រដ្ឋាភិបាលកម្ពុជា អះអាងថា ការចរចាទំនាក់ទំនងពាណិជ្ជកម្ម និងវិនិយោគទ្វេភាគីរវាងកម្ពុជា និងអាមេរិក ជាពិសេសការស្នើសុំបញ្ចុះអត្រាពន្ធ ៤៩% នឹងត្រូវធ្វើឡើងក្នុងកិច្ចប្រជុំចរចាលើកទី២ ក្នុងសប្តាហ៍ទី១ នៅដើមខែក្រោយ។
គណៈប្រតិភូខ្មែរដឹកនាំដោយឧបនាយករដ្ឋមន្ត្រី លោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម អ្នកស្រី ចម និម្មល និងឯកអគ្គរាជទូតថ្មី លោក កុយ គួង។ ក្នុងវគ្គទីមួយនៃកិច្ចប្រជុំ ភាគីទាំងពីរមិនបាននិយាយអំពីរឿងពន្ធ ៤៩% ទេ គ្រាន់តែសម្ដែងការគួរសមរាក់ទាក់ធម្មតា។
អង្គភាពអ្នកនាំពាក្យរាជរដ្ឋាភិបាល ចេញសេចក្តីប្រកាសព័ត៌មាននៅថ្ងៃទី១៥ ឧសភា នេះថា ក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាមេរិក បានចូលរួមកិច្ចប្រជុំចរចាលើកទី១ លើកិច្ចព្រមព្រៀងពាណិជ្ជកម្ម និងវិនិយោគទ្វេភាគីរវាងកម្ពុជា-អាមេរិកចប់សព្វគ្រប់ហើយជាមួយជំនួយការតំណាងពាណិជ្ជកម្មសហរដ្ឋអាមេរិកទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក អ្នកស្រី ហ្សារ៉ា អែលឺមែន (Sarah Ellerman)។
ប្រភពដដែលអះអាងថា ក្នុងកិច្ចប្រជុំលើកទី១ នេះ ភាគីទាំងពីរបានលើកឡើងដោយត្រង់ៗលើការពង្រឹងបន្ថែមនូវទំនាក់ទំនងពាណិជ្ជកម្ម និងវិនិយោគទ្វេភាគី ព្រមទាំងពិភាក្សាស៊ីជម្រៅលើអត្ថបទសេចក្ដីព្រាងកិច្ចព្រមព្រៀងពាណិជ្ជកម្មបដិការ ឬសេចក្តីព្រមព្រៀងកំណត់ពន្ធសហរដ្ឋអាមេរិកលើទំនិញពីស្រុកខ្មែរដែរ។
អង្គភាពអ្នកនាំពាក្យរាជរដ្ឋាភិបាល បញ្ជាក់ថា ភាគីទាំងពីរបានឯកភាពគ្នារៀបចំកិច្ចប្រជុំចរចាជុំទី២ នៅសប្តាហ៍ទី១ នៅខែមិថុនា ឆ្នាំ២០២៥ ខាងមុខនេះ ក្នុងរដ្ឋធានីវ៉ាស៊ីនតុន បន្តទៀត។
ការអះអាងនេះ ធ្វើឡើងបន្ទាប់ពីក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគកម្ពុជា បានជួបចរចាទ្វេភាគីជុំវិញការកំណត់ពន្ធរបស់សហរដ្ឋអាមេរិកដែលត្រូវបានបញ្ចប់កាលពីថ្ងៃពុធ។
កិច្ចប្រជុំនេះ ធ្វើឡើងបន្ទាប់ពីសហរដ្ឋអាមេរិកបានកំណត់ពន្ធគយ ៤៩% (Reciprocal Tariff ៤៩%) លើទំនិញកម្ពុជាដែលនាំចូលទៅទីផ្សាររបស់ខ្លួន កាលពីដើមខែមេសា កន្លងទៅ ដើម្បីបញ្ចៀសនូវឱនភាពពាណិជ្ជកម្មសហរដ្ឋអាមេរិកជាមួយកម្ពុជាទៅថ្ងៃមុខ។
មុនឈានដល់ការចរចានេះ កម្ពុជាបានបញ្ចុះពន្ធលើទំនិញអាមេរិកចំនួន ១៩វិស័យពី ៣៥% មកនៅត្រឹម ៥% ផងដែរ។ ជាងនេះទៀត កម្ពុជាក៏បានដាក់ចេញនូវវិធានការទប់ស្កាត់ការក្លែងបន្លំដើមកំណើតទំនិញ ដែលត្រូវបានអនុវត្តកាលពីថ្ងៃទី១២ ខែឧសភា កន្លងទៅនេះ។
