TAG
topstory
ការធ្វើកូដកម្មធ្វើឲ្យឧស្សាហកម្មកាត់ដេរខាតបង់ជាង២០០លានដុល្លារ
សមាគមរោងចក្រកាត់ដេរនៅកម្ពុជាហៅកាត់ថា GMAC បានឲ្យដឹងកាលពីម្សិលមិញថា ចលាចលការងាររយៈពេលជាច្រើនសប្តាហ៍នេះ បានធ្វើឲ្យវិស័យឧស្សាហកម្មកាត់ដេរខាតបង់ប្រាក់២០០លានដុល្លារ ហើយអ្នកទិញអន្តរជាតិទំនងជាកាត់បន្ថយការបញ្ជាទិញសម្លៀកបំពាក់ប្រមាណ៣០ភាគរយនៅឆ្នាំនេះ ខណៈដែលការសម្លាប់កូដករប្រាំនាក់ដែលត្រូវបានចាត់ទុកថា ជា “កាខូចខាតបណ្តាលមកពីចលាចល” ។
ដោយមិនសប្បាយចិត្តចំពោះកូដកម្មនិងការតវ៉ារយៈពេលមួយសប្តាហ៍ដោយកម្មករកាត់ដេរដែលទាមទារប្រាក់ឈ្នួលអប្បបរមាប្រចាំខែក្នុងវិស័យនេះដល់ទៅ១៦០ដុល្លារនោះ កងរាជអាវុធហត្ថបានបាញ់សម្លាប់កម្មករកាត់ដេរចំនួនប្រាំនាក់ និងធ្វើឲ្យរបួសជាង២០នាក់នៅក្រៅរោងចក្រមួយក្នុងរាជធានីភ្នំពេញកាលពីថ្ងៃសុក្រ។
ដោយសារអង្គការសិទ្ធិមនុស្ស អង្គការសហប្រជាជាតិ និងរដ្ឋាភិបាលបរទេសនានា ថ្កោលទោស លោក កែន លូ អគ្គលេខាធិការរបស់ GMAC បានលើកឡើងកាលពីថ្ងៃអាទិត្យថា ការតបតរបស់កងរាជអាវុធហត្ថទៅនឹងក្រុមអ្នកចោលដុំថ្ម គឺសមហេតុសមផល “បំផុត”...
អង្គការជាតិនិងអន្តរជាតិថ្កោលទោសរដ្ឋាភិបាលចំពោះអំពើហិង្សានៅទីលានប្រជាធិបតេយ្យ
អង្គការសហប្រជាជាតិ និងអង្គការសិទ្ធិមនុស្សក្នុងស្រុកបានថ្កោលទោសរដ្ឋាភិបាលចំពោះការប្រើអំពើហិង្សាបណ្ដេញអ្នកគាំទ្រគណបក្សសង្គ្រោះជាតិចេញពីទីលានប្រជាធិបតេយ្យក្នុងរាជធានីភ្នំពេញកាលពីថ្ងៃសៅរ៍ ព្រមទាំងការហាមឃាត់មិនឲ្យមានការតវ៉ាជាសាធារណៈនៅក្នុងរាជធានី។
កាលពីថ្ងៃសៅរ៍ សាលាដំបូងរាជធានីភ្នំពេញបានកោះហៅលោក សម រង្ស៊ី និងលោក កឹម សុខា ឲ្យចូលខ្លួនទៅតុលាការនៅថ្ងៃទី១៤ ខែមករា ពាក់ព័ន្ធនឹងការប្រើអំពើហិង្សារវាងកងរាជអាវុធហត្ថ និងកម្មកររោងចក្រកាត់ដេរដែលធ្វើការតវ៉ានៅក្នុងខណ្ឌពោធិ៍សែនជ័យ កាលពីថ្ងៃសុក្រ ដែលបានធ្វើឲ្យបាតុករប្រាំនាក់ស្លាប់ និងជាង២០នាក់ទៀតរងរបួសដោយសារគ្រាប់កាំភ្លើងរបស់កងរាជអាវុធហត្ថ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍ថា លោកសម រង្ស៊ី និងលោក កឹម សុខា...
GMAC និយាយការពារកងកម្លំាងប្រដាប់អាវុធដែលសម្លាប់កម្មករ
កាលពីម្សិលមិញ សមាជិកជាន់ខ្ពស់ម្នាក់នៃសមាគមរោងចក្រកាត់ដេរនៅកម្ពុជាហៅកាត់ថា GMAC បានសម្ដែងការគាំទ្រចំពោះការប្រើអំពើហិង្សាបណ្ដាលឲ្យមានមនុស្សស្លាប់ពីសំណាក់កងរាជអាវុធហត្ថលើកម្មករកម្មការិនីធ្វើកូដកម្មដែលអំឡុងពេលនោះ មនុស្សប្រាំនាក់បានបាត់បង់ជីវិត ហើយជាង២០នាក់បានរបួសដោយសារគ្រាប់កាំភ្លើង។
គួររំឭកថា កងរាជអាវុធហត្ថបានធ្វើការបាញ់រះពេលមានការគប់ដុំថ្មពីសំណាក់ក្រុមអ្នកតវ៉ាជាកម្មករកម្មការិនីរោងចក្រកាត់ដេររាប់រយនាក់នៅលើផ្លូវវ៉េងស្រេង ក្នុងខណ្ឌពោធិ៍សែនជ័យ ដែលជាកម្មករកម្មការិនីរាប់ពាន់នាក់ធ្វើកូដកម្មទាមទារឲ្យមានការដំឡើងប្រាក់ខែអប្បបរមា។ ក្រុមអ្នកតវ៉ាបានដាក់របាំងនៅលើផ្លូវ និងបាននាំគ្នាប្រើដបសាំងជាអាវុធ។
ខណៈអង្គការសិទ្ធិមនុស្សក្នុងស្រុកមួយបានហៅការសម្លាប់មនុស្សនេះថា ជាករណីអាក្រក់បំផុតនៃការប្រើអំពើហិង្សាលើជនស៊ីវិលពីសំណាក់រដ្ឋាភិបាលក្នុងរយៈពេល១៥ឆ្នាំនោះ លោក កែន លូ អគ្គលេខាធិការសមាគម GMAC បានលើកឡើងកាលពីម្សិលមិញថា អាជ្ញាធរបានឆ្លើយតបចំពោះការតវ៉ាយ៉ាងសមស្រប។ លោកបាននិយាយថា “GMAC ថ្កោលទោសការប្រើអំពើហិង្សា។ ប៉ុន្តែខ្ញុំគិតថា នគរបាលត្រូវបំបែកក្រុមកុបករ ហើយណាមួយក្រុមកុបករមិនបានស្ដាប់ការព្រមានដោយផ្ទាល់មាត់ទេ”។
