អ្នកតាមដានភូមិសាស្ត្រនយោបាយនៅតំបន់អាស៊ី-ប៉ាស៊ីហ្វិក លោក សេង វណ្ណលី លើកឡើងថា ករណីបាញ់សម្លាប់មេឧក្រិដ្ឋជនល្បែងអនឡាញជនជាតិតៃវ៉ាន់ ឈ្មោះ Lin Bingwen នៅកណ្តាលក្រុងព្រះសីហនុ គឺជាការឆ្លុះបញ្ចាំងពីភាពធូររលុងនៃប្រព័ន្ធគ្រប់គ្រងរដ្ឋបាល និងសន្តិសុខក្រោមការដឹកនាំរបស់នាយករដ្ឋមន្ត្រី ហ៊ុន ម៉ាណែត។
លោក សេង វណ្ណលី បានសរសេរលើគណនីហ្វេសប៊ុករបស់ខ្លួននៅថ្ងៃទី២៥ មីនា នេះថា វត្តមានរបស់ឧក្រិដ្ឋជនឆ្លងដែនដែលមានដីកាចាប់ខ្លួនពីអាជ្ញាធរអន្តរជាតិ ប៉ុន្តែនៅតែអាចរស់នៅ និងធ្វើសកម្មភាពដោយសេរីលើទឹកដីកម្ពុជាបាន គឺជាកញ្ចក់ឆ្លុះបញ្ចាំងយ៉ាងច្បាស់ពីវិបត្តិដ៏សែនជ្រៅនៃប្រព័ន្ធគ្រប់គ្រងរដ្ឋបាល និងសន្តិសុខជាតិរបស់រដ្ឋាភិបាលកម្ពុជា។
លោក សេង វណ្ណលី អះអាងថា បញ្ហានេះបង្ហាញឱ្យឃើញពីអំពើពុករលួយជាប្រព័ន្ធធ្ងន់ធ្ងរនៃស្ថាប័នអនុវត្តច្បាប់ ដែលអនុញ្ញាតឱ្យក្រុមឧក្រិដ្ឋជនប្រើប្រាស់ឥទ្ធិពលទឹកប្រាក់ដើម្បីទិញយកនូវ «ភាពរស់រាន» និង «ការការពារ» ពីសំណាក់មន្ត្រីមានអំណាចខិលខូចមួយចំនួន។
លោកបន្តថា នៅពេលដែលឧក្រិដ្ឋជនកម្រិតធ្ងន់អាចជ្រកកោនក្រោមរូបភាពជាអ្នកវិនិយោគ ឬមានខ្នងបង្អែករឹងមាំ វាមិនត្រឹមតែជាការបរាជ័យនៃផ្នែកចារកម្ម និងនគរបាលយុត្តិធម៌ប៉ុណ្ណោះទេ ប៉ុន្តែវាគឺជាការដាក់សញ្ញាសួរទៅលើឆន្ទៈនយោបាយពិតប្រាកដរបស់រដ្ឋាភិបាល ក្នុងការសម្អាតផ្ទះខ្លួនឯងផងដែរ។
អ្នកឃ្លាំមើលរូបនេះលើកឡើងថា ស្ថានភាពនេះបានប្រែក្លាយកម្ពុជាឱ្យទៅជាជម្រកប្រកបដោយសុវត្ថិភាពសម្រាប់មេខ្លោងឧក្រិដ្ឋកម្ម ដែលវាមិនមែនជារឿងចៃដន្យឡើយ ប៉ុន្តែវាជាលទ្ធផលនៃប្រព័ន្ធគ្រប់គ្រងដែលផ្តល់អាទិភាពលើផលប្រយោជន៍សេដ្ឋកិច្ចកខ្វក់ និងបណ្ដាញបក្សពួកនិយម ជាងការរឹតបន្តឹងយន្តការត្រួតពិនិត្យជនបរទេស និងការអនុវត្តច្បាប់អន្តោប្រវេសន៍។
