34 C
Phnom Penh

ការធ្វើកូដកម្ម​​​ធ្វើ​​​ឲ្យ​​​ឧស្សាហកម្មកាត់​​​ដេរ​​​ខាត​​​បង់​​​​​​​​​ជាង​​​២០០លាន​​​ដុល្លារ​​​

ដោយ ឌឹ ខេមបូឌា ដេលី

បទវិភាគ

សមាគម​​​រោងចក្រកាត់ដេរ​​​នៅ​​​កម្ពុជា​​​ហៅ​​​កាត់​​​​​​ថា GMAC បាន​​​ឲ្យ​​​ដឹង​​​កាលពីម្សិលមិញ​​​ថា ចលាចល​​​ការងារ​​​រយៈពេលជា​​​ច្រើន​​​សប្តាហ៍​​​នេះ បាន​​​ធ្វើ​​​ឲ្យ​​​វិស័យ​​​ឧស្សាហកម្ម​​​កាត់​​​ដេរ​​​ខាត​​​បង់​​​ប្រាក់​​​២០០លានដុល្លារ​​​ ហើយ​​​អ្នក​​​ទិញ​​​អន្តរ​​​ជាតិ​​​ទំនង​​​ជា​​​កាត់​​​បន្ថយ​​​ការ​​​បញ្ជា​​​ទិញ​​​សម្លៀក​​​បំពាក់​​​ប្រមាណ​​​៣០​​​ភាគ​​​រយ​​​នៅ​​​ឆ្នាំ​​​នេះ ខណៈដែល​​​ការ​​​សម្លាប់​​​​​​កូដករ​​​ប្រាំ​​​នាក់ដែលត្រូវ​​​បាន​​​ចាត់​​​ទុក​​​ថា ជា  “កាខូច​​​ខាត​​​បណ្តាល​​​មក​​​ពី​​​ចលាចល​​​” ។

ដោយមិន​​​សប្បាយ​​​ចិត្ត​​​ចំពោះ​​​កូដកម្ម​​​និង​​​ការ​​​តវ៉ា​​​រយៈពេល​​​មួយ​​​សប្តាហ៍​​​ដោយ​​​កម្មករ​​​កាត់​​​ដេរ​​​ដែល​​​ទាម​​​ទារ​​​ប្រាក់​​​ឈ្នួល​​​អប្បបរមា​​​ប្រចាំ​​​ខែ​​​ក្នុង​​​វិស័យ​​​នេះ​​​ដល់ទៅ​​​១៦០ដុល្លារ​​​នោះ កង​​​រាជអាវុធ​​​ហត្ថ​​​បាន​​​បាញ់​​​សម្លាប់​​​កម្មករ​​​​​​កាត់​​​ដេរ​​​ចំនួនប្រាំ​​​នាក់ និង​​​ធ្វើឲ្យ​​​របួស​​​ជាង​​​២០នាក់​​​នៅ​​​ក្រៅ​​​រោង​​​ចក្រ​​​មួយ​​​ក្នុង​​​រាជ​​​ធានី​​​ភ្នំពេញកាលពីថ្ងៃ​​​សុក្រ​​​។

ដោយសារ​​​អង្គការ​​​សិទ្ធិមនុស្ស​​​​​​ អង្គការ​​​សហប្រជាជាតិ​​​ និ​​​ង​​​រដ្ឋាភិបាល​​​បរទេសនានា​​​ ថ្កោល​​​ទោស​​​ លោក កែន លូ អគ្គលេខា​​​ធិការ​​​របស់​​​ GMAC បានលើក​​​ឡើង​​​កាលពី​​​ថ្ងៃ​​​អាទិត្យ​​​ថា ការ​​​តប​​​ត​​​របស់​​​កង​​​រាជអាវុធ​​​ហត្ថ​​​ទៅ​​​នឹង​​​ក្រុម​​​អ្នក​​​ចោល​​​ដុំ​​​ថ្ម​​​ គឺ​​​សម​​​ហេតុ​​​សម​​​ផល​​​ “បំផុត​​​” ហើយ​​​។

