មន្ត្រីបក្សប្រឆាំង ចាត់ទុកថាការទម្លាយអាថ៌កំបាំងទំនាក់ទំនងរវាងលោក ហ៊ុន សែន ជាមួយនាយករដ្ឋមន្ត្រីថៃ ជាពិសេសត្រកូលស៊ីណាវ៉ាត់ ជាកំហុសក្រមសីលធម៌នយោបាយការទូតធ្ងន់ធ្ងរ ដែលជាហេតុធ្វើឱ្យមេដឹកនាំថៃ ជំនាន់ក្រោយ រួមទាំងមេដឹកនាំប្រទេសដទៃទៀតខ្លាចរអាក្នុងការទំនាក់ទំនងការទូតជាមួយកម្ពុជា។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី២៧ មិថុនា នេះថា ទំនាស់ជាមួយថៃ អំពីបញ្ហាព្រំដែនជារឿងងាយបំផុត គ្រាន់តែកម្ពុជាប្តឹងថៃ ទៅតុលាការអន្តរជាតិ គឺគ្រប់គ្រាន់ហើយ មិនចាំបាច់យករឿងបុគ្គលមកពាក់ព័ន្ធក្នុងស្ថានការណ៍នេះឱ្យមានសង្គ្រាមជាមួយប្រទេសថៃ នោះទេ។
លោក អ៊ុំ សំអាន លើកឡើងថា ការបង្ហាញជំហររបស់លោក ហ៊ុន សែន ក្នុងការការពារអធិបតេយ្យជាតិខ្មែរទៅកាន់ប្រទេសថៃ នៅពេលនេះ គឺជាការឆ្លៀតឱកាសកេងចំណេញក្នុងពេលដែលកម្ពុជាមានទំនាស់ព្រំដែនជាមួយថៃ ដើម្បីស្វែងរកប្រជាប្រិយភាពឱ្យលោក ហ៊ុន ម៉ាណែត ជាជាងមានចេតនាការពារទឹកដីខ្មែរពិតប្រាកដ។
លោកបន្ថែមថា បើលោក ហ៊ុន សែន មានចេតនាការពារទឹកដីខ្មែរមែន គាត់ក៏ត្រូវហ៊ានបំផុសគំនិតជាតិនិយមឱ្យពលរដ្ឋខ្មែរងើបឡើងតវ៉ាប្រឆាំងនឹងការឈ្លានពានទឹកដីពីប្រទេសវៀតណាម ដែរ ប៉ុន្តែផ្ទុយពីការប្រឆាំងនឹងការឈ្លានពានពីសំណាក់ប្រទេសថៃ គាត់បែរជាបំផុសគំនិតឱ្យពលរដ្ឋខ្មែរអរគុណវៀតណាម ទៅវិញ។
មន្ត្រីបក្សប្រឆាំងរូបនេះ ស្នើឱ្យលោក ហ៊ុន សែន កំណត់សកម្មភាពរបស់គាត់ឱ្យបានត្រឹមត្រូវ ដើម្បីការពារផលប្រយោជន៍ និងមុខមាត់របស់ប្រទេស ជាជាងការស្វែងរកមុខមាត់សម្រាប់តែនាយករដ្ឋមន្ត្រី លោក ហ៊ុន ម៉ាណែត កូនប្រុសរបស់គាត់ និងប្រយោជន៍សម្រាប់តែបក្សកាន់អំណាចក្នុងជម្លោះព្រំដែនជាមួយថៃ នាពេលនេះ។
លោក ហ៊ុន សែន ក្នុងពេលថ្មីៗនេះ គឺបានទម្លាយអាថ៌កំបាំងទំនាក់ទំនងជាមួយត្រកូលស៊ីណាវ៉ាត់ ខ្ទេចខ្ទី ក្រោយពីមានជម្លោះព្រំដែនកម្ពុជា-ថៃ នាពេលនេះ។
ប្រធានព្រឹទ្ធសភា លោក ហ៊ុន សែន បានលើកឡើងក្នុងកម្មវិធីផ្សាយផ្ទាល់ពិសេសឆ្លើយតបទៅកាន់នាយករដ្ឋមន្ត្រីថៃ ជាពិសេសត្រកូលស៊ីណាវ៉ាត់ ជុំវិញជម្លោះព្រំដែនរវាងប្រទេសទាំងពីរនៅថ្ងៃទី២៧ មិថុនា ថា រាប់ជំនាន់មកហើយ ថៃមិនដែលពឹងកម្ពុជាទេ ប៉ុន្តែជំនាន់ដឹកនាំរបស់លោក ថៃបានមកពឹងពាក់កម្ពុជាឱ្យជួយក្នុងកិច្ចការនយោបាយរបស់ថៃ។
លោក ហ៊ុន សែន ទម្លាយថា លោកធ្លាប់បានជួយត្រកូលស៊ីណាវ៉ាត់ រួមមានលោកអតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត់ និងអ្នកស្រី យីងឡាក់ ស៊ីណាវ៉ាត់ ផងដែរ ក្នុងនោះ លោក ថាក់ស៊ីន ធ្លាប់ត្រូវបានទៅជ្រកកោននៅផ្ទះរបស់លោក ខណៈអ្នកស្រី យីងឡាក់ ក៏ធ្លាប់ត្រូវលោកជួយរំដោះចេញពីទឹកដីថៃ ឆ្លងកាត់តាមប្រទេសកម្ពុជា ទៅប្រទេសទី៣ ថែមទៀត។ បន្ថែមពីនេះ លោកក៏បានផ្តល់លិខិតឆ្លងដែនសញ្ជាតិខ្មែរឱ្យអ្នកស្រី យីងឡាក់ ដើម្បីចាកចេញទៅប្រទេសទី៣ ផងដែរ។
ជុំវិញបញ្ហានេះ អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២៧ មិថុនា នេះថា ការទម្លាយទំនាក់ទំនងផ្ទាល់ខ្លួនដោយភ្ជាប់ជាមួយបញ្ហាព្រំដែនរវាងប្រទេស និងប្រទេស មិនត្រឹមតែធ្វើឱ្យមានការរារែកចិត្តក្នុងការកសាងទំនាក់ទំនងការទូតសម្រាប់មេដឹកនាំថៃ ក្រោយៗទៀតនោះទេ ថែមទាំងធ្វើឱ្យមានការរារែកចិត្តសម្រាប់មេដឹកនាំប្រទេសដទៃទៀតជាមួយកម្ពុជាដែរ។
លោក សេក សុជាតិ លើកឡើងថា គ្មាននរណានឹងស្មានដល់ទេថា នៅពីក្រោយបញ្ហាព្រំដែនកម្ពុជា-ថៃ មានរឿងអាថ៌កំបាំងរវាងលោក ហ៊ុន សែន និងត្រកូលស៊ីណាវ៉ាត់ ច្រើនដល់ម្ល៉ឹង ហើយការទម្លាយនូវអាថ៌កំបាំងនេះ ក៏នឹងបង្កបញ្ហាកាន់តែលំបាកសម្រាប់ប្រទេសទាំងពីរដើម្បីបញ្ចប់ទំនាស់នេះទៅថ្ងៃក្រោយផងដែរ។
ចំណែកមន្ត្រីជាន់ខ្ពស់បក្សប្រឆាំង លោក ហ៊ីង សុខសាន្ត អះអាងថា ការទម្លាយរឿងផ្ទាល់ខ្លួនរវាងលោក ហ៊ុន សែន និងត្រកូលស៊ីណាវ៉ាត់ វាគ្មានប្រយោជន៍អ្វីសោះសម្រាប់ជាតិ។ ផ្ទុយទៅវិញ វាធ្វើឲ្យជាតិខ្មែរអាប់ឱនកិត្តិយសប៉ុណ្ណោះ។
លោក ហ៊ីង សុខសាន្ត បញ្ជាក់ថា ទង្វើបែបនេះគេនឹងមើលមកកម្ពុជាក្នុងរូបភាពអវិជ្ជមានពីសហគមន៍អន្តរជាតិ ជាពិសេសគឺសមាគមន៍អាស៊ានតែម្តង ព្រោះវាជាទង្វើបំពានគោលការណ៍អាស៊ាន គឺការមិនជ្រៀតជ្រែកកិច្ចការផ្ទៃក្នុងនៃរដ្ឋសមាជិកដទៃ៕
© 2025, ឌឹ ខេមបូឌា ដេលី. All rights reserved.