ក្រសួងការពារជាតិកម្ពុជា បដិសេធពីការដកកងទ័ពចេញពីតំបន់មុំបី ដែលស្ថិតក្នុងដែនអធិបតេយ្យភាពរបស់ខ្លួន និងអំពាវនាវឱ្យពលរដ្ឋខ្មែរទទួលយកព័ត៌មានពីបញ្ហាព្រំដែនកម្ពុជា-ថៃ ពីរដ្ឋាភិបាល ជាជាងទទួលព័ត៌មានពីប្រភពមិនច្បាស់លាស់។
ក្រសួងការពារជាតិកម្ពុជា ចេញសេចក្តីប្រកាសព័ត៌មាននៅថ្ងៃទី០៩ មិថុនា នេះថា រដ្ឋាភិបាលកម្ពុជាពុំបានដកកងទ័ពចេញពីតំបន់មុំបី ដែលស្ថិតក្នុងដែនអធិបតេយ្យភាពរបស់ខ្លួននោះឡើយ ដែលកងទ័ពកម្ពុជាបានឈរជើងកាន់កាប់តាំងពីយូរមកហើយនោះ។
ប្រភពដដែលអះអាងថា រាល់ការរៀបចំកម្លាំងរបស់កងទ័ព រាប់ទាំងការឈរជើង ការពង្រាយ ការកែសម្រួល និងការចល័តកម្លាំង គឺស្ថិតនៅក្នុងដែនអធិបតេយ្យភាពរបស់កម្ពុជាទាំងអស់ក្នុងគោលដៅត្រៀមខ្លួនការពារបូរណភាពទឹកដីជានិច្ច។
ក្រសួងការពារជាតិ បញ្ជាក់ថា កងទ័ពកម្ពុជាគាំទ្រដល់ការខិតខំស្វែងរកដំណោះស្រាយបញ្ហាដោយសន្តិវិធី ប៉ុន្តែក៏បានត្រៀមខ្លួនជាស្រេចដែរ ដើម្បីអនុវត្តបទបញ្ជារបស់រាជរដ្ឋាភិបាលក្នុងការការពារបូរណភាពទឹកដីប្រឆាំងរាល់ការប៉ុនប៉ងឈ្លានពាននានា។
មេដឹកនាំបក្សកាន់អំណាច លោក ហ៊ុន សែន បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី៨ ខែមិថុនា ឆ្នាំ២០២៥ នេះថា ការកែសម្រួលកម្លាំងកងទ័ពនៅតំបន់មានជម្លោះរវាងកម្ពុជា-ថៃ គឺជារឿងចាំបាច់បំផុតដើម្បីបញ្ចៀសនូវការប៉ះទង្គិចគ្នាដែលឈានដល់ការបង្ហូរឈាមទ្រង់ទ្រាយធំ។
មេដឹកនាំបក្សកាន់អំណាចរូបនេះ អះអាងថា ប្រជាជននៃប្រទេសទាំងពីរពិតជាចង់មានសន្តិភាព និងមិនចង់ឃើញនូវសង្គ្រាមនោះឡើយ ប៉ុន្តែទោះបែបនេះក្តី ក៏កម្ពុជានៅតែបន្តប្តឹងថៃ ទៅតុលាការអន្តរជាតិដែរ។
លោក ហ៊ុន សែន អំពាវនាវឱ្យពលរដ្ឋខ្មែរជឿទុកចិត្តលើរាជរដ្ឋាភិបាលក្នុងការដោះស្រាយជម្លោះដោយសន្តិវិធី ដើម្បីបញ្ចៀសសង្គ្រាមបង្ហូរឈាម និងដើម្បីមិត្តភាព រួមទាំងកិច្ចសហប្រតិបត្តិការល្អជាមួយប្រទេសជិតខាង។
ជុំវិញបញ្ហានេះ សារព័ត៌មានជាច្រើនរបស់ថៃ បានចេញផ្សាយព្រោងព្រាតដោយបញ្ជាក់ថា កងទ័ពកម្ពុជា និងថៃ បានដកកម្លាំងចេញពីតំបន់មុំបី ខណៈលេណដ្ឋាន ឬត្រង់សេដែលកងទ័ពកម្ពុជាបានជីក ក៏មានការផ្សព្វផ្សាយថាត្រូវបានលុបទៅវិញដែរ។
ទោះជាមានសេចក្តីថ្លែងការណ៍របស់ក្រសួងការពារជាតិកម្ពុជា អំពីការប្រកាសមិនដកទ័ពពីតំបន់មុំបីក៏ដោយ ក៏តំណាងរាស្ត្រគណបក្សសង្គ្រោះជាតិ លោក អ៊ុំ សំអាន នៅតែអះអាងថា ការប្រកាសកែសម្រួលកងទ័ព គឺមានន័យថាដកទ័ព។ លោកបន្តថា លោក ហ៊ុន សែន បានដកទ័ពជាង ២០០ម៉ែត្រពីតំបន់មុំបី ដែលកងទ័ពកម្ពុជាបានជីកលេណដ្ឋានរួច ឬជីកត្រង់សេរួចទៅហើយ។ លោកថា រហូតមកទល់ពេលនេះ កម្ពុជាបានលុបត្រង់សេទាំងនោះរួចទៅហើយ។
លោក អ៊ុំ សំអាន លើកឡើងនៅថ្ងៃទី០៩ មិថុនា នេះថា ការដកទ័ពចេញពីតំបន់មុំបីតាមការស្នើសុំរបស់ថៃ អាចមានការសង្ស័យជាច្រើន ក្នុងនោះរួមមាន ការភ័យខ្លាចរបស់លោក ហ៊ុន សែន ទាក់ទិននឹងការទម្លាយអាថ៌កំបាំងដែលគាត់នៅពីក្រោយឃាតកម្មតំណាងរាស្ត្រគណបក្សសង្គ្រោះជាតិ លោក លិម គិមយ៉ា ជាដើម។ ជាងនេះទៀត លោក ហ៊ុន សែន ក៏អាចខ្លាចថៃ ផ្តល់ទីតាំងឱ្យសកម្មជននយោបាយ និងទាំងមន្ត្រីបក្សប្រឆាំងមានមូលដ្ឋានប្រឆាំងនឹងគាត់ដែរ។ លើសពីនេះ គាត់ក៏ខ្លាចបាត់បង់នូវផលប្រយោជន៍ដែលក្រុមគ្រួសាររបស់គាត់កំពុងរកស៊ីនៅប្រទេសថៃ ថែមទៀត៕
© 2025, ឌឹ ខេមបូឌា ដេលី. All rights reserved.