យោងតាមទីភ្នាក់ងារសារព័ត៌មាន Reuters កាលពីថ្ងៃចន្ទ ទី២១ ខែមេសា ទីក្រុងប៉េកាំង បានព្រមានអូសសំណុំរឿងសង្គ្រាមពន្ធគយរបស់លោក ដូណាល់ ត្រាំ ទៅបើកសវនាការនៅក្រុមប្រឹក្សាសន្តិសុខអង្គការសហប្រជាជាតិ ក្នុងគោលបំណងឱ្យស្ថាប័នរបស់អង្គការពិភពលោកមួយនេះជួយដោះស្រាយសង្គ្រាមពាណិជ្ជកម្មដែលកំពុងផ្ទុះឡើងដ៏ខ្លាំងរវាងទីក្រុងវ៉ាស៊ីនតោន និងទីក្រុងប៉េកាំង ហើយវាបានរាលដាលពាសពេញពិភពលោក។
នៅពេលនេះ ប្រទេសសេដ្ឋកិច្ចធំទី១ និងទី២ នេះ បានបង្កើនការដំឡើងពន្ធវាយប្រហារគ្នាយ៉ាងធ្ងន់ធ្ងរ។ រដ្ឋការលោក ដូណាល់ ត្រាំ បានដំឡើងពន្ធលើទំនិញនាំចូលទីផ្សារសហរដ្ឋអាមេរិកដល់ទៅ ១៤៥% ហើយទីក្រុងប៉េកាំង វាយបកវិញដោយដំឡើងពន្ធលើទំនិញអាមេរិកចូលប្រទេសចិន ក្នុងអត្រា ១២៥%។
គេសង្កេតឃើញចំហាយនៃសង្គ្រាមពាណិជ្ជកម្មរបស់លោក ដូណាល់ ត្រាំ កំពុងជះផលវិបាកខ្លាំងដល់ប្រទេសកំពុងអភិវឌ្ឍដែលមានចំណូលទាប។
ក្រសួងពាណិជ្ជកម្មចិន បានប្រកាសថា ទីក្រុងប៉េកាំង នៅតែប្ដេជ្ញាចិត្តការពារផលប្រយោជន៍សេដ្ឋកិច្ចរបស់ខ្លួន ដោយទាមទារឱ្យអាមេរិកទៅតតាំងក្ដីនៅក្រុមប្រឹក្សាសន្តិសុខអង្គការសហប្រជាជាតិ ដែលរំពឹងថាស្ថាប័ននេះនឹងកោះប្រជុំសមាជិក ១៥ប្រទេសរបស់ខ្លួននៅពេលឆាប់ៗនេះ។
ទីក្រុងប៉េកាំង បានចោទសហរដ្ឋអាមេរិកក្រោមរដ្ឋការលោក ដូណាល់ ត្រាំ ថាកំពុងធ្វើវិច្ឆេទកម្មសេដ្ឋកិច្ចពិភពលោក។
ជាមួយគ្នានេះ ទីក្រុងប៉េកាំង ក៏បានចេញសារជំរុញប្រទេសកូនបំណុលរបស់ខ្លួនទាំងអស់ត្រូវហ៊ានងើបឡើងប្រឆាំងនឹងការចុះកិច្ចព្រមព្រៀងពាណិជ្ជកម្មណាមួយជាមួយសហរដ្ឋអាមេរិក ដែលធ្វើយ៉ាងណាជួយការពារផលប្រយោជន៍សេដ្ឋកិច្ចរបស់ចិន។
ទីក្រុងប៉េកាំង លើកឡើងថា រាល់ការចុះកិច្ចព្រមព្រៀងពាណិជ្ជកម្មជាមួយអាមេរិក ត្រូវតែជួយការពារផលប្រយោជន៍របស់ខ្លួនដោយមិនត្រូវទន់ជំហរនឹងសហរដ្ឋអាមេរិកនោះទេ។
ក្រសួងពាណិជ្ជកម្មចិន ព្រមានថា ក្រុងប៉េកាំង នឹងចាត់វិធានការវាយបកក្នុងករណីដែលប្រទេសណាមួយចុះកិច្ចព្រមព្រៀងពាណិជ្ជកម្មជាមួយអាមេរិក ដែលធ្វើឱ្យខូចផលប្រយោជន៍សេដ្ឋកិច្ចរបស់ចិន។
សេចក្ដីថ្លែងការណ៍របស់ក្រសួងការបរទេសចិន បានហៅសង្គ្រាមពាណិជ្ជកម្មរបស់សហរដ្ឋអាមេរិក កំពុងធ្វើចលាចលសេដ្ឋកិច្ចពិភពលោក និងជាការបំពានធ្ងន់ធ្ងរច្បាប់ពាណិជ្ជកម្មអន្តរជាតិ។
វិធានការពាណិជ្ជកម្មរបស់សហរដ្ឋអាមេរិក បាននាំមកនូវការប្រែប្រួលមិនធ្លាប់មាន។
ទីភ្នាក់ងារសារព័ត៌មាន AFP បានចុះផ្សាយថា ឧស្សាហកម្មដឹកជញ្ជូនពិភពលោកកំពុងធ្លាក់ក្នុងភាពចលាចលដោយសារទំនិញដែលត្រូវដឹកចេញទៅកាន់ទីផ្សារជុំវិញពិភពលោក កំពុងជាប់ពន្ធគយក្រោមវិធានការរបស់សហរដ្ឋអាមេរិក ដែលបណ្ដាលឱ្យសេដ្ឋកិច្ចពិភពលោកធ្លាក់ចូលទៅក្នុងភាពមិនច្បាស់លាស់។
