28 C
Phnom Penh

ទាហាន​ឆត្រ​យោង​បង្ក្រាប​​កម្ម​ករ​​និង​ព្រះ​សង្ឃ​តវ៉ា​ វាយឲ្យ​​​រង​របួស​​និងបាន​ឃាត់​ខ្លួន​​ជាច្រើននាក់

ដោយ ឌឹ ខេមបូឌា ដេលី

បទវិភាគ

ព្រះ​សង្ឃ​ កម្មករ​រោងចក្រ​កាត់​ដេរ​ដែល​ធ្វើ​កូដកម្ម​ និង​អ្នកកាសែត សរុប​​ជា​ង​១០​នាក់​ ត្រូវ​បាន​ទាហាន​ឆត្រ​យោង​អង្គភាព​លេខ​​៩១១​វាយ​នឹង​ដំបង​ឆក់​ ដែក​បំពង់​ទីប​​ ​ព្រម​ទាំង​បាញ់​នឹង​ចំពាម​នៅពេល​មាន​ការ​ប៉ះ​ទង្គិច​គ្នា​នៅ​ខាង​ក្រៅ​រោងចក្រ​មួយ​ក្នុង​ទីក្រុង​ភ្នំពេញ​ ដែល​នៅ​ទីនោះ​អ្នក​តវ៉ា​រាប់​រយ​នាក់​បាន​ជួប​ជុំគ្នា​ដើម្បី​ទាម​ទារ​ដំឡើង​ប្រាក់​ខែ​។

អង្គការ​សិទ្ធិមនុស្ស​ឲ្យ​ដឹង​ថា យ៉ាង​ហោច​ណាស់​ព្រះ​សង្ឃ​៤​អង្គ​ និង​អ្នក​តវ៉ា​១០​នាក់​ទៀត​​ដែល​ត្រូវ​​បាន​ឃាត់​ខ្លួន​នៅ​​កន្លែង​កើត​ហេតុ​កំពុង​ត្រូវ​បានឃុំខ្លួន​ដោយ​អង្គភាព​នោះ​​​នៅ​ឡើយ​រហូត​មក​ទល់​ល្ងាច​ម្សិល​មិញ។ ព្រះ​សង្ឃ​មួយ​អង្គ​ទៀត​ និង​ស្ត្រី​ម្នាក់​កំពុង​សម្រាក​ព្យាបាល​របួស​នៅមន្ទីរពេទ្យ​មិត្ត​ភាព​ខ្មែរ-​សូវៀត។

អំពើ​ហិង្សា​កាលពីម្សិលមិញ​នេះ បាន​ផ្ទុះ​ឡើង​បន្ទាប់ពីអ្នក​តវ៉ា​បាន​ទៅ​ដល់​ខ្លោង​ទ្វារ​រោងចក្រ​យ៉ាកជីន នៅ​តាម​ផ្លូវ​ជាតិ​លេខ​៤​ ដើម្បី​បញ្ចុះ​បញ្ចូល​កម្មករ​នៅ​ខាង​ក្នុង​ឲ្យ​ចូល​​រួមធ្វើ​បាតុកម្ម​ជាមួយ​ពួកគេ​ដើម្បី​ទាម​ទារ​ដំឡើង​ប្រាក់​ឈ្នួល​អប្បបរមា​ចំនួន​១៦០​ដុល្លារ​សម្រាប់​កម្មករ​រោងចក្រ​កាត់​ដេរ​។

យោង​តាម​ការ​រៀប​រាប់​របស់​សាក្សី​ ការ​ប៉ះទង្គិច​គ្នា​នេះ​បាន​ចាប់​ផ្ដើម​នៅ​​ពេល​ដែល​ទាហានមួយ​ក្រុម​មក​ពី​អង្គភាព​ឆត្រ​យោង​​លេខ​៩១១​​នៅ​ក្បែ​រ​នោះ ដែលបាន​ទៅ​​ឈរ​ជើ​ង​នៅ​ខា​ង​​​ក្រៅ​រោង​ចក្រ​​នេះ​បាន​គប់​ដប​ទឹក​សុទ្ធ​ទៅ​លើ​​ព្រះសង្ឃ​​ដែល​​គង់​នៅ​ជាមួយ​អ្នក​តវ៉ា​។ បន្ទាប់ពី​មាន​កំហឹង​ចំពោះ​កាយ​វិការ​ឈ្លើយ​បែប​នេះ​ អ្នក​តវ៉ា​មួយ​ចំនួន​បាន​ចាប់​ផ្ដើម​គប់​ដុំថ្ម​ដាក់ទាហាន​ទាំង​នោះ ហើយ​ទាហាន​ទាំង​នោះ​តប​ត​វិញ​ដោយ​ការ​វាយ​អ្នក​តវ៉ា​ ព្រះ​សង្ឃ និង​អ្នក​ថត​រូប​នឹង​ដំបង​ឆក់​ និង​​​ដែក​បំពង់​ទីប។

