មន្ត្រីជាន់ខ្ពស់បក្សប្រឆាំងលើកឡើងថា អ្នកដែលបង្កើតព័ត៌មានក្លែងក្លាយភូតកុហកពលរដ្ឋ និងបំពុលសង្គមខ្មែរសព្វថ្ងៃនេះ គ្មានអ្នកណាអាចធ្វើបានក្រៅពីរដ្ឋាភិបាលដែលកំពុងគ្រប់គ្រងដោយត្រកូលហ៊ុនឡើយ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី១ មេសា នេះថា ការផ្សព្វផ្សាយពីបញ្ហានានាពីសំណាក់ពលរដ្ឋលើបណ្ដាញសង្គម បានកើតមាននៅគ្រប់ទីកន្លែង ដូច្នេះ ការលើកឡើងពីបញ្ហា និងការទាមទារឱ្យរដ្ឋាភិបាលរកដំណោះស្រាយសម្រាប់ពលរដ្ឋរងគ្រោះ មិនមែនដើម្បីញុះញង់ឱ្យពលរដ្ឋស្អប់រដ្ឋាភិបាលនោះទេ ប៉ុន្តែគឺដើម្បីឱ្យរដ្ឋាភិបាលរកដំណោះស្រាយជូនពលរដ្ឋដែលកំពុងមានបញ្ហាប៉ុណ្ណោះ។
លោក អ៊ុំ សំអាន លើកឡើងថា អ្នកដែលគេចវេះមិនដោះស្រាយបញ្ហាជូនពលរដ្ឋដោយយកលេសចោទក្រុមប្រឆាំងដែលទាមទារឱ្យរដ្ឋាភិបាលរកដំណោះស្រាយបញ្ហាជូនពលរដ្ឋទៅវិញទេ ជាអ្នកដែលបង្កើតព័ត៌មានក្លែងក្លាយនោះ ព្រោះពួកគេមានបំណងលាក់បាំងអំពើទុច្ចរិតរបស់ខ្លួន។
ក្នុងសន្និសីទសារព័ត៌មានស្ដីពីការអនុវត្តយុទ្ធនាការ «និយាយថាទេចំពោះព័ត៌មានក្លែងក្លាយ» កាលពីថ្ងៃទី៣១ ខែមីនា ឆ្នាំ២០២៥ រដ្ឋមន្ត្រីក្រសួងព័ត៌មាន លោក នេត្រ ភក្ដ្រា លើកឡើងថា ក្រុមជនអគតិមួយចំនួនដែលនៅក្រៅប្រទេស កំពុងនាំគ្នាបង្កើតព័ត៌មានក្លែងក្លាយ ដើម្បីញុះញង់ និងបញ្ឆេះកំហឹងឲ្យពលរដ្ឋស្អប់ខ្ពើមជាតិសាសន៍ខ្លួនឯង និងរដ្ឋាភិបាលផងដែរ។
រដ្ឋមន្ត្រីក្រសួងព័ត៌មានរូបនេះបញ្ជាក់ថា អ្វីដែលជាចរិតពិតប្រាកដនៃការបង្កើតព័ត៌មានក្លែងក្លាយរបស់ក្រុមប្រឆាំងទាំងនោះ គឺពួកគេចង់បញ្ឆេះកំហឹងពលរដ្ឋឱ្យធ្វើបដិវត្តន៍ពណ៌ដើម្បីផ្តួលរំលំរដ្ឋាភិបាលប៉ុណ្ណោះ។
យ៉ាងណាក៏ដោយ មជ្ឈមណ្ឌលសិទ្ធិមនុស្សកម្ពុជា (CCHR) បានចេញផ្សាយរបាយការណ៍របស់ខ្លួនកាលពីចុងឆ្នាំ២០២៤ កន្លងទៅថា សិទ្ធិសេរីភាពសារព័ត៌មាន និងសិទ្ធិទទួលព័ត៌មានក្នុងប្រទេសកម្ពុជា នៅតែរងនូវការវាយប្រហារធ្ងន់ធ្ងរពីរដ្ឋាភិបាលនៅឡើយ។
ចំណែកអង្គការអ្នកសារព័ត៌មានគ្មានព្រំដែន (RSF) បានចេញផ្សាយពីសន្ទស្សន៍សេរីភាពសារព័ត៌មានរបស់កម្ពុជា ថា ប្រទេសកម្ពុជាជាប់ចំណាត់ថ្នាក់លេខ១៥១ សម្រាប់ឆ្នាំ២០២៤ ដោយសារតែគេរកឃើញថា រដ្ឋាភិបាលកម្ពុជាបានវាយប្រហារ និងគាបសង្កត់លើសិទ្ធិសេរីភាពសារព័ត៌មានឥតស្រាកស្រាន្ត៕
© 2025, ឌឹ ខេមបូឌា ដេលី. All rights reserved.