បន្ទាប់ពីបដិសេធម្ដងហើយម្ដងទៀតមិនព្រមផ្ដល់សក្ខីកម្មនៅចំពោះមុខសាលាក្ដីខ្មែរក្រហម ដែលបណ្ដាលឲ្យចៅក្រមទាក់ទងទៅនគរបាលយុត្តិធម៌ដើម្បីសុំអន្តរាគមន៍ ប្រធានក្រុមប្រឹក្សាកិច្ចការសាសនាអុិស្លាមនៅកម្ពុជា បានឡើងលើវេទិកាសាក្សីកាលពីម្សិលមិញ និងត្រូវបានសាកសួរយ៉ាងច្រើនអំពីអវត្តមានរបស់គាត់។
លោក សុះ កាំរី ដែលមានងារ “ឧកញ៉ា” ជាងារកិត្តិយសដែលជាទូទៅផ្ដល់ឲ្យពាណិជ្ជករស្ដុកស្ដម្ភដែលមានទំនាក់ទំនងជិតស្និទ្ធនឹងគណបក្សប្រជាជនកម្ពុជាកំពុងកាន់អំណាចបានបដិសេធមិនចូលខ្លួននៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ឡើយចាប់តាំងពីត្រូវតុលាការកោះហៅលើកដំបូងកាលពីខែកញ្ញាមក ដោយលើកហេតុផលថាមានបញ្ហាសុខភាព។
នៅទីបំផុតមេដឹកនាំសាសនារូបនេះបានយល់ព្រមផ្ដល់សក្ខីកម្មកាលពីខែមុន បន្ទាប់ពីអង្គជំនុំជម្រះបានគំរាមប្រើកម្លាំងដើម្បីនាំខ្លួនគាត់ឡើងតុលាការ ប៉ុន្តែបានប្ដូរចិត្តវិញកាលពីថ្ងៃអាទិត្យ ពោលគឺមួយថ្ងៃមុនពេលគាត់ត្រូវចូលខ្លួនតាមការកំណត់ ដោយនិយាយថា គាត់ប្ដូរចិត្តហើយ។
នៅពេលលោក សុះ កាំរី មិនបានចូលខ្លួននៅថ្ងៃទី២ កាលពីថ្ងៃអង្គារ លោក និល ណុន ប្រធានអង្គជំនុំជម្រះបានផ្ញើលិខិតមួយច្បាប់ទៅលោក ឡោ សុឡេង មន្ត្រីសម្ពន្ធការនគរបាលយុត្តិធម៌ដើម្បីស្នើឲ្យការបកស្រាយពីមូលហេតុដែលសាក្សីមិនបានបង្ហាញមុខ។
កាលពីម្សិលមិញ លោក សុះ កាំរី បានឡើងវេទិកាសាក្សីដើម្បីផ្ដល់សក្ខីកម្មអំពីការប្រព្រឹត្តលើជនជាតិចាម កាន់សាសនាអុិស្លាមអំឡុងសម័យ ប៉ុល ពត។ គាត់រៀបរាប់ថាបានឃើញសាកសពជនជាតិចាម គរលើគ្នានៅខេត្តកំពង់ចាម ហើយនិយាយថា គាត់បានអានកូនសៀវភៅមួយដែលបង្ហាញពីគោលនយោបាយរបស់ខ្មែរក្រហម ដើម្បីបំផ្លាញក្រុមសាសនានេះចោល។
លិខិតមួយច្បាប់ពីឧត្ដមសេនីយ៍ទោ ឡោ សុឡេង ដែលទទួលបានកាលពីម្សិលមិញបញ្ជាក់ថា លោក សុះ កាំរី បានយល់ព្រមបន្ទាប់ពីមានការបញ្ចុះបញ្ចូលពីសមាជិកផ្សេងទៀតនៃក្រុមប្រឹក្សាសាសនាអុិស្លាមនិងនៅពេលនគរបាលយុត្តិធម៌ត្រៀមប្រើកម្លាំងដើម្បីនាំខ្លួនគាត់ឡើងតុលាការ។
លោក ឡោ សុឡេង បានសរសេរនៅក្នុងលិខិតនោះថា “ផ្នែកសន្តិសុខជាតិ និងមន្ត្រីនគរបាលយុត្តិធម៌បានត្រៀមខ្លួនអនុវត្តដីកាបង្គាប់ដោយសហការជាមួយនគរបាលមូលដ្ឋាន និងអង្គភាពគាំទ្រសាក្សី និងអ្នកជំនាញរបស់សាលាក្ដីខ្មែរក្រហម ដោយកំណត់ពេលវេលា និងទីតាំងសម្រាប់អនុវត្តនៅម៉ោង៧:០០ព្រឹក [ថ្ងៃអង្គារ]”។
មន្ត្រីនគរបាលរូបនេះលើកឡើងថា បន្ទាប់មកលោកទទួលបាន ”សំណើបន្ទាន់” មួយពីក្រុមប្រឹក្សាសាសនាអុិស្លាមថា ទុកពេលឲ្យខ្លួនបញ្ចុះបញ្ចូលលោក សុះ កាំរី ឲ្យចូលខ្លួនដោយស្ម័គ្រចិត្ត ដោយបញ្ជាក់ថា ការចាប់បង្ខំឲ្យចូលខ្លួន ”នឹងនាំឲ្យបងប្អូនខ្មែរអុិស្លាមយល់ខុស ហើយអាចឈានទៅដល់ការតវ៉ាផ្សេងៗ និងអំពើហិង្សា”។
នៅក្នុងតុលាការកាលពីម្សិលមិញ លោក វីកទ័រ កូប៉េ ជាមេធាវីការពារ នួន ជា មេបញ្ជាការទី២របស់ខ្មែរក្រហម ដែលឡើងសវនាការជំនុះជម្រះទោសពីបទល្មើសរួមទាំងអំពើប្រល័យពូជសាសន៍ផង រួមជាមួយ ខៀវ សំផន ដែលជាប្រធានរដ្ឋរបស់ខ្មែរក្រហម បានសួរសាក្សីរូបនេះពីមូលហេតុដែលគាត់ស្ទាក់ស្ទើរខ្លាំងក្នុងការផ្ដល់សក្ខីកម្ម។
នៅពេលលោក សុះ កាំរី ឆ្លើយតបថា មូលហេតុតែមួយគត់ដែលរារាំងគាត់មិនចូលខ្លួនគឺសុខភាពចុះខ្សោយរបស់គាត់នោះ លោក វីកទ័រ កូប៉េ បានចង្អុលបង្ហាញថា វាបណ្តាលមកពីការព្រួយបារម្ភដូចដែលក្រុមប្រឹក្សាសាសនាអុិស្លាមបានលើកឡើង។
មេធាវីរូបនេះបានសួរថា “តើលោកបានដឹទេថាក្រុមប្រឹក្សាកិច្ចការសាសនាអុិស្លាមដែលមានលោកជាប្រធាន បានទាក់ទងទៅតុលាការ [ការលើកជាទឡ្ហីករណ៍] ថា ការបង្ខំឲ្យលោកចូលខ្លួននឹងនាំឲ្យមានការតវ៉ា និងអំពើហិង្សានៅក្នុងសហគមន៍ជនជាតិចាម?”។
លោក សុះ កាំរី បានឆ្លើយថា “ការលើកឡើងនោះគឺត្រឹមត្រូវ” មុនពេលប្តូរជំហរ ហើយអះអាងជាថ្មីម្ដងទៀតថា អវត្តមានរបស់គាត់ពាក់ព័ន្ធបញ្ហាសុខភាព។
បន្ទាប់មក លោក វីកទ័រ កូប៉េ លើកឡើងពីសំណើមួយរបស់លោក អូស្មាន់ ហាសាន់ ជាជនជាតិចាមកាន់សាសនាអិុស្លាម និងជារដ្ឋលេខាធិការក្រសួងការងារ ដែលសុំឲ្យតុលាការរកសាក្សីជំនួសលោក សុះ កាំរី។
មេធាវីរូបេនះបានសួរថា ”តើនរណាគឺជាឯកឧត្តម អូស្មាន់ ហាសាន់ គឺជាទីប្រឹក្សារបស់លោកនាយករដ្ឋមន្ត្រី ហ៊ុន សែន ឬ? តើគាត់គឺជានរណា ហើយតើលោកស្គាល់គាត់ដែរឬទេ?
សាក្សីរូបនេះបានឆ្លើយតបថា “សូមកុំសួរខ្ញុំអំពីបញ្ហារបស់អ្នកផ្សេង”។ លោក វីកទ័រ កូប៉េ បានសួរបន្ទាប់មកទៀតថា “តើលោកមានដឹង ថា លោក អូសា្មន់ ហាសាន់ បានស្នើជួសមុខលោក ឱ្យរកសាក្សីផ្សេងមកជំនួសលោកដើម្បីផ្ដល់សក្ខីកម្មដែរឬទេ”។ លោក សុះ កាំរី បានឆ្លើយតបម្ដងទៀតដោយត្អូញត្អែរអំពីសុខភាពមិនល្អរបស់លោក។
ពេលទាក់ទងតាមទូរស័ព្ទកាលពីម្សិលមិញ លោក អូស្មាន់ ហាសាន់ បានលើកឡើងថា លោកមិនដែលបានទាក់ទងទៅសាលាក្ដីឡើយ ប៉ុន្តែថា ទោះជាយ៉ាងណាក៏ដោយ លោកយល់ឃើញថា មិនគួរបង្ខំលោក សុះ កាំរី ឲ្យផ្ដល់សក្ខីកម្មទេ។
លោកបានមានប្រសាសន៍ថា “ខ្ញុំគិតថា មានអ្នកដែលអាចជំនួសគាត់បាន មានមនុស្សជាច្រើនដែលធ្លាប់ឆ្លងកាត់ [សម័យខ្មែរក្រហម]”។
ក្រោយមកនៅថ្ងៃដដែលនោះ លោក វីកទ័រ កូប៉េ បានសួរលោក សុះ កាំរី ថា ហេតុអ្វីបានជាលោកបដិសេធមិនព្រមស្បថ ហើយថា ការធ្វើបែបនេះបង្ហាញឲ្យឃើញថា លោកកំពុងនិយាយកុហកអំពីការដែលថា បានអានកូនសៀវភៅមាន១៦ទំព័រនៅក្នុងឆ្នាំ១៩៧៧ ដែលលើកឡើងថា ជនជាតិចាមនឹងត្រូវកម្ទេចចោលនៅត្រឹមឆ្នាំ១៩៨០។
លោកបានសួរថា “សូមអនុញ្ញាតឲ្យខ្ញុំសួរលោកនូវ [សំណួរ] ដ៏ច្បាស់លាស់ ហើយសូមកុំអាក់អន់ចិត្ត ពេលខ្ញុំសួរសំណួរថា ការដែលលោកមិនព្រមស្បថ គឺដោយសារតែតាមពិតទៅលោកមិនបានឃើញកូនសៀវភៅនោះ ហើយខ្លាចមិនហ៊ានស្បថមែនទេ?។
លោក សុះ កាំរី ដែលពីមុនបានពន្យល់ថា នៅក្នុងច្បាប់សាសនាអុិស្លាមមិនតម្រូវឲ្យលោកស្បថនោះ បានបដិសេធចំពោះការចោទប្រកាន់នេះ។
លោកបានមានប្រសាសន៍ថា “នៅទីនេះ ខ្ញុំគិតថា យើងមិនត្រូវប្រើពាក្យថាខ្លាចទេ ព្រោះយើងកំពុងនិយាយអំពីការពិត។ ខ្ញុំនិយាយត្រឹមអ្វីដែលខ្ញុំបានឃើញបានឮតែប៉ុណ្ណោះ ហើយក្រៅពីនោះខ្ញុំមិនដឹងថា ត្រូវប្រាប់យ៉ាងម៉េចទេ ក្នុងនាមខ្ញុំជាអ្នកប្រតិបត្តិតាមសាសនាមួយរូបនោះ”។
បន្ទាប់មកទៀត លោក សុះ កាំរី ត្រូវបានសាកសួរទាក់ទិនការនិយាយប្រាប់ជាលើកដំបូងទៅកាន់អ្នកស៊ើបអង្កេត ដោយពន្យល់អំពីវិធីដែលខ្មែរក្រហមបានសម្លាប់ជនជាតិចាម ដែលចូលរួមនៅក្នុងការបះបោរឆ្នាំ១៩៧៥ នៅភូមិកោះផល ក្នុងខេត្តកំពង់ចាម និងភូមិស្វាយឃ្លាំង ខេត្តត្បូងឃ្មុំ។
ទោះជាយ៉ាងណា នៅក្នុងសាលាក្ដី សាក្សីរូបនេះបានអះអាងថា លោកដឹងតិចតួចអំពីការសម្លាប់រង្គាល ហើយមិនចង់ពិភាក្សាអំពីបញ្ហានេះទេ។
យោងតាមរបាយការណ៍ក្នុងពេលថ្មីៗរបស់អង្គការឃ្លាំមើលសិទ្ធិមនុស្សបានឲ្យដឹង
ថា អង្គភាពខ្មែរក្រហមក្រោមការបញ្ជារបស់លោកនាយករដ្ឋមន្ត្រី ហ៊ុន សែន លោក ហេង សំរិន ប្រធានរដ្ឋសភា និងលោក អ៊ុក ប៊ុនឈឿន សមាជិកព្រឹទ្ធសភាមកពីគណបក្សប្រជាជនកម្ពុជា គឺមានជាប់ពាក់ព័ន្ធនៅក្នុងការបង្ក្រាបការងើបឡើងបះបោរនោះ។
លោក វីកទ័រ កូប៉េ បានសួរទៀតថា “តើលោកធ្លាប់បានឮអំពីការពាក់ព័ន្ធរបស់បុគ្គលដែលសព្វថ្ងៃនៅក្នុងជួររដ្ឋាភិបាល ទៅនឹងការបង្ក្រាបការបះបោរនេះដែរឬទេ?”។
សាក្សីរូបនេះបានឆ្លើយតបថា ”ខ្ញុំមិនដែលឮទេ”៕ សុខុម និង ស៊ុយឈាង (រាយការណ៍បន្ថែមដោយ អ៊ូច សូនី)