សកម្មជនខ្មែរនៅសហរដ្ឋអាមេរិក អះអាងថា ទីក្រុងឡងប៊ិច នៃរដ្ឋកាលីហ្វ័រញ៉ា នៅតែជាទីកន្លែងមានសុវត្ថិភាពសម្រាប់ជនភៀសខ្លួនដែលគ្មានឯកសារស្របច្បាប់ ព្រោះក្រុមប្រឹក្សាក្រុងមួយនេះនឹងមិនអនុវត្តតាមជំហរប្រធានាធិបតីថ្មីសហរដ្ឋអាមេរិក លោក ដូណាល់ ត្រាំ ក្នុងការចាប់បញ្ជូនជនភៀសខ្លួនខុសច្បាប់ទៅប្រទេសពួកគេវិញឡើយ។
សកម្មជនក្នុងសហគមន៍ខ្មែរនៅទីក្រុងឡងប៊ិច លោក មួង ណារ៉េត លើកឡើងនៅថ្ងៃទី២៨ មករា នេះថា អាជ្ញាធរក្រុងឡងប៊ិច នឹងមិនសហការជាមួយរដ្ឋាភិបាលថ្នាក់ជាតិ ឬរដ្ឋាភិបាលសហព័ន្ធនៃរដ្ឋការលោក ដូណាល់ ត្រាំ បង្ហាញអត្តសញ្ញាណជនភៀសខ្លួនខុសច្បាប់ ដើម្បីឱ្យអាជ្ញាធរអាមេរិកាំងចាប់ពួកគេឡើយ។
លោក មួង ណារ៉េត អះអាងថា ការដែលអាជ្ញាធរក្រុងឡងប៊ិច ហ៊ានអនុវត្តផ្ទុយពីជំហរគោលនយោបាយប្រធានាធិបតីបែបនេះ ដោយសារតែក្រុងមួយនេះមានចំណូលគ្រប់គ្រាន់ដែលមានប្រមាណជា ៣៦០០លានដុល្លារអាមេរិកក្នុងមួយឆ្នាំ សម្រាប់ចំណាយលើដំណើរការរបស់ខ្លួន រាប់ចាប់តាំងពីប្រាក់បៀវត្សរ៍មន្ត្រីរដ្ឋការក្នុងនាយកដ្ឋានទាំងជាង ២០ ឡើងទៅ ដោយមិនចាំបាច់ពឹងផ្អែកលើថវិកាពីរដ្ឋបាលថ្នាក់ជាតិច្រើនឡើយ។
លោកបន្តថា ព្រោះតែក្រុងឡងប៊ិច មានចំណូលគ្រប់គ្រាន់បែបនេះហើយ ទើបមិនរងសម្ពាធពីរដ្ឋបាលថ្នាក់ជាតិ និងមានភាពឯករាជ្យម្ចាស់ការដោយខ្លួនឯង ប៉ុន្តែសម្រាប់ក្រុង និងរដ្ឋផ្សេងទៀតដែលពឹងលើថវិកាថ្នាក់ជាតិ គឺត្រូវតែអនុវត្តវិធានការចាប់បញ្ជូនជនភៀសខ្លួនខុសច្បាប់តាមជំហរប្រធានាធិបតីថ្មីនេះដាច់ខាត បើមិនដូច្នោះទេ រដ្ឋការសហព័ន្ធនៅរដ្ឋធានីវ៉ាស៊ីនតុន អាចនឹងកាត់ជំនួយ។
