អ្នកឃ្លាំមើលស្ថានការណ៍កម្ពុជា ស្នើឱ្យប្រធានព្រឹទ្ធសភាកម្ពុជា លោក ហ៊ុន សែន លើកយកបញ្ហាអធិបតេយ្យជាតិទៅពិភាក្សាជាមួយមេដឹកនាំវៀតណាម ក្នុងដំណើរទស្សនកិច្ចទៅចូលរួមខួបអនុស្សាវរីយ៍បង្រួបបង្រួមជាតិរបស់វៀតណាម នៅថ្ងៃទី៣០ ខែមេសា។
ប្រធានក្រុមប្រឹក្សាឃ្លាំមើលកម្ពុជាក្នុងប្រទេសន័រវែស លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២៨ មេសា នេះថា ក្នុងដំណើរទស្សនកិច្ចនេះ លោក ហ៊ុន សែន គួរតែមានភាពក្លាហានបញ្ជាក់ជំហរទៅកាន់មេដឹកនាំវៀតណាម ក្នុងការធ្វើនិរាករណ៍កិច្ចព្រមព្រៀងអំឡុងទសវត្សរ៍ឆ្នាំ១៩៨០ ដែលផ្ទុយពីរដ្ឋធម្មនុញ្ញចោលទាំងអស់ ដើម្បីបញ្ជាក់ប្រាប់ពលរដ្ឋខ្មែរពីឆន្ទៈការពារអធិបតេយ្យជាតិខ្មែររបស់គាត់ចំពោះបរទេសឈ្លានពានមួយនេះ។
លោកបន្តថា បើលោក ហ៊ុន សែន មិនហ៊ានលើកយកបញ្ហាដែលលោកបានរៀបរាប់ទាំងនេះទៅជជែកជាមួយមេដឹកនាំវៀតណាម ដើម្បីបញ្ឈប់យុទ្ធសាស្ត្រឈ្លានពានរបស់ពួកគេទេ នោះមានន័យថា កម្ពុជានៅតែត្រូវបានដាក់ជាតំបន់សម្រាប់ឱ្យវៀតណាម ឈ្លានពានទៅថ្ងៃមុខបន្តទៀតដដែល។
លោក ម៉ែន ណាត បញ្ជាក់ថា ឱ្យតែកម្ពុជាមិនអាចលុបកិច្ចព្រមព្រៀងខុសច្បាប់អំឡុងទសវត្សរ៍ឆ្នាំ១៩៨០ កម្ពុជានឹងមិនអាចប្តឹងវៀតណាម ទៅតុលាការអន្តរជាតិឱ្យការពារអធិបតេយ្យជាតិរបស់ខ្លួនបានទេ។ ម្យ៉ាងទៀត បើកម្ពុជាមិនដកហូតដីសម្បទានសេដ្ឋកិច្ចក្នុងខេត្តទាំង៤ នៅភូមិភាគឦសានមកវិញទេ នោះកម្ពុជាក៏នៅតែរងនូវការប្រឈមគ្រប់បែបយ៉ាងពីវៀតណាម ទៅថ្ងៃមុខដែរ។
លោកគូសបញ្ជាក់ថា បំណងរបស់មេដឹកនាំវៀតណាម ហៅលោក ហ៊ុន សែន ទៅជួបក្នុងពិធីខួបនេះ គឺក្នុងនាមជាភ្ញៀវកិត្តិយសដែលជាយុទ្ធមិត្តនៃអតីតសហព័ន្ធឥណ្ឌូចិនជាមួយគ្នាផង ជាបងធំរបស់កម្ពុជា និងឡាវ សម្រាប់ការរំឭកគុណ និងដឹងគុណខ្លួនផង។
អគ្គលេខាធិការដ្ឋានព្រឹទ្ធសភា ចេញសេចក្តីប្រកាសព័ត៌មាននៅថ្ងៃទី២៨ មេសា នេះថា មេដឹកនាំបក្សកាន់អំណាច លោក ហ៊ុន សែន នឹងចូលរួមខួបអនុស្សាវរីយ៍បង្រួបបង្រួមជាតិរបស់វៀតណាម នៃសាធារណរដ្ឋសង្គមនិយមវៀតណាម នៅថ្ងៃទី៣០ ខែមេសា ខាងមុខនេះ។
សេចក្តីប្រកាសព័ត៌មានដដែលនេះបញ្ជាក់ថា អំឡុងពេលចូលរួមខួបអនុស្សាវរីយ៍នេះ លោក ហ៊ុន សែន នឹងជួបពិភាក្សាការងារដាច់ដោយឡែកៗពីគ្នាជាមួយមេដឹកនាំជាន់ខ្ពស់វៀតណាម រួមមាន ប្រធានាធិបតីវៀតណាម និងជាអគ្គលេខាធិការបក្សកុម្មុយនីស្តវៀតណាម លោក តូ ឡឹម ប្រធានរដ្ឋសភាវៀតណាម លោក ជិន ថាញ់មិន និងនាយករដ្ឋមន្ត្រីវៀតណាម លោក ផាម មីញជីញ ផងដែរ ដើម្បីបញ្ជាក់ពីការបន្តរឹតចំណងមិត្តភាព សាមគ្គីភាព និងកិច្ចសហប្រតិបត្តិការរវាងប្រទេសទាំងពីរ៕
© 2025, ឌឹ ខេមបូឌា ដេលី. All rights reserved.