នៅទីបំផុត ព្រះមហាក្សត្រខ្មែរ សម្តេចព្រះបរមនាថ សីហមុនី បានឡាយព្រះហស្តលេខាប្រកាសឱ្យប្រើប្រាស់ជាផ្លូវការច្បាប់ធម្មនុញ្ញស្ដីពីវិសោធនកម្មមាត្រា៣៣ ដើម្បីបើកផ្លូវឱ្យមានច្បាប់ដកសញ្ជាតិខ្មែរ។
ព្រះរាជក្រមដែលប្រកាសឱ្យប្រើច្បាប់ធម្មនុញ្ញស្ដីពីវិសោធនកម្មមាត្រា៣៣ នៃរដ្ឋធម្មនុញ្ញ ត្រូវបានព្រះមហាក្សត្រឡាយព្រះហស្តលេខាតាំងពីថ្ងៃទី១៥ ខែកក្កដា ឆ្នាំ២០២៥ មក ប៉ុន្តែទើបនឹងត្រូវបានផ្សព្វផ្សាយនៅថ្ងៃចន្ទដើមសប្តាហ៍នេះ ត្រូវបានបញ្ចូលខ្លឹមសារបន្ថែមពីលើមាត្រា៣៣ចាស់។
មាត្រា១ នៃព្រះរាជក្រមនេះ បានចែងថា មាត្រា៣៣ថ្មី មានសេចក្តីទាំងស្រុង ដូចតទៅ ប្រជាពលរដ្ឋខ្មែរមិនអាចត្រូវបាននិរទេស ឬចាប់បញ្ជូនខ្លួនទៅឱ្យប្រទេសក្រៅណាមួយឡើយ លើកលែងតែមានកិច្ចព្រមព្រៀងជាមួយគ្នាទៅវិញទៅមក។ ប្រជាពលរដ្ឋខ្មែរដែលកំពុងរស់នៅឯបរទេស ត្រូវបានរដ្ឋគាំពារ។ ការទទួលសញ្ជាតិខ្មែរ និងការបាត់សញ្ជាតិខ្មែរ ដោយរួមទាំងការដកសញ្ជាតិ ត្រូវកំណត់ក្នុងច្បាប់។
ច្បាប់ធម្មនុញ្ញស្ដីពីវិសោធនកម្មមាត្រា៣៣ ត្រូវបានធ្វើឡើងក្នុងរយៈពេលត្រឹមតែ ៥ថ្ងៃប៉ុណ្ណោះដោយគិតចាប់តាំងពីរដ្ឋសភាអនុម័តយល់ព្រមកាលពីថ្ងៃទី១១ កក្កដា មក។
សេចក្តីស្នើវិសោធនកម្មមាត្រា៣៣ នៃរដ្ឋធម្មនុញ្ញ ត្រូវបានរដ្ឋសភាអនុម័តយល់ព្រមដោយឯកច្ឆន្ទកាលពីថ្ងៃទី១១ កក្កដា ហើយក៏ត្រូវបញ្ជូនទៅព្រឹទ្ធសភាអនុម័តនៅថ្ងៃទី១៤ កក្កដា ដែលទទួលបានការគាំទ្រ ៥៨សំឡេងក្នុងចំណោមសមាជិកព្រឹទ្ធសភាចំនួន ៦០រូប និងត្រូវព្រះមហាក្សត្រឡាយព្រះហស្តលេខានៅថ្ងៃទី១៥ កក្កដា កន្លងទៅនេះ។ ដូច្នេះ ច្បាប់នេះបើគិតចាប់ពីថ្ងៃលោក ហ៊ុន សែន ប្រកាសឱ្យធ្វើវិសោធនកម្មកាលពីថ្ងៃទី២៧ ខែមិថុនា មក គឺមានរយៈពេលសរុបត្រឹមតែ ១៩ថ្ងៃប៉ុណ្ណោះ។
ជុំវិញបញ្ហានេះ មេដឹកនាំបក្សកាន់អំណាច លោក ហ៊ុន សែន ធ្លាប់បានបង្ហើបកាលពីថ្ងៃទី១៤ កក្កដា ថា មានខ្មែរមួយក្រុមកំពុងគប់គិតគ្នាជាមួយថៃ គ្រោងបង្កើតកម្លាំងវាយប្រហារកម្ពុជា ដូច្នេះបុគ្គលទាំងនោះកំពុងប្រព្រឹត្តអំពើក្បត់ជាតិ ហើយពួកគេក៏ជាគោលដៅនៃច្បាប់ដកសញ្ជាតិខ្មែរពីកំណើតនេះដែរ៕
© 2025, ឌឹ ខេមបូឌា ដេលី. All rights reserved.