យោងតាមប្រព័ន្ធផ្សព្វផ្សាយព័ត៌មានថៃបានឲ្យដឹងថា កងទ័ពថៃបានសុំឲ្យប្រទេសកម្ពុជា “កុំទាន់សន្និដ្ឋាន” ថាទាហានរបស់ខ្លួនត្រូវបានបន្ទោសចំពោះការស្លាប់អ្នកកាប់ឈើជនជាតិខ្មែរបីនាក់ដែលត្រូវបានបាញ់សម្លាប់កាលពីដើមខែនេះ ខណៈពេលឆ្លងព្រំដែនស្វែងរកកាប់ឈើគ្រញូង។
កាសែតបាងកក ប៉ុស្តិ៍ បានរាយការណ៍កាលពីថ្ងៃអង្គារថា លោក វីនថៃ ស៊ូវ៉ារី អ្នកនាំពាក្យកងទ័ពថៃបានហៅការស្លាប់របស់បុរសទាំងបីនាក់នេះថា “ជាការមិនទាន់ដាច់ស្រេច” ហើយបានលើកឡើងថា អាជ្ញាធរនៅក្នុងប្រទេសនេះកំពុងសើុបអង្កេតអំពីករណី នេះនៅឡើយ។
កាសែតនេះបានលើកឡើងថា លោក វីនថៃ បានធ្វើអត្ថាធិប្បាយឆ្លើយតបទៅនឹងលិខិតមួួយច្បាប់ដែលបានផ្ញើជូនដោយក្រសួងការបរទេសកម្ពុជាទៅស្ថានទូតថៃប្រចាំរាជធានីភ្នំពេញដែលបានលើកឡើងថា ទង្វើរបស់ប្រទេសថៃ “បានរំលោភច្បាប់របស់ប្រទេសស៊ីវីល័យណាមួយ និងច្បាប់អន្តរជាតិស្តីពីសិទ្ធិមនុស្ស”។
នៅពេលត្រូវបានទាក់ទងតាមទូរស័ព្ទកាលពីម្សិលមិញ លោក កុយ គួង អ្នកនាំពាក្យក្រសួងការបរទេសបានមានប្រសាសន៍ថា វាច្បាស់ណាស់ថា អ្នកកាប់ឈើទាំងបីនាក់ ដែលនគរបាលកម្ពុជាលើកឡើងថា ត្រូវបានបាញ់កាលពីថ្ងៃទី៥ ខែកុម្ភៈ បន្ទាប់ពីឆ្លងចូលទឹកដី ថៃដោយខុសច្បាប់ ពីខេត្តព្រះវិហារនោះ ត្រូវបានទាហានថៃបាញ់សម្លាប់។
លោកបានមានប្រសាសន៍ថា “យើងជឿថា ប្រជាជនរបស់យើងត្រូវបានទាហានថៃបាញ់សម្លាប់។ យើងមានសាក្សីដែលបានរត់រួចពីការបាញ់នោះដែលអាចបញ្ជាក់បាន”។
អំឡុងសន្និសីទកាសែតកាលពីម្សិលមិញ លោក កុយ គួង ក៏បានលើកឡើងផងដែរថាប្រទេសថៃមិនទាន់បានឆ្លើយតបចំពោះសំណើររបស់ក្រសួងថា សាកសពទាំងនេះត្រូវបានបញ្ជូនមកកាន់ប្រទេសកម្ពុជាវិញនៅឡើយទេ។ លោកបានប្រាប់អ្នកយកព័ត៌មានថា “ប្រសិនបើភាគីថៃជឿថា ទាហានរបស់ខ្លួនមិនជាប់ពាក់ព័ន្ធក្នុងការបាញ់ទេនោះ ពួកគេត្រូវសើុបអង្កេត ហើយរកអ្នកដែលទទួលខុសត្រូវ”។
លោក ប្រាវុធ ថាវនស៊ីរី អ្នកនាំពាក្យនគរបាលថៃបានលើកឡើងកាលពីម្សិលមិញថា លោកមិនមានព័ត៌មានលម្អិតអំពីករណីនេះទេ។
កាលពីសប្តាហ៍មុនក្រសួងមហាផ្ទៃ បានរាយការណ៍ថា ប្រជាជនខ្មែរ១១នាក់បានស្លាប់និង៣៤នាក់រងរបួសក្នុងហេតុការណ៍បាញ់១៦លើកផ្សេងគ្នាតាមបណ្តោយព្រំដែនថៃកាលពីឆ្នាំ២០១៤។
អង្គការអាដហុកដែលឃ្លាំមើលការបាញ់នៅតាមព្រំដែនបានកត់ត្រាថា មនុស្ស២៦នាក់បានស្លាប់ និង១៨នាក់រងរបួសអំឡុងរយៈពេលដូចគ្នានេះ៕សារុន (រាយការណ៍បន្ថែមដោយ Taisa Sganzerla)