នៅ​​​ឯ​​​សន្និសីទ​​​កាសែត​​​មួយ​​​នៅ​​​សណ្ឋា​​​គារ​​​​​​ភ្នំពេញ​​​កាលពីម្សិលមិញ ដើម្បី​​​កែតម្រូវ​​​​​​ការ​​​ច្រាន​​​ចោ​​​ល​​​ដាច់​​​អហង្កា​​​ររបស់​​​ខ្លួន​​​ចំពោះ​​​ការ​​​ទាម​​​ទារ​​​ប្រាក់​​​ឈ្នួល​​​របស់កម្មករ​​​ដែល​​​ធ្វើ​​​កូដកម្ម​​​ និង​​​ដើម្បី​​​អំពាវ​​​នាវ​​​ឲ្យ​​​មាន​​​ការ​​​បញ្ចប់​​​កូដកម្ម​​​ លោក វ៉ាន់ ស៊ូអៀង ប្រធាន​​​ GMAC បាន​​​មិន​​​អើពើនឹង​​​ការ​​​សម្លាប់​​​របស់​​​កង​​​រាជ​​​អាវុធហត្ថ​​​ឡើយ​​​ ហើយ​​​បាន​​​បន្ទោស​​​ការ​​​ស្លាប់​​​​​​នេះ​​​លើ​​​កម្មករ​​​ខ្លួន​​​ឯង​​​។

ឮលោក ស៊ូអៀង បាន​​​លើក​​​ឡើង​​​នៅឯ​​​សន្និសីទ​​​កាសែត​​​នេះ​​​ថា “ការ​​​អន្តោគមន៍​​​របស​​​់​​​នគរបាល​​​ដើម្បី​ធានាផ្លូវ​​​​​​ច្បាប​​​់ និង​​​បទ​​​បញ្ជា គឺ​​​សមហេតុ សមផល​​​ហើយ​​​។ វា​​​ត្រូវ​​​តែ​​​ជា​​​ការ​​​ខូច​​​ខាត​​​បណ្តាល​​​មក​​​ពី​​​ចលាចល​​​ ដូច្នេះ​​​ យើង​​​ត្រូវ​​​រំពឹង​​​ទុក​​​ដូច្នោះ​​​ដែរ។ ហេតុ​​​អ្វី​​​បាន​​​ជា​​​អ្នក​​​ទាំង​​​នោះ​​​ដែល​​​រំលោភ​​​ និង​​​ធ្វើ​​​បាតុកម្ម​​​ខុស​​​ច្បាប់​​​បង្ក​​​ផល​​​ប៉ះ​​​ពាល់​​​ដល់​​​បណ្តា​​​រោង​​​ចក្រ​​​ មិន​​​មាន​​​ការ​​​ទទួល​​​ខុស​​​ត្រូវ​​​ ? ហេតុ​​​អ្វី​​​? ។ ហើយ​​​ប្រសិន​​​បើ​​​មិន​​​មានព្រឹត្តិការណ៍​​​បែប​​​នេះ​​​ ក៏​​​គ្មាន​​​ការ​​​អន្តរាគមន៍​​​របស់​​​នគរបាល​​​​​​បែបនេះ​​​ដែរ។ហេតុ​​​អ្វី​​​ជានិច្ច​​​កាល​​​បង្ករឿង​​​ខុស​​​របៀប​​​នេះ​​​?”។

