សារព័ត៌មាន The Moscow Times ផ្សាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បង្ហាញជំហរចង់ចរចាជាមួយមេដឹកនាំប្រទេសអ៊ុយក្រែន ដែលលោក ពូទីន ថាអាចទៅរួច ប៉ុន្តែមិនមែនជាមួយប្រធានាធិបតីលោក វូឡូឌីមៀ ហ្សេឡេនស្គី នោះទេ។
លោក ពូទីន បានថ្លែងដូចនេះជាមួយនឹងអ្នកសារព័ត៌មាននៃក្រុមទូរទស្សន៍រដ្ឋរុស្ស៊ី Pavel Zarubin កាលពីថ្ងៃអង្គារ ទី២៨ មករា។
លោក ពូទីន បាននិយាយថា ប្រសិនបើលោក ហ្សេឡេនស្គី ចង់ចូលរួមក្នុងកិច្ចចរចានឹងរូបលោកផ្ទាល់ នឹងមិនអាចទៅរួចទេ ព្រោះលោក ហ្សេឡេនស្គី ពុំអាចជាមេដឹកនាំស្របច្បាប់នៃប្រជាជនអ៊ុយក្រែន ទៀតទេ។
ប្រធានាធិបតីរុស្ស៊ីរូបនេះបានបញ្ជាក់ថា បើប្រទេសអ៊ុយក្រែន ពិតជាមានបំណងចង់ចរចាស្វែងរកការព្រមព្រៀងគ្នាដោយប្រាកដប្រជាមែននោះ អ៊ុយក្រែនត្រូវមានមេដឹកនាំថ្មីជំនួសលោក ហ្សេឡេនស្គី ប៉ុន្តែជាមួយគ្នានេះ បុរសខ្លាំងនៅក្រុងមូស្គូ បន្តថា សង្គ្រាមដែលកំពុងបន្តអូសបន្លាយនៅអ៊ុយក្រែន មុខជានឹងចប់ក្នុងរយៈពេលត្រឹម ២ខែ ឬឆាប់ជាងនេះទៅទៀត ប្រសិនបើក្រុមបស្ចិមប្រទេសឈប់ផ្តល់ការគាំទ្រដល់ទីក្រុងគៀវ តទៅទៀត។
ក្នុងបទសម្ភាសន៍ជាមួយទូរទស្សន៍រដ្ឋរុស្ស៊ី លោក ពូទីន ថាអ៊ុយក្រែន នឹងមិនមានលទ្ធភាពតស៊ូប្រយុទ្ធបានយូរទៀតឡើយ សូម្បីតែត្រឹម ១ខែក៏មិនបានដែរ ប្រសិនបើលែងទទួលបានការគាំទ្រហិរញ្ញវត្ថុ និងសព្វាវុធពីលោកខាងលិច។ លោកបញ្ជាក់ថា យ៉ាងតិចត្រឹម ១ខែកន្លះ ឬក៏ ២ខែប៉ុណ្ណោះ សង្គ្រាមត្រូវតែបញ្ចប់។
ប្រតិកម្មទៅនឹងការលើកឡើងពីប្រធានាធិបតីរុស្ស៊ី តាមរយៈសារក្នុងបណ្ដាញសង្គម X ប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី បានចំអកថា លោក ពូទីន ភ័យខ្លាចចំពោះការចរចាដើម្បីបញ្ចប់សង្គ្រាមឈ្លានពាននៅប្រទេសអ៊ុយក្រែន ទើបលោក ពូទីន ច្រានចោលលទ្ធភាពជួបនិយាយគ្នាដោយផ្ទាល់ជាមួយរូបលោកឋានៈជាប្រធានាធិបតីអ៊ុយក្រែន។
សង្គ្រាមដែលមានរយៈពេលជិត ៣ឆ្នាំមកហើយនោះ នៅតែមិនទាន់មានសញ្ញាថាគូបដិបក្ខច្បាំងគ្នាទាំងសងខាងបន្ធូរដៃប្រយុទ្ធគ្នានៅឡើយទេ។
ប្រធានាធិបតីសហរដ្ឋអាមេរិក លោក ដូណាល់ ត្រាំ កំពុងដាក់សម្ពាធឱ្យភាគីទាំងពីរស្វែងរកទីបញ្ចប់សង្គ្រាម។ លោក ត្រាំ បានអះអាងថា លោក ហ្សេឡេនស្គី បានបង្ហាញបំណងចង់ចរចាឱ្យបានកិច្ចព្រមព្រៀងមួយ ដើម្បីបញ្ចប់សង្គ្រាម ខណៈលោក ត្រាំ ថាលោកកំពុងត្រៀមជួបលោក ពូទីន ព្រោះមេដឹកនាំវិមានក្រឹមឡាំង បានបង្ហាញពីការត្រៀមលក្ខណៈរួចរាល់ ដើម្បីជួបគ្នាជជែកអំពីបញ្ហាអ៊ុយក្រែន។
