លោក ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ប្រកាសនឹងកសាងអន្តេវាសិកដ្ឋានសម្រាប់និស្សិតស្រីក្នុងគ្រួសារក្រីក្រមកពីបណ្តាខេត្តនានា ដែលឡើងមកបន្តការសិក្សានៅរាជធានីភ្នំពេញ ដោយសាងសង់លើផ្ទៃដី ២ហិកតា ជាដីកូនស្រីរបស់លោក គឺអ្នកស្រី ហ៊ុន ម៉ាណា។
នៅថ្ងៃទី៤ ខែមិថុនា ឆ្នាំ២០២៥ នេះ លោក ហ៊ុន សែន បានថ្លែងប្រាប់ទៅប្រតិភូក្រុមប្រឹក្សាជាតិកម្ពុជាដើម្បីស្ត្រី ថា បន្ទាប់ពីការពិភាក្សាជាមួយភរិយា និងកូនស្រីរបស់លោក គឺលោកសម្រេចយកដី ២ហិកតាដែលទិញតម្លៃជាង ១០លានដុល្លារ សម្រាប់សាងសង់ស្ថានីយទូរទស្សន៍បាយ័ននៅជ្រោយចង្វារ ប្រគល់ជូនទៅក្រសួងកិច្ចការនារី ដើម្បីសាងសង់អន្តេវាសិកដ្ឋាន។
លោក ហ៊ុន សែន អះអាងថា ការសាងសង់អន្តេវាសិកដ្ឋាននិស្សិតស្រីស្នាក់នៅចំនួន ៥០០នាក់ ត្រូវការបន្ទប់ចំនួន ១២០បន្ទប់ ដោយក្នុង ១បន្ទប់អាចស្នាក់នៅបាន ៤នាក់ (ដោយមានបន្ទប់ទឹក និងចង្ក្រានបាយផងដែរ)។ ជាមួយគ្នានេះ ក៏មានការរៀបចំកសាងប៉ុស្តិ៍សុខភាពនៅជាន់ផ្ទាល់ដី ដែលមានបន្ទប់សម្រាប់ពិនិត្យជំងឺ និងបន្ទប់សម្រាប់គ្រូពេទ្យប្រចាំការទៀតផង។
លោក ហ៊ុន សែន អះអាងថា លោកសង្ឃឹមថាអន្តេវាសិកដ្ឋាននេះនឹងជួយកាត់បន្ថយការលំបាករបស់និស្សិតជាស្ត្រី និងជួយពន្លឿនដល់ការវិនិយោគកសាងសមត្ថភាពរបស់ស្ត្រី និងការចូលរួមរបស់ស្ត្រីក្នុងការកសាងប្រទេសជាតិ។
អង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា គាំទ្រចំពោះការលើកឡើងរបស់លោក ហ៊ុន សែន ដើម្បីកាត់បន្ថយហានិភ័យ ឬបញ្ហាប្រឈមរបស់សិស្សស្រី ឬក្មេងស្រីដែលបានចាកចេញពីស្រុកកំណើត ដើម្បីមករៀនសូត្រឆ្ងាយពីផ្ទះសម្បែង និងជាការលើកទឹកចិត្តដល់ក្មេងស្រីបន្តការសិក្សាផងដែរ។
លោកសង្ឃឹមថា ការលើកឡើងរបស់លោក ហ៊ុន សែន នេះ នឹងក្លាយទៅជាចំណាត់ការអនុវត្តប្រកបដោយប្រសិទ្ធភាព និងមានការយកចិត្តទុកដាក់ពីមន្ត្រី និងស្ថាប័នពាក់ព័ន្ធ។
នៅក្នុងកិច្ចប្រជុំប្រចាំឆ្នាំរបស់ក្រុមប្រឹក្សាជាតិកម្ពុជាដើម្បីស្ត្រី កាលពីថ្ងៃទី២១ ខែកុម្ភៈ ឆ្នាំ២០២៣ លោក ហ៊ុន សែន បានអំពាវនាវចំពោះសប្បុរសជននានាឱ្យចូលរួមជួយកសាងអន្តេវាសិកដ្ឋានសម្រាប់សិស្សស្ត្រីនៅរាជធានីភ្នំពេញ និងនៅតាមបណ្តាខេត្ត ដើម្បីជំរុញឱ្យសិស្សស្ត្រីនៅជនបទមានឱកាសសិក្សានៅវិទ្យាល័យ ហើយមានកន្លែងស្នាក់នៅ និងធ្វើយ៉ាងណាកាត់បន្ថយគម្លាតរវាងស្ត្រីនៅតាមទីក្រុង និងទីជនបទ៕
© 2025, ឌឹ ខេមបូឌា ដេលី. All rights reserved.