សេរីភាពសារព័ត៌មាននៅក្នុងប្រទេសកម្ពុជាបង្ហាញឲ្យថា មិនមានសញ្ញានៃការប្រសើរឡើងទេកាលពីឆ្នាំមុន នេះបើយោងតាមសន្ទស្សន៍សេរីភាពសារព័ត៌មានឆ្នាំ២០១៥ ដែលបានចេញផ្សាយកាលពីម្សិលមិញដោយសារព័ត៌មានគ្មានព្រំដែន។
នៅក្នុងសន្ទស្សន៍ប្រចាំឆ្នាំ ដែលចងក្រងដោយក្រុមតស៊ូមតិដែលមានមូលដ្ឋានក្នុងទីក្រុងប៉ារីស សេរីភាពសារព័ត៌មាននៅក្នុងប្រទេសកាន់តែតិច ចំណាត់ថ្នាក់និងពិន្ទុកាន់តែច្រើន។
បើទោះជាក្នុងឆ្នាំ២០១៥ សន្ទស្សន៍នេះបានធ្វើឲ្យប្រទេសកម្ពុជាស្ថិតក្នុងលេខរៀងទី១៣៩ ក្នុងចំណោមប្រទេសចំនួន១៨០ ដែលបានស្ទង់មតិក៏ដោយ ក៏មានការប្រសើរជាងចំណាត់ថ្នាក់ទី១៤៤កាលពីឆ្នាំមុន ដែលបានឡើងពិន្ទុពី៤០.៩៧ ក្នុងចំណោម១០០ កាលពីឆ្នាំ២០១៤ ដល់១៤.៩៩។
លោក បេនចាមីន អីុសម៉េល ប្រធានការិយាល័យព័ត៌មាននៅសារព័ត៌មានគ្មានព្រំដែនប្រចាំអាស៊ីបាស៊ីហ្វិកបានពន្យល់ថា “ជាការពិត កម្ពុជាមានការធ្លាក់ចុះទាក់ទងស្ថានភាពនេះ”។
បើទោះជាយ៉ាងហោចណាស់អ្នកកាសែតពីរនាក់ត្រូវបានសម្លាប់កាលពីឆ្នាំមុនក៏ដោយ ក៏លោក អីុសម៉េល បានលើកឡើងថា របាយការណ៍នេះមិនបានទទួលស្គាល់ឡើយ ពីព្រោះសារព័ត៌មានគ្មានព្រំដែនមិនអាចបញ្ជាក់ច្បាស់់លាស់ថា ការស្លាប់របស់ពួកគេពាក់ព័ន្ធផ្ទាល់ទៅនឹងការងាររបស់ខ្លួនជាសមាជិកប្រព័ន្ធផ្សព្វផ្សាយឡើយ។
អ្នកកាសែតម្នាក់គឺ លោក តាំង ទ្រី អាយុ៤៩ឆ្នាំត្រូវបានបាញ់ចំក្បាលកាលពីខែតុលា នៅក្នុងស្រុកស្នួល ខេត្តក្រចេះបន្ទាប់ពីសារព័ត៌មានជាច្រើនបានចុះផ្សាយអត្ថបទរបស់លោកស្តីពីសកម្មភាពកាប់ឈើខុសច្បាប់នៅក្នុងតំបន់នេះ។
លោក អីុសម៉េល បានឲ្យដឹងថា “យើងមិនចាត់ថា ការសម្លាប់នេះគឺ ១០០ភាគរយអះអាងថា ពាក់ព័ន្ធនឹងការងាររបស់គាត់ឡើយ”។
លោកបានបន្ថែមថា ការសម្លាប់លោក តាំង ទ្រី និងលោក សួន ចាន់ អ្នកយកព័ត៌មានអាយុ៤៤ឆ្នាំនៅក្នុងខេត្តកំពង់ឆ្នាំងកាលពីខែមករា ឆ្នាំមុន នៅតែត្រូវបានស៊ើបអង្កេតនៅពេលសារព័ត៌មានគ្មានព្រំដែនបានចាប់ផ្តើមចងក្រងរបាយការណ៍។
លោក មឿន ឈានណារិទ្ធ ប្រធានវិទ្យាស្ថានកម្ពុជាដើម្បីការសិក្សាប្រព័ន្ធផ្សព្វផ្សាយបានមានប្រសាសន៍ថា លោកយល់ស្របជាមួយលទ្ធផលរបស់របាយការណ៍នេះ ជាពិសេសចាប់តាំងពីអ្នកកាសែតមួយចំនួនបានរបួសអំឡុងការបង្ក្រាបដ៏ហិង្សាពីសំណាក់រដ្ឋាភិបាលទៅលើការតវ៉ារបស់កម្មករកាត់ដេរកាលពីខែមករា ឆ្នាំ២០១៤។
លោកបានលើកឡើងនៅក្នុងទំព័ហ្វេសប៊ុកថា “ស្ថានភាពនៃសេរីភាពសារព័ត៌មាននៅក្នុងប្រទេសកម្ពុជាកាន់តែធ្ងន់ធ្ងរដោយមានការវាយប្រហារលើអ្នកកាសែតនៅទីលានប្រជាធិបតេយ្យពីសំណាក់ក្រុមសន្តិសុខ រួមមានការវាយអ្នកកាសែតរបស់វិទ្យុសំឡេងប្រជាធិបតេយ្យជាដើម”៕សារុន