កាលពីសប្ដាហ៍មុននេះ ទីប្រឹក្សាលោក ត្រាំ ម្នាក់ដែលជាបេសកជនសម្រាប់ប្រទេសអ៊ុយក្រែន និងរុស្ស៊ី គឺលោក Keith Kellogg បានបង្ហើបថា លោក ត្រាំ ចង់ជួយធ្វើឱ្យសង្គ្រាមនៅអ៊ុយក្រែន អាចបិទបញ្ចប់ក្នុងរយៈពេល ១០០ថ្ងៃដំបូងក្នុងឆ្នាំទី១ នៃអាណត្តិ ៤ឆ្នាំរបស់លោក។
ប៉ុន្តែអតីតឧត្ដមសេនីយ៍ឯកកងឆត្រយោងអាមេរិកាំងរូបនេះព្រមានថា បើលោក ពូទីន និងរុស្ស៊ី ក្លាយជាឧបសគ្គនៃការចរចា គឺជាការបង្ខំឱ្យរដ្ឋការលោក ត្រាំ បន្ថែមទណ្ឌកម្មទៅលើរុស្ស៊ី ថែមទៀត ហើយក៏បន្ថែមការផ្ដល់អាវុធទៅឱ្យអ៊ុយក្រែន ថែមទៀតដែរ។
ដំណាលពេលដែលគេមើលឃើញថាលោក ពូទីន កំពុងរកលេសគេចពីការចរចា ដោយសំអាងថាមិនចង់ជួបលោក ហ្សេឡេនស្គី នឹងនាំឱ្យមានការព្រមានថាការចរចាអាចនឹងបរាជ័យពីអគ្គលេខាធិការអង្គការណាតូ (NATO) លោក Mark Rutte។ លោកបានអំពាវនាវឱ្យប្រទេសជាសមាជិក បង្កើនការចំណាយលើវិស័យការពារជាតិឱ្យលើសពីគោលដៅ ២% នៃផលិតផលក្នុងស្រុកសរុប។ លោកបានបញ្ជាក់ថា គោលដៅនេះត្រូវបានកំណត់តាំងពី ១០ឆ្នាំមុនរួចទៅហើយ។
ការអំពាវនាវពីលោក Mark Rutte បើទោះបីជាបង្ហាញអំពីការប្ដេជ្ញាចិត្តក្នុងសម្ព័ន្ធភាពណាតូ ក្នុងការពង្រឹងសមត្ថភាពការពារជាតិ និងទប់ទល់នឹងការគំរាមកំហែងពីសំណាក់រុស្ស៊ី ក៏ដោយ ក៏លោកបានជំរុញឱ្យប្រទេសជាសមាជិកបង្កើនការចំណាយលើវិស័យការពារជាតិ ដើម្បីធានាសន្តិសុខ និងស្ថិរភាពនៅក្នុងតំបន់អឺរ៉ុប និងអាត្លង់ទិច ជាមួយនឹងបង្កើនជំនួយយោធាថែមទៀតទៅឱ្យអ៊ុយក្រែន។
ដោយឡែករដ្ឋមន្ត្រីការបរទេសរុស្ស៊ី លោក Sergei Lavrov បានប្រកាសថា លោកមិនឃើញមានសញ្ញាណាមួយដែលបង្ហាញថា អ៊ុយក្រែន និងលោកខាងលិច បានត្រៀមខ្លួនរួចរាល់សម្រាប់កិច្ចចរចារកសន្តិភាពនោះទេ ទោះជាមានការនិយាយកាន់តែខ្លាំងអំពីតម្រូវការសម្រាប់កិច្ចចរចារកសន្តិភាពក៏ដោយ។
លោក Lavrov បានបញ្ជាក់ថា ការផ្គត់ផ្គង់អាវុធ និងការដាក់ទណ្ឌកម្មពីលោកខាងលិច បង្ហាញថាពួកគេមិនចង់បញ្ចប់សង្គ្រាមនៅឡើយទេ។ ទន្ទឹមគ្នានេះ លោកប្រមុខការទូតរុស្ស៊ី ក៏បានលើកឡើងពីបញ្ហាភាពស្របច្បាប់នៃរដ្ឋាភិបាលលោក ហ្សេឡេនស្គី និងលោក ហ្សេឡេនស្គី ផ្ទាល់ ពីព្រោះរដ្ឋាភិបាលលោក ហ្សេឡេនស្គី បានអស់ភាពស្របច្បាប់ អស់អាណត្តិតាំងពីខែឧសភា ទៅហើយនោះ។
ប្រទេសអ៊ុយក្រែន ត្រូវធ្វើការបោះឆ្នោតប្រធានាធិបតីអាណត្តិថ្មីនៅអំឡុងខែឧសភា ឆ្នាំ២០២៤ តែត្រូវបានសភាជាតិប្រទេសអ៊ុយក្រែន លើកពេលវេលាទៅមុខទៀត ដោយសារតែប្រទេសស្ថិតក្នុងសង្គ្រាម៕
© 2025, ឌឹ ខេមបូឌា ដេលី. All rights reserved.