សារព័ត៌មានបរទេសជាច្រើន ផ្សាយថ្ងៃចន្ទ ទី១២ ខែមករា ឆ្នាំ២០២៦ ថា អាជ្ញាធរមានសមត្ថកិច្ចខ្មែរ និងកូរ៉េខាងត្បូង បានធ្វើសហប្រតិបត្តិការរួមគ្នាបំបែកបណ្ដាញឆបោកនៅក្រុងភ្នំពេញ និងខេត្តព្រះសីហនុ ដោយជោគជ័យ ហើយឃាត់ខ្លួនមនុស្ស ២៦នាក់ ដែលបានឆបោកពលរដ្ឋកូរ៉េខាងត្បូង ១៦៥នាក់បានប្រាក់សរុបជាង ១៨លានដុល្លារសហរដ្ឋអាមេរិក។
ដំណាលពេលនៃការចាប់ខ្លួនមេបនឆបោក ចេន ហ្ស៊ី (Chen Zhi) នៅថ្ងៃទី៦ ខែមករា អាជ្ញាធរក៏ចាប់ខ្លួនពលរដ្ឋកោះចាមៃកា (Jamaica) ដែលបានឆបោកតាមអនឡាញលើជនរងគ្រោះចំនួន ២០០នាក់ដែរ។ នៅថ្ងៃទី១០ ខែមករា អាជ្ញាធរចាប់បានពលរដ្ឋកូរ៉េខាងត្បូង ៣២នាក់ ចិន ៤នាក់ នេប៉ាល់ ២នាក់ ដែលបានបង្កើតបណ្ដាញឆបោកជាច្រើនកន្លែងក្នុងស្រុកខ្មែរ។
ជាមួយគ្នានេះ អាជ្ញាធរក្រុងប៉េកាំង បានឲ្យដឹងថា អាជ្ញាធរចិន នឹងបញ្ចេញឈ្មោះបក្ខពួកមេបនឆបោក ចេន ហ្ស៊ី នៅស្រុកខ្មែរបន្ថែមទៀតឆាប់ៗនេះ។
តាមសេចក្តីរាយការណ៍ខ្លះ បណ្ដាញឆបោកនៅប្រទេសកម្ពុជា មានជាប់ឈ្មោះមនុស្ស និងក្រុមហ៊ុនយ៉ាងតិចចំនួន ១៤៦។
សារព័ត៌មាន The Cambodia Daily នឹងព្យាយាមផ្សាយឈ្មោះបុគ្គល និងក្រុមហ៊ុនទាំងនោះនាថ្ងៃអនាគត។
ក្នុងករណីនេះ រដ្ឋលេខាធិការក្រសួងមហាផ្ទៃ ជាប្រធានអាជ្ញាធរជាតិប្រយុទ្ធប្រឆាំងការរត់ពន្ធមនុស្ស អ្នកស្រី ជូ ប៊ុនអេង ប្រាប់កាសែតក្នុងស្រុកផ្សាយថ្ងៃទី១២ ខែមករា ដូចជាមិនយល់ច្បាប់ថា៖ «មិនយុត្តិធម៌សម្រាប់ប្រទេសកម្ពុជាសោះ ព្រោះថាជនឧក្រិដ្ឋរកស៊ីទុច្ចរិតទាំងអស់នោះជាជនបរទេស ហើយទាក់ទាញបរទេសឲ្យចូលអន្ទាក់ឆបោក ហើយបែរជាចោទប្រទេសកម្ពុជា។»
អ្នកស្រីបន្ថែមថា អ្នកស្រីដូចជាមិនយល់ហេតុអ្វីឧក្រិដ្ឋជនឆបោករត់ពន្ធមនុស្សទាំងនោះ រើសយកស្រុកខ្មែរដើម្បីធ្វើប្រតិបត្តិការ។
ទោះជាយ៉ាងណាក៏ដោយ ពិភពលោកមិនយល់ដូចអ្នកស្រីទេ សម្បុកចោរឆបោកនៅក្បែរផ្ទះអ្នកស្រី អាជ្ញាធរជួយលាក់បាំងដោយសារបានប្រយោជន៍ទាំងអស់គ្នា៕
© 2026, ឌឹ ខេមបូឌា ដេលី. All rights reserved.