លោក កែន លូ បានលើកឡើងថា ការបាញ់លើក្រុមអ្នកតវ៉ាពីសំណាក់កងរាជអាវុធហត្ថគឺជារឿងត្រឹមត្រូវ។ លោកនិយាយថា “បាទ ប្រាកដណាស់។ ពួកគេ បានគប់ដុំថ្ម និងរបស់របរផ្សេងៗទៀតមុន តើចង់ឲ្យពួកគាត់ ឆ្លើយតបយ៉ាងម៉េចវិញ”។ មុនពេលមានការប៉ះទង្គិចគ្នាបណ្ដាលឲ្យមានមនុស្សស្លាប់កាលពីថ្ងៃសុក្រ GMAC បានជំរុញឲ្យអាជ្ញាធរចាត់វិធានការតឹងរ៉ឹងជាងមុន លើសហជីពចំនួនប្រាំមួយដែលគេដឹងថា សុទ្ធតែមានភាពឯករាជ្យ មិនជាប់ពាក់ព័ន្ធជាមួយរដ្ឋាភិបាលរបស់លោកនាយករដ្ឋមន្ត្រី ហ៊ុន សែន និងលើសកម្មភាពធ្វើកូដកម្មរបស់សមាជិកសហជីពទាំងប្រាំមួយនាក់ដែលបានជាប់ពាក់ព័ន្ធរួចទៅហើយក្នុងការធ្វើឲ្យខូចខាតទ្រព្យសម្បត្តិរោងចក្រទ្រង់ទ្រាយតូច និងលើការគំរាមកម្មករកម្មការិនីដែលមិនចង់ធ្វើកូដកម្ម។ គិតត្រឹមថ្ងៃម្សិលមិញ សហជីពទាំងប្រាំមួយនៅមិនទាន់សម្រេចចិត្តថា តើនឹងបន្តការតវ៉ារបស់ខ្លួន ឬអត់ទេ។
អ្នកស្រី ឆេង ឡាង អនុប្រធានសហព័ន្ធសហជីពនៃឧស្សាហកម្មវាយនភ័ណ្ឌកាត់ដេរកម្ពុជា ហៅកាត់ថា NIFTUC មានប្រសាសន៍ថា “យើងអាចនឹងប្ដូរផែនការធ្វើការតវ៉ានៅថ្ងៃច័ន្ទ ព្រោះយើងមិនចង់ឲ្យមានកម្មករកម្មការិនីបាត់បង់ជីវិតដោយសារការធ្វើបាតុកម្មទៀតទេ”។ អ្នកស្រី ឡាង បានឲ្យដឹងថា សហជីពទាំងប្រាំបីមិនទាន់មានឱកាសព្រមព្រៀងគ្នាលើជំហររួមពាក់ព័ន្ធនឹងការធ្វើកូដកម្មបន្តទេ បន្ទាប់ពីមានការសម្លាប់កម្មករ និងការប្រើអំពើហិង្សាកាលពីថ្ងៃសុក្រនោះ។
អ្នកស្រី ឡាង បាននិយាយថា ថ្នាក់ដឹកនាំសហជីពទាំងនោះមានការភ័យខ្លាចណាស់មិនទាន់ហ៊ានជួបប្រជុំគ្នាទេ ហើយណាមួយកម្មករកម្មការិនីកាត់ដេរជាច្រើនបានគេចខ្លួនទៅផ្ទះសំបែងតាមបណ្ដាខេត្តនានាផង ដោយលោកបានបន្ថែមថា លោក រ៉ុង ឈុន ប្រធានសហភាពសហជីពកម្ពុជា ក៏កំពុងលាក់ខ្លួនផងដែរ បន្ទាប់ពីបានទទួលដីកាកោះហៅទៅសាកសួរពីសាលាដំបូងរាជធានីភ្នំពេញ។
អ្នកស្រីបានមានប្រសាសន៍ថា “ថ្នាក់ដឹកនាំសហជីពកំពុងព្រួយបារម្ភពីសុវត្ថិភាពរបស់ខ្លួនបន្ទាប់ពីមេដឹកនាំសហជីពម្នាក់បានទទួលដីកាពីតុលាការ។ ឥឡូវនេះសហជីពផ្សេងៗទៀតកំពុងមានការភ័យខ្លាចពីការចាប់ខ្លួន។ គួររំឭកថា កាលពីថ្ងៃព្រហស្បតិ៍ សហជីពទាំងប្រាំមួយបានព្រមព្រៀងគ្នាបង្កើនការតវ៉ាទាមទារប្រាក់ខែអប្បបរមា១៦០ដុល្លារនៅទូទាំងប្រទេសលើកលែងតែរដ្ឋាភិបាលនិងរោងចក្រនានាព្រមបន្ដការចរចាអំពីរឿងប្រាក់ខែនេះឲ្យបានមុន ឬត្រឹមថ្ងៃសៅរ៍។ សមាគមរោងចក្រកាត់ដេរនៅកម្ពុជានិងក្រសួងការងារមិនបានទាក់ទងគ្នាទេ ចាប់តាំងពីមានការបង្ហូរឈាមនៅថ្ងៃសុក្រមក។
លោក ហ៊ាង សុភក្ត្រ ព្រះរាជអាជ្ញារងអមសាលាដំបូងរាជធានីភ្នំពេញ បានបញ្ជាក់ថា លោក រ៉ុង ឈុន ត្រូវបានកោះហៅសម្រាប់ការសាកសួរនៅថ្ងៃទី១៤ ខែមករា អំពីការពាក់ព័ន្ធរបស់លោកក្នុងអំពើហិង្សាអំឡុងការតវ៉ាអំពីប្រាក់ខែអប្បបរមាកន្លងមក បន្ទាប់ពីមានពាក្យបណ្ដឹងពី GMAC ។ លោក សុភក្ត្រ បានថ្លែងថា “យើងគ្រាន់តែកោះហៅគាត់មកសាកសួរប៉ុណ្ណោះ ព្រោះ បានចោទគាត់ពីបទញុះញង់ អំពើហិង្សាដែលធ្វើឲ្យប៉ះពាល់ដល់សន្ដិសុខសង្គម។
ថ្នាក់ដឹកនាំគណបក្សសង្គ្រោះជាតិគឺលោក សម រង្ស៊ី និងលោក កឹម សុខា ក៏ត្រូវបានកោះហៅនៅថ្ងៃតែមួយឲ្យឆ្លើយសំណួរពាក់ព័ន្ធនឹងការញុះញង់ឲ្យមានអំពើហិង្សាផងដែរ។
លោក គង់ អាទិត្យ អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ក៏បានឲ្យដឹងផងដែរថា មេដឹកនាំសហជីពទាំងប្រាំមួយដែលរួមមានទាំងសហជីពរបស់លោកផងដែរនោះ មិនទាន់មានឱកាសជួបពិភាក្សាគ្នាអំពីអនាគតរបស់ខ្លួនទេ។ ហើយថ្នាក់ដឹកនាំសហជីពទំាងនោះកំពុងមានការភ័យខ្លាចចំពោះការចាប់ខ្លួន។
