 លើអតីតប្រធានាធិបតីហ្វីលីពីន លោក Rodrigo Duterte នៅពេលនេះជាសញ្ញាមួយបញ្ជាក់ថា បើអតីតមេដឹកនាំបក្សកាន់អំណាចលោក ហ៊ុន សែន នៅតែប្រព្រឹត្តអំពើឧក្រិដ្ឋលើបក្សប្រឆាំងទៀតនោះ វាសនារបស់គាត់នឹងដូចប្រធានាធិបតីហ្វីលីពីន ដែរ។){kind=link}
តំណាងរាស្ត្របក្សប្រឆាំង ព្រមានថា ចំណាត់ការពីតុលាការព្រហ្មទណ្ឌអន្តរជាតិ (International Criminal Court, ICC) លើអតីតប្រធានាធិបតីហ្វីលីពីន លោក Rodrigo Duterte នៅពេលនេះជាសញ្ញាមួយបញ្ជាក់ថា បើអតីតមេដឹកនាំបក្សកាន់អំណាចលោក ហ៊ុន សែន នៅតែប្រព្រឹត្តអំពើឧក្រិដ្ឋលើបក្សប្រឆាំងទៀតនោះ វាសនារបស់គាត់នឹងដូចប្រធានាធិបតីហ្វីលីពីន ដែរ។
មន្ត្រីជាន់ខ្ពស់គណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី១១ មីនា នេះថា បើលោក ហ៊ុន សែន មិនចង់មានវាសនាដូចលោក Rodrigo Duterte គាត់ត្រូវតែឈប់ប្រព្រឹត្តអំពើឧក្រិដ្ឋផ្សេងៗលើបក្សប្រឆាំង លើសកម្មជនសង្គម សកម្មជននយោបាយ និងសកម្មជនសិទ្ធិមនុស្សចាប់ពីពេលនេះតទៅ ជាពិសេសត្រូវបញ្ឈប់អំពើឃាតកម្មក្រៅប្រព័ន្ធច្បាប់តែម្តង។
ត្រង់ចំណុចនេះ សាលាច្បាប់គេបង្រៀនថា តុលាការចោទប្រកាន់លើជនសង្ស័យទាក់ទងតែបទល្មើសឧក្រិដ្ឋខ្លួនប្រព្រឹត្តនាពេលកន្លងទៅ ពោលគឺពេលអតីតកាលក្នុងកាលបញ្ញត្តិជាធរមានប៉ុណ្ណោះ ទោះជាជនល្មើសឈប់ប្រព្រឹត្តនៅពេលនេះក៏ដោយក្តី។
លោក អ៊ុំ សំអាន លើកឡើងថា រយៈពេលក្តោបក្តាប់អំណាចជាង ៤០ឆ្នាំមកនេះ លោក ហ៊ុន សែន បានជាប់ពាក់ព័ន្ធនឹងអំពើឧក្រិដ្ឋកម្មជាច្រើន ដូចជា ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្គ្រាម ឧក្រិដ្ឋកម្មឈ្លានពាន និងឧក្រិដ្ឋកម្មបែបភេរវកម្មរដ្ឋ ឬឧក្រិដ្ឋកម្មបែបបណ្ដាញ ជាដើម ដើម្បីតែការពារអំណាចដែលកំពុងកាន់កាប់ផ្ដាច់មុខដោយគ្រួសាររបស់គាត់សព្វថ្ងៃនេះ។
មន្ត្រីបក្សប្រឆាំងរូបនេះបញ្ជាក់ថា លោក ហ៊ុន សែន គឺជាមនុស្សតែម្នាក់គត់ដែលបានជាប់ពាក់ព័ន្ធនឹងឧក្រិដ្ឋកម្មសង្គ្រាមអំឡុងពេលធ្វើរដ្ឋប្រហារឆ្នាំ១៩៩៧ និងនៅពីក្រោយនៃការសម្លាប់មនុស្សល្បីៗក្រៅប្រព័ន្ធច្បាប់ជាច្រើននាក់ទៀត ហើយភស្តុតាងនៃអំពើឧក្រិដ្ឋទាំងនោះ សុទ្ធតែមាននៅក្នុងដៃរបស់តុលាការអន្តរជាតិទាំងអស់។
នៅថ្ងៃទី១១ ខែមីនា ឆ្នាំ២០២៥ នេះ អតីតប្រធានាធិបតីហ្វីលីពីន លោក Rodrigo Duterte ត្រូវបានឃាត់ខ្លួនពីបទឧក្រិដ្ឋកម្មប្រឆាំងមនុស្សជាតិតាមដីការបស់តុលាការព្រហ្មទណ្ឌអន្តរជាតិ (ICC) ក្រោយពេលដែលលោកបានធ្វើដំណើរទៅដល់អាកាសយានដ្ឋានអន្តរជាតិក្នុងទីក្រុងម៉ានីល ប្រទេសហ្វីលីពីន។
តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនលោក Duterte ពីបទសង្ស័យឧក្រិដ្ឋកម្មប្រឆាំងមនុស្សជាតិជុំវិញការសម្លាប់មនុស្សរាប់ពាន់នាក់ដែលពាក់ព័ន្ធនឹងការបង្ក្រាបគ្រឿងញៀនក្នុងពេលលោកកាន់អំណាចជាប្រធានាធិបតីរបស់ប្រទេសហ្វីលីពីន កាលពីអំឡុងឆ្នាំ២០១៦ កន្លងទៅ។
ក្នុងអំឡុងពេលកាន់តំណែងជាប្រធានាធិបតី លោក Duterte បានដឹកនាំយុទ្ធនាការបង្ក្រាបគ្រឿងញៀនខុសច្បាប់យ៉ាងខ្លាំងក្លាបំផុតដែលត្រូវគេហៅថា «សង្គ្រាមប្រឆាំងគ្រឿងញៀន» ក្នុងនោះ លោក Duterte បានបញ្ជាឲ្យមន្ត្រីប៉ូលិសសម្លាប់ជនសង្ស័យគ្រឿងញៀនជាង ៦០០០នាក់ក្រោមយុទ្ធនាការនេះថែមទៀត។
ទោះជាយ៉ាងណាក៏ដោយ ដីកាចាប់ខ្លួនពីតុលាការឧក្រិដ្ឋកម្មអន្តរជាតិ អនុវត្តមានប្រសិទ្ធភាពតែល្គឹកណាមានកិច្ចសហប្រតិបត្តិការពេញលេញពីប្រទេសជាសមាជិកប៉ុណ្ណោះ។ បើនាយករដ្ឋមន្ត្រី ហ៊ុន ម៉ាណែត ការពារឪពុក មិនចូលរួមធ្វើសហការជាមួយ ICC នោះការចាប់ខ្លួនបញ្ជូនទៅវិនិច្ឆ័យទោសនាទីក្រុងឡាអេ ក៏នៅតែជាការលំបាកដដែល ពីព្រោះអង្គការសហប្រជាជាតិពឹងតែលើកម្លាំងមានសមត្ថកិច្ចប្រទេសនីមួយៗជួយអនុវត្តដីកាតុលាការតែប៉ុណ្ណោះ៕
© 2025, ឌឹ ខេមបូឌា ដេលី. All rights reserved.