សកម្មជនខ្មែររូបនេះលើកឡើងថា ក្រៅពីរដ្ឋកាលីហ្វ័រញ៉ា និងរដ្ឋប្រមាណជា ១០ ផ្សេងទៀត គឺគ្មានសុវត្ថិភាពសម្រាប់ជនភៀសខ្លួនដែលរស់នៅលើទឹកដីសហរដ្ឋអាមេរិកដោយគ្មានឯកសារស្របច្បាប់នោះទេ ក្នុងនោះ ទីក្រុងនៃរដ្ឋខ្លះបានចាប់ផ្តើមលុបច្បាប់ការពារជនភៀសខ្លួនដែលគ្មានឯកសារស្របច្បាប់ជាបណ្តើរៗហើយ ខណៈយុទ្ធនាការចាប់ខ្លួនក៏បានចាប់ផ្តើមអនុវត្តទ្រង់ទ្រាយធំដែរនៅពេលនេះដែរ។
សកម្មជនខ្មែរក្រុងឡងប៊ិច រូបនេះគូសបញ្ជាក់ថា រដ្ឋាភិបាលប្រទេសកម្ពុជាប្រាកដជាទទួលយកជនភៀសខ្លួនដែលគ្មានឯកសារស្របច្បាប់ នៅពេលដែលសហរដ្ឋអាមេរិកចាប់បញ្ជូនត្រឡប់ទៅស្រុកខ្មែរវិញដោយដៃពីរ ដើម្បីជាការដោះដូរកុំឱ្យសហរដ្ឋអាមេរិកដាក់ទណ្ឌកម្មលើខ្លួន ព្រោះតែការបដិសេធមិនទទួលយកអ្នកត្រូវបានចាប់បញ្ជូនខ្លួនទាំងនោះ។
លោក មួង ណារ៉េត សង្កត់ធ្ងន់ថា ទោះជាទីក្រុងឡងប៊ិច ជាទីក្រុងសុខសាន្តសម្រាប់ជនភៀសខ្លួនខុសច្បាប់ក៏ដោយ ប៉ុន្តែអ្នកទាំងនោះត្រូវស្វែងយល់បន្ថែមទៀតដើម្បីកុំឱ្យអត្តសញ្ញាណរបស់គេត្រូវបានកំណត់គោលដៅដោយអាជ្ញាធរថ្នាក់ជាតិ ព្រោះអាជ្ញាធរក្រុងឡងប៊ិច គ្រាន់តែមិនសហការបង្ហាញអត្តសញ្ញាណអ្នកខុសច្បាប់ប៉ុណ្ណោះ ប៉ុន្តែបើអាជ្ញាធរថ្នាក់ជាតិដឹង ហើយចាប់ខ្លួននោះ អាជ្ញាធរក្រុងឡងប៊ិច ក៏មិនអាចជួយបានដែរ។
កាលពីថ្ងៃទី២០ ខែមករា ឆ្នាំ២០២៥ ប្រធានាធិបតីសហរដ្ឋអាមេរិក លោក ដូណាល់ ត្រាំ សម្រេចផ្អាកទទួលយកជនភៀសខ្លួនក្នុងរយៈពេល ៩០ថ្ងៃ ដោយគិតចាប់តាំងពីថ្ងៃទី២៧ ខែមករា ឆ្នាំ២០២៥ នេះតទៅ ក្នុងនោះមិនមែនមានតែជនអន្តោប្រវេសន៍ដែលស្ថិតក្នុងការតាមប្រមាញ់ពីរដ្ឋបាលដែលលោកដឹកនាំនោះទេ សូម្បីជនភៀសខ្លួននយោបាយដែលលោក ដូណាល់ ត្រាំ គិតថាជាបន្ទុកលើសហរដ្ឋអាមេរិក ក៏លោកមិនស្វាគមន៍ដែរ។
ជនភៀសខ្លួនដែលកំពុងរស់នៅលើទឹកដីសហរដ្ឋអាមេរិកក្នុងពេលបច្ចុប្បន្ននេះ មានជាង ១៧០ប្រទេសនៅលើពិភពលោក ទាំងជនភៀសខ្លួនដែលគ្មានឯកសារគ្រប់គ្រាន់ និងជនភៀសខ្លួនដែលស្របច្បាប់៕
© 2025, ឌឹ ខេមបូឌា ដេលី. All rights reserved.