មន្ត្រីសិទ្ធិមនុស្សថា ការចាប់ខ្លួន ខែម ស្រីមុំ ប៉ះពាល់សេរីភាពបញ្ចេញមតិ

ភ្នំពេញ៖ មន្ត្រីសិទ្ធិមនុស្សបានបង្ហាញក្តីបារម្ភចំពោះការចាប់ខ្លួនសកម្មជនសង្គម កញ្ញា ខែម ស្រីមុំ ដោយចាត់ទុកថា ករណីនេះអាចប៉ះពាល់ដល់សេរីភាពបញ្ចេញមតិ។

នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត បានប្រាប់អ្នកសារព័ត៌មានថា មន្ត្រីសិទ្ធិមនុស្សកំពុងតាមដានករណីនេះយ៉ាងយកចិត្តទុកដាក់។ លោកថា កញ្ញា ខែម ស្រីមុំ កំពុងត្រូវបានសាកសួរនៅស្នងការដ្ឋាននគរបាលរាជធានីភ្នំពេញ។

តាមការឲ្យដឹងពីមន្ត្រីសិទ្ធិមនុស្ស សមត្ថកិច្ចបានចាប់ខ្លួនកញ្ញា ខែម ស្រីមុំ នៅបន្ទប់ជួលមួយក្នុងរាជធានីភ្នំពេញ កាលពីថ្ងៃសៅរ៍ ទី១៦ ខែឧសភា ឆ្នាំ២០២៦។ មកដល់ពេលនេះ មិនទាន់មានការបញ្ជាក់ផ្លូវការអំពីមូលហេតុ ឬបទចោទប្រកាន់លើសកម្មជនរូបនេះនៅឡើយទេ។

លោក អំ សំអាត បានឲ្យដឹងថា កញ្ញា ខែម ស្រីមុំ ជាសកម្មជនសង្គមដែលតែងចូលរួមលើកឡើងអំពីបញ្ហាអយុត្តិធម៌សង្គម។ ថ្មីៗនេះ គណនីហ្វេសប៊ុករបស់នាងបានចែករំលែកវីដេអូមួយពាក់ព័ន្ធនឹងទាហានថៃ និងបញ្ហាព្រំដែនកម្ពុជា-ថៃ។

អង្គការសិទ្ធិមនុស្សក្នុងស្រុកបានបង្ហាញក្តីបារម្ភចំពោះការកើនឡើងនៃការចាប់ខ្លួនពលរដ្ឋ សកម្មជន និងព្រះសង្ឃ ដែលបានបញ្ចេញមតិអំពីបញ្ហាព្រំដែន។ ក្នុងខែមេសា ឆ្នាំ២០២៦ មនុស្សជាច្រើនត្រូវបានចាប់ខ្លួន រួមមានលោក ម៉ា ចន្ទតារា នៅខេត្តសៀមរាប លោក អ៊ិន សុខារ៉ាត់ នៅខេត្តស្វាយរៀង លោក សំ សុភាង នៅខេត្តត្បូងឃ្មុំ និងព្រះសង្ឃ ជា វុទ្ធី នៅខេត្តបាត់ដំបង។

លីកាដូបានឲ្យដឹងថា អ្នកនយោបាយជំទាស់ និងសកម្មជនជាង១០០នាក់ ត្រូវបានចាប់ខ្លួន ឬផ្តន្ទាទោសពាក់ព័ន្ធនឹងការប្រើប្រាស់សិទ្ធិបញ្ចេញមតិ៕

© 2026, ឌឹ ខេមបូឌា ដេលី. All rights reserved.