រដ្ឋមន្ត្រីការបរទេសខ្មែរថាលោក ចេន ហ្ស៊ី ទទួលបានសញ្ជាតិកម្ពុជាមិនស្របតាមច្បាប់ ទើបបញ្ជូនទៅចិន

ក្រសួងការបរទេសកម្ពុជា ចាត់ទុកការចាប់ខ្លួនឧក្រិដ្ឋជនជនជាតិចិន លោក ចេន ហ្ស៊ី (Chen Zhi) គឺជាការឆ្លុះបញ្ចាំងពីការប្ដេជ្ញាចិត្តយ៉ាងម៉ឺងម៉ាត់របស់កម្ពុជា ក្នុងការបង្ក្រាបឧក្រិដ្ឋកម្មឆ្លងដែន ជាពិសេសឧក្រិដ្ឋកម្មឆបោកតាមប្រព័ន្ធបច្ចេកវិទ្យា (Online Scams)។

សារព័ត៌មានស្និទ្ធនឹងរដ្ឋាភិបាលកម្ពុជា Fresh News នៅថ្ងៃទី១៩ មករា នេះបានស្រង់សម្ដីរដ្ឋមន្ត្រីការបរទេស និងសហប្រតិបត្តិការអន្តរជាតិ លោក ប្រាក់ សុខុន ក្នុងបទសម្ភាសន៍ជាមួយទីភ្នាក់ងារសារព័ត៌មានអន្តរជាតិ Reuters កាលពីថ្ងៃទី១៤ ខែមករា ឆ្នាំ២០២៦ ថា កម្ពុជាបន្តកិច្ចសហប្រតិបត្តិការយ៉ាងជិតស្និទ្ធជាមួយប្រទេសដៃគូ ក្នុងការប្រយុទ្ធប្រឆាំងឧក្រិដ្ឋកម្មឆ្លងដែនឱ្យមានប្រសិទ្ធភាព។

លោក ប្រាក់ សុខុន អះអាងថា កម្ពុជាប្ដេជ្ញាចិត្តក្នុងការបន្តកិច្ចសហប្រតិបត្តិការលើការបង្ក្រាបឧក្រិដ្ឋកម្មឆ្លងដែន ក៏ដូចជាឧក្រិដ្ឋកម្មឆបោកតាមប្រព័ន្ធបច្ចេកវិទ្យាជាមួយប្រទេសជាច្រើន ដូចជាសហរដ្ឋអាម៉េរិក ចិន សាធារណរដ្ឋកូរ៉េ វៀតណាម និងថៃ ជាដើម ហើយការចាប់ខ្លួនលោក ចេន ហ្ស៊ី គឺជាលទ្ធផលនៃការស៊ើបអង្កេតដ៏យូរមួយដែលកម្ពុជាបានអនុវត្តបង្ក្រាបឧក្រិដ្ឋកម្មឆបោកតាមប្រព័ន្ធបច្ចេកវិទ្យានោះ។

រដ្ឋមន្ត្រីការបរទេសរូបនេះបញ្ជាក់ថា ពិតមែនតែលោក ចេន ហ្ស៊ី មានសញ្ជាតិកម្ពុជា ប៉ុន្តែនៅពេលដែលបើកការស៊ើបអង្កេត គឺរកឃើញថាសញ្ជាតិរបស់គាត់មិនទទួលបានដោយស្របច្បាប់ទេ។ លោកថា ដោយសារតែលោក ចេន ហ្ស៊ី ជាជនជាតិចិន ដូច្នេះកម្ពុជាក៏សម្រេចចិត្តធ្វើបត្យាប័នគាត់ទៅប្រទេសចិន តែម្តង។

លោក ចេន ហ្ស៊ី ត្រូវបានសមត្ថកិច្ចកម្ពុជាឃាត់ខ្លួនកាលពីថ្ងៃទី០៦ ខែមករា ឆ្នាំ២០២៦ និងបានបញ្ជូនទៅសាធារណរដ្ឋប្រជាមានិតចិន វិញ ខណៈគោរមងាររបស់ឧកញ៉ារូបនេះ ក៏ត្រូវបានព្រះមហាក្សត្រខ្មែរត្រាស់បង្គាប់លុបចោលកាលពីខែធ្នូ ឆ្នាំ២០២៥ កន្លងទៅផងដែរ។

អ្នកតាមដានភូមិសាស្ត្រនយោបាយនៅតំបន់អាស៊ី-ប៉ាស៊ីហ្វិក លោក សេង វណ្ណលី សរសេរលើគណនីហ្វេសប៊ុករបស់ខ្លួននៅថ្ងៃទី១៩ មករា នេះ ដោយចាត់ទុកការអះអាងរបស់លោក ប្រាក់ សុខុន អំពីបញ្ហានេះ គ្រាន់តែជាការដោះសាដោយគ្មានតម្លាភាព និងបង្ហាញពីភាពទន់ខ្សោយនៃប្រព័ន្ធតុល្យភាពអំណាច ដែលធ្វើឱ្យមេដឹកនាំមិនសូវមានសម្ពាធក្នុងការទទួលខុសត្រូវចំពោះសម្ដី និងទង្វើរបស់ខ្លួនប៉ុណ្ណោះ។

ជុំវិញបញ្ហានេះ ក្រុមអ្នកតស៊ូមតិកម្ពុជា (CAT) បានអះអាងកាលពីថ្ងៃទី១៣ ខែមករា ថា ការចាប់បញ្ជូនខ្លួនលោក ចេន ហ្ស៊ី (Vincent Chen Zhi) ទៅកាន់ប្រទេសចិន ដោយគ្មានដំណើរការសវនាការ គឺជាការរំលោភបំពានប្រព័ន្ធយុត្តិធម៌កម្ពុជាយ៉ាងធ្ងន់ធ្ងរ ហើយក៏ជាចេតនាលុបបំបាត់ការផ្តល់យុត្តិធម៌ដល់ជនរងគ្រោះដែលពាក់ព័ន្ធនឹងអំពើឆបោករបស់ឧក្រិដ្ឋជនរូបនេះដែរ។

ប្រភពដដែលអះអាងថា ការធ្វើបែបនេះ គឺជាការបង្ហាញឱ្យឃើញនូវចេតនាក្នុងការលុបបំបាត់ភស្តុតាងដែលឧក្រិដ្ឋជន ចេន ហ្ស៊ី (Vincent Chen Zhi) ធ្លាប់ប្រព្រឹត្តនៅកម្ពុជា កន្លងមកក្នុងបទល្មើសលាងលុយ និងការបោកប្រាស់តាមអនឡាញ រួមទាំងការធ្វើទារុណកម្មលើជនរងគ្រោះនានាជាដើម។

ជាងនេះទៀត ក៏ជាចេតនាលុបបំបាត់ភស្តុតាងនានាដើម្បីកុំឱ្យមានការជីកកកាយដល់ប្រភពលុយ រួមទាំងទីតាំងបោកប្រាស់នានាដែលឧក្រិដ្ឋជនរូបនេះបានចរាចរណ៍នៅកម្ពុជាកន្លងមកផងដែរ។

ជុំវិញបញ្ហានេះ ក្រសួងយុត្តិធម៌អាមេរិក បានចេញសេចក្តីប្រកាសព័ត៌មានកាលពីថ្ងៃទី១៤ ខែតុលា ឆ្នាំ២០២៥ ថា មានក្រុមហ៊ុនជាង ១០០ (១១៨ក្រុមហ៊ុន) បានរងការចោទប្រកាន់ថាបានជាប់ពាក់ព័ន្ធនឹងការក្លែងបន្លំក្នុងអំពើឆបោកតាមអនឡាញរបស់លោក ចេន ហ្ស៊ី។

ចំណែករដ្ឋអាជ្ញាតុលាការសហព័ន្ធសហរដ្ឋអាមេរិកក្រុងញ៉ូវយ៉ក (New York) លោក Joseph Nocella Jr. បានបង្ហាញក្នុងពាក្យបណ្ដឹងលើករណីលោក ចេន ហ្ស៊ី (Chen Zhi) កាលពីអំឡុងខែតុលា ឆ្នាំ២០២៥ ដែរថា ក្រុមហ៊ុន ព្រីនស៍ គ្រុប (Prince Group) របស់លោក ចេន ហ្ស៊ី បានធ្វើប្រតិបត្តិការឆបោកនៅទូទាំងប្រទេសកម្ពុជា ក្រោមគ្រោងការណ៍ក្លែងបន្លំការវិនិយោគរូបិយប័ណ្ណគ្រីបតូ និងគម្រោងក្លែងបន្លំជាច្រើនផ្សេងទៀតចាប់តាំងពីឆ្នាំ២០១៥ មក ដែលដំណើរការក្នុងនាមជាក្រុមហ៊ុនសាជីវកម្មរបស់កម្ពុជា។

ប្រភពដដែលថា ក្រុមហ៊ុននេះបានធ្វើប្រតិបត្តិការលើការអភិវឌ្ឍអចលនទ្រព្យ សេវាកម្មហិរញ្ញវត្ថុ និងសេវាកម្មអ្នកប្រើប្រាស់ជាដើម ហើយក្រោមគ្រោងការណ៍នេះ បានបណ្តាលឱ្យមានការខាតបង់លុយរាប់ពាន់លានដុល្លារ ដែលកំណត់គោលដៅលើពលរដ្ឋអាមេរិក និងមនុស្សនៅជុំវិញពិភពលោក៕

លោក ចេន ហ្ស៊ី (Chen Zhi) ដែលតុលាការប្រទេសចិន រកឃើញថាជាប់ពាក់ព័ន្ធបនល្បែងអនឡាញខុសច្បាប់ និងលោក ហ៊ុន សែន ប្រធានព្រឹទ្ធសភា និងប្រធានគណបក្សប្រជាជនកម្ពុជា។

