សាធារណជន និងអ្នកតាមដានបញ្ហាសង្គម ចង់ឃើញការអនុវត្តច្បាប់ដោយតម្លាភាពទៅលើជនបង្កគ្រោះថ្នាក់ចរាចរណ៍ ដែលបានបណ្តាលឱ្យស្លាប់មនុស្ស ៦នាក់នៅស្រុកមោងឫស្សី ខេត្តបាត់ដំបង ដើម្បីធានាបានយុត្តិធម៌សម្រាប់ជនរងគ្រោះ និងក្រុមគ្រួសារ។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា បានប្រាប់ក្រុមអ្នកសារព័ត៌មានក្នុងស្រុកថា លោករង់ចាំមើលចំណាត់ការរបស់សមត្ថកិច្ចពាក់ព័ន្ធករណីគ្រោះថ្នាក់ចរាចរណ៍ដែលបណ្តាលឲ្យមានមនុស្ស ៦នាក់ស្លាប់។
លោកថា ប្រសិនបើជនរងគ្រោះមិនអាចទទួលបានយុត្តិធម៌ពេញលេញនោះទេ នោះទំនុកចិត្តរបស់ពលរដ្ឋចំពោះអាជ្ញាធរ នឹងកាន់តែថមថយ។
បណ្ឌិត គិន ភា បន្ថែមថា ផ្នត់គំនិតអវិជ្ជមានរបស់មហាជននឹងបង្កើតជាស្នាមប្រេះឆាក្នុងសង្គមកាន់តែជ្រៅទៅៗ ហើយដែលបន្តិចម្ដងៗបូករួមជាមួយសម្ពាធសកលនៃវិបត្តិថាមពល និងសង្គ្រាមព្រំដែនផង វានឹងក្លាយជាបន្ទុកដ៏ធ្ងន់ធ្ងរសម្រាប់រដ្ឋាភិបាលក្នុងការគ្រប់គ្រងស្ថានការណ៍។
លោកអះអាងថា បើអាជ្ញាធរនៅតែបន្តការពារជនខិលខូច ហើយទុកឱ្យយុត្តិធម៌ក្លាយជាទំនិញសម្រាប់តែអ្នកមានអំណាច និងមានលុយ នោះសង្គមប្រឈមយ៉ាងខ្លាំងនឹងបែកបាក់ ចុះអន់ខ្សោយ។
ជុំវិញករណីគ្រោះថ្នាក់ចរាចរណ៍ខាងលើ អ្នកនាំពាក្យក្រសួងមហាផ្ទៃ លោក ទូច សុឃៈ អះអាងថា សមត្ថកិច្ចនឹងអនុវត្តច្បាប់ដោយស្មើភាពគ្នាចំពោះជនបង្កហេតុ ដោយមិនគិតពីតួនាទី តំណែង ឬសាច់ញាតិគ្រួសារជនប្រព្រឹត្តបទល្មើសឡើយ។
លោក ទូច សុឃៈ អះអាងថា សមត្ថកិច្ចជំនាញនឹងស្រាវជ្រាវរកអង្គហេតុ អង្គច្បាប់ និងភស្តុតាងជាក់លាក់ដើម្បីស្វែងរកយុត្តិធម៌ដល់ជនរងគ្រោះ ហើយក្នុងករណីជនបង្ករត់គេចខ្លួន នឹងមានទោសបន្ថែម។
លោកបន្តថា គោលការណ៍របស់ក្រសួងមហាផ្ទៃ អនុវត្តយកច្បាប់ជាធំ គឺនរណាក៏ដោយឱ្យតែប្រព្រឹត្តបទល្មើស គឺត្រូវតែអនុវត្តច្បាប់មិនរើសមុខ។
ករណីគ្រោះថ្នាក់ចរាចរណ៍នេះបានកើតឡើងកាលពីយប់ថ្ងៃទី២៧ ខែមីនា។ រហូតដល់វេលារសៀលថ្ងៃទី៣០ ខែមីនា ទើបសមត្ថកិច្ចជំនាញនៃស្នងការដ្ឋាននគរបាលខេត្តបាត់ដំបង ចេញលិខិតកោះហៅម្ចាស់ឡានដែលបង្កហេតុ ទៅបំភ្លឺ។ កាលបរិច្ផេទចូលបំភ្លឺ គឺនៅថ្ងៃទី១ ខែមេសា។
តាមសមត្ថកិច្ចជំនាញខេត្តបាត់ដំបង ម្ចាស់រថយន្តដែលបង្កហេតុឈ្មោះ ស៊ីវ ជ័យសិដ្ឋ វ័យ ២០ឆ្នាំ ដែលត្រូវគេស្គាល់ថាជាកូនប្រុសស្នងការរងម្នាក់នៃស្នងការដ្ឋាននគរបាលខេត្តបន្ទាយមានជ័យ។ ក្រោយហេតុការណ៍គ្រោះថ្នាក់ ជនបង្កបានគេចខ្លួន។
គ្រោះថ្នាក់ចរាចរណ៍ទូទាំងប្រទេសក្នុងឆ្នាំ២០២៥ បានកើតឡើងចំនួន ២៣៤៥ករណី ធៀបនឹងឆ្នាំ២០២៤ មានចំនួន ២៨៤៤ករណី។ ចំនួននេះបានថយចុះ ៤៩៩ករណី ស្មើ ១៨%។ ចំណែកចំនួនអ្នកស្លាប់បានថយចុះ ៤២នាក់ ស្មើនឹង ៣% និងចំនួនអ្នករបួសក៏បានថយចុះ ៥០៧នាក់ ស្មើ ១៤%៕
© 2026, ឌឹ ខេមបូឌា ដេលី. All rights reserved.