លោក​​​បាន​​​លើក​​​ឡើង​​​អំពី​​​ការ​​​បាញ់​​​គ្រាប់​​​ពិ​​ត​​​និង​​​ក្រុម​​​អ្នក​​​ចោល​​​ដុំ​​​ថ្ម​​​ថា “សមាមាត្រ​​​ គឺ​​​ការ​​​វាយ​​​តម្លៃ​​​របស់​​​អ្នក​​​ ម្នាក់​​​ៗ​​​វាយ​​​តម្លៃ​​​”។ លោក​​​បន្ត​​​ថា “ វា​​​ជា​​​រឿង​​​ដ៏​​​ក្រៀម​​​ក្រំ​​​មួយ​​​ចំពោះ​​​អ្នក​​​​​​ទាំង​​​ឡាយដែល​​​រង​​​ប៉ះ​​​ពាល់ ស្លាប់​​​ វា​​​ជា​​​រឿង​​​ដ៏​​​ក្រៀម​​​ក្រំ​​​មួយ។ ខ្ញុំ​​​មិន​​​ចង់​​​ឲ្យ​​​មាន​​​រឿង​​​ដូច្នោះ​​​ទេ ខ្ញុំ​​​មិនចង់​​​សោះ​​​​​​ ដូច្នេះ​​​ហេតុ​​​អ្វី​​​[ក្រុម​​​​​​អ្នក​​​តវ៉ា]ចាប់​​​ផ្តើម​​​?។

​​​រយៈពេល​​​ប៉ុន្មានថ្ងៃ​​​កាលពី​​​ចុង​​​សប្តាហ៍​​​មុន GMAC បានប្តឹង​​​អំពី​​​ការ​​​បំផ្លាញ​​​ទ្រព្យ​​​សម្បត្តិ​​​ដែល​​​ក្រុម​​​កូដករ​​​តាម​​​ចោទ​​​ថា បាន​​​សម្រុក​​​ចូល​​​រោង​​​ចក្រ​​​របស់​​​សមាជិក​​​ខ្លួន។ ទោះ​​​ជាយ៉ាង​​​ណា​​​ ដោយ​​​ស្នើ​​​សុំ​​​ឲ្យ​​​ធ្វើការ​​​វាយ​​​តម្លៃ​​​ឲ្យ​​​ហ្មត់​​​ចត់​​​អំពី​​​ការ​​​ខាត​​​បង់​​​នៃ​​​ការ​​​ខូច​​​ខាត​​​ទាំង​​​នោះ​​​កាលពីម្សិលមិញ លោក ស៊ូអៀង​​​ បានលើក​​​ឡើង​​​ថា ការ​​​ប៉ាន់​​​ប្រមាណ​​​​​​មួយ​​​នឹង “ឆាប់​​​ពេក​​​ហើយ​​​”។

GMAC គ្រាន់តែ​​​បង្ហាញ​​​ក្រុម​​​អ្នក​​​យក​​​ព័ត៌មាន​​​នូវ​​​វីដេអូ​​​ឃ្លីប​​​ខ្លី​​​មួយ​​​អំពី​​​កម្មករ​​​កាត់​​​ដេរ​​​ដែល​​​ទាត់​​​និង​​​វាយ​​​កម្ទេច​​​របង​​​ដែកនៅ​​​រោង​​​ចក្រ​​​។ ដោយ​​​មិន​​​អាច​​​និយាយ​​​អំពី​​​ការ​​​ខូច​​​ខាត​​​ដល់​​​រោង​​​ចក្រ​​​នេះ​​​នោះ លោក ស៊ូអៀង មាន​​​​​​​​​ការ​​​យក​​​ចិត្ត​​​ទុក​​​ដាក់​​​បន្ថែ​​​ម​​​ទៀត​​​ក្នុង​​​ការ​​​កំណត់​​​ថ្លៃ​​​មួយទៅ​​​លើ​​​អ្វី​​​ដែល​​​ឧបសគ្គ​​​នៃការ​​​ធ្វើ​​​កូដកម្ម​​​បាន​​​ធ្វើឲ្យ​​​ខូច​​​ខាត​​​ដល់​​​រោង​​​ចក្រ​​​នៅ​​​ក្នុង​​​សមាគម​​​របស់លោក​​​ និង​​​ឧស្សាហកម្ម​​​របស់​​​​​រោង​​​ចក្រនេះ ពោល​​​គឺ​​​​​​​​​ខាតបង់​​​ទឹក​​​ប្រាក់​​​ចំនួន​​​​​​២០០លាន​​​ដុល្លារ​​​ក្នុង​​​ការ​​​លក់​​​ផលិត​​​ផល​​​ និង​​​ចំណូល​​​៧០លាន​​​ដុល្លារ​​​ក្នុង​​​រយៈពេល៥០ថ្ងៃ​​​ចុង​​​ក្រោយ​​​នេះ ហើយ​​​អ្នក​​​ទិញ​​​ជា​​​ច្រើន​​​បាន​​​គំរាម​​​ប្តឹង​​​ ឬ​​​លុប​​​ចោល​​​កិច្ច​​​សន្យា​​​ជុំ​​​វិញ​​​ការ​​​ផលិត​​​ដែល​​​ខាត​​​បង់​​​នេះ ហើយ​​​ក្រុម​​​ហ៊ុន​​​ពី​​​ប្រាំ​​​ទៅ​​​ប្រាំពីរ​​​ក្រុមហ៊ុន​​​ដែល​​​​​​កំពុង​​​តែ​​​គិត​​​អំពី​​​ការ​​​បង្កើត​​​ហាង​​​នៅ​​​ទីនេះ​​​ លុប​​​ចោល​​​ការ​​​ទស្សនកិច្ច​​​របស់​​​ខ្លួន​​​។