លោកបានមានប្រសាសន៍ថា “យើងចង់ឲ្យមានការចរចាជាមួយក្រសួងការងារ និយោជក និង GMAC ដើម្បីពិភាក្សាអំពីការដំឡើងប្រាក់ខែអប្បបរមា ប៉ុន្តែពួកគេមិនទាន់បានជូនដំណឹងមកយើងថា តើកិច្ចប្រជុំបន្ទាប់នឹងធ្វើឡើងនៅពេលណាទេ”។ លោក ប្រាក់ ចាន់ធឿន ប្រធាននាយកដ្ឋានវិវាទការងារនៅក្រសួងការងារបានឲ្យដឹងថា ក្រសួងនេះបានផ្ញើលិខិតអញ្ជើញទៅសហជីពទាំងប្រាំមួយឲ្យមកជួបពិភាក្សាគ្នានៅថ្ងៃពុធ ដែលនៅពេលនោះសហជីពទាំងនេះឲ្យបញ្ឈប់ការធ្វើកូដកម្ម បើមិនដូច្នេះទេ ត្រូវប្រឈមនឹងវិធានការតាមផ្លូវច្បាប់។
លោកបានមានប្រសាសន៍ថា យើងបានកំណត់ពេលជួបប្រជុំជាមួយថ្នាក់ដឹកនាំសហជីពទាំងនោះ ដើម្បីប្រាប់ពួកគេកុំឲ្យបង្កបញ្ហាដែលអាចបង្កឲ្យមានភាពចលាចលនៅតាមរោងចក្រនានាទៀត”។ យើងមិនមានគម្រោងពិភាក្សាពីការដំឡើងប្រាក់ខែអប្បបរមាអំឡុងកិច្ចប្រជុំនោះទេ ប៉ុន្តែយើងនឹងស្នើឲ្យថ្នាក់ដឹកនាំសហជីពទាំងនោះឈប់រំខានកម្មករកម្មការិនីពេលពួកគេវិលត្រឡប់ទៅធ្វើការវិញ បើមិនដូច្នោះទេ យើងនឹងចាត់វិធានការតាមផ្លូវច្បាប់”។
លោក កែន លូ អគ្គលេខាធិការ GMAC បានអះអាងថា លោកមិនដឹងថា តើមានកម្មករកម្មការិនីកាត់ដេរប៉ុន្មាននាក់នៅរាជធានីភ្នំពេញ ចូលធ្វើការវិញទេ ប៉ុន្តែបានបន្ថែមថា រោងចក្រភាគច្រើននឹងព្យាយាមបើកទ្វារវិញនៅថ្ងៃនេះ។
លោកបានលើកឡើងថា វិស័យកាត់ដេរដែលបានផ្ដល់ប្រាក់ចំណូលជាង៥.០០០លានដុល្លារកាលពីឆ្នាំមុននេះ នឹងរើបឡើងវិញ។ លោកបានមានប្រសាសន៍ថា “ប្រាកដណាស់ថា មានការខូចខាត...ប៉ុន្តែខ្ញុំមិនគិតថា វាមិនអាចប៉ះប៉ូវវិញបានទេ”។
លោក កែន លូ បានអះអាងថា ការប្រើអំពើហិង្សាលើកម្មករកម្មការិនីធ្វើកូដកម្មពីសំណាក់រដ្ឋាភិបាលនេះនឹងមិនធ្វើឲ្យប៉ះពាល់ដល់វិស័យនេះទេ ផ្ទុយទៅវិញវានឹងធ្វើឲ្យវិនិយោគិនកាន់តែមានទំនុកចិត្តមិនចាកចេញពីកម្ពុជាទៅប្រទេសដទៃ។ លោក កែន លូ បានមានប្រសាសន៍ថា “អាជ្ញាធរបានបង្ក្រាបក្រុមអ្នកតវ៉ា វាគឺជាការបោះជំហានមួយក្នុងផ្លូវត្រូវ”៕ សេរីវុធ
កងរាជអាវុធហត្ថបាញ់មនុស្សស្លាប់ប្រាំនាក់អំឡុងការប៉ះទង្គិចគ្នាជាមួយនឹងក្រុមបាតុករ
មនុស្សប្រាំនាក់ត្រូវបានបាញ់ស្លាប់ ហើយជាង២០នាក់ទៀតបានរងរបួស ភាគច្រើនគឺដោយសារគ្រាប់កាំភ្លើង ពេលមន្ត្រីកងរាជអាវុធហត្ថបាញ់កាំភ្លើង AK អំឡុងការប៉ះទង្គិចគ្នាជាមួយក្រុមអ្នកតវ៉ា ដែលប្រដាប់ដោយដុំថ្ម ដំបង និងដបសាំងនៅលើផ្លូវវេងស្រេង ក្នុងតំបន់រោងចក្រកាត់ដេរនៅខណ្ឌពោធិ៍សែនជ័យ រាជធានីភ្នំពេញកាលពីថ្ងៃសុក្រ ម្សិលមិញនេះ។
អង្គការសិទ្ធិមនុស្សលីកាដូបានលើកឡើងថា ការបាញ់សម្លាប់នេះជាអំពើហិង្សាអាក្រក់បំផុតដែលរដ្ឋបានប្រើលើជនសីុវិលនៅក្នុងរយៈពេល១៥ឆ្នាំនេះ និងជាហេតុការណ៍អកុសលបំផុតក្នុងវិស័យកាត់ដេរដ៏សំខាន់ដែលមានកម្មករកម្មការិនីបម្រើការងារប្រហែល៦០មឺុននាក់តាមរោងចក្ររាប់រយដែលភាគច្រើនស្ថិតនៅក្រោមាករកាន់ កាប់របស់ជនបរទេស។
ការស្លាប់ និងរងរបួសនេះគឺជាលទ្ធផលនៃការតវា៉ាដោយសន្តិវិធីរយៈពេលជាងមួយសប្តាហ៍ដែលកម្មករកម្មការិនីរោងចក្រកាត់ដេររាប់ម៉ឺុននាក់បានធ្វើកូដកម្មទាមទារប្រាក់ខែ១៦០ដុល្លារក្នុងមួយខែ។
អំពើហិង្សានៅតំបន់ផ្លូវវេងស្រេងនេះបានផ្ទុះឡើងកាលពីយប់ថ្ងៃព្រហស្បតិ៍ ពេលយុវជនបិទផ្លូវ និងដុតកង់ឡានជាការឆ្លើយតបចំពោះការវាយដំ និងឃុំខ្លួនកូដករ មេដឹកនាំសហជីព និងព្រះសង្ឃពីសំណាក់ទាហានអង្គភាពឆត្រយោងលេខ៩១១នៅរោងចក្រកាត់ដេរ យ៉ាកជីន ដែលស្ថិតនៅក្នុងខណ្ឌពោធិ៍សែនជ័យដែរ។
នគរបាលនិងកងរាជអាវុធហត្ថរាប់រយនាក់បានព្យាយាមបង្ក្រាបការតវ៉ានេះនៅវេលាម៉ោង២រំលងអធ្រាត្រឈានចូលព្រឹកថ្ងៃសុក្រ...
