អ្នកវិភាគឯករាជ្យចាស់វស្សាដ៏មានបទពិសោធខ្ពស់ម្នាក់ លើកឡើងថា បើរដ្ឋាភិបាលប្រទេសណាស្នើឱ្យរដ្ឋាភិបាលកម្ពុជាផ្តល់សញ្ជាតិខ្មែរទៅឱ្យជនជាតិរបស់ពួកគេដែលកំពុងរស់នៅលើទឹកដីខ្មែរ នោះរដ្ឋាភិបាលកម្ពុជាក៏គួរតែស្នើឱ្យរដ្ឋាភិបាលនៃប្រទេសនោះផ្តល់សញ្ជាតិឱ្យអ្នកទាំងនោះវិញដែរ។
បណ្ឌិត ឡៅ ម៉ុងហៃ សរសេរលើគណនីហ្វេសប៊ុករបស់ខ្លួននៅថ្ងៃទី២២ កក្កដា នេះថា រដ្ឋាភិបាលរបស់ជនបរទេសដែលកំពុងរស់នៅដោយខុសច្បាប់លើទឹកដីខ្មែរ មិនទាំងផ្តល់សញ្ជាតិឱ្យជនជាតិរបស់គេផង តើមានមូលហេតុអ្វីដែលត្រូវមកស្នើឱ្យរដ្ឋាភិបាលកម្ពុជាផ្តល់សញ្ជាតិខ្មែរទៅឱ្យជនបរទេសទាំងនោះ។
បណ្ឌិត ឡៅ ម៉ុងហៃ បញ្ជាក់ថា ជនបរទេសទាំងអស់ដែលមករស់នៅលើទឹកដីកម្ពុជា សុទ្ធតែមានសញ្ជាតិពីកំណើតរបស់ពួកគេរួចអស់ហើយ ដូច្នេះមិនចាំបាច់ត្រូវស្នើឱ្យរដ្ឋាភិបាលកម្ពុជាផ្តល់សញ្ជាតិខ្មែរឱ្យជនបរទេសទាំងនោះទៀតទេ។
ការអះអាងនេះ ធ្វើឡើងស្របពេលដែលរដ្ឋាភិបាលកម្ពុជាបានផ្តល់សញ្ជាតិខ្មែរឱ្យពលរដ្ឋវៀតណាមដែលបានចូលទៅរស់នៅក្នុងប្រទេសកម្ពុជាដោយខុសច្បាប់រាប់ពាន់នាក់ គិតត្រឹមឆ្នាំ២០២៥ នេះ។
កាលពីថ្ងៃទី៨ ខែកក្កដា ឆ្នាំ២០២៥ អគ្គនាយកដ្ឋានអត្តសញ្ញាណកម្ម បានអះអាងថា គិតចាប់ពីឆ្នាំ១៩៩៩ មក កម្ពុជាបានផ្តល់សញ្ជាតិខ្មែរដល់ជនបរទេសសរុបជាង ៥ពាន់នាក់ហើយ ដែលចំនួននេះគឺនៅតិចនៅឡើយ បើធៀបនឹងប្រទេសក្នុងតំបន់។
សម្រាប់សញ្ជាតិខ្មែរដែលផ្តល់ឱ្យជនបរទេសទាំងជាង ៥ពាន់នាក់នេះ គេអាចប៉ាន់ប្រមាណបានថា ជនជាតិវៀតណាម ទទួលបានសញ្ជាតិខ្មែរជាង ៤ពាន់នាក់ ព្រោះបើយោងតាមលិខិតក្រសួងមហាផ្ទៃ បានបញ្ជាក់ថា ជនបរទេសទាំង ១០សញ្ជាតិ ក្រៅពីជនជាតិវៀតណាម ដែលបានស្នើសុំបណ្ណស្នាក់នៅអចិន្ត្រៃយ៍នៅក្នុងប្រទេសកម្ពុជា មានត្រឹមតែជាង ៣០០នាក់ (៣១៥នាក់) ប៉ុណ្ណោះ ខណៈជនជាតិវៀតណាម មានរហូតដល់ទៅជិត ១សែននាក់នោះ។
