មេដឹកនាំបក្សកាន់អំណាច លោក ហ៊ុន សែន អួតក្នុងវេទិកាអាស៊ានក្នុងរដ្ឋធានីហ្សាការតា ប្រទេសឥណ្ឌូនេស៊ី កាលពីថ្ងៃទី៥ ឧសភា ថា កម្ពុជាមិនមែនជាប្រទេសកម្សត់ដូចក្នុងអតីតកាលទេក្នុងជំនាន់ដឹកនាំរបស់លោក និងគណបក្សប្រជាជនកម្ពុជា។
អតីតកម្មាភិបាលជាន់ខ្ពស់នៃរបបខ្មែរក្រហម លោក ហ៊ុន សែន លើកឡើងថា លោកមិនមែនមានត្រឹមតែបទពិសោធន៍កសាងប្រទេសកម្ពុជាពីបាតដៃទទេនោះទេ សូម្បីតែវត្តមានរបស់កម្ពុជានៅក្នុងអាស៊ាន ក៏លោកជាអ្នកគូសវាសរៀបចំផ្លូវពីចំណុចសូន្យដែរ។
លោកអះអាងថា ចំណុចចាប់ផ្ដើមនៃការដឹកនាំរបស់លោក គឺកើតចេញពីភាពឯកោខាងនយោបាយការទូត និងសេដ្ឋកិច្ច ហើយការតភ្ជាប់របស់កម្ពុជាជាមួយនឹងអាស៊ាន គឺមានឫសគល់ចេញពីភាពឯកោនេះតែម្តង ព្រោះតែលោកចង់បានការទទួលស្គាល់ស្មើមុខ ស្មើសិទ្ធិ និងការគោរពពេញលេញលើឯករាជ្យ អធិបតេយ្យ និងសេចក្តីថ្លៃថ្នូរក្នុងនាមជាប្រជាជាតិមួយនៅក្នុងតំបន់។
ប្រធានព្រឹទ្ធសភារូបនេះបញ្ជាក់ថា ចំណុចចាប់ផ្ដើមរបស់កម្ពុជាជាមួយអាស៊ាន មិនមែនជារឿងរ៉ាវល្អប៉ុន្មានទេ ព្រោះនៅក្នុងអំឡុងទសវត្សរ៍ឆ្នាំ៨០ និងដើមទសវត្សរ៍ឆ្នាំ៩០ រដ្ឋាភិបាលសាធារណរដ្ឋប្រជាមានិតកម្ពុជា និងរដ្ឋកម្ពុជា ត្រូវបានអាស៊ានចាត់ទុកថាជារដ្ឋាភិបាលនៅក្រោមការគ្រប់គ្រងរបស់វៀតណាម នាពេលនោះ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន បានប្រាប់សារព័ត៌មាន The Cambodia Daily នៅថ្ងៃទី៦ ឧសភា នេះថា ការអួតអាងរបស់លោក ហ៊ុន សែន មិនឆ្លុះបញ្ចាំងពីការពិតនៅកម្ពុជាឡើយ ព្រោះជាង ៤ទសវត្សរ៍ក្រោមការដឹកនាំរបស់គាត់ ទ្រព្យសម្បត្តិរបស់ប្រទេសកម្ពុជាបានរងនូវភាពវិនាសហិនហោចគ្មានសល់ ខណៈពលរដ្ឋខ្មែរក្លាយជាពលរដ្ឋក្រីក្រ និងបាត់បង់សិទ្ធិសេរីភាពគ្រប់គ្នា។
លោក អ៊ុំ សំអាន លើកឡើងថា លោក ហ៊ុន សែន បានបន្សល់ឱ្យពលរដ្ឋខ្មែរនូវភាពក្រីក្រពេញប្រទេស អំពើពុករលួយពេញស្ថាប័នរដ្ឋ អំពើឧក្រិដ្ឋកម្មកើតមានសឹងគ្រប់ទីកន្លែង ដូចជា អំពើជួញដូរមនុស្ស ការលាងលុយកខ្វក់ ការជួញដូរគ្រឿងញៀន ការចាប់ជំរិត អំពើឆបោក និងការចាប់បង្ខាំងមនុស្ស ជាដើម។
ជាងនេះទៀត ក្រុមឧកញ៉ា និងមន្ត្រីរដ្ឋាភិបាលមួយចំនួនដែលរកផលប្រយោជន៍ឱ្យគ្រួសារលោក ហ៊ុន សែន ក៏ចូលដៃជាមួយក្រុមឧក្រិដ្ឋជនបោកប្រាស់ពលរដ្ឋខ្លួនឯង តាមរយៈនៃការលក់ដីខ្យល់ លក់ផ្ទះខ្យល់ ក្នុងនោះក៏មានការបោកប្រាស់ដោយបង្កើតគម្រោងវិនិយោគដាក់លុយទទួលបានការប្រាក់ខ្ពស់ផងដែរ។
លោកបន្តថា ចំណែកធនធានធម្មជាតិកម្ពុជា ដូចជា រ៉ែ ទាំងលើគោក និងក្នុងក្រោមទឹក រួមទាំងព្រៃឈើ ត្រូវវិនាសហិនហោចគ្មានសល់ ខណៈទឹកដីត្រូវបរទេសជិតខាងរំលោភបំពានយកជាបន្តបន្ទាប់ ចំណែកលោក ហ៊ុន សែន បែរជាគប់គិតជាមួយបរទេសឈ្លានពានចុះហត្ថលេខាកាត់ទឹកដីខ្មែរឱ្យពួកគេជាថ្នូរនឹងអំណាចដឹកនាំប្រទេសកម្ពុជាបន្តពូជទៅវិញ៕
© 2025, ឌឹ ខេមបូឌា ដេលី. All rights reserved.