លោក​​​បាន​​​លើក​​​ឡើង​​​ថា មក​​​ទល់​​ត្រឹម​​​ឆ្នាំ​​​២០១៤ ក្រុ​​ម​​​ហ៊ុន​​​ខ្លះ​​​ដូចជា ក្រុម​​​ហ៊ុន​​​ H&M បាន​​​យល់​​​ព្រម​​​បង់​​​ប្រាក់បន្ថែមទៀត​​​សម្រាប់​​​ការ​​​បញ្ជាទិញ​​​របស់​​​ខ្លួន​​​ ក៏ប៉ុន្តែ​​​បាន​​​ព្រមាន​​​ថា ការ​​​ធ្លាក់​​​ចុះយ៉ាង​​​ខ្លាំង​​​និង​​​​​ទាំង​​​ស្រុង​​​​​​ក្នុង​​​ការ​​​បញ្ជា​​​ទិញ​​​ត្រូវ​​​បាន​​​ធានា​​​រួច​​​រាល់​​​ហើយ​​​។ លោក​​​បាន​​​ថ្លែង​​​ថា “ឆ្នាំ​​​ក្រោយ​​​ ប្រសិន​​​បើ​​​ជា​​​អ្នក​​​ទិញ​​​នៅ​​​តែ​​​បន្ត​​​ដាក់​​​បរិមាណ​​​នៃ​​​ការ​​​បញ្ជាទិញ​​​ដដែល​​​ ដែល​​​ខ្ញុំ​​​សង្ស័យ​​​ ប្រសិន​​​បើ​​​ពួកគេ​​​ដំឡើង​​​ថ្លៃ​​​ដូច​​​ជា​​​ក្រុម​​​ហ៊ុន​​​ H&M ​​​យើង​​​ប្រហែល​​​ជា​​​ទប់​​​ទល់​​​បាន​​​។

ប៉ុន្តែ ជា​​​ការ​​​​​​ពិត​​​ពួកគេ​​​នឹង​​​មិន​​​ធ្វើ​​​ដូច្នោះ​​​ឡើយ​​​។ ​​​យើង​​​រំពឹង​​​ទុក​​​ថា នឹង​​​មាន​​​ការ​​​បាត់​​​បង់​​​ការ​​​បញ្ជា​​​ទិញ​​​ពី​​​២០ទៅ​​​៣០ភាគ​​​រយ​​​។ យើង​​​អាច​​​រំពឹង​​​ទុក​​​ថា អ្នក​​​ទិញ​​​ខ្លះ​​​នឹង​​​បញ្ចុះ​​​ថ្លៃ ព្រោះ​​​ពួកគេ​​​និយាយ​​​ថា ‘ខ្ញុំ​​​ប្រថុយ​​​ប្រថានក្នុង​​​ការ​​​ដាក់​​​ការ​​​បញ្ជា​​​ទិញ​​​ក្នុង​​​ប្រទេស​​​កម្ពុជា​​​ ពី​​​ព្រោះ​​​​​​វា​​​ជា​​​ប្រទេស​​​​​​មួយ​​ដែលប្រកប​​​ដោយ​​​ហានិភ័យ​​​’ ”​​​។