លោក ចេន ហ្ស៊ី (រូបទី២ ពីស្ដាំ) ក្នុងពិធីចុះហត្ថលេខាលើកិច្ចសន្យាវិនិយោគសម្រាប់គម្រោងអាកាសយានដ្ឋានអន្តរជាតិតេជោ (ខេត្តកណ្តាល ប្រទេសកម្ពុជា)

រដ្ឋមន្ត្រីការបរទេសខ្មែរថាលោក ចេន ហ្ស៊ី ទទួលបានសញ្ជាតិកម្ពុជាមិនស្របតាមច្បាប់ ទើបបញ្ជូនទៅចិន

បទវិភាគ

បទវិភាគ៖ ហេតុអ្វីបានជារុស្ស៊ី ខ្លាចមីស៊ីល Tomahawk អាមេរិក? ធ្វើដូចម្ដេចអ៊ុយក្រែន បានអាវុធនេះពីលោក ត្រាំ?

បទវិភាគ៖ ពីឧក្រិដ្ឋជនសង្គ្រាមក្លាយជាភ្ញៀវរបស់អាមេរិក លោក ត្រាំ ទាញលោក ពូទីន ចេញពីភាពឯកា

បទវិភាគព័ត៌មាន៖ មិនអាចប្ដូរមេដឹកនាំផ្ដាច់ការនៅបេឡារូស លើកលែងតែដូចប្រទេសបង់ក្លាដេស

បទវិភាគ៖ របបផ្ដាច់ការនៅប្រទេសស៊ីរី ដល់ពេលត្រូវបាត់បង់ហើយ

បទវិភាគ៖ ប្រទេសមួយក្រោមឥទ្ធិពលចិនខ្លាំង ហើយពីរទៀតក្រោមឥទ្ធិពលវៀតណាមផងចិនផង

បទវិភាគ៖ ផ្លែការ៉ុតនិងដំបងដាក់នៅចំពោះមុខកម្ពុជាក្នុងភូមិសាស្ត្រនយោបាយរវាងអាមេរិកនិងចិន

បទវិភាគ៖ តើប៉ាឡេស្ទីន អាចក្លាយជាសមាជិកពេញសិទ្ធិនៃអង្គការសហប្រជាជាតិបានដែរឬទេ?

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

អត្ថបទទាក់ទង

អាជ្ញាធរមានសមត្ថកិច្ចខ្មែរ និងកូរ៉េខាងត្បូង ធ្វើសហប្រតិបត្តិការកម្ចាត់បទល្មើសឆបោកតាមអនឡាញ

រដ្ឋមន្ត្រីកម្ពុជា-ថៃ រឭកគ្នាអំពីការប្ដេជ្ញាចិត្តពិតប្រាកដនិងការគោរពច្បាប់អន្តរជាតិឱ្យបានពេញលេញ

ការិយាល័យរដ្ឋអាជ្ញានៅរដ្ឋធានីវ៉ាស៊ីនតុន ប្រកាសដាក់ទណ្ឌកម្មឧកញ៉ាក្នុងគណបក្សប្រជាជនកម្ពុជា

អំពើឆបោកអនឡាញកំពុងបំប្លែងខ្លួនទៅតាមតំបន់សេដ្ឋកិច្ចពិសេស រោងចក្រ សណ្ឋាគារ បុរីផ្ទះជួលនិងអគារកំពុងសង់

អ្នកឃ្លាំមើលថាអាមេរិកដាក់ទណ្ឌកម្មលើឧកញ៉ា កុក អាន ជាសញ្ញាអាសន្នដល់កម្ពុជា

អាមេរិកប្រកាសផ្តល់ប្រាក់រង្វាន់ ៤លានដុល្លារសម្រាប់ការផ្តល់ព័ត៌មានឧក្រិដ្ឋជនចិនឈ្មោះ Daren Li

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

លោក ចេន ហ្ស៊ី បាត់មុខពីកម្ពុជា ស្របពេលអាមេរិកលាតត្រដាងអំពើឆបោកនិងលាងលុយកខ្វក់ក្នុងប្រព័ន្ធគ្រីបតូ

តើព្រះសង្ឃ និងមេដឹកនាំខ្មែរ បានធ្វើអ្វីខ្លះដើម្បីជាប្រយោជន៍ដល់ព្រះពុទ្ធសាសនា និងសង្គមជាតិរបស់ខ្លួន?

តើកាកបាទក្រហមកម្ពុជាទទួលអំណោយសប្បុរសដោយកុសលកម្ម ឬអកុសលកម្មបថ?

លោក ហេង សិទ្ធី អំពាវនាវឱ្យពលរដ្ឋខ្មែរចូលរួមរំដោះប្រទេសចេញពីអំណាចប្រមូលផ្ដុំគ្រួសារតែមួយ

មេធាវី៖ ការចាប់ខ្លួនលោក ហេង សិទ្ធី ដោយសារដឹងអំពីផែនការបង្កើតបក្សនយោបាយប្រឆាំងត្រកូលហ៊ុន