នៅកណ្តាលទីក្រុងគៀវ ពលរដ្ឋអ៊ុយក្រែនច្រើនលាននាក់ បានឆ្លងកាត់ស្ថានភាពដ៏ស្លុតរន្ធត់ គឺនៅយប់ថ្ងៃពុធឈានចូលថ្ងៃព្រហស្បតិ៍ ទី២៨ សីហា កងទ័ពរុស្ស៊ី បានប្រើដ្រូនជិត ៦០០គ្រឿង និងមីស៊ីលជាង ៣០គ្រាប់ សម្រុកវាយប្រហារយ៉ាងសន្ធាប់លើរដ្ឋធានីគៀវ ដែលបានសម្លាប់ពលរដ្ឋអ៊ុយក្រែន ជាច្រើននាក់។
បើគិតត្រឹមថ្ងៃព្រហស្បតិ៍ ទី២៨ សីហា អ្នកស្លាប់ ១៤នាក់ ក្នុងនោះកុមារ ៣នាក់ និងអ្នករបួសមានជាង ៤០នាក់។ នេះបើតាមការបញ្ជាក់របស់អាជ្ញាធររដ្ឋធានីគៀវ។
សារព័ត៌មានអ៊ុយក្រែន RBC Ukraine ចុះផ្សាយថា លោក វូឡូឌីមៀ ហ្សេឡេនស្គី ប្រធានាធិបតីអ៊ុយក្រែន សម្ដែងប្រតិកម្មថា កងទ័ពរុស្ស៊ី បានបើកប្រតិបត្តិការវាយប្រហារចំកណ្ដាលបេះដូងប្រទេសអ៊ុយក្រែន គឺរដ្ឋធានីគៀវ។
តាមលោក ហ្សេឡេនស្គី ការវាយប្រហាររបស់រុស្ស៊ី បានបង្ហាញឲ្យឃើញថា របបនៅទីក្រុងមូស្គូ ដាក់ផែនការបាញ់មីស៊ីលបាលិស្ទិក ជាការបន្តសម្លាប់មនុស្ស បង្កការឈឺចាប់ដល់ប្រជាជនអ៊ុយក្រែន ឥតស្ដាយក្រោយឡើយ។
លោកប្រធានាធិបតីអ៊ុយក្រែន ហ្សេឡេនស្គី បានសង្កត់ធ្ងន់ថា ការវាយប្រហារនេះ គឺជាចម្លើយពីរុស្ស៊ី ចំពោះការអំពាវនាវឲ្យមានបទឈប់បាញ់ ដោយរុស្ស៊ី សម្រេចជ្រើសរើសផ្លោងមីស៊ីលជំនួសឲ្យតុចរចា។
ជាថ្មីម្តងទៀត លោក ហ្សេឡេនស្គី បានបន្តអំពាវនាវឱ្យអន្តរជាតិ បញ្ចេញប្រតិកម្មធ្ងន់ៗ និងជាបន្ទាន់ចំពោះទង្វើរបស់រុស្ស៊ី ហើយជាពិសេសស្នើឱ្យសម្ព័ន្ធមិត្តរបស់រុស្ស៊ី ដូចជាចិន និងហុងគ្រី ត្រូវដូរជំហរចេញពីការគាំទ្ររុស្ស៊ី។
លោក ហ្សេឡេនស្គី បានអំពាវនាវទៅប្រទេសចិន ដែលតាំងខ្លួនជាប្រទេសអព្យាក្រឹត និងប្រទេសហុងគ្រី ឲ្យចូលរួមសាមគ្គីក្នុងជំហររួមមួយដាក់សម្ពាធទៅលើរបបនៅក្រុងមូស្គូ។ លោក ហ្សេឡេនស្គី ក៏កំពុងរង់ចាំប្រតិកម្មពីពិភពលោកទាំងមូលបញ្ចេញប្រតិកម្មទៅនឹងរុស្ស៊ី តែសង្ឃឹមថាបណ្តាប្រទេសដែលមានអំណាច និងសេដ្ឋកិច្ចខ្លាំង នឹងចូលរួមដាក់បន្ថែមទណ្ឌកម្មសង្កត់រុស្ស៊ី ថែមទៀត ជាពិសេស លោក ហ្សេឡេនស្គី កំពុងរង់ចាំលោក ដូណាល់ ត្រាំ ថាតើប្រតិកម្មដូចម្ដេចទៀតចំពោះទង្វើដ៏ឃោរឃៅរបស់លោកប្រធានាធិបតីរុស្ស៊ី វ៉្លាឌីមៀ ពូទីន។
តាមអាជ្ញាធរក្រុងគៀវ ការវាយប្រហាររបស់រុស្ស៊ី នៅពេលនេះ រុស្ស៊ីបាញ់បង្ហោះដ្រូន ៥៩៨គ្រឿង និងមីស៊ីល ៣១គ្រាប់ ក្នុងនោះមានមីស៊ីលបាលិស្ទិក Iskander ៩គ្រាប់ ជាមីស៊ីលដ៏មានអានុភាពយ៉ាងខ្លាំង។