ប៉ុន្តែ​​​ លោក ស៊ូអៀង និង​​​ក្រុម​​​គាំទ្រ​​​អាជីវ​​​កម្ម​​​ផ្សេង​​​ទៀត​​​នៅ​​​ឯ​​​សន្និសីទ​​​កាសែត​​​បាន​​​បញ្ជាក់​​​ថា កម្មករ​​​កាត់​​​ដេរ​​​ទទួល​​​ប្រាក់​​​ខែ​​​គ្រប់​​​គ្រាន់​​​ហើយ​​​ ហើយ​​​ថា ការ​​​សុំ​​​ដំឡើង​​​ប្រាក់​​​ខែ​​​អប្បបរមា​​​ដល់​​​១៦០​​​ដុល្លារ​​​មិន​​​គ្រាន់​​​តែ​​​សម្លាប់​​​ឧស្សាហកម្ម​​​កាត់​​​ដេរ​​​ក្នុង​​​ស្រុក​​​នោះ​​​ទេ​​​ ក៏​​​ប៉ុន្តែ បំផ្លាញ​​​ខ្ទេច​​​ខ្ទី​​​ទៅលើ​​​សេដ្ឋកិច្ច​​​ទាំង​​​មូល​​​។

លោក  ប្រេតតុន ស៊ារ៉ូនី (Bretton Sciaroni) ទីប្រឹក្សា​​​ផ្នែក​​​ច្បាប់​​​ជា​​​យូរមក​​​ហើយ​​​របស់​​​រដ្ឋាភិបាល​​​លោកនាយករដ្ឋមន្ត្រី ហ៊ុន សែន​​​ដែល​​​ដឹក​​​នាំ​​​ក្លិប​​​អាជីវកម្ម​​​អន្តរជាតិ​​​នៅ​​​ក្នុង​​​ប្រទេស​​​នេះ​​​ បាន​​​ព្រមាន​​​ថា ការ​​​ឡើង​​​ប្រាក់​​​ឈ្នួល​​​ទ្វេ​​​ភ្លាម​​​ៗ​​​ក្នុង​​​វិស័យ​​​មួយ​​​ដែល​​​មាន​​​ជន​​​កម្ពុជា​​​ប្រមាណ​​​៦០០.០០០នាក់​​​ នឹង​​​មាន​​​ផ​​ល​​​​​ប៉ះ​​​ពាល់​​​អតិផរណា​​​ដ៏​​​​​​គ្រោះ​​​ថ្នាក់​​​មួយ​​​នៅ​​​ទូទាំង​​​ប្រទេស​​​។

លោក ស៊ារ៉ូនី បាន​​​ឲ្យ​​​ដឹង​​​ថា លោក​​​មិន​​​ដឹង​​​ថា តើ​​​ប្រាក់​​​ឈ្នួល​​​បែប​​​ណា​​​ដែល​​​រោង​​​ចក្រ​​​ នឹង​​​ចាប់​​​ផ្តើម​​​ដក​​​ ជា​​​អ្វី​​​ដែល​​​លោក​​​ហៅ​​​ថា “ចំណុច​​​កំពូល​​​” ក៏​​​ប៉ុន្តែ លោក​​​បាន​​​បញ្ជាក់​​​ថា ការ​​​តវ៉ា​​​កាន់​​​តែ​​​ច្រើន​​​ដូចជា ការ​​​តវ៉ា​​​ក្នុង​​​រាជធានី​​​ភ្នំពេញ ដែល​​​គេ​​​បានឃើញ​​​កាល​​​ពីសប្តាហ៍​​​មុន នឹងធ្វើ​​​ឲ្យ​​​​​​វិនិយោគិន​​​ញញើត​​​មិន​​​ហ៊ាន​​​ចូល​​​មក​​​។

ក្រុម​​​ហ៊ុន​​​ធន​​​ធាន​​​មនុស្ស​​​ក្នុង​​​ស្រុក​​​ HR Inc. បាន​​​ធ្វើការ​​​ស្ទាប​​​ស្ទង់​​​មួយ​​​អំពី​​​កម្មករ​​​កាត់​​​ដេរ​​​ដែល​​​ទទួល​​​បាន​​​ចំណូល​​ និង​​​ចំណាយ​​​នៅ​​​ពាក់​​​កណ្តាល​​​ឆ្នាំ​​​២០១​៣​។​ ក្រុម​​​ហ៊ុន​​​នេះ​​​បាន​​​រក​​​ឃើញ​​​ថា កម្មករ​​​កាត់​​​ដេរ​​​ជា​​​មធ្យម​​​ទទួល​​​ចំណូល​​​ជាមួយនឹង​​​ប្រាក់​​​បន្ថែម​​​ម៉ោង​​​រាល់​​​ថ្ងៃ​​​ ពោលគឺ​​​១៧៨ដុល្លារ​​​ក្នុង​​​មួយ​​​ខែ ហើយ​​​ប្រាក់​នេះ​​​​ត្រូវ​​​បាន​​​ចំណាយ​​​បន្ទាប់​​​ពី​​​ផ្ញើ​​​ទៅ​​​ផ្ទះ​​​ចំនួន​​​៥៦ដុល្លារ​​​ក្នុងមួយ​​​ខែ​​​។

លោក សាន់ដ្រា ដាមីកូ (Sandra D’Amico)​​​នាយក​​​គ្រប់​​​គ្រង​​​របស់ក្រុម​​​ហ៊ុន​​​HR Inc. ដែល​​​ជា​​​អនុប្រធាន​​​សហព័ន្ធនិយោជក​​​ និង​​​សមា​​​គម​​​​​​អាជីវកម្ម​​​កម្ពុជា​​​ផង​​​ដែរ​​​ បាន​​​ឲ្យ​​​ដឹង​​​ថា “ពិត​​​មែន​​​ហើយ​​​ មាន​​​ការ​​​ពិភាក្សា​​​មួយ​​​អំពី​​​​​​តើ​​​អ្វីទៅ​​​ជា​​​អាហារ​​​ឆ្ងាញ់​​​។ ប៉ុន្តែ ភាពពិត​​​បង្ហាញ​​​ថា មាន​​​ប្រាក់​​​បន្ថែម​​​ និងមាន​​​ប្រាក់​​​ចំណូល​​​ដែល​​​អាច​​​ប្រើប្រាស់​​​ក្នុង​​​ការ​​​ចំណាយ​​​ផ្សេង​ៗ”។

