លោក ហ៊ុន ម៉ាណែត ថ្វាយព្រះពរព្រះមហាក្សត្រខ្មែរ សម្តេចព្រះបរមនាថ នរោត្ដម សីហមុនី ក្នុងឱកាសបុណ្យចម្រើនព្រះជន្ម ឱ្យព្រះអង្គមានព្រះរាជសុខភាពល្អ ព្រះពលានុភាពរឹងមាំខ្លាំងក្លា និងព្រះជន្មយឺនយូរ ដើម្បីគង់ប្រថាប់ជាម្លប់ដ៏ត្រជាក់ថ្កុំថ្កើងរុងរឿងរបស់មាតុភូមិ និងប្រជានុរាស្ត្ររបស់ព្រះអង្គ។
នាយករដ្ឋមន្ត្រីតពូជរូបនេះ ចេញលិខិតថ្វាយព្រះពរក្នុងព្រះរាជពិធីបុណ្យចម្រើនព្រះជន្មព្រះមហាក្សត្រខ្មែរ កាលពីថ្ងៃទី១២ ឧសភា ដែលត្រូវបានផ្សព្វផ្សាយនៅថ្ងៃទី១៣ ឧសភា នេះថា លោកសូមក្រាបថ្វាយបង្គំនូវកតញ្ញុតាធម៌ និងកតវេទិតាធម៌យ៉ាងជ្រាលជ្រៅបំផុត ថ្វាយព្រះករុណាព្រះបរមនាថ នរោត្ដម សីហមុនី ដែលព្រះអង្គបានបំពេញនូវព្រះរាជតួនាទីដ៏ឧត្ដុង្គឧត្ដមថ្លៃថ្លាក្នុងនាមជានិមិត្តរូបនៃឯកភាពជាតិ វឌ្ឍនភាព ការបង្រួបបង្រួមជាតិ និងនិរន្តរភាពជាតិ។
លោក ហ៊ុន ម៉ាណែត ថ្វាយព្រះពរសូមឱ្យព្រះអង្គគង់ជាម្លប់សម្រាប់ប្រជារាស្ត្ររបស់ព្រះអង្គ និងដើម្បីលើកកម្ពស់កិត្យានុភាពជាតិ ក្នុងការជំរុញការអភិវឌ្ឍប្រទេសជាតិលើគ្រប់វិស័យ ទាំងក្នុងវិស័យសេដ្ឋកិច្ច សង្គមកិច្ច ការទូត ក្នុងម្លប់នៃសន្តិភាព ឱ្យរឹងរឹតតែមានភាពរីកចម្រើនជឿនលឿនប្រកបដោយសេចក្តីសុខក្សេមក្សាន្ត ចម្រុងចម្រើន និងរុងរឿង។
ចំណែកមេដឹកនាំបក្សកាន់អំណាច លោក ហ៊ុន សែន ក៏ចេញលិខិតថ្វាយព្រះពរនៅថ្ងៃទី១៣ ឧសភា នេះផងដែរ ដោយលោកសូមថ្វាយព្រះពរជាមួយនឹងសមានចិត្តស្វាមីភក្តិចំពោះព្រះរាជបល្ល័ង្ក ក្រោមម្លប់ដ៏ត្រជាក់ត្រជំ ដែលប្រទេសជាតិកំពុងបន្តពង្រឹងសន្តិភាព ស្ថិរភាព សន្តិសុខ សណ្ដាប់ធ្នាប់សង្គម នីតិរដ្ឋ និងលទ្ធិប្រជាធិបតេយ្យ ដែលជាមូលដ្ឋានគ្រឹះសម្រាប់ការអភិវឌ្ឍសង្គម សេដ្ឋកិច្ច និងការរីកចម្រើនឥតឈប់ឈររបស់ប្រទេសជាតិ។
នៅថ្ងៃទី១៤ ខែឧសភា ឆ្នាំ២០២៥ គឺជាថ្ងៃបុណ្យចម្រើនព្រះជន្ម ព្រះករុណាព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា គម្រប់ ៧២ព្រះវស្សាយាងចូល ៧៣ព្រះវស្សា ក្នុងព្រះរាជកិច្ចបំពេញព្រះរាជតួនាទី ធានាឯករាជ្យ និងបូរណភាពទឹកដីសម្រាប់ប្រទេសកម្ពុជាទាំងមូល។
ព្រះករុណាសម្តេច ព្រះបរមនាថ នរោត្តម សីហមុនី ជាព្រះរាជបុត្រច្បងរបស់ព្រះបរមរតនកោដ្ឋ សម្តេចព្រះនរោត្តម សីហនុ ដែលបានប្រសូតនៅថ្ងៃទី១៤ ខែឧសភា ឆ្នាំ១៩៥៣ នៅទីក្រុងភ្នំពេញ។
មាត្រា៧ នៃរដ្ឋធម្មនុញ្ញកម្ពុជា បានចែងយ៉ាងច្បាស់ថា ព្រះមហាក្សត្រទ្រង់គ្រងរាជ្យសម្បត្តិ ប៉ុន្តែទ្រង់មិនកាន់អំណាចឡើយ ហើយទ្រង់នឹងគង់ជាប្រមុខរដ្ឋអស់មួយជីវិត៕
© 2025, ឌឹ ខេមបូឌា ដេលី. All rights reserved.