លោក សេង វណ្ណលី បញ្ជាក់ថា ប្រសិនបើរបបក្រុងភ្នំពេញនៅតែបន្តការគ្រប់គ្រងបែបធូររលុង និងបណ្តោយឱ្យមានអភ័យឯកសិទ្ធិសម្រាប់ឧក្រិដ្ឋជនដែលមានប្រាក់ នោះនឹងរុញច្រានឱ្យកម្ពុជាធ្លាក់ចូលទៅក្នុងវិបត្តិរដ្ឋដែលគ្រប់គ្រងដោយក្រុមម៉ាហ្វីយ៉ាជាមិនខាន ហើយចុងក្រោយ អ្នកដែលរងគ្រោះពិតប្រាកដគឺប្រជាពលរដ្ឋស្លូតត្រង់ និងអស្ថិរភាពសង្គមទាំងមូលតែម្តង។
កាលពីថ្ងៃទី២៤ ខែមីនា ឆ្នាំ២០២៦ គម្រោងរាយការណ៍ស្ដីពីឧក្រិដ្ឋកម្ម និងអំពើពុករលួយ ឬហៅថា OCCRP បានបង្ហាញថាមេឧក្រិដ្ឋជនល្បែងអនឡាញឈ្មោះ Lin Bingwen ត្រូវបានជនមិនស្គាល់មុខមានគ្នាប្រហែល ៣នាក់ទៅ ៤នាក់ បាញ់ស្លាប់ភ្លាមៗនៅលើផ្លូវលំមួយកន្លែងក្នុងសង្កាត់លេខ១ ក្រុងព្រះសីហនុ ខេត្តព្រះសីហនុ កាលពីយប់ថ្ងៃទី២៣ ខែមីនា ខណៈជននេះក៏ត្រូវបានរកឃើញថាជាប់ក្នុងបញ្ជីខ្មៅតាមចាប់ខ្លួនរបស់ការិយាល័យស៊ើបអង្កេតឧក្រិដ្ឋកម្មតៃវ៉ាន់ ដែរ។
ប្រភពដដែល អះអាងថា មុនហេតុការណ៍ដ៏អកុសលនេះ មេឧក្រិដ្ឋជនល្បែងអនឡាញឈ្មោះ Lin Bingwen បានរត់គេចខ្លួនពីការតាមចាប់របស់សមត្ថកិច្ចតៃវ៉ាន់ ក្នុងបទល្មើសល្បែងអនឡាញខុសច្បាប់ក្នុងទំហំទឹកប្រាក់ជាង ១ពាន់លានដុល្លារ (១,០៣ពាន់លានដុល្លារ) និងក្នុងបទប្រតិបត្តិការផ្ទេរលុយខុសច្បាប់តាមប្រព័ន្ធធនាគារផងដែរ។
ក្នុងបទល្មើសនេះ សមត្ថកិច្ចតៃវ៉ាន់ បានរកឃើញថា ឈ្មោះ Lin Bingwen បានផ្ទេរលុយខុសច្បាប់ជាង ២០ពាន់លានដុល្លារ (២១,៧ពាន់លានដុល្លារ) ដែលជាប់ទាក់ទងទៅនឹងប្រតិបត្តិការល្បែងអនឡាញ ហើយក៏ជាអ្នករកស៊ីក្នុងទីផ្សារងងឹតក្នុងទីក្រុងម៉ាកាវ និងបានយកលុយខុសច្បាប់ទៅលាងក្នុងប្រព័ន្ធហិរញ្ញវត្ថុរបស់តៃវ៉ាន់ ថែមទៀត។
ជុំវិញបញ្ហានេះ កាសែតបរទេសជាច្រើនបានចុះផ្សាយថា ឈ្មោះ Lin Bingwen មានភាគហ៊ុនរកស៊ីជាមួយដៃគូសហការរបស់ជនជាតិចិន ក្នុងវិស័យកាស៊ីណូ និងសណ្ឋាគារក្នុងទីក្រុងព្រះសីហនុ បន្ទាប់ពីមកស្នាក់នៅខេត្តនេះ កាលពីចុងឆ្នាំ២០២៤ ក្រោយខកខានចូលសវនាការតាមដីកាចាប់ខ្លួនរបស់តុលាការតៃវ៉ាន់ ពាក់ព័ន្ធនឹងបទល្មើសល្បែងអនឡាញខុសច្បាប់ជុំវិញរឿងអាស្រូវនៃក្លឹប៨៨ ក្នុងអំឡុងឆ្នាំ២០២៣ កន្លងទៅនោះ៕
© 2026, ឌឹ ខេមបូឌា ដេលី. All rights reserved.