នាវាដឹកជញ្ជូនតាមសមុទ្របានផ្ទុកទំនិញតែពាក់កណ្តាលប៉ុណ្ណោះ ព្រោះមិនបានរាប់បញ្ចូលទំនិញដែលប្រឈមមុខពន្ធគយរបស់សហរដ្ឋអាមេរិក។
លោក Alexandre Charpentier ដែលជាអ្នកជំនាញផ្នែកដឹកជញ្ជូនមកពីក្រុមហ៊ុនប្រឹក្សាយោបល់ Roland Berger ឱ្យដឹងថា រយៈពេល ៣សប្ដាហ៍មកនេះ ការធ្លាក់ចុះនៃការធ្វើពាណិជ្ជកម្ម ហើយនាវាដឹកជញ្ជូនជាច្រើនមានទំនិញត្រឹមតែ ៥០ភាគរយប៉ុណ្ណោះ ក្នុងពេលឆ្លងកាត់តំបន់អាត្លង់ទិច និងអន្តរប៉ាស៊ីហ្វិកទៅកាន់សហរដ្ឋអាមេរិក។
ពន្ធគយរបស់សហរដ្ឋអាមេរិកលើទំនិញចិន មានអត្រា ១៤៥% ហើយចុងក្រោយនេះ លោក ត្រាំ គំរាមបង្កើនពន្ធរហូតដល់ ២៤៥% លើផលិតផលមួយចំនួនទៀតរបស់ចិន ប្រសិនបើចិន បន្តចាត់វិធានការឆ្លើយតបនឹងការដំឡើងពន្ធពីសហរដ្ឋអាមេរិក។
យ៉ាងណា ក្រុងប៉េកាំង សច្ចាថានឹងតស៊ូប្រយុទ្ធដល់ដំណាក់កាលចុងក្រោយនៅចំពោះមុខការគំរាមកំហែងដំឡើងពន្ធបន្ថែមទៀតរបស់ប្រធានាធិបតីអាមេរិក។ នេះបើយោងតាមអ្នកនាំពាក្យរបស់ក្រសួងការបរទេសចិន។
ចាប់តាំងពីសង្គ្រាមពាណិជ្ជកម្មរបស់លោក ដូណាល់ ត្រាំ ផ្ទុះឡើង មានតែប្រទេសចិន មួយគត់ហ៊ានដំឡើងសំឡេងបង្កើតវិធានការប្រឆាំងនឹងសហរដ្ឋអាមេរិក ក្រៅពីនេះ ប្រទេសជាច្រើនព្យាយាមសម្របសម្រួលជាមួយសហរដ្ឋអាមេរិក។ ចំពោះចិន លោក ដូណាល់ ត្រាំ បានប្រកាសបិទផ្លូវចរចា ប៉ុន្តែនៅតែទទួលស្វាគមន៍ប្រទេសផ្សេងទៀតដែលចង់ចរចាជាមួយអាមេរិក។
បើតាមលោក Scott Bessent រដ្ឋមន្ត្រីហិរញ្ញវត្ថុរបស់អាមេរិក មានប្រទេសដល់ទៅជិត ៦០ បានទាក់ទងទៅអាមេរិក ដើម្បីសុំចរចាបញ្ចុះពន្ធលើទំនិញនាំចូលទីផ្សារអាមេរិក ដែលនៅក្នុងនោះ ជប៉ុន ជាប្រទេសសេដ្ឋកិច្ចធំទី៤ កំពុងទទួលបានការយោគយល់ជាងគេ ព្រោះជប៉ុន បានស្នើសុំចរចាជាមួយអាមេរិកមុនគេ។
ចំពោះប្រទេសកូរ៉េខាងត្បូង ដែលជាកម្លាំងសេដ្ឋកិច្ចដ៏ធំមួយដែរ ត្រូវបានរដ្ឋការលោក ត្រាំ ព្រមានឱ្យពិនិត្យឡើងវិញទំនិញរបស់ចិន ដែលផលិតក្នុងទឹកដីកូរ៉េខាងត្បូង ឱ្យនាំចូលទីផ្សារអាមេរិក។
ចំពោះប្រទេសនៅតំបន់អាស៊ីអាគ្នេយ៍ដែលភាគច្រើនជាប្រភពវេចខ្ចប់ទំនិញរបស់ចិន ជាពិសេសផ្ទាំងកញ្ចក់សូឡាស្រូបពន្លឺព្រះអាទិត្យផលិតថាមពលអគ្គិសនីភាគច្រើនផលិតចេញពីជាវត្ថុធាតុដើមនាំចូលពីប្រទេសចិន កំពុងប្រឈមមុខនឹងពន្ធគយអាមេរិករហូតដល់ ៣៥០០% បើឧបករណ៍ទាំងនោះនាំចូលទីផ្សារអាមេរិក។
វិធានការថ្មីនេះរបស់រដ្ឋការលោក ដូណាល់ ត្រាំ វានឹងប៉ះពាល់ខ្លាំងដល់ក្នុងតំបន់ ក្នុងនោះមានប្រទេសវៀតណាម ថៃ ម៉ាឡេស៊ី និងកម្ពុជា។ នេះយោងតាមការប្រកាសព័ត៌មានរបស់ក្រសួងពាណិជ្ជកម្មសហរដ្ឋអាមេរិក ដែលបានប្រកាសជាសាធារណៈកាលពីថ្ងៃចន្ទ ទី២១ ខែមេសា ឆ្នាំ២០២៥៕
© 2025, ឌឹ ខេមបូឌា ដេលី. All rights reserved.