ទាហានឆត្រយោងបង្ក្រាបកម្មករនិងព្រះសង្ឃតវ៉ា វាយឲ្យរងរបួសនិងបានឃាត់ខ្លួនជាច្រើននាក់
ព្រះសង្ឃ កម្មកររោងចក្រកាត់ដេរដែលធ្វើកូដកម្ម និងអ្នកកាសែត សរុបជាង១០នាក់ ត្រូវបានទាហានឆត្រយោងអង្គភាពលេខ៩១១វាយនឹងដំបងឆក់ ដែកបំពង់ទីប ព្រមទាំងបាញ់នឹងចំពាមនៅពេលមានការប៉ះទង្គិចគ្នានៅខាងក្រៅរោងចក្រមួយក្នុងទីក្រុងភ្នំពេញ ដែលនៅទីនោះអ្នកតវ៉ារាប់រយនាក់បានជួបជុំគ្នាដើម្បីទាមទារដំឡើងប្រាក់ខែ។
អង្គការសិទ្ធិមនុស្សឲ្យដឹងថា យ៉ាងហោចណាស់ព្រះសង្ឃ៤អង្គ និងអ្នកតវ៉ា១០នាក់ទៀតដែលត្រូវបានឃាត់ខ្លួននៅកន្លែងកើតហេតុកំពុងត្រូវបានឃុំខ្លួនដោយអង្គភាពនោះនៅឡើយរហូតមកទល់ល្ងាចម្សិលមិញ។ ព្រះសង្ឃមួយអង្គទៀត និងស្ត្រីម្នាក់កំពុងសម្រាកព្យាបាលរបួសនៅមន្ទីរពេទ្យមិត្តភាពខ្មែរ-សូវៀត។
អំពើហិង្សាកាលពីម្សិលមិញនេះ បានផ្ទុះឡើងបន្ទាប់ពីអ្នកតវ៉ាបានទៅដល់ខ្លោងទ្វាររោងចក្រយ៉ាកជីន នៅតាមផ្លូវជាតិលេខ៤ ដើម្បីបញ្ចុះបញ្ចូលកម្មករនៅខាងក្នុងឲ្យចូលរួមធ្វើបាតុកម្មជាមួយពួកគេដើម្បីទាមទារដំឡើងប្រាក់ឈ្នួលអប្បបរមាចំនួន១៦០ដុល្លារសម្រាប់កម្មកររោងចក្រកាត់ដេរ។
យោងតាមការរៀបរាប់របស់សាក្សី ការប៉ះទង្គិចគ្នានេះបានចាប់ផ្ដើមនៅពេលដែលទាហានមួយក្រុមមកពីអង្គភាពឆត្រយោងលេខ៩១១នៅក្បែរនោះ ដែលបានទៅឈរជើងនៅខាងក្រៅរោងចក្រនេះបានគប់ដបទឹកសុទ្ធទៅលើព្រះសង្ឃដែលគង់នៅជាមួយអ្នកតវ៉ា។ បន្ទាប់ពីមានកំហឹងចំពោះកាយវិការឈ្លើយបែបនេះ អ្នកតវ៉ាមួយចំនួនបានចាប់ផ្ដើមគប់ដុំថ្មដាក់ទាហានទាំងនោះ ហើយទាហានទាំងនោះតបតវិញដោយការវាយអ្នកតវ៉ា ព្រះសង្ឃ និងអ្នកថតរូបនឹងដំបងឆក់ និងដែកបំពង់ទីប។
សេង ហ៊ាង ជាកម្មកររោងចក្រយ៉ាកជីន ដែលបានចូលរួមការតវ៉ានេះបាននិយាយថា “ ទាហានបានវាយព្រះសង្ឃ និងកម្មករឃោរឃៅណាស់។ ទាហានត្រូវការពារប្រទេសជាតិ មិនមែនមកវាយកម្មករនោះទេ”។ កម្មកររោងចក្រកាត់ដេររាប់ម៉ឺននាក់បាននិងកំពុងតវ៉ា និងធ្វើកូដកម្មអស់រយៈពេលមួយសប្ដាហ៍មកហើយ ដើម្បីទាមទារឲ្យរដ្ឋាភិបាលដំឡើងប្រាក់ឈ្នួលអប្បបរមាប្រចាំខែរបស់ខ្លួនដល់១៦០ដុល្លារ។ ការព្រមព្រៀងពីក្រសួងការងារដើម្បីដំឡើងប្រាក់ឈ្នួលនេះដល់១០០ដុល្លារ ត្រូវបានច្រានចោលព្រោះវាតិចពេក។
ការប៉ះទង្គិចគ្នាកាលពីម្សិលមិញនេះ គឺជាការប៉ះទង្គិចគ្នាដ៏ធ្ងន់ធ្ងរបំផុតចាប់តាំងពីកូដកម្មបានចាប់ផ្ដើមឡើងរហូតមកទល់ពេលនេះ។
នៅពេលសួរពីមូលហេតុដែលប្រើកងកម្លាំងពិសេសដែលអ្នកខ្លះមានកាន់កំាភ្លើងដើម្បីចាត់វិធានការខុសប្លែកពីធម្មតាការពាររោងចក្រកូរ៉េនេះ លោកវរសេនីយ៍ទោ ចាប សុភ័ណ ដែលគេមើលឃើញបញ្ជាទាហានឆត្រយោងទាំងនេះនៅកន្លែងកើតហេតុបានឆ្លើយថា “ ខ្ញុំធ្វើតាមបទបញ្ជា”។
លោក ចាប សុភ័ណ គឺជាបងប្អូនរបស់លោក ចាប ភក្ដី មេបញ្ជាការអង្គភាពទ័ពឆត្រយោងលេខ៩១១ដែលមិនអាចទាក់ទងសុំការអត្ថាធិប្បាយអំពីការប្រើប្រាស់អង្គភាពរបស់លោកបាន។
ឧត្តមសេនីយ៍ត្រី ស៊ុំ សំណាង មេបញ្ជាការរងអង្គភាពភាពទ័ពឆត្រយោងលេខ៩១១ក៏បានបដិសេធមិននិយាយពីមូលហេតុដែលកងទ័ពឆត្រយោងរបស់លោកត្រូវបានដាក់ពង្រាយដើម្បីការពាររោងចក្រឯកជននេះដែរ។ ទោះជាយ៉ាងណា លោកបាននិយាយថា ទាហានរបស់លោកគ្រាន់តែប្រើកម្លាំងទប់ទល់នឹងអ្នកតវ៉ាប្រើហិង្សាប៉ុណ្ណោះ។ លោកបានមានប្រសាសន៍ថា “ មនុស្សមួយក្រុមក្នុងចំណោមមនុស្សទាំងនោះបានសម្រុកចូលរោងចក្រនេះ។ ខ្ញុំមិនដឹងថា ពួកគេជានរណាទេ”។
ឧត្តមសេនីយ៍ត្រី ស៊ុំ សំណាង បានមានប្រសាសន៍ថា លោកមិនដឹងថា មានមនុស្សប៉ុន្មាននាក់បានរងរបួស ឬត្រូវបានកងទ័ពរបស់លោកឃាត់ខ្លួននោះទេ ប៉ុន្តែលោកបានមានប្រសាសន៍ថា ពួកគេកំពុងត្រូវឃុំខ្លួននៅបញ្ជាការដ្ឋានកងទ័ពឆត្រយោងក្រោមការគ្រប់គ្រងរបស់កងរាជអាវុធហត្ថ។
អង្គការសិទ្ធិមនុស្សបានថ្កោលទោសអំពើហិង្សានេះ ជាពិសេសការប្រើប្រាស់ទាហានឲ្យទប់ទល់នឹងអ្នកតវ៉ា។ អង្គការលីកាដូ និងមជ្ឈមណ្ឌលអប់រំច្បាប់សម្រាប់សហគមន៍បានលើកឡើងនៅក្នុងសេចក្ដីថ្លែងការណ៍រួមមួយថា “ ការប្រើប្រាស់អង្គភាពបញ្ជាការពិសេសលេខ៩១១ឲ្យបង្ក្រាបបាតុកម្មនៅជិតរោងចក្រយ៉ាកជីន នៅក្នុងខណ្ឌពោធិ៍សែនជ័យ ក្នុងទីក្រុងភ្នំពេញនេះមិនធ្លាប់មានទេ និងបង្ហាញពីវិធីសាស្ត្រថ្មីរបស់អាជ្ញាធរក្នុងការទប់ស្កាត់ការតវ៉ាអហិង្សាធំៗ”។
