អ៊ុយក្រែន ទទួលបានថវិកាប្រមាណ ៤៣ពាន់លានដុល្លារសម្រាប់ឧស្សាហកម្មការពារជាតិរបស់ខ្លួនក្នុងឆ្នាំ២០២៥ នេះ ដែលបានមកពីការផ្តល់មូលនិធិក្នុងស្រុក និងជំនួយពីសម្ព័ន្ធមិត្ត។
លោក វូឡូឌីមៀ ហ្សេឡេនស្គី (Volodymyr Zelenskyy) បាននិយាយថា ថវិកានេះនឹងត្រូវបានប្រើប្រាស់ដើម្បីបង្កើនការផលិត និងការទិញយន្តហោះគ្មានមនុស្សបើក កាំភ្លើងធំ និងអាវុធផ្សេងៗទៀត។
ទីក្រុងគៀវ (Kyiv) ក៏បានបើកដំណើរការកម្មវិធី Build with Ukraine ដោយបានប្រកាសកិច្ចព្រមព្រៀងថ្មីដែលត្រូវចុះហត្ថលេខានៅរដូវក្តៅនេះជាមួយក្រុមហ៊ុនផលិតអាវុធពីប្រទេសអាល្លឺម៉ង់ និងក្រុមហ៊ុនខ្លះមកពីសហរដ្ឋអាមេរិក រួមទាំងការសហការផលិតកម្មអាវុធនៅតាមបណ្តាប្រទេសអឺរ៉ុប ផងដែរ។
លោក ហ្សេឡេនស្គី បានប្រាប់អ្នកយកព័ត៌មាននៅទីក្រុងគៀវ កាលពីថ្ងៃទី២៣ ខែមិថុនា ថា អ៊ុយក្រែន នឹងផលិតអាវុធនៅក្នុងប្រទេសរបស់ខ្លួនដែលសម្ព័ន្ធមិត្តរបស់អ៊ុយក្រែន ក៏ជួយក្នុងគោលដៅពង្រឹងវិស័យការពារជាតិរបស់អ៊ុយក្រែន ហើយសម្ព័ន្ធមិត្តបានចូលរួមជួយផលិត និងអភិវឌ្ឍយន្តហោះគ្មានមនុស្សបើក គ្រាប់មីស៊ីល និងកាំភ្លើងធំ ដែលជាគោលដៅរួមគ្នាប្រឆាំងនឹងការវាយប្រហាររបស់រុស្ស៊ី មកលើអ៊ុយក្រែន។
អ៊ុយក្រែន កំពុងស្វែងរកការអភិវឌ្ឍសមត្ថភាពយោធាក្នុងស្រុករបស់ខ្លួន ខណៈដែលខ្លួនព្យាយាមទប់ទល់នឹងការឈ្លានពានរបស់រុស្ស៊ី រហូតមកដល់ឆ្នាំទីបួននៃការធ្វើសង្គ្រាមប្រឆាំងនឹងការឈ្លានពានរបស់រុស្ស៊ី។ តែជាមួយគ្នានេះ អ៊ុយក្រែន ក៏ចាប់ផ្ដើមបន្ថយការពឹងផ្អែកទៅលើជំនួយយោធាពីសម្ព័ន្ធមិត្ត ជាពិសេសពីសហរដ្ឋអាមេរិក។
យ៉ាងណាក៏ដោយ លោក ហ្សេឡេនស្គី និយាយថា វាជាអាទិភាពរបស់អ៊ុយក្រែន ក្នុងការទាមទារឱ្យសហរដ្ឋអាមេរិកនៅបន្តរក្សាការគាំទ្រចំពោះអ៊ុយក្រែន ខណៈដែលប្រទេសនៅអឺរ៉ុបមួយចំនួន បានបង្ហាញថា ពួកគេនឹងឈរនៅជាមួយអ៊ុយក្រែន ក្នុងការចំណាយទាំងអស់លើវិស័យការពារជាតិ។
ប៉ុន្តែលោក ហ្សេឡេនស្គី នៅតែបន្តលើកឡើងថា ស្ថានភាពលំបាកបំផុតគឺគ្មានការចូលរួមពីសហរដ្ឋអាមេរិកនោះទេ។ លោក ហ្សេឡេនស្គី ដែលបានចូលរួមកិច្ចប្រជុំកំពូលរបស់អង្គការណាតូ (NATO) នៅឯទីក្រុងឡាអេ កាលពីថ្ងៃទី២៤-២៥ ខែមិថុនា លោកក៏បានជួបនឹងលោក ដូណាល់ ត្រាំ និងមេដឹកនាំណាតូជាច្រើន។
ក្នុងជំនួបជាមួយលោកប្រធានាធិបតីសហរដ្ឋអាមេរិក លោក ត្រាំ បានយល់ព្រមលក់ប្រព័ន្ធការពារដែនអាកាស Patriot ទៅឱ្យអ៊ុយក្រែន ដែលនឹងធ្វើឱ្យអ៊ុយក្រែន មានភាពលំនឹងឡើងវិញ ប្រសិនបើប្រព័ន្ធការពារដែនអាកាស Patriot របស់សហរដ្ឋអាមេរិក ត្រូវបានដឹកទៅឱ្យអ៊ុយក្រែន បន្ថែមទៀតក្នុងពេលឆាប់ៗនេះ។
