 ស្នើឱ្យតុលាការដោះលែង និងលើកលែងការចោទប្រកាន់លើសកម្មជនសិទ្ធិមនុស្ស លោក កើត សារ៉ាយ ស្របពេលដែលលោកត្រូវបានឃុំខ្លួនអស់រយៈពេលជាង ៦០០ថ្ងៃទៅហើយ។){kind=link}
មជ្ឈមណ្ឌលសិទ្ធិមនុស្សកម្ពុជា (CCHR) ស្នើឱ្យតុលាការដោះលែង និងលើកលែងការចោទប្រកាន់លើសកម្មជនសិទ្ធិមនុស្ស លោក កើត សារ៉ាយ ស្របពេលដែលលោកត្រូវបានឃុំខ្លួនអស់រយៈពេលជាង ៦០០ថ្ងៃទៅហើយ។
មជ្ឈមណ្ឌលសិទ្ធិមនុស្សកម្ពុជា (CCHR) បានសរសេរលើទំព័រហ្វេសប៊ុករបស់ខ្លួននៅថ្ងៃទី១ ធ្នូ នេះថា សកម្មជនសិទ្ធិមនុស្ស លោក កើត សារ៉ាយ បានជាប់ពន្ធនាគារអស់រយៈពេលជាង ៦០០ថ្ងៃហើយ ខណៈសាលាឧទ្ធរណ៍ភ្នំពេញ នៅមិនទាន់កំណត់ពេលសវនាការលើបណ្ដឹងឧទ្ធរណ៍នៃសំណុំរឿងរបស់លោក ដែលត្រូវបានរងពីបទចោទ «ញុះញង់» និង «ការមិនរាងចាលក្នុងបទមជ្ឈិម បន្ទាប់ពីការផ្ដន្ទាទោសបទមជ្ឈិម» នៅឡើយ។
មជ្ឈមណ្ឌលសិទ្ធិមនុស្សកម្ពុជា បញ្ជាក់ថា បទចោទលើលោក កើត សារ៉ាយ ត្រូវបានធ្វើឡើងដោយសារតែលោកបានធ្វើអត្ថាធិប្បាយទាក់ទងនឹងជម្លោះដីធ្លីនៅខេត្តព្រះវិហារ កាលពីអំឡុងឆ្នាំ២០២៤ កន្លងទៅ។
លោក កើត សារ៉ាយ ត្រូវសមត្ថកិច្ចចាប់ខ្លួនកាលពីថ្ងៃទី០៥ ខែមេសា ឆ្នាំ២០២៤ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ជុំវិញការដឹកនាំនិស្សិតចុះទៅសិក្សា និងតាមដានករណីពលរដ្ឋមានជម្លោះដីធ្លីនៅឃុំស្រយង់ ស្រុកគូលែន ខេត្តព្រះវិហារ ក្នុងពេលដែលពលរដ្ឋទាំងនោះកំពុងរត់គេចខ្លួនពីការតាមចាប់របស់អាជ្ញាធរ។
ក្រោយចាប់ខ្លួន សាលាដំបូងរាជធានីភ្នំពេញ នៅថ្ងៃទី៦ ខែវិច្ឆិកា ឆ្នាំ២០២៤ សម្រេចផ្ដន្ទាទោសប្រធានសមាគមសម្ពន្ធនិស្សិតបញ្ញវន្តខ្មែរ (KSILA) លោក កើត សារ៉ាយ ឱ្យជាប់ពន្ធនាគាររយៈពេល ៤ឆ្នាំ ពីបទ «មិនរាងចាលក្នុងបទមជ្ឈិម បន្ទាប់ពីការផ្ដន្ទាទោសបទមជ្ឈិម និងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
លោក កើត សារ៉ាយ ធ្លាប់ត្រូវសមត្ថកិច្ចចាប់ដាក់ពន្ធនាគារម្តងរួចមកហើយកាលពីអំឡុងឆ្នាំ២០២០ បន្ទាប់ពីលោកអំពាវនាវឱ្យមានការដោះលែងថ្នាក់ដឹកនាំសហជីព លោក រ៉ុង ឈុន ក្នុងនោះ លោកត្រូវបានតុលាការផ្ដន្ទាទោសឱ្យជាប់ពន្ធនាគាររយៈពេល ២០ខែ (១ឆ្នាំ ៨ខែ) ប៉ុន្តែតុលាការដោះលែងឱ្យមានសេរីភាពឡើងវិញមុនថ្ងៃកំណត់ ដោយព្យួរទោសដែលនៅសល់។
ពាក់ព័ន្ធនឹងបញ្ហានេះ គម្រោងយុត្តិធម៌ពិភពលោក The World Justice Project (WJP) បានចេញផ្សាយសេចក្តីរាយការណ៍របស់ខ្លួនស្ដីពីនីតិរដ្ឋរបស់ប្រទេសទាំង ១៤៣ នៅលើពិភពលោក កាលពីថ្ងៃទី២៥ ខែតុលា ឆ្នាំ២០២៥ នេះថា ប្រទេសកម្ពុជាជាប់ចំណាត់ថ្នាក់លេខរៀងទី១៤១ ក្នុងចំណោមប្រទេស១៤៣ នៅលើពិភពលោក។
គម្រោងយុត្តិធម៌ពិភពលោក បញ្ជាក់ថា ចំណាត់ថ្នាក់នេះបង្ហាញថា ប្រទេសកម្ពុជា មាននីតិរដ្ឋទាបបំផុតជុំវិញការប្រើអំណាចរបស់មេដឹកនាំ ការមិនធានាបាននូវរដ្ឋធម្មនុញ្ញ ការអនុវត្តច្បាប់ផ្សេងៗ រួមទាំងការមិនអាចធានានូវសេរីភាពសារព័ត៌មាន និងសេរីភាពពលរដ្ឋ ជាដើម៕
© 2025, ឌឹ ខេមបូឌា ដេលី. All rights reserved.