41.3 C
Phnom Penh

អ្នក​គាំទ្រ​​បញ្ចាំង​​ភាពយន្ត​​ប្រារព្ធ​ខួប​នៃ​ការ​​​ស្លាប់​របស់​​​លោក​ ឈុត វុទ្ធី

ដោយ ឌឹ ខេមបូឌា ដេលី

បទវិភាគ

បួន​ឆ្នាំបន្ទាប់ពី​លោក ឈុត វុទ្ធី ​សកម្មជន​បរិស្ថាន​​ត្រូវ​បាន​ខ្មាន់​កាំភ្លើង​បាញ់​សម្លាប់​ខណៈ​​​​កំពុង​ស៊ើប​អង្កេត​ការ​កាប់​ឈើ​ខុស​ច្បាប់​នៅ​ខេត្ត​កោះកុង ខ្សែភាព​យន្ត​មួយ​ពណ៌នា​​​​​ពី​​ជីវិត​​​​ប៉ុន្មាន​ខែ​ចុង​ក្រោយ​របស់​លោក​ដែល​ត្រូវ​បាន​ហាម​ឃាត់​​នៅ​ក្នុង​​ប្រទេស​កម្ពុជា នឹង​ត្រូវ​​​ចាក់​បញ្ចាំង​ទូទាំង​ពិភព​លោក​នៅ​ថ្ងៃ​នេះ​។

​យោង​តាម​សេចក្ដី​ថ្លែងការណ៍​​មួយ​​របស់​ Not1More ​​ជា​បណ្ដាញ​គាំទ្រ​​​អ្នក​ការ​ពារ​បរិស្ថាន​​​​ទូទាំង​ពិភពលោក​ដែល​ទើប​បង្កើត​ឡើង​ថ្មីៗ​បាន​ឲ្យ​ដឹង​ថា ខ្សែភាព​យន្ត​រឿង​​ “​ខ្ញុំ ​ឈុត វុទ្ធី” នឹង​ត្រូវ​ចាក់​បញ្ចាំង​ក្នុង​ប្រទេស​នានា​រួម​មាន ចក្រភពអង់គ្លេស ថៃ អុីស្លង់ ​​និង​​ហ្គីណេ​ប៊ីស្សូ។ វា​ក៏​​​នឹង​អាច​រក​បាន​ដោយ​ឥត​គិត​ថ្លៃ​នៅ​លើ​ទំព័រ​ហ្វេសប៊ុក​របស់​ខ្សែភាព​យន្ត​នេះ​​​​រយៈ​ពេល​​២៤​ម៉ោង​ផង​ដែរ​។

កាលពី​សប្ដាហ៍​មុន គម្រោង​ចាក់​បញ្ចាំង​​ភាព​យន្ត​នេះ​នៅ​ Meta House ក្នុង​រាជធានី​ភ្នំពេញ ដែល​វា​​ត្រូវ​បាន​ចាក់​បញ្ចាំង​​ដំបូង​នៅ​​​​​​ឆ្នាំ​២០១៤ ត្រូវ​បាន​លុប​ចោល​​តាម​បញ្ជា​របស់​​​ក្រសួង​វប្បធម៌ ដែល​​បាន​ហាម​ប្រាម​វា​ចាប់​តាំង​ពី​ពេល​នោះមក។ ថ្វី​បើ​មាន​បម្រាម​​​​នេះ​ក្ដី​ ​ក៏​រោង​ភាព​យន្ត​ Flicks បាន​លើក​ឡើង​ថា ខ្លួន​មាន​គម្រោង​ចាក់​បញ្ចាំង​ខ្សែភាព​យន្ត​នេះ​នៅ​ទីតាំង​​​មួយ​​មិន​បង្ហើប​ឲ្យ​ដឹង​នៅ​ក្នុង​រាជធានី​ភ្នំពេញ​នៅ​ថ្ងៃ​នេះ​។

សូម​រំឭក​ថា លោក ឈុត វុទ្ធី ត្រូវ​ខ្មាន់​កំាភ្លើង​បាញ់​ស្លាប់​​កាលពី​ថ្ងៃទី​២៦ ខែ​មេសា ឆ្នាំ​២០១២ អំឡុង​ពេល​​ប្រកែក​គ្នា​ជាមួយ​កង​​​​រាជអាវុធហត្ថ​ខេត្ត​កោះកុង ខណៈ​កំពុង​ស៊ើប​​​អង្កេត​ការ​កាប់​ឈើ​ខុស​ច្បាប់​​​ជាមួយ​​អ្នក​​យក​ព័ត៌មាន​ពីរ​រូប​មកពី​កាសែត ខេមបូឌា ដេលី។

ការ​ស៊ើបអង្កេត​ផ្លូវ​ការ​​ដែល​បាន​សន្និដ្ឋាន​​​ថា មន្ត្រី​កង​រាជអាវុធហត្ថ​ឈ្មោះ អុិន រតនា បាន​បាញ់​​បុរស​វ័យ​៤៦​ឆ្នាំ​រូប​នេះ​ឲ្យ​ស្លាប់ មុន​ពេល​ត្រូវ​មន្ត្រី​កង​រាជអាវុធហត្ថម្នាក់​ទៀត​​​​​បាញ់​សម្លាប់​​​បន្ត​គ្នា​នោះ បាន​រង​ការ​រិះគន់​យ៉ាង​​​​ខ្លាំង​ពី​សំណាក់​បណ្ដា​អង្គការ​សិទ្ធិ​មនុស្ស​​​​​ថា ​ប្រញាប់​ប្រញាល់​ពេក និង​មាន​ការ​​​ធ្វេស​ប្រហែស​។ នៅ​​ទីបំផុត​សាលា​ដំបូង​ខេត្ត​កោះ​កុង​បាន​ដក​ការ​ចោទ​ប្រកាន់​លើ​មន្ត្រី​​កង​រាជអាវុធហត្ថ​ដែល​នៅ​រស់​។

ពេល​ទាក់​ទង​កាលពី​ម្សិលមិញ ​យុវជន​ ឆឺយ ឧត្ដម​រស្មី វ័យ​២៥​ឆ្នាំ ដែល​ត្រូវ​ជា​កូន​ប្រុស​របស់​លោក ឈុត វុទ្ធី បាន​និយាយ​ថា ​ខ្លួន​​នឹង​នៅ​តែ​បន្ត​ស្វែង​រក​យុត្តិធម៌​។ ”​ខ្ញុំ​មិន​ដឹង​​ទេ​ថា ហេតុ​អី​បាន​ជា​រដ្ឋាភិបាល​​ស្អប់​ប៉ា​ខ្ញុំ និង​មិន​ហា៊ន​ចាក់​បញ្ចាំង​​ភាព​យន្ត​នេះ​។ ខ្ញុំ​ចង់​ឲ្យ​រដ្ឋាភិបាល​​សើរើ​សំណុំរឿង​នេះ​ឡើង​វិញ ប៉ុន្តែ​ខ្ញុំ​មិន​ជឿ​លើ​តុលាការ​នៅ​កម្ពុជា​ទេ ពីព្រោះ​តុលាការ​មិន​ឯករាជ្យ​…។ ខ្ញុំ​កំពុង​ប្រមូល​ភ័ស្តុតាង​​ ហើយ​នឹង​បញ្ជូន​វា​ទៅ ICC” ជា​ការ​សំដៅ​ដល់​តុលាការ​​ឧក្រិដ្ឋកម្ម​អន្តរ​ជាតិ​នៅ​ក្នុង​ទីក្រុង​ឡាអេ។ យុវជន​រូប​នេះ​បន្ត​​​​​​​ថា “​ខ្ញុំ​គិត​ថា ​អ្នក​ដែល​សម្លាប់​ប៉ា​ខ្ញុំ​ជា​មន្ត្រី​ជាន់​ខ្ពស់​ក្នុង​ជួរ​​រដ្ឋាភិបាល​។ ខ្ញុំ​ចង់​ឲ្យ​រដ្ឋាភិ​​​បាល​​​​វែក​មុខ​អ្នក​ដែល​បញ្ជា​ឲ្យ​សម្លាប់​ប៉ា​ខ្ញុំ”៕ សុខុម​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស