នាយករដ្ឋមន្ត្រី ហ៊ុន ម៉ាណែត លើកឡើងថា តម្លៃកសិផលឡើងចុះមិនមែនកើតមានតែនៅកម្ពុជាទេ សូម្បីនៅប្រទេសផ្សេងក៏កើតមានដូចគ្នាដែរ ខណៈរដ្ឋាភិបាលមិនមានលទ្ធភាពដោះស្រាយគ្រប់បញ្ហាដែលកើតឡើងទាំងអស់បានឡើយ។
លោក ហ៊ុន ម៉ាណែត លើកឡើងក្នុងពិធីសម្ពោធអគារនៅមជ្ឈមណ្ឌលអតីតយុទ្ធជនប៊ុនរ៉ានីសែនជ័យដំណាក់ទ្រយឹង នៅថ្ងៃទី២០ ខែមករា ឆ្នាំ២០២៥ នេះថា ប្រទេសវៀតណាម អាមេរិក និងប្រទេសកូរ៉េខាងត្បូង ក៏មានការឡើងចុះតម្លៃកសិផលដែរ ដោយសារការឡើងចុះតម្លៃកសិផលនៅលើពិភពលោក។
លោក ហ៊ុន ម៉ាណែត លើកឡើងថា តម្លៃអង្ករកាលពីឆ្នាំមុនឡើងថ្លៃ ដោយសារកាលពីខែកក្កដា ឆ្នាំ២០២៣ ប្រទេសឥណ្ឌា បានផ្អាកការនាំចេញ ដែលធ្វើឱ្យមានការខ្វះខាតអង្ករនៅទូទាំងពិភពលោក ដូច្នេះហើយបានជាតម្លៃអង្ករឡើងថ្លៃ ប៉ុន្តែឆ្នាំនេះចាប់ពីខែកញ្ញា ឆ្នាំ២០២៤ មក ប្រទេសឥណ្ឌា បញ្ចេញអង្ករទៅកាន់ពិភពលោកឡើងវិញ ដូច្នេះហើយទើបនៅប្រទេសវៀតណាម ចាប់ផ្ដើមទម្លាក់តម្លៃអង្ករដើម្បីប្រកួតប្រជែងទីផ្សារ ទើបបណ្តាលឱ្យមានបញ្ហាតម្លៃស្រូវធ្លាក់ចុះបែបនេះ។
នាយករដ្ឋមន្ត្រីកម្ពុជារូបនេះបញ្ជាក់ថា វិស័យកសិកម្មនៅតែជាវិស័យអាទិភាពខ្ពស់សម្រាប់រាជរដ្ឋាភិបាលកម្ពុជាដដែល ហើយរាជរដ្ឋាភិបាលមិនដែលនៅស្ងៀមចំពោះបញ្ហាដែលកសិករប្រឈមនោះឡើយ ដូច្នេះហើយបានជារដ្ឋាភិបាលបញ្ចេញកញ្ចប់ថវិកា ១៥០លានដុល្លារ ដើម្បីជួយទិញស្រូវពីប្រជាកសិករ និងអំពាវនាវដល់គ្រឹះស្ថានហិរញ្ញវត្ថុនានា ផ្តល់កម្ចីការប្រាក់ទាបដល់រោងម៉ាស៊ីនកិនស្រូវក្នុងការទិញស្រូវពីកសិករផងដែរ។
កាលពីថ្ងៃទី១៣ ខែមករា ឆ្នាំ២០២៥ មានប្រជាពលរដ្ឋជាច្រើនរស់នៅភូមិព្រៃដំរី ឃុំព្រៃតូច ស្រុកមោងឫស្សី ខេត្តបាត់ដំបង បាននាំគ្នាចេញមកបិទផ្លូវជាតិលេខ៥ ដើម្បីធ្វើសកម្មភាពតវ៉ា ស្នើឱ្យក្រសួងកសិកម្ម រុក្ខាប្រមាញ់ និងនេសាទ ជួយដោះស្រាយបញ្ហាស្រូវដែលកំពុងធ្លាក់ចុះតម្លៃ។
កសិករទាំងនេះអះអាងថា តម្លៃស្រូវប្រភេទ អូអឹម (OM) របស់ពួកគេអាចទទួលបានតែចន្លោះពី ៧០០រៀលទៅ ៨០០រៀលប៉ុណ្ណោះក្នុង ១គីឡូក្រាម ហើយតម្លៃស្រូវក្នុងកម្រិតនេះមិនអាចទូទាត់នឹងថ្លៃចំណាយបានឡើយ គឺមានន័យថាកសិករត្រូវខាតដើមទាំងស្រុង ដែលជាហេតុធ្វើឲ្យពួកគេធ្លាក់ចូលក្នុងបំណុលជាមិនខាន។
ជុំវិញបញ្ហានេះ មន្ត្រីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទ មួយរូបប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី២០ មករា នេះថា សព្វថ្ងៃនេះ មិនមែនប្រជាពលរដ្ឋមិនចេះធ្វើកសិកម្មនោះទេ ប៉ុន្តែមកពីរដ្ឋាភិបាលមិនអាចធានានូវទីផ្សារកសិផល តម្លៃសម្ភារៈសម្រាប់ធ្វើកសិកម្ម និងហេដ្ឋារចនាសម្ព័ន្ធជាដើមតែប៉ុណ្ណោះ ទោះជារាជរដ្ឋាភិបាលបានពង្រាយមន្ត្រីកសិកម្មនៅតាមឃុំ-សង្កាត់ហើយក៏ដោយ។
មន្ត្រីជាន់ខ្ពស់នៃក្រសួងកសិកម្មដដែលនេះបញ្ជាក់ថា រដ្ឋាភិបាលគ្មានផែនការលើកស្ទួយវិស័យកសិកម្មឱ្យបានច្បាស់លាស់ និងឱ្យមាននិរន្តរភាពទេ ព្រោះកសិករនៅតែធ្វើស្រែពឹងលើមេឃ និងនាំចូលសម្ភារៈកសិកម្មពីប្រទេសវៀតណាម ដដែល ខណៈតម្លៃកសិផលដែលកសិករប្រមូលបាន គឺស្រេចតែនៅលើឈ្មួញជាអ្នកកំណត់ប៉ុណ្ណោះ។
គួររំឭកថា៖ ក្នុងទីផ្សារសេរី ផលិតផលអ្វីក៏ដោយ បើផលិតជន់ជោរ ចាក់ធារហួសសេចក្តីត្រូវការ តម្លៃផលិតផលនោះនឹងធ្លាក់ចុះ។ បើសេចក្តីត្រូវការមានច្រើនលើសលប់ លើសពីផលិតផល តម្លៃផលិតផលនឹងឡើងវិញ ហើយពេលហ្នឹងក៏ត្រូវប្រយ័ត្នចំពោះឈ្មួញដំឡើងថ្លៃផលិតផល ១ជា២ ជា៣ ដែរ។
មួយវិញទៀត បើទីផ្សារផលិតផលខ្មែរនៅរួមតូច សំអាងត្រឹមតែប្រទេសយៀកណាម ឬប្រទេសថៃ ដែលផលិតស្រូវ-អង្ករដូចយើងដែរនោះ ទោះជាស្រូវ-អង្ករខ្មែរល្អលើសគេយ៉ាងណាក៏ដោយ ក៏មិនបានថ្លៃដូចបំណងដែរ។ បើកសិករខ្មែរចំណាយទុនច្រើនធ្វើស្រែដាំស្រូវ កន្លែងខ្លះទិញតាំងពីទឹក តាំងពីជី តាំងពីថ្នាំបាញ់សត្វល្អិត គាត់មិនអាចលក់តម្លៃថោកបានឡើយ។ បរទេសជិតខាងក៏គេមិនចង់ឲ្យអង្ករខ្មែរដឹកចេញក្រៅលើសគេដែរ។ ដូច្នេះមានឈ្មួញដើរទិញស្កាត់មុន កំណត់ថ្លៃឲ្យកសិករខ្មែរ។ កសិករខ្មែរសុខចិត្តលក់ឲ្យឈ្មួញក្នុងស្រុក ពីព្រោះគាត់មិនដឹងទៅរកទីផ្សារខ្លួនឯងរបៀបដូចម្តេច ហើយក៏បានប្រាក់ទូទាត់ភ្លាមៗដែរ។
ទាំងអស់នេះជាភារកិច្ចរដ្ឋាភិបាល ដើម្បីជួយផលិតករក្នុងស្រុកពង្រីកទីផ្សារលើផលិតផលរបស់ខ្លួន ជួយរក្សាតម្លៃផលិតផលក្នុងស្រុកឲ្យមានតុល្យភាពជាមួយទំនិញបរទេស ព្យាយាមកំណត់ការនាំចូលផលិតផលពីបរទេសមកចាក់ធារក្នុងស្រុក ដែលនាំដល់ការបញ្ចុះតម្លៃផលិតផលក្នុងស្រុក។
បើប្រមុខរដ្ឋាភិបាលថាមិនដឹងធ្វើយ៉ាងម៉េច ទីណាក៏ដូចគ្នា កសិករខ្មែរនឹងស្លាប់ដោយសារគេទម្លាក់តម្លៃស្រូវ-អង្ករខ្លួន ថាមកពីគុណភាពមិនល្អ មិនស្មើនឹងគេ។
យោងតាមស្ថិតិពីការស្រាវជ្រាវ ផ្សាយក្នុងព្រឹត្តិបត្រ TENDATA នាខែសីហា ឆ្នាំ២០២៤ ប្រទេស១០ ដែលនាំស្រូវ-អង្ករចេញច្រើនជាងគេក្នុងពិភពលោក ប្រទេសកម្ពុជាស្ថិតនៅលំដាប់លេខ៨។ តាមលេខរៀងពី១ ដល់ ១០ គឺប្រទេសឥណ្ឌា ថៃឡង់ដ៍ យៀកណាម ប៉ាគីស្ថាន សហរដ្ឋអាមេរិក ចិន ភូមា កម្ពុជា ប្រេស៊ីល អ៊ុយរូហ្គាយ៕
© 2025, ឌឹ ខេមបូឌា ដេលី. All rights reserved.