រលកនៃការវាយប្រហារលើកនេះ បានប៉ះពាល់ទៅដល់អគារលំនៅឋាន កន្លែងអគារការិយាល័យធ្វើការ និងសួនកុមារកម្សាន្ត ព្រមទាំងហេដ្ឋារចនាសម្ព័ន្ធផ្លូវដែកចំនួនជាង ២០ទីតាំងសំខាន់ៗនៅតំបន់គៀវ។ អគារស្នាក់នៅខ្លះកម្ពស់ ៥ជាន់ ត្រូវគ្រាប់មីស៊ីលរុស្ស៊ី ធ្វើឲ្យរលំបាក់រាបដល់ដី។ ជាមួយគ្នានេះ ការិយាល័យរបស់ស្ថានបេសកកម្មសហភាពអឺរ៉ុបប្រចាំក្រុងគៀវ តាមឯកអគ្គរដ្ឋទូតសហភាពអឺរ៉ុបប្រចាំអ៊ុយក្រែន អ្នកស្រី Katarina Mathernova ក៏បានអះអាងថា អគារប្រតិភូសហភាពអឺរ៉ុបនៅទីក្រុងគៀវ បានរងការខូចខាតយ៉ាងធ្ងន់ធ្ងរដែរ។ សាលាមួយកន្លែងជាសាលាបង្រៀនភាសាអង់គ្លេសនៅក្រុងគៀវ ក៏រងគ្រោះបាក់បែកយ៉ាងធ្ងន់ធ្ងរ ដោយប្រកាសបិទទ្វារចាប់ពីពេលនេះតទៅ។
ទោះជាយ៉ាងនេះក្តី ភាគីរុស្ស៊ី អះអាងថា ការវាយប្រហាររបស់ខ្លួនសំដៅតែទៅលើទីតាំងយោធាតែប៉ុណ្ណោះ។
ក្នុងស្ថានភាពអាសន្ននេះ ក្រុមអ្នកសង្គ្រោះបន្ទាន់ប្រមាណ ៥០០នាក់ និងប៉ូលិសជាង ១០០០នាក់ ចូលរួមជួយសង្គ្រោះពន្លត់ភ្លើង និងស្វះស្វែងរកមនុស្សដែលបាត់ខ្លួននៅក្រោមគំនរបាក់បែកដោយសារអគារដួលរលំ។
ភ្លាមៗនោះ ប្រធានាធិបតីបារាំង បានហៅការវាយប្រហារពីរុស្ស៊ី ថាជាអំពើឃោរឃៅព្រៃផ្សៃបំផុត ដែលវិមានក្រឹមឡាំង មិនចង់បញ្ចប់សង្គ្រាមឡើយ។
ប្រធានក្រុមប្រឹក្សាអឺរ៉ុប លោក António Costa ថ្លែងថ្កោលទោសរុស្ស៊ី តែលោករំលែកទុក្ខចំពោះជនរងគ្រោះអ៊ុយក្រែន និងប្រកាសថា សហភាពអឺរ៉ុប នៅតែប្ដេជ្ញាចិត្តបន្តជួយគាំទ្រអ៊ុយក្រែន ជានិច្ច ហើយថាការចាត់វិធានការថ្មីប្រឆាំង នឹងត្រូវកំណត់ឡើង។
ការវាយប្រហារដ៏ខ្លាំងពីរុស្ស៊ី លើរដ្ឋធានីគៀវ នៅយប់ចូលដល់ថ្ងៃទី២៨ សីហា តែមួយថ្ងៃប៉ុណ្ណោះដែលរុស្ស៊ី អះអាងថា កងកម្លាំងរបស់ខ្លួនចាប់យកបានទីតាំងថ្មីមួយទៀតក្នុងតំបន់ Dnipropetrovsk ខាងអ៊ុយក្រែន។
តាមក្រសួងការពារជាតិរុស្ស៊ី ភូមិដែលទ័ពរុស្ស៊ី ចាប់យកបាន គឺមានឈ្មោះ Filia ស្ថិតនៅក្នុងតំបន់ Dnipropetrovsk គឺជាទីតាំងថ្មី។ ក្រុងមូស្គូ និយាយទៀតថា ខ្លួនកំពុងធ្វើផ្លូវចូលទៅក្នុងតំបន់ Dnipropetrovsk ប៉ុន្តែកងកម្លាំងអ៊ុយក្រែន បាននិងកំពុងវាយបកដើម្បីយកភូមិនានានៅក្នុងតំបន់ Donetsk ដែលជាការវាយទប់ស្កាត់ការឈានទៅមុខរបស់ទ័ពរុស្ស៊ី។
មេបញ្ជាការកំពូលកងទ័ពអ៊ុយក្រែន ឧត្ដមសេនីយ៍ Oleksandr Syrskyi បាននិយាយថា កងកម្លាំងអ៊ុយក្រែន បានដណ្តើមយកភូមិចំនួន៣ មកវិញនៅតំបន់ Donetsk។
សង្គ្រាមបង្កដោយរុស្ស៊ី នៅអ៊ុយក្រែន ចូលដល់ជាង ៣ឆ្នាំ ៦ខែហើយ។ ផែនការសន្តិភាពផ្តើមគំនិតដោយប្រធានាធិបតីសហរដ្ឋអាមេរិក លោក ដូណាល់ ត្រាំ កំពុងត្រូវបានលោក ពូទីន លេងសើច ហើយបន្តអូសពេលវេលា ព្រោះតែទ័ពរុស្ស៊ី កំពុងមានប្រៀបជាងទ័ពអ៊ុយក្រែន នៅលើសមរភូមិ៕
© 2025, ឌឹ ខេមបូឌា ដេលី. All rights reserved.