អ៊ុយក្រែន បានស្នើទិញប្រព័ន្ធការពារដែនអាកាស Patriot ពីសហរដ្ឋអាមេរិក ចំនួន ១០គ្រឿង ក្នុងទំហំ ១៥០០លានដុល្លារ។
បច្ចុប្បន្ននេះ អ៊ុយក្រែន មានប្រព័ន្ធការពារដែនអាកាស Patriot ដែលជាជំនួយរបស់រដ្ឋការលោក បៃដិន និងជំនួយរបស់អាល្លឺម៉ង់ ហុឡង់ដ៍ អ៊ីតាលី និងរ៉ូម៉ានី មានជិត ១០គ្រឿង ប៉ុន្តែលោក ហ្សេឡេនស្គី អះអាងថា អ៊ុយក្រែនត្រូវការរហូតដល់ទៅ ២០គ្រឿង ទើបអាចគ្រប់គ្រាន់ក្នុងការដំឡើងតាមតំបន់ជាច្រើននៅទូទាំងប្រទេសអ៊ុយក្រែន។
អ៊ុយក្រែន បានបញ្ជាក់ថា អ៊ុយក្រែនបានប្រើប្រាស់នូវប្រព័ន្ធការពារដែនអាកាស UAVs ក្នុងការបាញ់ទម្លាក់យន្តហោះគ្មានមនុស្សបើកប្រភេទ Shahed របស់រុស្ស៊ី។
កងកម្លាំងរុស្ស៊ី បន្តទម្លាក់គ្រាប់បែកតាមអាកាសទ្រង់ទ្រាយធំនៅទូទាំងប្រទេសអ៊ុយក្រែន សឹងតែរាល់ថ្ងៃ។ កាលពីថ្មីៗនេះ ទីក្រុងមូស្គូ បានបាញ់បង្ហោះយន្តហោះគ្មានមនុស្សបើកច្រើនរយគ្រឿង និងមីស៊ីលជាង ១០០គ្រាប់ នៅក្នុងសរយៈពេល ២សប្ដាហ៍មកនេះ។ នេះបើយោងតាមការបញ្ជាក់ពីអគ្គសេនាធិការរបស់អ៊ុយក្រែន។
តំបន់ Poltava នៃទឹកដីអ៊ុយក្រែន ជាទីតាំងនៃរោងចក្រចម្រាញ់ប្រេងដ៏សំខាន់មួយ ត្រូវបានកងកម្លាំងរុស្ស៊ី កំណត់គោលដៅវាយប្រហារជាថ្មីម្តងទៀត។
រុស្ស៊ី ក៏បន្តដឹកជញ្ជូនគ្រាប់បែក គ្រាប់រំសេវ និងសព្វាវុធផ្សេងទៀតទៅកាន់សមរភូមិជួរមុខនៅភាគខាងកើតអ៊ុយក្រែន ព្រមទាំងនៅភាគឦសាននៃតំបន់ Sumy តំបន់ Kharkiv តំបន់ Dnipropetrovsk និងតំបន់ផ្សេងទៀត។
លោក ហ្សេឡេនស្គី បានអំពាវនាវម្តងទៀតឱ្យបន្ថែមទណ្ឌកម្មទៅលើរុស្ស៊ី ដូចជាការកំណត់តម្លៃប្រេងរបស់រុស្ស៊ី ឱ្យទាបបំផុត ក៏ដូចជាការដាក់ទណ្ឌកម្មប្រឆាំងនឹងក្រុមហ៊ុន និងឧស្សាហកម្មការពារជាតិដែលសហការដោយផ្ទាល់ និងដោយប្រយោលជាមួយរុស្ស៊ី។
លោកបាននិយាយថា ក្រុមហ៊ុនការពារជាតិចំនួន៣៩ របស់រុស្ស៊ី បានចូលរួមក្នុងការផលិតមីស៊ីលផ្លោង Oreshnik របស់រុស្ស៊ី ដែលក្នុងនោះ ២១ក្រុមហ៊ុនមិនត្រូវបានទទួលរងនូវការដាក់ទណ្ឌកម្មនាពេលបច្ចុប្បន្ននេះទេ។
តែនៅខណៈនេះ សហភាពអឺរ៉ុប និងអង់គ្លេស បានបន្ថែមទណ្ឌកម្មលើតម្លៃប្រេងរបស់រុស្ស៊ី ឱ្យកាន់តែទាប គឺមិនដល់ ៥០ដុល្លារទេក្នុងប្រេងឆៅមួយបារ៉ែល ២០០លីត្រ ស្របពេលអឺរ៉ុប ដាក់ទណ្ឌកម្មលើនាវាដឹកប្រេងជាង ២០០គ្រឿងក្នុងបញ្ជីខ្មៅ ដែលត្រូវតាមប្រមាញ់រឹបអូស បើនាវាទាំងនោះសំដៅទៅដឹកប្រេង ឬដឹកប្រេងចេញពីប្រទេសរុស្ស៊ី៕
© 2025, ឌឹ ខេមបូឌា ដេលី. All rights reserved.