មន្ត្រីជំនួយការនយោបាយការបរទេសសម្រាប់វិមានក្រឹមឡាំង លោក Yury Ushakov បានប្រកាសថា បទឈប់បាញ់នៅអ៊ុយក្រែន អាចកើតឡើងបាន លុះត្រាតែកងកម្លាំងរបស់អ៊ុយក្រែន យល់ព្រមដកខ្លួនចេញពីតំបន់ដុនបាស ទាំងមូល ខណៈលោក ហ្សេឡេនស្គី បង្ហើបថាការបោះបង់ទឹកដីណាមួយទៅរុស្ស៊ី គឺជាសិទ្ធិរបស់ប្រជាជន ចំពោះលោកជាប្រធានាធិបតីគ្មានសិទ្ធិអ្វីឡើយ ព្រោះរដ្ឋធម្មនុញ្ញអ៊ុយក្រែន មិនបានផ្ដល់សិទ្ធិឱ្យលោកនោះទេ។ នេះបើតាមចុះផ្សាយរបស់សារព័ត៌មានអ៊ុយក្រែន នៅថ្ងៃសុក្រ ទី១២ ខែធ្នូ ឆ្នាំ២០២៥ នេះ។
លោក Yury Ushakov បញ្ជាក់ថា បទឈប់បាញ់អាចមានទៅបាន បន្ទាប់ពីមានការដកកងទ័ពអ៊ុយក្រែន ចេញពីតំបន់ដុនបាស ហើយប្រសិនបើមិនតាមរយៈការចរចាទេ ទឹកដីតំបន់នេះនឹងស្ថិតនៅក្រោមការគ្រប់គ្រងទាំងស្រុងរបស់រុស្ស៊ី ដោយកម្លាំងទ័ព។
តំបន់ដុនបាស មានខេត្តចំណុះ ២ខេត្ត គឺខេត្តដូណែត និងខេត្តលូហ្គាន់។ តំបន់នេះមានផ្ទៃដីជាង ៥៣០០គីឡូម៉ែត្រការ៉េ ជាដែនដីអ៊ុយក្រែន ដ៏ធំបំផុតនៅជាប់ព្រំដែនរុស្ស៊ី ភាគខាងត្បូង តែតំបន់នេះធ្លាក់ក្នុងសង្គ្រាមរបស់រុស្ស៊ី តាំងពីឆ្នាំ២០១៤ ព្រោះតែរុស្ស៊ី បង្កើតកម្លាំងទ័ពឧទ្ទាមវាយប្រហារប៉ុនប៉ងបំបែកជារដ្ឋអបគមន៍។
យ៉ាងណា លោក Yury Ushakov បានបង្ហើបពីលទ្ធភាពនៃដំណោះស្រាយមួយ ដោយលើកឡើងថា នៅក្រោមផែនការសន្តិភាព តំបន់ដុនបាស ដែលបច្ចុប្បន្នស្ថិតក្រោមការគ្រប់គ្រងរបស់អ៊ុយក្រែន អាចនឹងមិនមានវត្តមានកងទ័ពរុស្ស៊ី ឬអ៊ុយក្រែន នោះទេ ប៉ុន្តែនឹងត្រូវជំនួសដោយកងឆ្មាំជាតិរុស្ស៊ី និងប៉ូលិស ដើម្បីរក្សាសណ្ដាប់ធ្នាប់។
បច្ចុប្បន្ន រុស្ស៊ីគ្រប់គ្រងតំបន់នៃខេត្តលូហ្គាន់ ទាំងមូល និងប្រហែល ៨០% នៃតំបន់ដូណែត ប៉ុន្តែតំបន់ដូណែត កំពុងធ្លាក់ការវាយបកយ៉ាងខ្លាំងពីកងទ័ពអ៊ុយក្រែន។
ស្របពេលជាមួយគ្នានេះ វិមានក្រឹមឡាំង បានប្រកាសសេចក្តីថ្លែងការណ៍ចុងក្រោយរបស់ប្រធានាធិបតីអាមេរិក លោក ដូណាល់ ត្រាំ ស្ដីពីអ៊ុយក្រែន ដែលថាទីក្រុងមូស្គូ នឹងឈ្នះសង្គ្រាម ហើយទីក្រុងគៀវ នឹងត្រូវកាត់ទឹកដី គឺស្របគ្នាទៅនឹងទស្សនៈរបស់លោក Yury Ushakov មន្ត្រីជំនួយការនយោបាយការបរទេសសម្រាប់វិមានក្រឹមឡាំង។
នៅក្នុងបទសម្ភាសន៍ជាមួយ Politico លោក ត្រាំ បានហៅមេដឹកនាំអឺរ៉ុបថាក្រុមខ្សោយ តែជាមួយគ្នានេះ លោកថាអ៊ុយក្រែន មិនអាចចូលរួមជាមួយណាតូបានទេ ខណៈលោក ត្រាំ អំពាវនាវឱ្យលោក ហ្សេឡេនស្គី រៀបចំការបោះឆ្នោតផងដែរ។
អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ បានប្រាប់អ្នកសារព័ត៌មានថា ករណីប្រធានបទសមាជិកភាពណាតូ ករណីទឹកដី និងការបាត់បង់ដីរបស់អ៊ុយក្រែន វាស៊ីចង្វាក់គ្នាទៅនឹងការយល់ឃើញរបស់រុស្ស៊ី ដែលលោក ត្រាំ បានលើកឡើងដូចនេះ។ លោក ឌីមីទ្រី ប៉េស្កូវ បានចាត់ទុកទស្សនៈរបស់លោក ត្រាំ ថាល្អខ្លាំងណាស់។