លោក  ស៊ូអៀង ក៏​​​បាន​​​អះអាង​​​ដែល​​​ថា កូដករ​​​មួយ​​​ចំនួន​​​តូច​​​បាន​​​កំពុង​​​តែ​​​យក​​​ឧស្សាហ​​​កម្ម​​​ទាំង​​​មូល​​​ជាចំណាប់​​​ខ្មាំង ។ លោកមិន​​​បាន​​​ទទួល​​​ស្គាល់​​​ការ​​​អំពាវ​​​នាវ​​​របស់​​​សហជីព​​​ដែល​​​ធ្វើ​​​កូដកម្ម​​​ឲ្យ​​​បន្ត​​​ការ​​​ចរចា​​​អំពី​​​ប្រាក់​​​ឈ្នួល​​​ឡើយ​​​ ប៉ុន្តែ លោក​​​បាន​​​ថ្លែ​​​ងថា ការ​​​ចរចា​​​នៅ​​​ពេល​​​អនាគត​​​ណាមួយ​​​ នឹង​​​កើត​​​ឡើង​​​ដោយ​​​គ្មាន​​​អំពើ​​​ហិង្សា​​​ទៀត​​​ឡើយ​​​។ លោក ស៊ូអៀង បាន​​​ថ្លែង​​​ថា លោក​​​រំពឹង​​​ដែរថា កម្មករ​​​កាត់​​​ដេរ​​​យ៉ាង​​​តិច​​​៨០​​​ភាគរយ​​​ នឹង​​​ត្រឡប់​​​មក​​​កាន់​​​រោ​​​ង​​​ចក្រ​​​ចំនួន​​​ជាង​​​៤០០ទៀត​​​ក្នុង​​​ប្រទេសនេះ​​​វិញ​​​ បន្ទាប់​​​ពី​​​ថ្ងៃ​​​ឈប់​​​សម្រាក​​​ទិវា​​​ជ័យ​​​ជម្នះ​​​៧មករា​​​។

សហជីពចំនួន​​​ប្រាំមួយ​​​ដែល​​​នៅ​​​ពី​​​ក្រោយ​​​​​​​​​ការ​​​តវ៉ា​​​នេះ​​​បាន​​​បដិសេធ​​​ដាច់​​​អហង្កា​​​ថា មិន​​​បាន​​​ញុះ​​​ញង់​​​ឲ្យ​​​មាន​​​អំពើហិង្សា​​​ណា​​​មួយ​​​កាល​​​ពីសប្តាហ៍​​​មុន​​​នោះ​​​ទេ ហើយ​​​កាលពី​​​ម្សិល​​​មិញ បាន​​​លើក​​​ឡើង​​​ថា ​​​ខ្លួន​​​នៅ​​​តែ​​​ទាម​​​ទារ​​​ឲ្យ​​​ការ​​​ដំឡើង​​​ប្រាក់​​​ឈ្នួល​​​អប្បបរមា​​​១៦០ដុល្លារ​​​។

លោក ជា មុនី ប្រធាន​​​សហជីព​​​កម្មករ​​​កាត​​​់​​​ដេរ​​​នៃ​​​ព្រះរាជាណាចក្រកម្ពុជា​​​ ធ្វើ​​​ការ​​​​​​ព្រមាន​​​របស់​​​លោក​​​ផ្ទាល់​​​ចំពោះ​​​រោង​​​ចក្រ​​​នានាថា ប្រសិន​​​បើ​​​ពួកគេ​​​មិន​​​ដំឡើង​​​ប្រាក់​​​ឈ្នួល​​​អប្បបរមា​​​១៦០ដុល្លារ​​​ទេនោះ កម្មករ​​​នឹង​​​ចេញ​​​ពី​​​ប្រទេស​​​ដើម្បី​​​ស្វែង​​​រក​​​ប្រាក់​​​ឈ្នួល​​​ប្រសើរ​​​ជាង​​​នេះ​​​នៅក្រៅ​​​ប្រទេស​​​។ លោក មុនី បានលើក​​​ឡើង​​​ថា “ខ្ញុំ​​​ចង់​​​ព្រមាន​​​ពួកគេ​​​ថា ប្រសិន​​​បើ​​​គ្មានការ​​​ដំឡើង​​​ប្រាក់​​​ឈ្នួល​​​អប្បបរមាទេ​​​នោះ ឧស្សាហកម្ម​​​នេះ​​​នឹង​​​ដួល​​​រលំ​​​ ពីព្រោះ​​​កម្មករ​​​នឹង​​​ចេញ​​​ទៅ​​​ប្រទេស​​​ផ្សេង​​​ទៀត​​​”។ លោក​​​បាន​​​​​​ចាត់​​​ទុក​​​ការ​​​​​ព្រមាន​​​របស់រោងចក្រ​​​ចេញ​​​ពីកម្ពុជា​​​ ថា ជា​​​ល្បិច​​​ចាស់​​​គំរិលមួយ​​​។

លោក​​​បាន​​​មាន​​​ប្រសាសន៍​​​ថា “សូម​​​ឲ្យ​​​ពួកគេ​​​ដំឡើង​​​ប្រាក់​​​ឈ្នួល​​​ដល់១៦០ដុល្លារ​​​ជាមុន​​​សិន​​​ ដូច្នេះ​​​យើង​​​អាច​​​មើល​​​ឃើញ​​​ថា​​​តើ​​​រោង​​​ចក្រ​​​ចំនួន​​​ប៉ុន្មាន​​​បិទ​​​។ ពួកគេ​​​បាន​​​ជជែក​​​អំពី​​​បញ្ហា​​​នេះរយៈពេល​​​១០ឆ្នាំ​​​ហើយ”។ លោក មុនី បាន​​​ឲ្យ​​​ដឹង​​​ថា សហជីព​​​ចំនួន​​​ប្រាំមួយ​​​មិន​​​ទាន់​​​កំណត់​​​ផែនការ​​​របស់​​​ខ្លួន​​​នៅ​​​ឡើយ​​​ទេ​​​ បន្ទាប់​​​ពីថ្ងៃ​​​ឈប់​​​សម្រាក​​​ថ្ងៃ​​​នេះ ប៉ុន្តែ​​​រំពឹង​​​ថា មានកម្មករ​​​​​​ច្រើនបន្ត​​​ការ​​​ធ្វើ​​​កូដកម្ម​​​របស់​​​ខ្លួន​​​ទៀត​​​ ប៉ុន្តែ​​​​​​ លោក​​​មិន​​​បាន​​​និយាយ​​​ថា​​​ កម្មករ​​​ចំនួនប៉ុន្មាននាក់​​​នោះ​​​​​​ទេ​​​។

លោក គង់ អាទិត្យ​​​ អនុប្រធាន​​​សម្ព័ន្ធ​​​សហជី​​ព ប្រជា​​​​​​ធិប​​​តេយ្យកម្មករ​​​កាត់​​​​​​ដេរ​​​កម្ពុជា​ ហៅ​​​កាត់​​​​​​ថា ស៊ី​​​ខៅ​​​ឌូ ​​​​​បា​​​ន​​​​​​លើក​​​ឡើង​​​​​​​​​ថា​​​​​​ ​​​រោ​​​ង​​​​​​ចក្រ​​​គួរ​​​​​​​​​តែ​​​​​​​​​បញ្ជាក់​​​​​​ថា ខ្លួ​​​ន​​​​​​មិន​​​អាច​​​លៃ​​​លក​​​ដំឡើង​​​ប្រាក់​​​ឈ្នួល​​​អប្បបរមា​​​១៦០​​​ដុល្លារ​​​ដោយ​​​ការ​​​បើក​​​បញ្ជី​​​របស់​​​ខ្លួន​​​នោះ​​​ទេ។ លោក​​​បាន​​​ថ្លែង​​​ថា “បញ្ហាសំខាន់​​​គឺ​​​ថា ពួក​​​គេ​​​ត្រូវ​​​ងាក​​​មក​​​រក​​​តុ​​​ចរចា​​​វិញ​​​។ យើង​​​នៅ​​​តែ​​​ទាមទារ​​​១៦០ដុល្លារ​​​”។ សហជីព​​​ទាំង​​​នេះ​​​បានច្រាន​​​ចោល​​​សំណើ​​​​​​មួយ​​​ពី​​​រដ្ឋាភិបាល​​​ និង​​​រោងចក្រ​​​សុំ​​​ឲ្យ​​​ដំឡើង​​​ប្រាក់​​​ឈ្នួល​​​អប្បបរមា​​​ប្រចំា​​​ខែ១០០ដុល្លារ​​​៕ប៊ុននី

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស