 ក្នុងខេត្តព្រះសីហនុ ថាជារបាយការណ៍មានចរិតនយោបាយខុសពីការពិត។){kind=link}
ក្រសួងមហាផ្ទៃ ចាត់ទុករបាយការណ៍ដែលចោទលោក ស សុខា រដ្ឋមន្ត្រីក្រសួងមហាផ្ទៃ ថាជាសហវិនិយោគិនជាមួយនឹងក្រុមហ៊ុនកាស៊ីណូ ជីន ប៉ី (Jin Bei) ក្នុងខេត្តព្រះសីហនុ ថាជារបាយការណ៍មានចរិតនយោបាយខុសពីការពិត។
ក្រសួងមហាផ្ទៃ បានចេញសេចក្តីបំភ្លឺកាលពីថ្ងៃទី២០ ខែតុលា ថា លោក ស សុខា មិនមានការជាប់ពាក់ព័ន្ធជាមួយនឹងអាជីវកម្មកាស៊ីណូ ជីន ប៉ី នៅក្នុងខេត្តព្រះសីហនុ នោះឡើយ ព្រោះកន្លងមក លោកពុំមានភាគហ៊ុនណាមួយជាមួយនឹងអាជីវកម្មកាស៊ីណូ ជីន ប៉ី (Jin Bei) ក្រោមកិច្ចសហការជាមួយលោក ចេន ហ្ស៊ី (Chen Zhi) នោះទេ។
ប្រភពដដែល អះអាងថា ក្នុងនាមជាសេនាធិការរបស់រាជរដ្ឋាភិបាល លោក ស សុខា បានខិតខំប្រឹងប្រែងប្រកបដោយឆន្ទៈក្នុងការលុបបំបាត់បទល្មើសគ្រប់ប្រភេទ ដូចជា បទល្មើសបច្ចេកវិទ្យា និងអំពើជួញដូរមនុស្សគ្រប់ទម្រង់ រួមទាំងបទល្មើសជួញដូរគ្រឿងញៀនរហូតទទួលបាននូវលទ្ធផលល្អប្រសើរជាបន្តបន្ទាប់។
ជាក់ស្ដែង រយៈពេល ៩ខែឆ្នាំ២០២៥ នេះ អាជ្ញាធរ និងកងកម្លាំងមានសមត្ថកិច្ច បានស្រាវជ្រាវ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scam) ជិត ៥០លើក (៤៨លើក) ដោយឃាត់ខ្លួនជនសង្ស័យ និងបញ្ជូនទៅតុលាការជិត ២០០នាក់ (១៦៨នាក់)។ ជាងនេះទៀត ក៏បានបណ្ដេញជនល្មើសផ្សេងទៀតចេញពីកម្ពុជា ជិត ៣ពាន់នាក់ផងដែរ (២៧២២នាក់)។
ចំណែកបទល្មើសជួញដូរមនុស្ស ត្រូវបានសមត្ថកិច្ចបង្ក្រាបចំនួន ១៤៧ករណី ដោយឃាត់ខ្លួនជនសង្ស័យជាង ២០០នាក់ (២០៥នាក់) និងកសាងសំណុំរឿងបញ្ជូនទៅតុលាការផងដែរ ក្នុងនោះ សមត្ថកិច្ចបានរំដោះជនរងគ្រោះជិត ៥០០នាក់ (៤៨៣នាក់)។
ដោយឡែកបទល្មើសគ្រឿងញៀន សមត្ថកិច្ចបង្ក្រាបបានជិត ៧ពាន់ករណី (៦៩១៤ករណី) និងបានឃាត់ខ្លួនអ្នកពាក់ព័ន្ធជិត ២ម៉ឺននាក់ (១៧៤០៦នាក់) ព្រមទាំងរឹបអូសគ្រឿងញៀនគ្រប់ប្រភេទបានជាង ៧តោន (៧,៥០៩តោន) រួមទាំងសារធាតុគីមីផ្សំប្រមាណជិត ៥០តោនថែមទៀត (៤៨តោន)។
ក្រសួងមហាផ្ទៃ ច្រានចោលទាំងស្រុងចំពោះការផ្សព្វផ្សាយព័ត៌មានមិនពិត និងការចោទប្រកាន់ទាំងឡាយណាដែលភ្ជាប់លោក ស សុខា ទៅនឹងអំពើឧក្រិដ្ឋកម្មផ្សេងៗ ព្រោះទង្វើនេះបានធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយសនៃស្ថាប័នជាតិទាំងមូល និងសេចក្តីថ្លៃថ្នូររបស់បុគ្គល ដែលផ្ទុយស្រឡះពីសមិទ្ធផលដែលក្រសួងសម្រេចបានកន្លងមក។