ជុំវិញបញ្ហានេះ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ លោក សេង វណ្ណលី លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី១៣ ឧសភា ដោយព្រមានថា បើការចរចាលើកិច្ចព្រមព្រៀងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាមេរិក ជាពិសេសការស្នើសុំបញ្ចុះអត្រាពន្ធ ៤៩% បរាជ័យ កម្ពុជានឹងជួបឧបសគ្គកាន់តែធ្ងន់ធ្ងរបន្ថែមទៀតទៅថ្ងៃមុខ។
លោក សេង វណ្ណលី លើកឡើងថា សព្វថ្ងៃនេះ កម្ពុជាត្រូវបានសហរដ្ឋអាមេរិកចាត់ទុកជាប្រទេសដែលត្រូវបានប្រើជាមូលដ្ឋាននៃការផលិតដោយការនាំចូលទំនិញពីចិន ដើម្បីនាំចេញទៅកាន់ទីផ្សារអាមេរិក ក្រោមស្លាក Made in Cambodia ដែលមានន័យថា ដំឡើងនៅកម្ពុជា ធ្វើនៅកម្ពុជា និងផលិតនៅកម្ពុជា។
លោក សេង វណ្ណលី គូសបញ្ជាក់ថា ការស្ដារប្រជាធិបតេយ្យ គោរពសិទ្ធិមនុស្ស និងការរក្សាអព្យាក្រឹត្យលើនយោបាយការទូតរបស់កម្ពុជា សុទ្ធតែជាចំណែកដែលសហរដ្ឋអាមេរិកចង់បាន មិនមែនត្រឹមតែបញ្ហាដោះដូរពាណិជ្ជកម្មប៉ុណ្ណោះទេ។
ជាមួយគ្នានេះ គណៈប្រតិភូរាជរដ្ឋាភិបាលមានលោក ស៊ុន ចាន់ថុល អ្នកស្រី ចម និម្មល និងលោកឯកអគ្គរាជទូត កុយ គួង ក៏បានទៅជួបសមាជិកព្រឹទ្ធសភាអាមេរិកាំងខាងបក្សប្រជាធិបតេយ្យ ពីរដ្ឋ Illinois គឺអ្នកស្រី Tammy Duckworth សមាជិកគណៈកម្មាធិការព្រឹទ្ធសភាផ្នែកកិច្ចការកងកម្លាំងប្រដាប់អាវុធ ពាណិជ្ជកម្ម វិទ្យាសាស្ត្រ និងដឹកជញ្ជូន ការបរទេស និងអតីតយុទ្ធជន។ អ្នកស្រីមានឪពុកជាជនជាតិអាមេរិកាំង ម្តាយជាជនជាតិថៃ ជាអតីតនាយទាហានពិការជើងទាំងពីរក្នុងប្រតិបត្តិការហោះហើរឧទ្ធម្ភាគចក្រចម្បាំង រងគ្រោះថ្នាក់ដោយគ្រាប់រ៉ុក្កែតបច្ចាមិត្ត ធ្លាក់ក្នុងទឹកដីប្រទេសអ៊ីរ៉ាក់។
អ្នកស្រី Tammy Duckworth ជាសមាជិកព្រឹទ្ធសភាដែលស្អប់ខ្ពើមរបបផ្ដាច់ការ ជិះជាន់ រំលោភសិទ្ធិសេរីភាពមនុស្ស ពុករលួយ និងប្រឆាំងគោលនយោបាយចិនវាតឥទ្ធិពលនៅភូមិភាគអាស៊ី។
រាជាណាចក្រកម្ពុជា កំពុងធ្វើសមយុទ្ធយោធាជាមួយកងទ័ពចិន ដែលមានបុគ្គលិកយោធាជាង ២០០០នាក់ចូលរួមធ្វើប្រតិបត្តិការខាងជើងគោក ជើងទឹក និងជើងអាកាស នៅខេត្តព្រះសីហនុ និងខេត្តកំពង់ឆ្នាំង។
ទាក់ទងនឹងបញ្ហាខ្មែរទាំងអស់នេះ តើខ្មែរនៅសហរដ្ឋអាមេរិកធ្វើអ្វីទៀត?៕
© 2025, ឌឹ ខេមបូឌា ដេលី. All rights reserved.