អគ្គលេខាធិការនៃរាជបណ្ឌិត្យសភាកម្ពុជា បណ្ឌិត យង់ ពៅ ព្រមានកុំឱ្យពលរដ្ឋខ្មែររុញប្រទេសរបស់ខ្លួនទៅជាលេណដ្ឋាននៃសង្វៀនភូមិសាស្ត្រនយោបាយរវាងចិន និងអាមេរិក ជុំវិញជម្លោះព្រំដែនជាមួយថៃ។
បណ្ឌិត យង់ ពៅ លើកឡើងក្នុងវេទិកាស្ដីពីធនាគារខួរក្បាល និងប្រព័ន្ធផ្សព្វផ្សាយកម្ពុជា-ចិន នៅថ្ងៃទី០៧ វិច្ឆិកា ដោយអំពាវនាវឱ្យពលរដ្ឋខ្មែរកុំបញ្ចេញទស្សនៈអវិជ្ជមានលើមិត្តចិន ជ្រុលហួសហេតុ ចៀសវាងអូសទាញឱ្យប្រទេសកម្ពុជា ក្លាយជាលេណដ្ឋាននៃសង្វៀនភូមិសាស្ត្រនយោបាយរបស់មហាអំណាច។
មន្ត្រីរដ្ឋាភិបាលដដែលនេះ លើកឡើងថា ពលរដ្ឋខ្មែរមួយចំនួនបានចោទប្រកាន់ពីឥរិយាបថចិន ចំពោះបញ្ហាជម្លោះព្រំដែនកម្ពុជា-ថៃ ប៉ុន្តែតាមការពិត ប្រទេសចិន ក៏មានចំណែកយ៉ាងច្រើនដែរក្នុងការចូលរួមសម្របសម្រួលរហូតមានកិច្ចព្រមព្រៀងសន្តិភាពរវាងប្រទេសកម្ពុជា និងប្រទេសថៃ នៅទីក្រុងកូឡាឡាំពួរ កាលពីចុងខែតុលា នោះ។
លោកបញ្ជាក់ថា ជុំវិញជម្លោះព្រំដែនរវាងកម្ពុជា-ថៃ មិនគួរគប្បីលើកតម្កើងប្រទេសមួយ ហើយវាយប្រហារប្រទេសមួយផ្សេងទៀតនោះទេ ព្រោះការធ្វើបែបនេះ នឹងនាំគ្រោះថ្នាក់ដល់ប្រទេសកម្ពុជាខ្លួនឯង ដូច្នេះពលរដ្ឋខ្មែរមិនត្រូវអូសទាញឱ្យកម្ពុជា ក្លាយជាសមរភូមិនៃការប្រកួតប្រជែងភូមិសាស្ត្រនយោបាយរបស់ប្រទេសមហាអំណាចណាមួយឡើយ។
កាលពីថ្ងៃទី២៨ ខែកក្កដា ឆ្នាំ២០២៥ ប្រធានាធិបតីអាមេរិក លោក ដូណាល់ ត្រាំ បានចេញមុខផ្ដួចផ្ដើមឱ្យមានបទឈប់បាញ់ បន្ទាប់ពីប្រទេសទាំងពីរឈ្លោះគ្នារហូតឈានដល់ការប្រើអាវុធបាញ់ផ្លោងដាក់គ្នាទៅវិញទៅមក។
នៅថ្ងៃទី២៦ ខែតុលា ឆ្នាំ២០២៥ លោក ដូណាល់ ត្រាំ ក៏បានចេញមុខធ្វើជាសាក្សីម្តងទៀតក្នុងពិធីចុះកិច្ចព្រមព្រៀងសន្តិភាពរវាងកម្ពុជា-ថៃ ប៉ុន្តែពិធីនេះមិនមានវត្តមានចិន នោះទេ។ បន្ថែមពីនេះ អាមេរិក ក៏លើកលែងទណ្ឌកម្មហាមឃាត់លក់អាវុធឱ្យកម្ពុជា និងប្រកាសបើកផ្លូវឱ្យមានការរៀបចំធ្វើសមយុទ្ធយោធាជាមួយកម្ពុជាឡើងវិញថែមទៀត។
ចំណែកឯកអគ្គរដ្ឋទូតសាធារណរដ្ឋប្រជាមានិតចិន ប្រចាំនៅកម្ពុជា លោក វ៉ាង វិនពីន (WANG Wenbin) អះអាងកាលពីពាក់កណ្តាលខែកញ្ញា ឆ្នាំ២០២៥ ថា ភាគីចិន បានឃាត់ និងជំរុញឱ្យមានការពិភាក្សាយ៉ាងសកម្មជុំវិញជម្លោះព្រំដែនរវាងកម្ពុជា-ថៃ ដែលបានកើតឡើងតាំងពីដំបូងមកម្ល៉េះ។
ឯកអគ្គរដ្ឋទូតចិន រូបនេះបញ្ជាក់ថា បេសកជនពិសេសរបស់ភាគីចិន បានបំពេញបេសកកម្មសម្របសម្រួលលើកទី៣ ហើយ ខណៈចិន ក៏រីករាយក្នុងការផ្តល់ជំនួយយ៉ាងសកម្មស្របតាមការចង់បានរបស់ភាគីទាំងពីរដែរ។
ជុំវិញបញ្ហានេះ អតីតមេធាវីសាលាក្ដីខ្មែរក្រហម លោក កង ឫទ្ធិគិរី លើកឡើងថា សង្គ្រាម ៥ថ្ងៃរវាងកម្ពុជា-ថៃ ត្រូវបានសហរដ្ឋអាមេរិក អន្តរាគមន៍ខ្លាំងឱ្យមានបទឈប់បាញ់ ប៉ុន្តែចិន ដូចជារារែកក្នុងការអន្តរាគមន៍ចំពោះសង្គ្រាមមួយនេះ ដែលខុសពីឆ្នាំ២០០៨ ចិនបានបង្ហាញជំហរច្បាស់លាស់ថា ខ្លួននៅខាងកម្ពុជា ក្នុងពេលដែលកម្ពុជា មានជម្លោះព្រំដែនជាមួយថៃ នាពេលនោះ៕
© 2025, ឌឹ ខេមបូឌា ដេលី. All rights reserved.