លិខិតក្រសួងមហាផ្ទៃ ចុះថ្ងៃទី១០ ខែកក្កដា ឆ្នាំ២០២០ បង្ហាញថា ជនបរទេសអន្តោប្រវេសន៍នៅទូទាំងប្រទេសកម្ពុជា បានស្នើសុំប្រកាសទទួលស្គាល់ជាជនអន្តោប្រវេសន៍ និងសុំបណ្ណស្នាក់នៅអចិន្ត្រៃយ៍ជាង ៨ម៉ឺន ៩ពាន់នាក់ (៨៩៧៨៦នាក់)។
លិខិតដដែលបញ្ជាក់ថា ក្នុងចំណោមជនបរទេសទាំងជាង ៨ម៉ឺននាក់នេះ គឺស្មើនឹងជាង ២ម៉ឺន ៨ពាន់គ្រួសារ (២៨៩៤៥គ្រួសារ) ដែលមាន ១១សញ្ជាតិ ក្នុងនោះ ជនជាតិវៀតណាម មានចំនួន ៨ម៉ឺន ៩៤៧១នាក់ ខណៈជនបរទេស ១០សញ្ជាតិផ្សេងទៀតដែលទទួលបានបណ្ណស្នាក់នៅមានត្រឹមតែជាង ៣០០នាក់ (៣១៥នាក់) ប៉ុណ្ណោះ។
ជុំវិញបញ្ហានេះ ក្រុមអ្នកវិភាគលើកឡើងថា តាមពិត មេដឹកនាំវៀតណាម កន្លងមកបានស្នើឱ្យរដ្ឋាភិបាលកម្ពុជាផ្តល់សញ្ជាតិខ្មែរដល់ជនជាតិវៀតណាម ដែលកំពុងរស់នៅលើទឹកដីខ្មែរដោយខុសច្បាប់រហូតមក គ្រាន់តែពួកគេមិនបាននិយាយដោយត្រង់ប៉ុណ្ណោះ គឺស្នើឱ្យផ្តល់បណ្ណស្នាក់នៅជំនួសវិញ។
ប្រភពដដែល អះអាងថា ការស្នើឱ្យរដ្ឋាភិបាលកម្ពុជាផ្តល់បណ្ណស្នាក់នៅអចិន្ត្រៃយ៍ដល់ជនជាតិវៀតណាម ទាំងនោះ ក៏មិនខុសពីការស្នើសុំឱ្យផ្តល់សញ្ជាតិខ្មែរដល់ពួកគេដែរ ព្រោះបើយោងតាមច្បាប់សញ្ជាតូបនីយកម្ម ជនបរទេសដែលមានបណ្ណស្នាក់នៅប្រទេសកម្ពុជាជាប់គ្នា ៧ឆ្នាំ នឹងទទួលបានសញ្ជាតិខ្មែរដោយស្វ័យប្រវត្តិ។
យោងតាមលក្ខខណ្ឌនេះ គេអាចសន្និដ្ឋានបានថា ជនបរទេសដែលទទួលបានបណ្ណស្នាក់នៅអចិន្ត្រៃយ៍ជាង ៨ម៉ឺន ៩ពាន់នាក់ (៨៩៧៨៦នាក់) ដែលមានជនជាតិវៀតណាម ៨ម៉ឺន ៩៤៧១នាក់ តាំងពីឆ្នាំ២០១៩ មកនោះ មានន័យថា ឆ្នាំ២០២៦ ខាងមុខ គឺគ្រប់ចំនួន ៧ឆ្នាំតែម្តង ដូច្នេះជនជាតិវៀតណាម ទាំងជាង ៨ម៉ឺននាក់នេះ ក៏ត្រូវទទួលបានសញ្ជាតិខ្មែរដោយស្វ័យប្រវត្តិដែរ។
មាត្រា១៩ នៃច្បាប់ស្ដីពីសញ្ជាតិ ត្រង់ជំពូក៦ ដែលចែងអំពីសញ្ជាតូបនីយកម្ម កំណត់ថា ជនបរទេសដែលអាចសុំសញ្ជាតូបនីយកម្មបាន ត្រូវមានទីលំនៅក្នុងព្រះរាជាណាចក្រកម្ពុជា ហើយស្នាក់នៅជាប់ចំនួន ៧ឆ្នាំ ដោយគិតពីថ្ងៃទទួលបានបណ្ណស្នាក់នៅ៕
© 2025, ឌឹ ខេមបូឌា ដេលី. All rights reserved.