អ្នកតាមដានស្ថានការណ៍នយោបាយក្នុងប្រទេសកម្ពុជា ចាត់ទុកការគំរាមកំហែងងើបមួយវ៉ៃមួយពីសំណាក់លោក ហ៊ុន សែន និងការអំពាវនាវឱ្យពលរដ្ឋងើបទាំងអស់វ៉ៃលោក ហ៊ុន សែន តែម្នាក់ពីសំណាក់លោក សម រង្ស៊ី សុទ្ធតែជាជំហរនយោបាយបំផ្លាញសុខដុមរមនារបស់កម្ពុជាទាំងអស់។
អ្នកឃ្លាំមើលសង្គម លោក វ៉ន ចាន់ឡូត លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១ មេសា នេះថា ពាក្យថាងើបមួយវ៉ៃមួយ គឺជាសារនយោបាយគំរាមដោយត្រង់ទៅកាន់ពលរដ្ឋ ហើយការអនុវត្តជំហរនយោបាយបែបនេះ អ្នកដែលរងទុក្ខពិតប្រាកដ គឺពលរដ្ឋតែម្តង ជាពិសេសពលរដ្ឋដែលអនុវត្តសិទ្ធិបញ្ចេញមតិដូចដែលបានចែងក្នុងច្បាប់នាពេលកន្លងមក។
លោក វ៉ន ចាន់ឡូត បន្ថែមថា ចំណែកការប្រកាសជំហរនយោបាយផ្តួលរំលំរបស់លោក សម រង្ស៊ី គឺជារឿងដែលមិនអាចទៅរួចជាដាច់ខាត ព្រោះលោក ហ៊ុន សែន បានក្តោបក្តាប់កម្លាំងកងទ័ព និងក្រុមនាយទុន ដូចជា ក្រុមឧកញ៉ា ជាដើម យ៉ាងណែនពេញដៃទៅហើយ ដូច្នេះជំហរនយោបាយក្នុងការប្រកាសផ្តួលរំលំបក្សកាន់អំណាច គឺគ្មានពន្លឺឡើយ ទោះប្រទេសមួយចំនួនធ្លាប់អនុវត្តផែនការនេះទទួលបានជោគជ័យក៏ដោយ ក៏មិនប្រាកដថាកម្ពុជាអាចជោគជ័យដូចប្រទេសទាំងនោះទេ។
អ្នកឃ្លាំមើលសង្គមរូបនេះបញ្ជាក់ថា ដោយយោងតាមរបបនយោបាយរបស់កម្ពុជាដែលប្រកាន់យករបបប្រជាធិបតេយ្យ សេរីពហុបក្ស អាចឆ្លុះបញ្ចាំងឱ្យឃើញកាន់តែច្បាស់ថា ការគំរាមងើបមួយវ៉ៃមួយ និងការអំពាវនាវឱ្យផ្តួលរំលំ គឺជាជំហរនយោបាយដែលប្រាសចាកពីរដ្ឋធម្មនុញ្ញរបស់កម្ពុជា ដែលមានចែងទាំងស្រុង។
លោក វ៉ន ចាន់ឡូត បញ្ជាក់ថា ពលរដ្ឋគឺជាម្ចាស់សិទ្ធិ ម្ចាស់អំណាច ម្ចាស់វាសនារបស់ប្រទេសជាតិ ខណៈអ្នកដឹកនាំដែលកើតចេញពីការបោះឆ្នោត ត្រូវដឹកនាំដើម្បីបំពេញសេចក្តីត្រូវការរបស់ពលរដ្ឋ នោះទើបជាកាតព្វកិច្ចដែលពួកគេម្នាក់ៗត្រូវតែធ្វើ។
កាលពីចុងខែមីនា ឆ្នាំ២០២៥ អតីតនាយករដ្ឋមន្ត្រីកម្ពុជា លោក ហ៊ុន សែន គំរាមបន្តកម្ទេចក្រុមប្រឆាំងឥតឈប់ឈររហូតទាល់តែអស់ពីទឹកដីខ្មែរ។ ជាងនេះទៀត ការអនុវត្តជំហរនយោបាយងើបមួយវ៉ៃមួយ ក៏លោកនៅតែបន្តអនុវត្តដូចមុនដែរ។
ចំណែកលោក សម រង្ស៊ី ក្នុងរយៈពេលចុងក្រោយនេះ ក៏ប្រកាសជំហរនយោបាយផ្តួលរំលំរដ្ឋាភិបាលដែលកំពុងដឹកនាំដោយគណបក្សប្រជាជនកម្ពុជា ជាបន្តបន្ទាប់ដែរ ក្រោមយុទ្ធសាស្ត្រផ្ការីក ដែលត្រូវអនុវត្តដោយចលនាជាតិតស៊ូ ជាចលនាដែលទើបបង្កើតឡើងកាលពីពេលថ្មីៗនេះ៕
© 2025, ឌឹ ខេមបូឌា ដេលី. All rights reserved.