សេង ហ៊ាង ជា​កម្មករ​រោងចក្រ​យ៉ាក​ជីន ដែល​បាន​ចូល​រួម​ការ​តវ៉ា​នេះ​បាន​និយាយ​ថា “ ទាហាន​បាន​វាយ​ព្រះ​សង្ឃ​ និង​កម្ម​ករ​ឃោរ​ឃៅ​ណាស់​។ ទាហាន​ត្រូវ​ការ​ពារ​ប្រទេស​ជាតិ មិនមែន​មក​វាយ​កម្មករ​នោះ​ទេ”។ កម្មករ​រោងចក្រ​កាត់​ដេរ​រាប់​ម៉ឺន​នាក់​បាន​និង​កំពុង​​តវ៉ា​ និង​ធ្វើ​កូដកម្ម​អស់​រយៈពេល​មួយ​សប្ដាហ៍​មក​ហើយ ដើម្បី​ទាម​ទារ​ឲ្យ​រដ្ឋា​ភិបាល​ដំឡើង​ប្រាក់​ឈ្នួល​អប្បបរមា​ប្រចាំ​ខែ​របស់​ខ្លួន​ដល់​១៦០​ដុល្លារ​។ ការ​ព្រម​ព្រៀង​​​​​​​ពីក្រសួង​ការ​ងារ​ដើម្បី​ដំឡើង​ប្រាក់​ឈ្នួល​នេះ​ដល់​១០០​ដុល្លារ ​ត្រូវ​បាន​ច្រាន​ចោល​ព្រោះ​វា​តិ​ច​ពេក​។

ការ​ប៉ះទង្គិច​គ្នាកាលពីម្សិលមិញ​នេះ គឺ​ជា​ការ​ប៉ះទង្គិច​គ្នា​ដ៏ធ្ងន់​ធ្ងរ​បំផុត​ចាប់​តាំង​ពីកូដកម្ម​បាន​ចាប់​ផ្ដើម​ឡើង​រហូត​មក​ទល់​ពេល​នេះ​។

នៅពេល​សួរ​ពីមូល​ហេតុ​ដែល​ប្រើ​កង​កម្លាំង​ពិសេស​ដែល​អ្ន​ក​ខ្លះ​មាន​កាន់​កំាភ្លើង​ដើម្បីចាត់​វិធានការ​ខុស​ប្លែក​ពីធម្មតា​ការ​ពារ​រោងចក្រ​​កូរ៉េ​នេះ លោក​វរសេនីយ៍​ទោ​​ ចាប សុភ័ណ ដែល​គេ​មើល​​ឃើញ​បញ្ជា​​ទាហាន​ឆត្រ​យោង​ទាំង​​នេះ​នៅកន្លែង​កើត​ហេតុ​បាន​ឆ្លើយ​ថា “ ខ្ញុំ​​ធ្វើ​តាម​​បទ​បញ្ជា”។

លោក ចាប សុភ័ណ គឺ​ជា​បង​ប្អូន​របស់​លោក​ ចាប ភក្ដី មេ​បញ្ជាការ​​អង្គភាពទ័ព​​ឆត្រ​​យោង​លេខ​៩១១ដែល​​មិន​អាច​ទាក់​ទង​សុំការ​អត្ថា​ធិប្បាយ​អំពី​​ការ​ប្រើ​ប្រាស់​អង្គ​ភាព​របស់​លោក​បាន។

ឧត្តម​សេនីយ៍​ត្រី ស៊ុំ សំណាង មេបញ្ជា​ការ​រង​​អង្គភាព​ភាព​ទ័ព​​ឆត្រ​យោង​លេខ​៩១១​ក៏​បាន​បដិសេធ​​មិននិយាយ​ពីមូល​ហេតុ​ដែល​​​កង​ទ័ព​ឆត្រ​យោង​របស់​លោក​ត្រូវ​បាន​ដាក់​ពង្រាយ​ដើម្បីការ​ពារ​រោងចក្រ​ឯក​ជន​នេះ​ដែរ។ ទោះ​ជា​យ៉ាង​ណា​ លោក​បាន​និយាយ​ថា ទាហាន​របស់​លោក​គ្រាន់​តែ​ប្រើ​កម្លាំង​ទប់​ទល់​នឹង​អ្នក​តវ៉ា​​ប្រើ​ហិង្សា​ប៉ុណ្ណោះ​។ លោក​បានមាន​ប្រសាសន៍​ថា “ មនុស្ស​មួយ​ក្រុម​ក្នុង​ចំណោម​មនុស្ស​ទាំង​នោះ​បាន​សម្រុក​ចូល​រោងចក្រ​នេះ​។ ខ្ញុំ​មិន​ដឹង​ថា ពួក​គេ​ជា​នរណា​ទេ​”។