ពួកគេបានអំពាវនាវឲ្យអាជ្ញាធរដោះលែងជាបន្ទាន់នូវមនុស្សដែលពួកគេបានឃាត់ខ្លួនកាលពីម្សិលមិញចំពោះការរៀបចំ ឬចូលរួមនៅក្នុងការតវ៉ា ឬចោទប្រកាន់ជនណាដែលសង្ស័យថា បានប្រព្រឹត្តបទល្មើសដោយគ្មានការពន្យារពេល។
លោក មឿន តុលា ប្រធានកម្មវិធីការងារនៅមជ្ឈមណ្ឌលអប់រំច្បាប់សម្រាប់សហគមន៍បានមានប្រសាសន៍ថា “យើងជំរុញឲ្យអ្នកជាប់ពាក់ព័ន្ធទាំងអស់នៅក្នុងការតវ៉ា និងជម្លោះការងារ និងអាជ្ញាធរគោរពច្បាប់ អត់ធ្មត់ និងរក្សាភាពអហិង្សា។ ត្រូវតែបញ្ចប់អំពើហិង្សា ឈប់ចាប់ខ្លួន និងរើសអើងចំពោះអ្នកព្យាយាមប្រើប្រាស់សិទ្ធិសេរីភាពក្នុងការជួបជុំ និងការទាមទារដំឡើងប្រាក់ខែ”។
អង្គការសិទ្ធិមនុស្សអាដហុក ទាមទារឲ្យដោះលែងអ្នកដែលត្រូវបានឃាត់ខ្លួនទាំងអស់ដោយគ្មានលក្ខខណ្ឌ ហើយបានជំរុញឲ្យរដ្ឋាភិបាលផ្ដន្ទាទោសអាជ្ញាធរចំពោះការជាប់ពាក់ព័ន្ធនៅក្នុងការប៉ះទង្គិចគ្នានេះ។
លោក ប៊ុន វណ្ណ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា មានប្រសាសន៍ថា នៅសួនឧស្សាហកម្មកាណាឌីយ៉ា ដែលស្ថិតនៅក្នុងខណ្ឌពោធិ៍សែនជ័យដែរនោះ ក៏មានការប៉ះទង្គិចគ្នាដែរ ហើយកងរាជអាវុធហត្ថបានត្រៀមខ្លួនទប់ទល់នឹងកម្មករតវ៉ារាប់ពាន់នាក់នៅពេលរសៀល។
លោក ប៊ុន វណ្ណ បានមានប្រសាសន៍ថា “កងរាជអាវុធហត្ថជាង២០០នាក់ប្រដាប់ដោយដំបង និងខែលគ្រប់ដៃ និងកំាភ្លើងដែរនោះ ត្រូវបានដឹកទៅទីនោះតាមរថយន្តតូចៗប្រហែល២០គ្រឿង ហើយពួកគេបានវាយកម្មករប្រហែល១០នាក់នឹងដំបង។ ខ្ញុំបញ្ជាកម្មករតាមឧបករណ៍បំពងសំឡេងឲ្យដកថយពីព្រោះខ្ញុំព្រួយបារម្ភខ្លាចកងរាជអាវុធហត្ថបាញ់កម្មករ”។
លោកឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានមានប្រសាសន៍ថា មន្ត្រីរបស់លោកត្រូវតែអន្តរាគមន៍ដើម្បីការពារសួនឧស្សាហកម្មនេះពីកម្មករ។លោកបានមានប្រសាសន៍ថា “យើងត្រូវតែចាត់វិធានការ ពីព្រោះពួកគេប៉ុនប៉ងបំផ្លាញទ្រព្យសម្បត្តិរោងចក្រ។ ស្ថានភាពអាចធ្ងន់ធ្ងរប្រសិនបើយើងមិនបានចាត់វិធានការទេនោះ”។
លោកបានមានប្រសាសន៍ថា លោកមិនបានដឹងថា មនុស្សប៉ុន្មាននាក់បានរងរបួស ឬត្រូវបានឃាត់ខ្លួននៅកន្លែងនោះ ឬថាតើមនុស្សដែលត្រូវបានឃាត់ខ្លួននោះនឹងត្រូវដោះលែងនៅពេលណាទេ។ លោកបានមានប្រសាសន៍ថា “លោកអាចមកមើលដោយខ្លួនឯងបាន”។
លោក ព្រំ សុខា រដ្ឋលេខាធិការក្រសួងមហាផ្ទៃ ក៏បាននិយាយការពារទាហានដែលបានបង្ក្រាបអ្នកតវ៉ានៅរោងចក្រយ៉ាកជីន និងកងរាជអាវុធហត្ថនៅសួនឧស្សាហកម្មកាណាឌីយ៉ានេះដែរ។
លោកបានមានប្រសាសន៍ថា “អ្នកតវ៉ាមួយចំនួនមិនគោរពច្បាប់ទេ ព្រមទាំងបំភិតបំភ័យយើងទៀត ហើយយើងបានទទួលបណ្តឹងពីស្ថានទូតជប៉ុននៅរសៀលនេះ។ ពួកគេបានធ្វើពាក្យបណ្តឹងជាផ្លូវការអំពីអ្នកតវ៉ាជ្រុលនិយម។ ពួកគេបានប្រើប្រាស់ពាក្យធ្ងន់ៗដើម្បីបំភិតបំភ័យយើង។ លោកបានបន្ថែមថា “លោកអាចមើលឃើញអ្វីដែលបានកើតឡើងនៅសួនឧស្សាហកម្មកាណាឌីយ៉ា។ វាធ្វើឲ្យប៉ះពាល់ដល់ក្រុមហ៊ុនមួយដែលនាំចេញសម្លៀកបំពាក់ការពារដែលគេយកទៅការពារវិទ្យុសកម្ម របស់រោងចក្រនុយក្លេអ៊ែនៅហ្វូគូស៊ីម៉ា”។
លោក តាកាយ៉ូស៊ិ គូរ៉ីមីយ៉ា (Takayoshi Kuromiya) លេខាទី២ប្រចាំនៅស្ថានទូតជប៉ុនបានបដិសេធថា ស្ថានទូតនេះគ្មានទំនាក់ទំនងណាមួយជាមួយកងកម្លាំងសន្ដិសុខរបស់ប្រទេសកម្ពុជាទេកាលពីម្សិលមិញ ហើយក៏មិនបានអំពាវនាវឲ្យមានការបង្ក្រាបលើកូដករបះបោរដែរ។ លោកមានប្រសាសន៍ថា “ទេថ្ងៃនេះយើងមិនបានធ្វើអ្វីទេ យើងបិទទ្វារ”។
កាលពីព្រឹកម្សិលមិញ កម្មកររោងចក្រមួយក្រុមទៀត មានគ្នាជាង២០០នាក់ ដែលធ្វើការតវ៉ាសុំដំឡើងប្រាក់ខែ បានបិទចរាចរណ៍លើកំណាត់ផ្លូវជាតិលេខ២ក្នុងខណ្ឌមានជ័យនៅភាគខាងត្បូងរាជធានីភ្នំពេញអស់រយៈពេលជាង២ម៉ោង។ ទោះបីជាមានការបិទចរាចរណ៍លើកំណាត់ផ្លូវប្រវែងពីរបីរយម៉ែត្រធ្វើឲ្យអ្នកដំណើរតាមយានយន្តរាប់រយនាក់ជាប់ទៅណាមិនរួចក៏ដោយ ក៏នគរបាលមិនបានតបតទៅវិញទេ។ មុនពេលផ្អាកការបិទផ្លូវនេះ...
គណបក្សប្រឆាំងលុបចោលការចរចាបន្ទាប់ពីទាហានឆត្រយោងបង្ក្រាបការតវ៉ា
កាលពីម្សិលមិញ គណបក្សសង្គ្រោះជាតិបានលុបចោលការជួបប្រជុំជាមួយគណបក្សប្រជាជនកម្ពុជាដែលបានគ្រោងធ្វើនៅថ្ងៃនេះបន្ទាប់ពីអង្គភាពទាហានឆត្រយោងបានបង្ក្រាបការតវ៉ាដ៏ហិង្សារបស់កម្មកររោងចក្រកាត់ដេរដែលបានធ្វើកូដកម្ម។ គម្រោងជួប ប្រជុំ ដែលគ្រោងធ្វើនៅម៉ោង៩ព្រឹកនៅអគារព្រឹទ្ធសភានេះ គឺដើម្បីកំណត់លក្ខខណ្ឌសម្រាប់ការចរចាបន្ថែមរវាងមេដឹកនាំគណបក្សទាំងពីរជុំវិញជម្លោះក្រោយការបោះឆ្នោតនេះ។
លោក សម រង្ស៊ី ប្រធានគណបក្សសង្គ្រោះជាតិបានប្រកាសពីការលុបចោលការជួបប្រជុំនោះដល់ក្រុមបាតុករកាលពីយប់មិញនៅទីលានប្រជាធិបតេយ្យ។ លោក សម រង្ស៊ី បាននិយាយទៅកាន់ក្រុមមនុស្សទាំងនោះថា “ក្នុងកាលៈទេសៈនេះ យើងមិនអាចចរចាជាមួយអ្នកធ្វើបាបប្រជាពលរដ្ឋខ្មែរបានឡើយ”។
យ៉ាងហោចណាស់អ្នកតវ៉ា១៥នាក់ត្រូវបានឃាត់ខ្លួនបន្ទាប់ពីទាហានឆត្រយោងបានប្រើដំបងឆក់ ដែកបំពង់ទីប និងចំពាមកៅស៊ូដើម្បីបង្ក្រាបការតវ៉ារបស់កម្មកររោងចក្រកាត់ដេរដែលបានធ្វើកូដកម្មនៅខាងក្រៅរោងចក្រយ៉ាកជីនក្នុងខណ្ឌពោធិ៍សែនជ័យ រាជធានីភ្នំពេញ។ អ្នកតវ៉ាមួយចំនួនត្រូវបានបញ្ជូនទៅព្យាបាលនៅមន្ទីរពេទ្យ។
លោក សម រង្ស៊ី បានមានប្រសាសន៍ថា “មិនមានការចរចាទៀតទេ។ យើងបានលុបចោលការចរចាទាំងនេះរហូតដល់លែងមានការធ្វើបាប ការវាយដំ ការចាប់ខ្លួនប្រជាពលរដ្ឋ ការបង្កបញ្ហានិងការប្តឹងផ្តល់ ”។ លោក សម រង្ស៊ី បានបន្ថែមថា ការតវ៉ាជាប់ៗគ្នារបស់គណបក្សសង្គ្រោះជាតិដែលកាលពីថ្ងៃអាទិត្យមុនមានអ្នកចូលរួម៥០.០០០នាក់ហែក្បួនក្នុងរាជធានីភ្នំពេញនោះនឹងបន្តនៅថ្ងៃអាទិត្យនេះដូចដែលបានគ្រោងទុក ហើយជាថ្មីម្តងទៀតនឹងធ្វើកាន់តែធំនៅទូទាំងប្រទេស។
លោក យឹម...
សមាគមគ្រូបង្រៀនឯករាជ្យកម្ពុជាត្រូវបានរងការគំរាមមិនឲ្យធ្វើបាតុកម្មតាមការគ្រោងទុក
កាលពីម្សិលមិញ ក្រសួងមហាផ្ទៃបានគំរាមដកហូតអាជ្ញាប័ណ្ណសមាគមគ្រូបង្រៀនឯករាជ្យកម្ពុជា ប្រសិនបើសមាគមនេះធ្វើបាតុកម្មតាមការគ្រោងទុកនៅសប្ដាហ៍ក្រោយក្នុងបំណងទាមទារប្រាក់ខែខ្ពស់ជាងមុនសម្រាប់គ្រូបង្រៀននៅទូទាំងប្រទេស។
មន្ត្រីម្នាក់នៅក្រសួងមហាផ្ទៃបានឲ្យដឹងថា ការគំរាមនេះគឺជាការឆ្លើយតបដោយផ្ទាល់ចំពោះការជាប់ពាក់ព័ន្ធរបស់លោក រ៉ុង ឈុន ប្រធានសមាគមនេះក្នុងការធ្វើកូដកម្មរបស់កម្មករកម្មការិនីរោងចក្រកាត់ដេរទៅទូទាំងប្រទេស និងចំពោះទំនាក់ទំនងរបស់លោកជាមួយគណបក្សសង្គ្រោះជាតិ។
សមាគមគ្រូបង្រៀនឯករាជ្យកម្ពុជាដែលមានសមាជិកជាង១០.០០០នាក់នៅទូទាំងប្រទេស បានសម្រេចកាលពីថ្ងៃអង្គារថា នឹងធ្វើបាតុកម្មរយៈពេលមួយសប្ដាហ៍នៅទូទាំងប្រទេសដោយចាប់ផ្ដើមនៅថ្ងៃច័ន្ទ ដើម្បីអំពាវនាវឲ្យមានការផ្ដល់ប្រាក់ខែ២៥០ដុល្លារក្នុងមួយខែសម្រាប់គ្រូបង្រៀនដែលមានប្រាក់ខែទាប។ សមាគមនេះបានផ្ញើលិខិតមួយច្បាប់ជូនរដ្ឋាភិបាលក្នុងថ្ងៃតែមួយជាមួយនឹងសេចក្ដីលម្អិតពីផែនការនេះ។
លោក ឌុច សន អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ បានមានប្រសាសន៍ថា “យើងនឹងដកហូតអាជ្ញាប័ណ្ណប្រសិនបើគាត់ ដឹកនាំការធ្វើបាតុកម្មដូចមានបញ្ជាក់ក្នុងលិខិតគាត់មែន”។ លោក សន បានឲ្យដឹងថា លោក ស ខេង...
កម្មករនឹងធ្វើបាតុកម្មបន្តទៀត បន្ទាប់ពីឈប់សម្រាកមួយថ្ងៃ
ទោះបីជាមានការព្រមានពីរដ្ឋាភិបាលដើម្បីបញ្ចប់ការធ្វើបាតុកម្មចំពោះការទាមទារដំឡើងប្រាក់ខែអប្បបរមាក្នុងវិស័យកាត់ដេរត្រឹមថ្ងៃនេះក៏ដោយ ក៏មេដឹកនាំសហជីពបានលើកឡើងកាលពីម្សិលមិញថា កម្មករកាត់ដេរនឹងបន្តការធ្វើការបាតុកម្មទូទាំងប្រទេសបន្តទៀតបន្ទាប់ពីឈប់សម្រាកអស់មួយថ្ងៃដើម្បីអបអរសាទរឆ្នាំថ្មី។
កូដកម្មនឹងបាតុកម្មនៅតែបន្តទោះបីជារដ្ឋាភិបាលបានសម្រេចដំឡើងប្រាក់ខែអប្បបរមាដល់៩៥ដុល្លារ កាលពីសប្តាហ៍មុនក៏ដោយ ប៉ុន្តែវានៅទាបជាងការទាមទាររបស់សហជីពដែលទាមទារឲ្យមានការដំឡើងប្រាក់ខែដល់១៦០ដុល្លារក្នុងខែនោះ។ ការសម្រេចដំឡើងប្រាក់ខែ៥ដុលា្លរ បន្ថែមទៀតដើម្បីធ្វើឲ្យ ប្រាក់ខែអប្បបរមា របស់កម្មកករកាត់ដេរឡើងដល់១០០ដុល្លាររបស់លោក អ៊ីត សំហេង រដ្ឋមន្ត្រីក្រសួងការងារកាលពីថ្ងៃអង្គារ ត្រូវបានសម្ព័នសហជីពមិនមែនរដ្ឋាភិបាលច្រានចោល។
លោកស្រី ម៉ន ញឹម មេដឹកនាំម្នាក់ក្នុងចំណោមមេដឹកនាំសហជីពទាំង៦នាក់ដែលត្រូវបានប្រាប់ឲ្យដឹងថា ពួកគេនឹងត្រូវប្រឈមវិធានការផ្លូវច្បាប់ ប្រសិនបើបាតុកម្មនៅតែបន្ត បានលើកឡើងថា កម្មករកាត់ដេរនឹងធ្វើបាតុកម្មបន្តទៀតនៅថ្ងៃនេះនៅឯរោងចក្រនីមួយៗ ដែលកម្មករកាត់ដេរបម្រើការឲ្យ។ លោកស្រីបានមានប្រសាសន៍ថា “កម្មករកាត់ដេរភាគច្រើនបានសម្រាកមួយថ្ងៃ ដើម្បីអបអរសាទរឆ្នាំថ្មី នៅថ្ងៃនេះ ប៉ុន្តែពួកនឹងបន្តការតវ៉ាបន្តទៀតនៅថ្ងៃស្អែកនៅឯរោងចក្ររបស់ពួកគេ ដើម្បីទាមទារឲ្យមានការដំឡើងប្រាក់ខែអប្បបរមា”។
កាលពីថ្ងៃច័ន្ទ ទីស្តីការគណៈរដ្ឋមន្ត្រីបានផ្ញើលិខិតមួយច្បាប់ទៅក្រសួងការងារ ដោយស្នើឲ្យក្រសួងដកអាជ្ញាប័ណ្ណរបស់សហជីពណាដែលបន្តការតវ៉ាហើយលោកបានប្រាប់កងសន្តិសុខរបស់រដ្ឋាភិបាលឲ្យត្រៀមខ្លួនដើម្បីចាត់វិធានការប្រឆាំងបាតុកម្មខុសច្បាប់។ កាលពីថ្ងៃច័ន្ទនិងថ្ងៃអង្គារ កម្មករកាត់ដេររាប់ពាន់នាក់ បានប្រមូលផ្តុំគ្នាធ្វើមហាបាតុកម្ម នៅខាងមុខក្រសួងការងារ។ ហើយកាលពីសប្តាហ៍មុនមានមនុស្សរាប់ពាន់នាក់់បានចូលរួមការហែក្បូននិងការធ្វើបាតុកម្មដែលដឹកនាំដោយគណបក្សសង្គ្រោះជាតិដើម្បីអំពាវនាវឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែង។
លោក គង់ អាទិត្យ អនុប្រធាន សម្ព័នសហជីពប្រជាធិបតេយ្យកម្មករកាត់ដេរកម្ពុជា បានឲ្យដឹងថា ការធ្វើបាតុកម្មបន្តទៀតនឹងមានកម្មករកាត់ដេរប្រមាណ៣០០.០០០នាក់់ចូលរួម ពោលគឺស្មើនឹង៦០ភាគរយនៃកម្មករកាត់ដេរនៅទូទាំងប្រទេស។ លោកបានបន្ថែមថា មេដឹកនាំសហជីពទាំង៦ ដែលជាប់ពាក់ព័ន្ធនឹងការធ្វើបាតុកម្ម នឹងជួបប្រជុំគ្នានៅក្នុងរាជធានីភ្នំពេញនៅថ្ងៃស្អែក ដើម្បីពិភាក្សាពីផែនការទៅថ្ងៃអនាគតបន្តទៀត។
លោក កេន លូ (Ken Loo) អគ្គលេខាធិកាសមាគមរោងចក្រកាត់ដេរនៅក្នុងប្រទេសកម្ពុជាបានឲ្យដឹងថា សមាជិករោងចក្រកាត់ដេរមួយចំនួនក្នុងចំណោមសមាជិកកាត់ដេរទាំងអស់របស់ខ្លួនប្រហែលនឹងបើករោងចក្ររបស់ខ្លួននៅថ្ងៃស្អែក ប៉ុន្តែលោកបានលើកឡើងថា សមាគមរបស់លោក នៅតែព្រួយបារម្ភចំពោះអំពើហិង្សាដែលអាចកើតមាន ប្រសិនបើរោងចក្រមួយចំនួនចាប់ផ្តើមប្រតិបត្តិការណ៍ឡើងវិញ អំឡុងការតវ៉ាទាមទារដំឡើងប្រាក់ខែនៅតែបន្តនោះ។ លោកបានមានប្រសាសន៍ថា “ខ្ញុំគិតថា អ្វីដែលយើងនឹងឃើញនោះគឺរោងចក្រមួយចំនួននឹងបើកនៅថ្ងៃស្អែក ហើយបន្ទាប់មកប្រសិនបើរោងចក្រទាំងនេះមានបញ្ហា ពួកគេប្រហែលនឹងបិទរោងចក្ររបស់ខ្លួនភ្លាមៗ។ រោងចក្រខ្លះប្រហែលជាមិនចង់ប្រថុយប្រថានឡើយ”។
លោក លូ បានបន្ថែមថា សមាគមរោងចក្រកាត់ដេរនៅកម្ពុជានឹងអំពាវនាវឲ្យរដា្ឋភិបាលជួយសម្រួលដល់ការនាំចេញវត្ថុធាតុដើមសារជាថ្មី ព្រោះរោងចក្រមិនអាចផលិតសម្លៀកបំពាក់ដើម្បីបំពេញតម្រូវការរបស់អតិថិជនខ្លួនបានឡើយ ដោយសារតែការធ្វើបាតុកម្ម។ លោកបានប្រសាសន៍ថា “ក្នុងគំនិតរបស់យើងគឺយើងចាំបាច់ត្រូវតែប្តូររោងចក្ររបស់យើងទៅប្រទេសផ្សេង ហើយដឹកជញ្ជូនវត្ថុធាតុដើមដែលយើងមានចេញពីប្រទេសកម្ពុជា”៕ ស៊ុយឈាង
(រាយការណ៍បន្ថែមដោយ Colin Meyn)
នៅពេលកម្មករកំពុងធ្វើកូដកម្មរដ្ឋាភិបាលដំឡើងប្រាក់ឈ្នួលប្រាំដុល្លារបន្ថែមទៀតដល់១០០ដុល្លារ
រយៈពេលមួយសប្ដាហ៍បន្ទាប់ពីកម្មករបានចាប់ផ្ដើមធ្វើកូដកម្មទូទាំងប្រទេស ដើម្បីប្រឆាំងសេចក្ដីសម្រេចរបស់រដ្ឋាភិបាលថា ដំឡើងប្រាក់ឈ្នួលអប្បរមាចំនួន១៥ដុល្លារដល់៩៥ដុល្លារសម្រាប់វិស័យកាត់ដេរនោះ កាលពីម្សិលមិញ ក្រសួងការងារ និងបណ្ដុះបណ្ដាលវិជ្ជាជីវៈបានប្រកាសថា ឥឡូវនេះខ្លួនដំឡើងប្រាក់ឈ្នួលប្រចាំខែនេះចំនួនប្រាំដុល្លារបន្ថែមទៀត ពោលគឺដំឡើងឲ្យដល់១០០ដុល្លារ។
ទោះជាយ៉ាងនេះក៏ដោយ មេដឹកនាំសហជីពប្រាំមួយដែលមិនមានទំនាក់ទំនងជាមួយរដ្ឋាភិបាល និងបានដឹកនាំកម្មកររោងចក្រកាត់ដេរជាច្រើនពាន់នាក់ក្នុងសកម្មភាពបាតុកម្មក្នុងសប្ដាហ៍នេះ ដើម្បីទាមទារប្រាក់ឈ្នួលអប្បបរមា១៦០ដុល្លារ ច្រានចោលប្រាក់ឈ្នួលថ្មី១០០ដុល្លារនេះ។
នៅក្នុងសេចក្ដីប្រកាសដែលចុះហត្ថលេខាដោយលោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ រដ្ឋាភិបាលក៏បានប្រកាសផងដែរថា ចំនួនប្រាក់ឈ្នួលថ្មីចំនួន១០០ដុល្លារសម្រាប់កម្មកររោងចក្រកាត់ដេរនេះ ត្រូវតែអនុវត្តដោយចាប់ផ្ដើមក្នុងខែកុម្ភៈ មិនមែនខែមេសា ដូចផែនការកាលពីដំបូងដែលមានការដំឡើងប្រាក់ឈ្នួល១៥ដុល្លារនោះទេ។ ក្នុងរយៈពេលប្រាំបួនខែកន្លងមកនេះ រដ្ឋាភិបាលបានដំឡើងប្រាក់ឈ្នួលអប្បបរមាក្នុងវិស័យកាត់ដេរ៦៤ភាគរយ ពី៦១ដុល្លារ។
លោក...
ប្អូនស្រីលោក ហ៊ុន សែន ប្រៀបធៀបលោក សម រង្ស៊ី ទៅនឹងប៉ុល ពត
អ្នកស្រី ហ៊ុន ស៊ីណាត ត្រូវជាប្អូនស្រីពៅរបស់លោកនាយករដ្ឋមន្ត្រី ហ៊ុន សែន កាលពីថ្ងៃច័ន្ទបានក្លាយជាមន្ត្រីរដ្ឋាភិបាលចុងក្រោយម្នាក់ដែលប៉ុនប៉ងធ្វើឲ្យគណបក្សប្រឆាំងមួយរូបលែងជឿទុកចិត្តចំពោះការបង្ហោះរូបភាពឃោរឃៅតាមហ្វេសប៊ុក។
អ្នកស្រី ស៊ីណាត ដែលជាអនុរដ្ឋលេខាធិការមកពីគណបក្សប្រជាជនកម្ពុជានៅក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចបានចែករំលែករូបភាពពីរនៅលើទំព័រហ្វេសប៊ុករបស់គាត់ដែលបានភ្ជាប់លោក សម រង្ស៊ី មេដឹកនាំគណបក្សប្រឆាំងទៅនឹងមេដឹកនាំជាន់ខ្ពស់របស់ខ្មែរក្រហម ព្រមទាំង អាដុល អ៊ីត្លែ។
ដំបូងរូបភាពដែលបង្ហោះនៅម៉ោង១១និង១៥នាទីយប់ថ្ងៃច័ន្ទនេះ បង្ហាញរូបលោក សម រង្ស៊ី នៅពីលើផ្ទៃមុខរបស់សមាជិកខ្មែរក្រហមប្រាំបួននាក់ រួមទាំង អៀង សារី ខៀវ សំផន និង ប៉ុល ពត។ អក្សរដែលសរសេរនៅពីលើផ្ទៃមុខរបស់លោក សម រង្ស៊ី នេះមានខ្លឹមសារថា “បញ្ញវន្តមកពីទីក្រុងបារីស សុទ្ធតែជាអ្នកបំផ្លាញជាតិ”។
ប៉ុល ពត អៀង សារី និង ខៀវ សំផន ព្រមទាំងមន្ត្រីរបបខ្មែរក្រហមមួយចំនួនទៀត បានទៅរៀនថ្នាក់អាហារូបករណ៍ពីក្រុមកុម្មុយនីស្តនៅបារីស អំឡុងទសវត្សរ៍ឆ្នាំ១៩៦០ដែលឧបត្ថម្ភដោយព្រះអង្គម្ចាស់ នរោត្តម សីហនុ។
អ្នកស្រី ស៊ីណាត បានសរសេរសំដៅដល់លោក សម រង្ស៊ី ថា “ខ្ញុំគាំទ្ររូបនេះពីព្រោះទាំងនេះគឺជាពាក្យពិតអំពីរបបខ្មែរក្រហមដែលមានមនុស្សស្លាប់ជាង១លាននាក់។ លោក សម រង្ស៊ី បានរស់នៅក្នុងទីក្រុងបារីស បន្ទាប់ពីគ្រួសាររបស់លោកបាននិរទេសទៅទីនោះនៅក្នុងជំនាន់ សីហនុ កាលពីទសវត្សរ៍ឆ្នាំ១៩៦៥ និងត្រឡប់មកកម្ពុជាវិញ ធ្វើជារដ្ឋមន្ត្រីក្រសួងហិរញ្ញវត្ថុនៅឆ្នាំ១៩៩២។ សព្វថ្ងៃនេះ មានមនុស្សម្នាក់ទៀតបានមកពីប្រទេសបារំាង” ។
យោងតាមលោក ហារីស និង ជូលី មេត្តាអ្នកសរសេរជីវប្រវត្តិរបស់លោក ហ៊ុន សែន បានឲ្យដឹងថា អ្នកស្រី ស៊ីណាត ខ្លួនគាត់ផ្ទាល់បានចូលព្រៃម៉ាកគីជាមួយខ្មែរក្រហមក្នុងឆ្នាំ១៩៧១ប្រហែលជានៅពេលដំណាលគ្នាជាមួយលោក ហ៊ុន សែន ដែរ។ លោក សម រង្ស៊ី ដែលមិនធ្លាប់ធ្វើជាសមាជិកខ្មែរក្រហមបានមានប្រសាសន៍កាលពីម្សិលមិញថា លោកមិនធ្វើអត្ថាធិប្បាយអំពីអ្វីដែលបង្ហោះនៅតាមហ្វេសប៊ុករបស់អ្នកស្រី ស៊ីណាត ទេ។
ការបង្ហោះនោះមានរូបលោក សម រង្ស៊ី លើកដៃស្រដៀងគ្នាទៅនឹងការគោរពរបស់របប ណាហ្ស៊ី។ អ្នកស្រី ស៊ីណាត សរសេរនៅពីក្រោមរូបលោក សម រង្ស៊ី ថា “ គាត់ចង់ធ្វើតាមមេដឹកនាំ អ៊ីត្លែ ដើម្បីយកមកអនុវត្តក្នុងប្រទេសយើង”។ លោក សម រង្ស៊ី បានមានប្រសាសន៍ថា “ខ្ញុំមិនចង់ឆ្លើយតបទៅនឹងការប្រមាថប្រភេទនេះទេ។ ហេតុអីបានជាខ្ញុំត្រូវឆ្លើយតបចំពោះការរិះគន់ជាទូទៅចំពោះអ្នករៀននៅក្នុងទីក្រុងបារីស? វាពិតជាមានន័យណាស់”។ គេមិនអាចទាក់ទងអ្នកស្រី ស៊ីណាត សុំការអត្ថាធិប្បាយបានទេ។
កាលពីសប្ដាហ៍មុន លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានចែករំលែករូបនៅតាមទំព័រហ្វេសប៊ុកដែលពណ៌នាមិនពិតអំពីព្រះតេជគុណ ប៊ុត ប៊ុនទិញ ដែលជាព្រះសង្ឃប្រឆាំង ថើបស្ត្រីបរទេសម្នាក់ ប៉ុន្តែក្រោយមករូបនោះត្រូវបានលុបចេញវិញ។ លោក ខៀវ កាញារីទ្ធ មិនសូមទោសឬធ្វើការកែតម្រូវអំពីរូបនេះទេ ហើយនោះគឺជារូបព្រះសង្ឃនៅប្រទេសស្រីលង្កា ដោយលោកមានប្រសាសន៍ថា បណ្ដាញទំនាក់ទំនងសង្គមមិនមែនជាប្រភពព័ត៌មានផ្លូវការទេ។
កាលពីម្សិលមិញ លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បានយល់ស្របថា ហ្វេសប៊ុកគឺជាល្បែងកម្សាន្ត។ លោកបានមានប្រសាសន៍ថា “យើងគ្មានច្បាប់សម្រាប់វិនិច្ឆ័យទោសលើការប្រើប្រាស់ហ្វេសប៊ុកទេ”។ លោកបានមានប្រសាសន៍ថា “ប្រសិនបើនរណាម្នាក់បង្ហោះនៅតាមហ្វេសប៊ុកថា គេចង់សម្លាប់នាយករដ្ឋមន្ត្រីនោះ យើងមិនអាចធ្វើអ្វីបានទេ គឺគ្រាន់តែហៅគេមកសាកសួរថា តើគេចង់និយាយអំពីអ្វី៕គឹមហឿន
Latest news
© 2021, ដេលី. All rights reserved.