កាលពីថ្ងៃទី១៣ ខែតុលា ឆ្នាំ២០២៥ សភាអាមេរិក បានចេញសេចក្តីព្រាងច្បាប់លេខ H.R 5490 ក្នុងគោលបំណងដាក់ប្រទេសកម្ពុជា ក្នុងបញ្ជីខ្មៅ និងស្នើដាក់ទណ្ឌកម្មលើមន្ត្រីរដ្ឋាភិបាលគ្រាក់ៗ និងឧកញ៉ាខ្មែរមួយចំនួន រួមទាំងក្រុមហ៊ុនខ្មែរដែលសហការជាមួយក្រុមហ៊ុនចិន ជាច្រើនទៀតផងដែរ។
ក្នុងសេចក្តីព្រាងច្បាប់នេះ បានកំណត់មុខសញ្ញាដាក់ទណ្ឌកម្មទៅលើឧកញ៉ាខ្មែរ និងមន្ត្រីជាន់ខ្ពស់ក្នុងជួររដ្ឋាភិបាលកម្ពុជា មួយចំនួន ដូចជា៖
- លោក ឌី វិជ្ជា កូនប្រសាលោក ហ៊ុន សែន
- លោក នេត សាវឿន ឧបនាយករដ្ឋមន្ត្រី
- លោក គួច ចំរើន អភិបាលខេត្តកណ្តាល
- លោក ស សុខា រដ្ឋមន្ត្រីក្រសួងមហាផ្ទៃ
- ឧកញ៉ា ចេន ហ្ស៊ី ជនជាតិចិនសញ្ជាតិខ្មែរ ដែលជាទីប្រឹក្សាលោក ហ៊ុន សែន
- លោក យឹម លក្ខណ៍ ជាកូនប្រុសរបស់លោក យឹម ឆៃលី អតីតរដ្ឋមន្ត្រីក្រសួងអភិវឌ្ឍន៍ជនបទ ដែលត្រូវជាប្អូនថ្លៃរបស់លោក ហ៊ុន ម៉ានី កូនប្រុសរបស់លោក ហ៊ុន សែន
- ឧកញ៉ា ហ៊ុន តូ ក្មួយប្រុសបង្កើតរបស់លោក ហ៊ុន សែន
- ឧកញ៉ា កុក អាន
- មេឧក្រិដ្ឋជនមួយរូបទៀតឈ្មោះ យ៉ាន ណារ៉ុង
- រួមទាំងមនុស្សជាង ៣០នាក់ផ្សេងទៀតដែលភាគច្រើនជាឧក្រិដ្ឋជនជនជាតិចិន។
ពាក់ព័ន្ធនឹងបញ្ហានេះ អតីតឧកញ៉ា ហេង សិទ្ធី ដែលកំពុងជាប់ឃុំ បានទម្លាយកាលពីដើមខែមករា ឆ្នាំ២០២៥ នេះថា លោក ស សុខា តែងទទួលសំណូកពីឧក្រិដ្ឋជនក្នុងពេលបង្ក្រាបល្បែងស៊ីសងខុសច្បាប់ និងទទួលសំណូកពីឧក្រិដ្ឋជនផ្តល់កម្ចីអនឡាញខុសច្បាប់ រួមទាំងចេញមុខការពារក្រុមឧក្រិដ្ឋជនខុសច្បាប់ដែលកំពុងប្រព្រឹត្តនៅក្នុងប្រទេសកម្ពុជា ផងដែរ។
អតីតឧកញ៉ារូបនេះ អំពាវនាវឱ្យលោក ហ៊ុន ម៉ាណែត បើកការស៊ើបអង្កេតលើរដ្ឋមន្ត្រីក្រសួងមហាផ្ទៃ លោក ស សុខា អគ្គស្នងការនគរបាលជាតិ លោក ស ថេត ស្នងការនគរបាលរាជធានីភ្នំពេញ លោក ជួន ណារិន្ទ និងអភិបាលខេត្តកណ្តាល លោក គួច ចំរើន ផងដែរ ជុំវិញការប្រព្រឹត្តអំពើពុករលួយ ការការពារក្រុមឧក្រិដ្ឋជនដែលកំពុងសម្ងំលាក់ខ្លួននៅក្នុងប្រទេសកម្ពុជា សព្វថ្ងៃនេះ៕
© 2025, ឌឹ ខេមបូឌា ដេលី. All rights reserved.