ឧត្តម​សេនីយ៍​ត្រី ស៊ុំ សំណាង បាន​មាន​ប្រសាសន៍​ថា លោក​មិន​​ដឹង​ថា  មាន​មនុស្ស​​​ប៉ុន្មា​ន​នាក់​បាន​រង​របួស​ ឬ​ត្រូវ​បាន​កង​ទ័ព​របស់​លោក​ឃាត់​ខ្លួន​នោះទេ​ ប៉ុន្តែ​លោក​បាន​​មាន​ប្រសាសន៍​ថា ពួក​គេ​កំពុង​ត្រូវ​ឃុំ​ខ្លួន​នៅ​​បញ្ជាការ​ដ្ឋាន​កង​ទ័ព​ឆត្រ​យោង​ក្រោម​ការ​គ្រប់​គ្រង​របស់​កង​រាជអាវុធ​ហត្ថ​​។

អង្គការ​សិទ្ធិមនុស្ស​បាន​ថ្កោល​ទោស​អំពើ​​ហិង្សានេះ​ ជា​ពិសេស​ការ​​ប្រើ​ប្រាស់​ទាហាន​​​ឲ្យ​​ទប់​ទល់​នឹង​អ្នក​តវ៉ា​។ អង្គការ​លីកាដូ និង​មជ្ឈមណ្ឌល​អប់​រំ​ច្បាប់​​សម្រាប់​សហគមន៍​បាន​លើក​ឡើង​​នៅ​ក្នុង​សេចក្ដី​ថ្លែង​ការ​ណ៍​រួម​មួយ​ថា “ ការ​ប្រើ​ប្រាស់​អង្គភាព​​បញ្ជាការ​ពិសេស​លេខ​៩១១​​ឲ្យ​​បង្ក្រាប​បាតុកម្ម​នៅជិត​រោងចក្រ​យ៉ាក​ជីន នៅ​ក្នុង​ខណ្ឌ​ពោធិ៍សែនជ័យ ក្នុង​ទីក្រុង​ភ្នំពេញ​នេះ​​មិនធ្លាប់​មាន​ទេ​ និង​បង្ហាញ​ពី​វិធី​សាស្ត្រ​​ថ្មី​របស​់​អាជ្ញាធរ​​​ក្នុង​ការ​ទប់​ស្កាត់​ការ​តវ៉ា​អហិង្សា​​ធំៗ​”​។

ពួកគេ​បាន​អំពាវ​នាវ​ឲ្យ​អាជ្ញាធរ​ដោះ​លែងជា​បន្ទាន់​​នូវ​​​​មនុស្ស​​ដែល​ពួកគេ​បាន​ឃាត់​ខ្លួន​កាលពី​ម្សិលមិញចំពោះការ​រៀប​ចំ​ ឬ​ចូល​រួម​នៅ​ក្នុង​ការ​តវ៉ា​​​ ឬ​ចោទ​ប្រកាន់​ជន​ណា​​ដែល​សង្ស័យ​ថា បាន​ប្រព្រឹត្ត​បទល្មើស​​ដោយ​គ្មាន​​ការ​ពន្យារពេល​។

លោក មឿន តុលា ប្រធាន​កម្មវិធី​ការ​ងារ​នៅ​មជ្ឈមណ្ឌល​អប់​រំច្បាប់​សម្រាប់​សហ​គមន៍​​​បាន​មាន​ប្រសាសន៍​ថា “យើង​ជំរុញ​ឲ្យ​អ្នក​ជាប់​ពាក់ព័ន្ធ​ទាំង​អស់​នៅ​ក្នុង​ការ​តវ៉ា​ និង​ជម្លោះការ​ងារ​ និង​អាជ្ញាធរ​គោរព​ច្បាប់​ អត់​ធ្មត់​ និងរក្សា​ភាព​​អហិង្សា។ ត្រូវ​តែ​​បញ្ចប់​អំពើ​​ហិង្សា​ ឈប់​ចាប់​ខ្លួន​ និង​រើស​អើង​ចំពោះ​អ្នក​ព្យាយាម​ប្រើ​ប្រាស់​សិទ្ធិ​សេរីភាព​ក្នុង​ការ​ជួប​ជុំ និង​ការ​ទាមទារ​ដំឡើង​ប្រាក់​ខែ​”។

អង្គការ​សិទ្ធិមនុស្ស​អាដ​ហុក ទាមទារ​ឲ្យ​ដោះ​លែង​អ្នក​ដែល​ត្រូវ​បាន​ឃាត់​ខ្លួន​ទាំង​អស់ដោយ​គ្មាន​លក្ខខណ្ឌ​ ហើយ​បាន​ជំរុញ​ឲ្យ​រដ្ឋាភិបាល​ផ្ដន្ទាទោស​អាជ្ញាធរ​ចំពោះ​ការ​ជាប់​​​ពាក់​ព័ន្ធ​នៅ​ក្នុងការ​ប៉ះទង្គិច​គ្នា​នេះ​។

