អ្នកនាំពាក្យព្រឹទ្ធសភាកម្ពុជា លោក ជា ធីរិទ្ធ ជំរុញឲ្យភាគីថៃ គួរប្តឹងលោក ហ៊ុន សែន ទៅកាន់តុលាការអន្តរជាតិ ករណីដែលថៃ មិនសុខចិត្តនឹងការបញ្ចេញសំឡេងសន្ទនារវាងប្រធានគណបក្សកាន់អំណាច ជាមួយនាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ បន្ទាប់ពីជំនួយការនាយករដ្ឋមន្ត្រីថៃ បានដាក់ពាក្យបណ្ដឹងទៅនាយកដ្ឋានសន្តិសុខជាតិថៃ។
អ្នកនាំពាក្យព្រឹទ្ធសភាកម្ពុជា លោក ជា ធីរិទ្ធ បានថ្លែងប្រាប់អ្នកសារព័ត៌មានថា ភាគីថៃ គួរប្តឹងលោក ហ៊ុន សែន ទៅតុលាការអន្តរជាតិ កុំគ្រាន់តែបញ្ចេញសំឡេងឲ្យតែមានការចាប់អារម្មណ៍។ លោកថា ភាគីថៃ នឹងមិនហ៊ានប្តឹងលោក ហ៊ុន សែន ទៅតុលាការអន្តរជាតិនោះទេ ពីព្រោះភាគីថៃ តែងតែខ្លាចច្បាប់អន្តរជាតិ។
យោងតាមការចេញផ្សាយរបស់សារព័ត៌មាន បាងកកប៉ុស្តិ៍ បានឲ្យដឹងថា កាលពីថ្ងៃទី២៣ ខែមិថុនា លោក Somkid Chueakong ជំនួយការនាយករដ្ឋមន្ត្រីថៃ បានដាក់ពាក្យបណ្ដឹងទៅនាយកដ្ឋានសន្តិសុខជាតិថៃ ដោយចោទប្រកាន់លោក ហ៊ុន សែន ពីបទគំរាមកំហែងសន្តិសុខជាតិថៃ។
សារព័ត៌មានខាងលើបានសរសេរថា បណ្តឹងនេះធ្វើឡើងក្រោយពីប្រធានព្រឹទ្ធសភាកម្ពុជា បានបញ្ចេញសំឡេងសន្ទនាតាមទូរសព្ទជាលក្ខណៈឯកជនរវាងមេដឹកនាំកម្ពុជា និងថៃ កាលពីថ្ងៃទី១៨ ខែមិថុនា ហើយដែលថៃ អះអាងថា ការបែកធ្លាយសំឡេងនេះ បានធ្វើឲ្យមានការខឹងសម្បា និងធ្វើឲ្យមានភាពតានតឹងនយោបាយនៅក្នុងប្រទេសថៃ។
ទាក់ទិនទៅនឹងករណីនេះ គណៈកម្មការជាតិប្រឆាំងអំពើពុករលួយថៃ ក៏ចាប់ផ្តើមស៊ើបអង្កេតទៅលើក្រមសីលធម៌របស់នាយករដ្ឋមន្ត្រី ផែថងថាន ស៊ីណាវ៉ាត់ ទាក់ទងនឹងការហៅទូរសព្ទទៅលោក ហ៊ុន សែន កាលពីថ្ងៃទី១៥ ខែមិថុនា និងដែលត្រូវបានបែកធ្លាយកិច្ចសន្ទនានៅថ្ងៃទី១៨ ខែមិថុនា។
កាលពីថ្ងៃទី២២ មិថុនា ក្រសួងការបរទេសកម្ពុជា ក៏បានផ្ញើកំណត់ការទូតទៅភាគីថៃ ដើម្បីធ្វើការតវ៉ាយ៉ាងខ្លាំង ដោយអះអាងថា ការថតសំឡេងទុក គឺជាការអនុវត្តទៅតាមស្តង់ដា និងការទទួលស្គាល់ជាអន្តរជាតិ ដែលរដ្ឋនានាត្រូវចងក្រងឯកសារស្ដីពីកិច្ចពិភាក្សារវាងថ្នាក់ដឹកនាំជាតិ ជាពិសេសនៅពេលប្រាស្រ័យទាក់ទងពាក់ព័ន្ធនឹងកិច្ចការទូត សន្តិសុខជាតិ ឬកិច្ចសហប្រតិបត្តិការទ្វេភាគី៕
© 2025, ឌឹ ខេមបូឌា ដេលី. All rights reserved.