លោក វូឡូឌីមៀ ហ្សេឡេនស្គី និយាយថា លោកបានត្រៀមខ្លួនរួចរាល់ដើម្បីចុះចេញពីអំណាចជាប្រធានាធិបតីអ៊ុយក្រែន ក្រោយពីសង្គ្រាមជាមួយរុស្ស៊ី ត្រូវបានបិទបញ្ចប់។ នេះបើតាមការចេញផ្សាយដោយសារព័ត៌មាន New York Post នៅថ្ងៃទី២៦ កញ្ញា។
ក្នុងកិច្ចសម្ភាសតាមប្រព័ន្ធវីដេអូជាមួយសារព័ត៌មានអាមេរិក Axios លោក ហ្សេឡេនស្គី បានបញ្ជាក់ដូចនេះថា៖ «ប្រសិនបើអ៊ុយក្រែន បិទបញ្ចប់សង្គ្រាមជាមួយរុស្ស៊ី ពិតណាស់ ខ្ញុំត្រៀមជាស្រេចមិនបន្តឈរឈ្មោះបោះឆ្នោតអាណត្តិទី២ របស់ខ្ញុំទៀតនោះទេ ព្រោះវាមិនមែនជាគោលដៅរបស់ខ្ញុំនោះទេ។ ខ្ញុំចង់នៅជាមួយប្រទេសខ្ញុំ ជួយប្រទេសខ្ញុំ ក្នុងគ្រាដ៏សែនលំបាកមួយ។ គោលដៅរបស់ខ្ញុំ គឺបញ្ចប់សង្គ្រាមឱ្យបាន។»
លោក ហ្សេឡេនស្គី បានបន្តថា លោកនឹងស្នើឱ្យសភាអ៊ុយក្រែន រៀបចំការបោះឆ្នោតថ្មី បើមានបទឈប់បាញ់ត្រូវបានអនុវត្តជាផ្លូវការ។
លោក ហ្សេឡេនស្គី មានអាយុ ៤៧ឆ្នាំ។ លោកបានជាប់ឆ្នោតជាប្រធានាធិបតីអ៊ុយក្រែន នៅក្នុងការបោះឆ្នោតនៅខែមេសា ឆ្នាំ២០១៩។ ការបោះឆ្នោតអាណត្តិថ្មីនៅអ៊ុយក្រែន ត្រូវកំណត់ធ្វើឡើងនៅខែមេសា ឆ្នាំ២០២៤ តែត្រូវបានផ្អាកដោយសារតែច្បាប់អាជ្ញាសឹក ដែលត្រូវបានដាក់ចេញនៅអ៊ុយក្រែន បន្ទាប់ពីសង្គ្រាមឈ្លានពានរបស់រុស្ស៊ី បានផ្ទុះឡើងកាលពីខែកុម្ភៈ ឆ្នាំ២០២២។ ដោយសារតែហេតុផលនេះ រុស្ស៊ីបានចោទសួរអំពីភាពស្របច្បាប់នៃឋានៈជាមេដឹកនាំរបស់លោក ហ្សេឡេនស្គី។
អំឡុងសង្គ្រាមរយៈពេលជាង ៣ឆ្នាំកន្លះមកនេះ លោក ហ្សេឡេនស្គី នៅតែទទួលបានការជឿជាក់កម្រិតខ្ពស់ក្នុងចំណោមសាធារណជនអ៊ុយក្រែន។
ការស្ទង់មតិមួយធ្វើឡើងដោយវិទ្យាស្ថាន Kyiv International Institute of Sociology កាលពីដើមខែនេះ បានបង្ហាញថា ប្រជាជនអ៊ុយក្រែន ជិត ៧០ភាគរយ នៅតែជឿទុកចិត្តលើលោក ហ្សេឡេនស្គី ក្នុងការដឹកនាំប្រទេសដែលកំពុងហែកហួរដោយសង្គ្រាមរបស់រុស្ស៊ី។
ប្រជាជនអ៊ុយក្រែន និងអ្នកនយោបាយអឺរ៉ុបភាគច្រើន បានហៅលោក ហ្សេឡេនស្គី ជាវីរជនសង្គ្រាមពិតៗមិនក្លែងក្លាយឡើយ ព្រោះលោកហ៊ាននិយាយ គឺហ៊ានធ្វើ។
លោក ហ្សេឡេនស្គី តែងតែចុះទៅជួបកងទ័ពនៅសមរភូមិជួរមុខ។ លោកជាមេដឹកនាំអ៊ុយក្រែន ដែលមិនលុតជង្គង់ដើម្បីសន្តិភាពនឹងអ្នកឈ្លានពានឡើយ។ លោក ហ្សេឡេនស្គី មិនដែលពោលពាក្យ ឬបង្ហើបការចរចាបញ្ចប់សង្គ្រាមជាមួយនឹងការកាត់ច្រៀកទឹកដីណាមួយទៅឱ្យរុស្ស៊ី ឡើយ។ លោកតែងតែនិយាយថា រដ្ឋធម្មនុញ្ញអ៊ុយក្រែន មិនបានផ្ដល់សិទ្ធិឱ្យប្រធានាធិបតីកាត់ទឹកដីឱ្យអ្នកឈ្លានពានជាថ្នូរនឹងសន្តិភាពម្ដងណាឡើយ។
ថ្លែងទៅកាន់មហាសន្និបាតអង្គការសហប្រជាជាតិ កាលពីថ្ងៃទី២៤ កញ្ញា លោក ហ្សេឡេនស្គី បានជំរុញឱ្យមហាអំណាចពិភពលោកជួយបញ្ឈប់សង្គ្រាមរុស្ស៊ី នៅក្នុងប្រទេសរបស់លោក។ លោកព្រមានអំពីការប្រកួតប្រជែងអាវុធដ៏គ្រោះថ្នាក់ដែលលោកបាននិយាយថា សង្គ្រាមនេះបង្កើតឲ្យមានការប្រកួតប្រជែងគ្នាខាងអាវុធដែលគួរឲ្យព្រួយបារម្ភ។
លោក ហ្សេឡេនស្គី បានអំពាវនាវឱ្យមានច្បាប់សកលមួយដ៏រឹងមាំ ដើម្បីទប់ស្កាត់ការប្រើប្រាស់បញ្ញាសិប្បនិម្មិតក្នុងសង្គ្រាម ខណៈដែលលោកព្រមានថា យន្តហោះគ្មានមនុស្សបើកហៅថាដ្រូន ដែលរុស្ស៊ី វាយប្រហារអ៊ុយក្រែន វាអាចផ្ទុកគ្រាប់នុយក្លេអ៊ែរ។ ជាមួយគ្នានេះ លោក ហ្សេឡេនស្គី ក៏បានថ្កោលទោសប្រធានាធិបតីរុស្ស៊ី លោក វ្ល៉ាឌីមៀ ពូទីន ពីបទប៉ុនប៉ងពង្រីកវិសាលភាពសង្គ្រាមឲ្យលើសពីប្រទេសអ៊ុយក្រែន ហើយចូលដល់ប្រទេសនៅអឺរ៉ុប។
ការអត្ថាធិប្បាយរបស់លោក ហ្សេឡេនស្គី បានធ្វើឡើងមួយថ្ងៃបន្ទាប់ពីបានជួបប្រធានាធិបតីអាមេរិក លោក ដូណាល់ ត្រាំ នៅឯអង្គការសហប្រជាជាតិ ដែលលោក ត្រាំ បង្ហាញជំហរតឹងរ៉ឹងជាងមុនទៅលើវិមានក្រឹមឡាំង។
លោក ត្រាំ បានប្រាប់លោក ហ្សេឡេនស្គី ថា អ៊ុយក្រែនអាចដណ្តើមយកមកវិញនូវទឹកដីដែលរុស្ស៊ី កាន់កាប់ទាំងអស់ ដែលជាការផ្លាស់ប្ដូរដ៏អស្ចារ្យនៅក្នុងសមរភូមិ។ ជាមួយគ្នានេះ លោក ត្រាំ ក៏បានគាំទ្រគំនិតនៃការបាញ់ទម្លាក់យន្តហោះចម្បាំងរុស្ស៊ី ដែលរំលោភដែនអាកាសរបស់អង្គការណាតូ បើមានហេតុការណ៍កើតឡើងម្ដងទៀត។
កាលពីថ្ងៃទី១៩ កញ្ញា យន្តហោះរុស្ស៊ី MIG-31 ចំនួន ៣គ្រឿង ហោះចូលលម្ហអាកាសនៃប្រទេសអេស្តូនី ដែលនាំឱ្យណាតូកោះប្រជុំសមភាគីតាមមាត្រា៤ នៃធម្មនុញ្ញរបស់ណាតូ។ ការកោះប្រជុំនេះ បាននាំឱ្យលោកអគ្គលេខាធិការនៃអង្គការណាតូ Mark Rutte ប្រកាសគាំទ្រជំហររបស់លោក ដូណាល់ ត្រាំ ដែលថាប្រទេសសមាជិកណាតូ គួរតែបាញ់ទម្លាក់ដ្រូន និងយន្តហោះរបស់រុស្ស៊ី ប្រសិនបើចូលទៅក្នុងដែនអាកាសពួកគេនៅក្នុងករណីចាំបាច់។
លោក Rutte បានប្រាប់សារព័ត៌មាន Fox News ថា៖ «បើវាចាំបាច់ យើងក៏យល់ស្របទាំងស្រុងដូចប្រធានាធិបតី ត្រាំ លើកឡើង តែយើងទទូចថា យោធាណាតូត្រូវបានបណ្តុះបណ្តាលវាយតម្លៃឆ្លើយតបនឹងការគំរាមកំហែងបែបនេះ និងកំណត់ថា តើពួកគេអាចយកយន្តហោះរុស្ស៊ី ចេញពីទឹកដីសម្ព័ន្ធមិត្តបានឬទេ។»
យ៉ាងណា រដ្ឋមន្ត្រីការបរទេសរុស្ស៊ី លោក Sergei Lavrov បានចោទវាយបកវិញថា អង្គការណាតូ និងសហភាពអឺរ៉ុប កំពុងប្រើប្រាស់អ៊ុយក្រែន ដើម្បីប្រកាសសង្គ្រាមជាក់ស្តែងប្រឆាំងនឹងរុស្ស៊ី។
លោក Lavrov បានថ្លែងដូចនេះអំឡុងកិច្ចប្រជុំរដ្ឋមន្ត្រីការបរទេស G20 នៅឯអង្គការសហប្រជាជាតិ កាលពីថ្ងៃព្រហស្បតិ៍ ទី២៥ កញ្ញា។ លោក Lavrov ប្រមុខការទូតរុស្ស៊ី បន្តចោទថា សកម្មភាពរបស់លោកខាងលិច គឺជាមូលហេតុដែលបង្កឱ្យផ្ទុះសង្គ្រាមនៅអ៊ុយក្រែន មកទល់នឹងពេលនេះ៕
© 2025, ឌឹ ខេមបូឌា ដេលី. All rights reserved.