លោក ប៊ុន វណ្ណ ប្រធាន​​សម្ព័ន្ធ​សហជីព​​​​ប្រជា​​​ធិបតេយ្យ​​​កម្មករ​កាត់​ដេរ​កម្ពុជា​ មាន​ប្រសាសន៍​ថា នៅ​​សួន​ឧស្សាហ​​​កម្ម​​​កាណា​​​ឌីយ៉ា ដែល​ស្ថិត​នៅក្នុង​ខណ្ឌ​ពោធិ៍​សែន​​​ជ័យ​​​ដែរ​នោះ​ ក៏មាន​ការ​ប៉ះទង្គិច​គ្នា​ដែរ​ ហើយ​កង​រាជ​អាវុធ​ហត្ថ​បាន​​ត្រៀម​ខ្លួន​ទប់​ទល់​នឹង​កម្មករ​តវ៉ា​រាប់​ពាន់​នាក់​នៅពេ​ល​រសៀល​។

លោក​ ប៊ុន វណ្ណ បានមាន​ប្រសាសន៍​ថា “កង​រាជអាវុធ​ហត្ថ​ជាង​២០០​នាក់​ប្រដាប់​ដោយ​ដំបង​ និង​ខែល​គ្រប់​ដៃ​​ និង​កំាភ្លើង​ដែរ​​​នោះ ត្រូ​វ​បាន​ដឹក​ទៅទីនោះ​តាម​រថយន្ត​តូ​ច​ៗ​​​ប្រហែល​២០​គ្រឿង​​ ហើយ​ពួកគេ​បាន​វាយ​កម្មករ​ប្រហែល​១០​នាក់​នឹង​ដំបង​។ ខ្ញុំ​បញ្ជា​កម្មករ​តាម​ឧបករណ៍​បំពង​សំឡេង​ឲ្យ​ដក​ថយ​ពីព្រោះខ្ញុំ​ព្រួយ​បារម្ភ​ខ្លាច​កង​រាជ​អាវុធ​​ហត្ថ​បាញ់​កម្មករ​”។

លោកឧត្តម​សេនីយ៍​ត្រី ខេង ទីតូ​ អ្នក​នាំ​ពាក្យ​កង​រាជ​អាវុធ​ហត្ថ​លើ​ផ្ទៃ​ប្រទេស​បាន​មាន​ប្រសាសន៍​ថា មន្ត្រី​របស់​លោក​ត្រូវតែ​អន្តរា​​​គមន៍​ដើម្បី​ការពារ​​សួ​ន​ឧស្សាហកម្ម​នេះ​ពី​កម្មករ​។លោក​បាន​មាន​ប្រសាសន៍​ថា “យើង​ត្រូវ​តែចាត់​វិធានការ​ ពីព្រោះពួកគេ​ប៉ុន​ប៉ង​បំផ្លាញ​ទ្រព្យ​សម្បត្តិ​រោងចក្រ​។ ស្ថាន​ភាព​អាច​ធ្ងន់​ធ្ងរ​ប្រសិន​បើ​យើង​មិន​បាន​ចាត់​វិធាន​ការ​ទេ​នោះ​”។

លោក​បានមាន​ប្រសាសន៍​ថា លោក​មិន​បាន​ដឹង​ថា មនុស្ស​ប៉ុន្មាន​នាក់​បាន​រង​របួស​ ឬ​ត្រូវ​បានឃាត់​ខ្លួន​នៅ​កន្លែង​នោះ​ ឬ​ថាតើ​​មនុស្ស​​ដែ​ល​ត្រូវ​បាន​ឃាត់​ខ្លួន​នោះ​នឹង​​ត្រូវ​ដោះ​លែង​នៅពេល​ណាទេ​។ លោក​បាន​មាន​ប្រសាសន៍​ថា “លោក​អាច​​​មក​មើល​ដោយ​ខ្លួនឯង​បាន​”។

លោក ព្រំ សុខា រដ្ឋលេខាធិការ​ក្រសួង​មហាផ្ទៃ ក៏​បាននិយាយ​ការពា​រ​​ទាហាន​​ដែល​បាន​បង្ក្រាប​អ្នក​តវ៉ា​នៅ​រោងចក្រ​យ៉ាក​ជីន និង​​កង​រាជអាវុធហត្ថ​​នៅ​សួន​ឧស្សា​ហ​កម្ម​កា​ណាឌីយ៉ា​នេះដែរ​​។

លោក​បាន​មាន​ប្រសាសន៍​ថា “អ្នក​តវ៉ា​មួយ​ចំនួន​មិន​គោរព​ច្បាប​់ទេ ព្រម​ទាំង​បំភិត​បំភ័យ​យើង​ទៀត ហើយ​យើង​បាន​ទទួល​​បណ្តឹង​ពី​​ស្ថានទូត​ជប៉ុន​នៅ​រសៀល​នេះ​។ ពួក​គេ​​​បាន​ធ្វើ​​ពាក្យ​បណ្តឹង​ជា​ផ្លូវ​ការ​អំពី​អ្នក​តវ៉ា​ជ្រុល​និយម​។ ពួកគេ​បាន​ប្រើ​ប្រាស់​ពាក្យ​ធ្ងន់​ៗ​​​ដើម្បី​បំភិត​បំភ័យ​យើង​។ លោក​បាន​បន្ថែម​ថា “លោក​អា​ច​មើ​ល​ឃើញ​អ្វីដែល​បាន​កើត​ឡើង​នៅ​សួន​ឧស្សា​ហកម្ម​កាណាឌីយ៉ា។ វា​ធ្វើ​ឲ្យ​ប៉ះពាល់​ដល់​ក្រុម​ហ៊ុ​ន​មួយ​ដែល​នាំ​ចេញ​សម្លៀក​បំពាក់​ការ​​ពា​រ​​ដែល​គេ​យក​ទៅ​ការ​ពារ​វិទ្យុ​សកម្ម​ ​របស់​រោងចក្រ​នុយ​ក្លេអ៊ែ​នៅ​​ហ្វូគូស៊ីម៉ា”។