ក្រោយពីលោក ត្រាំ បានថ្លែងដូចនេះ លោក ហ្សេឡេនស្គី បានឆ្លើយតបថា លោកត្រៀមខ្លួនរៀបចំការបោះឆ្នោតថ្មី ប្រសិនបើមានការធានាសន្តិសុខ និងអនុវត្តឱ្យបាននូវបរិយាកាសដែលគ្មានការផ្ទុះអាវុធវាយប្រហារអ៊ុយក្រែន នៅទូទាំងប្រទេស។
លោក ហ្សេឡេនស្គី ប្រធានាធិបតីអ៊ុយក្រែន បានប្រាប់ក្រុមអ្នកសារព័ត៌មានថា យើងត្រូវគោរពឆន្ទៈរបស់ប្រជាជនអ៊ុយក្រែន ចំពោះការកាត់ទឹកដីទៅឱ្យរុស្ស៊ី ហើយត្រូវតែឆ្លងកាត់ការបោះឆ្នោត ឬបោះឆ្នោតប្រជាមតិទូទាំងប្រទេស។
តាមលោក ហ្សេឡេនស្គី វាជារឿងស្មុគស្មាញខ្លាំងណាស់ បើនិយាយពីទឹកដី ដែលលោកថា រុស្ស៊ីឈ្លានពានអ៊ុយក្រែន ៤ឆ្នាំមកហើយ តែទ័ពអ៊ុយក្រែន នៅតែការពារ និងវាយបកវិញ។ លោកថា ទ័ពអ៊ុយក្រែន ស្លាប់ច្រើនណាស់ដើម្បីទឹកដីរបស់ខ្លួន។ ប្រជាជនអ៊ុយក្រែន នឹងមិនឱ្យកាត់ទឹកដីដូណែត ឬលូហ្គាន់ ឱ្យអ្នកឈ្លានពាននោះទេ។ តែលោកថា លោកគោរពឆន្ទៈរបស់ប្រជាជន ព្រោះរដ្ឋធម្មនុញ្ញអ៊ុយក្រែន មិនបានឱ្យលោកឋានៈជាប្រធានាធិបតីប្រើសិទ្ធិកាត់ទឹកដីទៅឱ្យអ្នកឈ្លានពាន ឬប្រទេសណាមួយឡើយ។
ជុំវិញសង្គ្រាមរុស្ស៊ី ឈ្លានពានអ៊ុយក្រែន អគ្គលេខាធិការនៃអង្គការណាតូ (NATO) លោក Mark Rutte បានទទូចឱ្យសម្ពន្ធមិត្តក្នុងបក្សសម្ពន្ធយោធាណាតូត្រូវរួមគ្នាបង្កើនកិច្ចប្រឹងប្រែងការពារជាតិ ដើម្បីទប់ស្កាត់សង្គ្រាមជាមួយរុស្ស៊ី បើផ្ទុះឡើង គឺអាចនឹងមានទំហំធំដូចកាលពីសម័យសង្គ្រាមលោកលើកទី២។
ក្នុងសុន្ទរកថាមួយនៅទីក្រុងប៊ែរឡាំង លោក Rutte បាននិយាយថា សម្ពន្ធមិត្តនៅក្នុងបក្សសម្ពន្ធយោធាណាតូនេះខ្លះ អាចមើលស្រាលការគំរាមកំហែងរបស់រុស្ស៊ី គឺជាការធ្វេសប្រហែសហើយ គឺត្រូវរួមគ្នាចំណាយលើវិស័យការពារជាតិ និងការផលិតសព្វាវុធដើម្បីទប់ស្កាត់កុំឱ្យផ្ទុះសង្គ្រាមឈ្លានពានមួយនេះ។
លោក Rutte បានថ្លែងថា រុស្ស៊ីកំពុងនាំសង្គ្រាមត្រឡប់មកកាន់អឺរ៉ុបវិញនៅពេលនេះ គ្រាន់តែវាមិនទាន់មកដល់។ សង្គ្រាមនេះវាអាចចេញពីសង្គ្រាមនៅអ៊ុយក្រែន ឬរុស្ស៊ី មានផែនការវាយអតីតរដ្ឋរបស់សូវៀត តែពួកគេជាសមាជិករបស់ណាតូ ដែលត្រូវវាយបកយ៉ាងលឿនបំផុត។
លោកអគ្គលេខាធិការ NATO ថារុស្ស៊ី អាចត្រៀមខ្លួនរួចរាល់ដើម្បីប្រើប្រាស់កម្លាំងយោធាប្រឆាំង NATO ក្នុងឆ្នាំ២០៣០។ តែបើ NATO ខ្លាំងរឹងមាំ រុស្ស៊ីមិនអាចរំលោភឈ្លានពានឡើយ។ តែលោកថា មិនឱ្យរុស្ស៊ី ឈ្នះសង្គ្រាមវាយយកទឹកដីអ៊ុយក្រែន ឬក៏ផ្ដួលរំលំអ៊ុយក្រែន ទាំងស្រុងបានឡើយ៕
© 2025, ឌឹ ខេមបូឌា ដេលី. All rights reserved.