ភ្នាក់ងារគយប្រទេសកម្ពុជា ហាមប្រាមការនាំចូលបន្លែ ផ្លែឈើ ប្រេងឥន្ធនៈ និងឧស្ម័នឥន្ធនៈពីប្រទេសថៃ ខណៈទំនិញផ្សេងទៀតអាចនាំចូលបានធម្មតាតាមមាត់ច្រកផ្លូវការនានា មានកំពង់ផែជាដើម ដែលមិនមែនជាមាត់ច្រកព្រំដែនគោកដែលត្រូវបានបិទជាឯកតោភាគីដោយក្រុមយោធាថៃ នោះ។
មូលហេតុនាំទៅដល់ការហាមប្រាមបែបនេះ ធ្វើឲ្យអ្នកសង្កេតការណ៍ខ្មែរមួយចំនួនមានក្តីមន្ទិលសង្ស័យ ហេតុអ្វីបិទតែច្រកព្រំដែនគោក?
តាមប្រភពព័ត៌មានគួរឲ្យជឿយកជាការបាន ថាមានក្រុមគ្រួសារមន្ត្រីយោធាជាន់ខ្ពស់នៃក្រសួងការពារជាតិ រកស៊ីដឹកទំនិញគេចពន្ធពីស្រុកថៃ ទៅស្រុកខ្មែរ កាត់តាមខេត្តកោះកុង ដោយមិនបាច់ដឹកតាមផ្លូវគោក។
អគ្គនាយកដ្ឋានគយ និងរដ្ឋាករកម្ពុជា ចេញសេចក្តីជូនដំណឹងនៅថ្ងៃទី១៦ កក្កដា នេះថា មុខទំនិញមានប្រភពដើមពីប្រទេសថៃ ដែលត្រូវបានហាមឃាត់មិនឱ្យនាំចូល មានបន្លែ និងផ្លែឈើ ចំណែកប្រេងឥន្ធនៈ និងឧស្ម័នឥន្ធនៈ មានដូចជា ប្រេងសាំង ប្រេងម៉ាស៊ូត ឧស្ម័នរាវសម្រាប់ដុត ប្រេងខ្មៅ និងប្រេងសាំងយន្តហោះផងដែរ។
សេចក្តីជូនដំណឹងដដែលនេះ អះអាងថា មុខទំនិញផ្សេងទៀតក្រៅពីមុខទំនិញដែលបានហាមឃាត់នេះ មិនមែនជាកម្មវត្ថុនៃការហាមប្រាមការនាំចូលឡើយ ដូច្នេះអាជីវករ ពាណិជ្ជករ អាចបន្តនាំចូលបានជាធម្មតាដោយបំពេញបែបបទ និងនីតិវិធីកំណត់ដោយលិខិតបទដ្ឋានជាធរមាន។
អគ្គនាយកដ្ឋានគយ បញ្ជាក់ថា ចំពោះតម្រាយផ្លូវ និងមធ្យោបាយដឹកជញ្ជូនទំនិញនាំចូលមកកម្ពុជា អាជីវករ ពាណិជ្ជករអាចប្រើប្រាស់មធ្យោបាយដឹកជញ្ជូនផ្សេងៗ និងតាមមាត់ច្រកផ្លូវការនានា លើកលែងតែមាត់ច្រកព្រំដែនផ្លូវគោករវាងកម្ពុជា-ថៃ ដែលត្រូវបានបិទជាឯកតោភាគីដោយយោធាថៃ ប៉ុណ្ណោះ។
កាលពីថ្ងៃទី១៧ ខែមិថុនា កន្លងទៅ អគ្គនាយកដ្ឋានគយ និងរដ្ឋាករកម្ពុជា បានហាមឃាត់ត្រឹមតែការនាំចូលបន្លែ និងផ្លែឈើគ្រប់ប្រភេទប៉ុណ្ណោះពីប្រទេសថៃ ចំណែកទំនិញផ្សេងទៀតនៅដំណើរការធម្មតា ទោះថៃ បានសម្រេចបិទច្រកព្រំដែនរវាងប្រទេសទាំងពីរដោយឯកតោភាគីតាំងពីថ្ងៃទី៧ មិថុនា ទៅហើយក្តី។
ជុំវិញការបិទច្រកព្រំដែនពីសំណាក់ភាគីថៃ នេះ កម្ពុជាតែងអំពាវនាវឱ្យភាគីថៃ បើកព្រំដែនឡើងវិញទាំងអស់ដូចដើម នោះកម្ពុជាក៏នឹងទម្លាក់ចោលរបាំងហាមឃាត់បន្លែ ផ្លែឈើពីប្រទេសថៃ ដែរ ប៉ុន្តែភាគីថៃ នៅបន្តបិទព្រំដែនបន្តទៀតដដែល។
រហូតដល់ថ្ងៃទី២២ មិថុនា នាយករដ្ឋមន្ត្រីកម្ពុជា លោក ហ៊ុន ម៉ាណែត ក៏បានចេញបញ្ជាឱ្យផ្អាកការនាំចូលប្រេងឥន្ធនៈ និងឧស្ម័នឥន្ធនៈគ្រប់ប្រភេទពីប្រទេសថៃ ទាំងស្រុងតែម្តង។
ជាងនេះទៀត កាលពីដើមខែកក្កដា កន្លងទៅ មេដឹកនាំបក្សកាន់អំណាច លោក ហ៊ុន សែន ក៏បានបញ្ជាឱ្យរដ្ឋាភិបាលកម្ពុជា បញ្ឈប់ការនាំចូលមុខទំនិញមួយចំនួនពីប្រទេសថៃ បន្ថែមទៀតដែលត្រូវបានចាត់ទុកជាមុខទំនិញយុទ្ធសាស្ត្រ ដូចជា អគ្គិសនី អ៊ីនធឺណិត ប្រេងឥន្ធនៈ និងឧស្ម័ន រួមទាំងការបញ្ឈប់ចាក់បញ្ចាំងភាពយន្តថៃ ទាំងអស់ នៅក្នុងប្រទេសកម្ពុជាផងដែរ។
គិតមកទល់នឹងថ្ងៃទី១៦ ខែកក្កដា នេះ កម្ពុជាបានហាមឃាត់មុខទំនិញពីប្រទេសថៃ ចំនួន ១១មុខហើយ រួមមានបន្លែ ផ្លែឈើ ប្រេងសាំង ប្រេងម៉ាស៊ូត ឧស្ម័នរាវសម្រាប់ដុត ប្រេងខ្មៅ ប្រេងសាំងយន្តហោះ អគ្គិសនី អ៊ីនធឺណិត ភាពយន្ត និងកីឡាករប្រដាល់ថៃ ផងដែរ។ នៅតាមហាងលក់ទំនិញក្នុងខេត្តខ្លះ ទេសចរឃើញធ្នើរដាក់តាំងទំនិញវាលស្រឡះ ប៉ុន្តែកន្លែងខ្លះ អាជីវករពាណិជ្ជករងាកទៅដឹកទំនិញពីប្រទេសយៀកណាម មកបំពេញវិញ៕
© 2025, ឌឹ ខេមបូឌា ដេលី. All rights reserved.