លោក តាកាយ៉ូស៊ិ គូរ៉ីមីយ៉ា (Takayoshi Kuromiya) លេខា​​​ទី​​​២​ប្រចាំ​​​នៅ​​​ស្ថានទូត​​​ជប៉ុន​​​​​​​​បាន​​​បដិសេធ​​​ថា ​​​ស្ថានទូត​​​​​​​​​នេះ​​​​​​គ្មាន​​​ទំនាក់​​​ទំនង​​​​​​​​​ណាមួយ​​​ជាមួយ​​​កង​​​កម្លាំង​​​សន្ដិសុខ​​​របស់​​​ប្រទេស​​កម្ពុជា​​​​​​​ទេ​​​កាលពី​​​ម្សិលមិញ​​​ ហើយ​​​ក៏​​​មិន​​​បាន​​​អំពាវនាវ​​​ឲ្យ​​​មាន​​​ការ​​​បង្ក្រាប​​​លើ​​​កូដ​​​ករ​​​បះបោរ​​​ដែរ​​​។ លោក​​​មាន​​​ប្រសាសន៍​​​ថា “ទេ​​​​​​ថ្ងៃ​​​នេះ​​​យើង​​​មិន​​​បាន​​​ធ្វើ​​​​​​អ្វី​​​ទេ​​​ យើង​​​​​​បិទ​​​ទ្វា​​​រ​​​​​​”។

កាលពី​​​ព្រឹកម្សិលមិញ​​​ កម្មករ​​​​​​រោងចក្រ​​​​​​មួយ​​​ក្រុម​​​ទៀត​​​​​​ មាន​​​គ្នា​​​ជាង​​​២០០​​​នាក់​​​​​​ ដែល​​​​​​ធ្វើ​​​ការ​​​តវ៉ា​​​​​​សុំ​​​ដំឡើង​​​ប្រាក់​​​ខែ​​​ ​​​​​​បាន​​​​​​បិទ​​​ចរា​​​ចរណ៍​​​​​​​​​លើ​​​កំណាត់​​​ផ្លូវ​​​​​​ជាតិ​​​លេខ​​​​​​២ក្នុង​​​ខណ្ឌ​​​មានជ័យ​​​នៅ​​​ភាគ​​​ខាង​​​ត្បូង​​​រាជធានី​​​ភ្នំពេញ​​​អស់​​​​​​​​​​​​​​​រយៈ​​​​​​ពេល​​​​​​ជាង​​​២​​​ម៉ោង​​​។ ទោះ​​បី​​​ជា​​​មាន​​​ការ​​​បិទ​​​ចរាចរណ៍​​​​​​លើ​​​កំណាត់​​​ផ្លូវ​​​ប្រវែង​​ពីរ​​​បី​​​រយម៉ែត្រ​​​​​​ធ្វើ​​​ឲ្យ​​​អ្នក​​​ដំណើរ​​​​​​តាម​​​យានយន្ត​​​​​​​​​រាប់រយ​​​នាក់​​​​​​ជាប់​​​​​​ទៅ​​​​​​ណា​​​មិន​​​រួច​​​ក៏​​​ដោយ​​​ ក៏​​​នគរបាល​​​មិន​​​បាន​​​​​​តប​​​ត​​​ទៅ​​​វិញ​​​ទេ​​​។​​​ មុន​​​ពេល​​​​​​​​​ផ្អាក​​​ការ​​​បិទ​​​ផ្លូវ​​​នេះ​​​​​​ ក្រុម​​​បាតុ​​​ករ​​​បាន​​​និយាយ​​​ថា ពួក​​​គេ​​​​​​នឹង​​​ត្រឡប់​​​មក​​​​​​កន្លែង​​​​​​នេះ​​​វិញ​​​​​​ម្ដង​​​ទៀត​​​នៅ​​​ព្រឹក​​​នេះ​​​។

កម្មករ​​​កម្មការិនី​​​កាត់​​​ដេរ​​​ប្រហែល​​​១០០​​​នាក់​​​ក៏​​​បានបិទ​​​កំណាត់​​​ផ្លូវ​​​ជាតិ​​​លេខ​​​៥ អស់​​​រយៈ​​​ពេល​​​៥​​​ម៉ោង​​​​​​​​​កាល​​​ពីម្សិលមិញ​​​នៅ​​​ខាង​​​​​​មុខ​​​​​​រោងចក្រ​​​តៃ​​​យ៉ុង​​​  (Dai Young) ក្នុង​​​ខណ្ឌ​​​​​​ប្ញស្សីកែវ​​​​​​ រាជធានីភ្នំពេញ​​​។ នគរបាល​​​ខណ្ឌ និង​​​​​​នគរបាល​​​​​​អន្តរាគមន​​​៍​​​ប៉ុន្មាន​​​នាក់​​​​​​បាន​​​​​​ឃ្លាំ​​​មើល​​​​​​ការ​​​​​​តវ៉ា​​​នេះ​​​ដែល​​​​​​នៅ​​​ស្ងាត់​​​ស្ងៀម​​​នៅ​​​
ឡើយ​​​​​​រហូត​​​ដល់​​​​​​វា​​​បញ្ចប់​​​នៅ​​​​​​ម៉ោង​​​ប្រហែល​​​២​​​រសៀល​​​។

ថ្លែង​​​ទៅ​​​កាន់​​​អ្នក​​​គាំទ្រ​​​គណបក្ស​​​ពីរបី​​​រយ​​​នាក់​​​​​​នៅ​​​ទីលាន​​​ប្រជាធិបតេយ្យ​​​​​​កាលពី​​​​​​រសៀល​​​​​​ម្សិល​​​មិញ​​​ លោក សម រង្ស៊ី ប្រធាន​​​គណបក្ស​​​សង្គ្រោះ​​​ជាតិ​​​បាន​​​ថ្កោល​​​ទោស​​​​​​ចំពោះ​​​ការ​​​​​​ប្រើអំពើ​​​ហិង្សា​​​​​​​​​ពី​​​សំណាក់​​​ទាហាន​​​និង​​​នគរ​​​បាល​​​ ហើយ​​​បាន​​​ចោទ​​​ប្រកាន់​​​​​​លោក ចាប ភក្ដី មេបញ្ជាការ​​​កង​​​ទ័ព​​​ឆត្រ​​​យោង​​​លេខ​​​៩១១​​​ និង​​​សាច់​​​ញាតិ​​​របស់​​​គាត់​​​ថា មាន​​​ភាគ​​​ហ៊ុន​​​នៅ​​​តាម​​​រោងចក្រ​​​​​​កាត់​​​ដេរ ហើយ​​​​​​ធ្វើ​​​សកម្មភាព​​​​​​ដើម្បី​​​ការពារ​​​ការ​​​វិនិ​​​យោគ​​​របស់​​​ខ្លួន​​​។​​​

លោក​​​ សម រង្ស៊ី បាន​​​ថ្លែង​​​ទៅ​​​កាន់​​​ក្រុម​​​អ្នក​​​គាំទ្រ​​​នៅ​​​ទីលាន​​​ប្រជាធិបតេយ្យ​​​ថា “ដូច្នេះ​​​​​​ ចាប ភក្ដី និង ​​​ចាប សុភ័ណ ​​​បាន​​​ប្រមូល​​​​​​កង​​​​​​កម្លាំង​​​ពី​​​អង្គភាព​​​​​​ទ័ព​​​ឆត្រ​​​យោង​​​​​​ដើម្បី​​​វាយ​​​បង្ក្រាប​​​កម្មករ​​​ ពីព្រោះ​​​ពួក​​​គេ​​​ចង់​​​​​​រក្សា​​​ទុក​​​​​​ប្រាក់​​​មួយ​​​លាន​​​ដុល្លារ​​​​​​របស់​​​ពួក​​​គេ​​​”។

​​​អំឡុង​​​ពេល​​​តវ៉ា​​​ទាំង​​​នេះ​​​ សហជីព​​​​​​លេច​​​ធ្លោ​​​ចំនួន​​​ប្រាំមួយ​​​ ដែល​​​គ្មាន​​​ទំនាក់ទំនង​​​​​​ជាមួយ​​​រដ្ឋាភិបាល​​​ បាន​​​ជួប​​​ប្រជុំ​​​​​​​​​កាលពី​​​ព្រឹក​​​ម្សិលមិញ​​​ ដើម្បី​​​ត្រៀម​​​រៀប​​​ចំ​​​​​​អ្វី​​​ដែល​​​ត្រូវ​​​ធ្វើ​​​​​​នៅ​​​ពេល​​​បន្ទាប់​​​។ ពួក​​​គេ​​​​​​បានសម្រេ​​​ចចិត្ត​​​​ទុក​​​ពេល​​​ឲ្យ​​​ក្រសួង​​​ការងារ​​​​​​ និង​​​​​​សមាគម​​​រោង​​​ចក្រ​​​កាត់​​​ដេរ​​​នៅកម្ពុជា​​​រហូត​​​ដល់​​​ថ្ងៃ​​​សៅរ៍​​​ ដើម្បី​​​ព្រម​​​ព្រៀង​​​ចរចា​​លើ​​​​ប្រាក់​​​ខែ​​​អប្បបរ​​​មា ប្រសិន​​​បើ​​​មិន​​​ដូច្នេះ​​​ទេ​​​​​​នឹង​​​ប្រឈម​​​ការ​​​តវ៉ា​​​កាន់​​​តែ​​​ខ្លាំង​​​ឡើង​​​​​​នៅ​​​​​​​​​ខាង​​​ក្រៅ​​​​​​រោងចក្រ​​​​​​ទូទាំង​​​ប្រទេស​​​។​​​

លោកស្រី ម៉ម ញឹម ប្រធាន​​​សម្ព័ន្ធ​​​សហ​​​​ជីព​​​ជាតិ​​​នៃ​​​ឧស្សាហកម្មវាយនភណ្ឌ​​​កាត់​​​ដេរ​​​កម្ពុជា​​​ ដែល​​​បាន​​​ចូល​​​រួម​​​​​​ក្នុង​​​​​​ការ​​​ចរចា​​​នេះ​​​​​​បាន​​​​​​មាន​​​ប្រសាសន៍​​​ថា “កម្មករ​​​របស់​​​យើង​​​​​​នឹង​​​​​​នៅ​​​តែ​​​បន្ត​​​​​​ធ្វើ​​​​​​ការ​​​តវ៉ា​​​ [ពីរ] ថ្ងៃ​​​​​​បន្ទាប់​​​​​​ទៀត​​​ ប៉ុន្តែ​​​​​​ប្រសិន​​​បើ​​​ក្រសួង​​​ការងារ [និង GMAC] មិន​​​ស្វែងរក​​​ដំណោះ​​​ស្រាយ​​​ឲ្យ​​​​​​​​​យើង​​​ទេ​​​នោះ​​​ យើង​​​នឹង​​​ត្រៀ​​​ម​​​ធ្វើ​​​មហា​​​បាតុកម្ម​​​​​​និង​​​ដើរ​​​ក្បួន​​​​​​ទូទាំងប្រទេស​​​”។

លោក​​​ស្រី​​​ ក៏​​​បានថ្កោល​​​ទោស​​​អាជ្ញាធរ​​​ផង​​​ដែរ​​​ ចំពោះ​​​ការ​​​ប្រើ​​​អំពើ​​​ហិង្សា​​​​​​យ៉ាង​​​ចាស់​​​​​​​​​ដៃ​​​ ដើម្បី​​​បង្ក្រាប​​​ការ​​​តវ៉ា​​​។ លោក​​​ស្រី​​​​​​មាន​​​ប្រសាសន៍​​​ថា “ពេល​​​នេះ​​​កម្មករ​​​​​​កំពុង​​​​​​តវ៉ា​​​គ្រប់​​​​​​​​​​​​កន្លែង ​​​ពីព្រោះ​​​ពួក​​​គាត់​​​មាន​​​កំហឹង​​​​​​យ៉ាង​​​ខ្លាំង​​​បន្ទាប់ពី​​​ទាហាន​​​​​​​​​បាន​​​ប្រើ​​​អំពើ​​​ហិង្សា និង​​​ចាប់​​​​​​ខ្លួន​​​ពួក​​​គាត់​​​។ រដ្ឋាភិបាល​​​មិន​​​បាន​​​ស្វែងរក​​​វិធី​​​សន្ដិភាព​​​ដើម្បី​​​ដោះ​​​ស្រាយ​​​បញ្ហា​​​ទេ តែ​​​ផ្ទុយ​​​ទៅ​​​វិញ​​​បែរ​​​​​​ជា​​​ប្រើ​​​កម្លាំង​​​​​​បង្ក្រាប​​​បាតុករ​​​​​​”។

កាល​​​ពី​​​ម្សិលមិញ​​​​​​ សមាគម​​​រោងចក្រ​​​កាត់​​​ដេរ​​​នៅ​​​កម្ពុជា​​​បាន​​​ផ្ញើលិខិត​​​មួយ​​​ច្បាប់​​​​​​ទៅ​​​​​​លោក​​​ អិុត សំហេង​​​ រដ្ឋមន្ត្រី​​​ក្រសួង​​​ការងារ​​​ ដោយ​​​ចោទ​​​ប្រកាន់​​​បាតុករ​​​​​​ថា បាន​​​បំផ្លិច​​​បំផ្លាញ​​​​​​ទ្រព្យ​​​សម្បត្តិ​​​នៅ​​​តាម​​​រោង​​​ចក្រ​​​ “ភាគច្រើន​​​” ក្នុង​​​ចំណោម​​​​​​រោង​​​ចក្រ​​​កាត់​​​ដេរ​​​​​​ជាង​​​​​​៤០០​​​កន្លែង​​​ទូទាំង​​​ប្រទេស​​​ក្នុង​​​រយៈ​​​ពេល​​​ពីរបី​​​សប្ដាហ៍​​​កន្លង​​​មក​​​នេះ​​​ ហើយ​​​បាន​​​បន្ត​​​​​​ការ​​​ប្ដេជ្ញា​​​របស់​​​ខ្លួន​​​​​​បិទ​​​​​​រោងចក្រ​​​​​​ទាំង​​​នោះ​​​​​​រហូត​​​​​​​​​ដល់​​​​​​សហជីព​​​​​​និង​​​​​​រដ្ឋាភិបាល​​​អាច​​​ធានា​​​សុវត្ថិភាព​​​របស់​​​ពួក​​​​​​គេ​​​។

សមាគម​​​រោងចក្រ​​​កាត់​​​ដេរ​​​នៅ​​​កម្ពុជា​​​បាន​​​លើក​​​ឡើង​​​ថា រោងចក្រ​​​ទាំងអស់​​​​​​នឹង​​​ “ផ្អាក​​​​​​ផលិតកម្ម​​​រហូត​​​ដល់​​​ស្ថានភាព​​​អាក្រក់​​​នេះ​​​​​​វិល​​​ទៅ​​​រក​​​ស្ថានភាព​​​ធម្មតា​​​វិញ​​​ ហើយ​​​សន្ដិសុខ​​​​​​ សុវត្ថិភាព​​​​​​កម្មករ​​​​​​ និង​​​ទ្រព្យ​​​សម្បត្តិ​​​​​​រោងចក្រ​​​​​​ត្រូវ​​​បាន​​​ធានា​​​ការពារ​​​”។ កូដកម្ម​​​ បូក​​​រួម​​​​​​នឹង​​​​​​ការបិទទ្វាររោងចក្រ​​​​​​បាន​​​ធ្វើ​​​ឲ្យ​​​​​​ប៉ះពាល់​​​យ៉ាង​​​ខ្លាំង​​​​​​ដល់​​​ឧស្សា​​​ហ​​​កម្ម​​​នាំចេញ​​​​​​ធំ​​​បំផុត​​​របស់​​​ប្រទេស​​​កម្ពុជា​​​ ដែល​​​រក​​​ចំណូល​​​បាន​​​ប្រហែល​​​៥.០០០​​​លាន​​​​​​ដុល្លារ​​​ អំឡុង​​​​​​រយៈពេល​​​​​​១១​​​ខែ​​​​​​ដំបូង​​​​​​ក្នុង​​​ឆ្នាំ​​​២០១៣។

កាលពី​​​ថ្ងៃ​​​អង្គារ​​​ ក្រសួង​​​ការងារ​​​បាន​​​ផ្ញើ​​​លិខិត​​​ផ្ទាល់​​​របស់​​​ខ្លួន​​​​​​ជូន​​​​​​គណបក្ស​​​សង្គ្រោះ​​​ជាតិ​​​​​​ ដើម្បី​​​​​​តវ៉ា​​​រឿង​​​ ក្រុម​​​បាតុករ​​​ហិង្សា​​​មួយ​​​ចំនួន​​​ដែល​​​បាន​​​អះអាង​​​ថា ជា​​​​​​សមាជិក​​​គណ​​​បក្ស​​​ប្រឆាំង​​។ ក្រសួង​​​នេះ​​​បាន​​​ស្នើ​​​សុំ​​​ឲ្យ​​​មេ​​​ដឹកនាំ​​​គណបក្ស​​​សង្គ្រោះ​​​ជាតិ​​​បញ្ជាក់​​​ថា ​​​ក្រុម​​​​​​ទាំង​​​នោះ​​​មិន​​​បាន​​​​​​ចេញ​​​​​​ពី​​​គណបក្ស​​​សង្គ្រោះ​​​ជាតិ​​​។

នៅ​​​ក្នុង​​​ការ​​​ឆ្លើយ​​​តប​​​​​​ទៅ​​​រដ្ឋមន្ត្រី​​​​​​ក្រសួង​​​​​​ការងារ​​​កាល​​​ពីម្សិលមិញ​​​ លោក យឹម សុវណ្ណ​​​ អ្នក​​​នាំពាក្យ​​​គណបក្ស​​​សង្គ្រោះជាតិ​​​ លោក​​​សូម​​​ធានា​​​អះអាង​​​។ លោក​​​បានមាន​​​ប្រសា​​​សន៍​​​ថា “គណបក្ស​​​សង្គ្រោះជាតិ​​​បាន​​​និង​​​កំពុង​​​ធ្វើ​​​បាតុកម្មទាមទារ​​​រក​​​យុត្តិធម៌​​​ និង​​​​​​ទាម​​​ទារ​​​ឲ្យ​​​មាន​​​ការ​​​​​​បោះឆ្នោត​​​​​​ឡើង​​​​​​វិញ​​​ដោយ​​​អ​​​ហិង្សា​​​ និង​​​ដោយ​​​សន្ដិវិធី​​​ ហើយ​​​យើង​​​ក៏​​​គោរព​​​សីល​​​ធម៌​​​ដែរ​​​ និង​​​​​​មិន​​​ដែល​​​ប្រើអំពើ​​​ហិង្សា​​​ដើម្បី​​​ដោះ​​​ស្រាយ​​​បញ្ហា​​​ឡើយ​​​”៕ គឹមហឿន

(រាយការណ៍​​​បន្ថែម​​​ដោយ ផាន់ អាណា ម៉ិច ដារ៉ា ឃួន ណារីម អូន ភាព ហ៊ុល រស្មី និង​​​ Alex Willemyns)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស