31 C
Phnom Penh

តុលាការ​​​សាកសួរ​មន្ត្រី​សមា​គម​​​អាដហុក​ពាក់​ព័ន្ធ​រឿង​អាស្រូវ​ផ្លូវ​ភេទ​​របស់​លោក កឹម សុខា​​

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់​ខ្ពស់​បួន​រូប​​នៃ​​សមាគម​សិទ្ធិ​មនុស្ស​​​​​អាដហុក​​ក្នុង​ស្រុក និង​អតីត​មន្ត្រី​​​​​​​សមាគម​​​នេះ​​​​​​​​​មួយ​រូប​ដែល​បច្ចុប្បន្ន​ធ្វើការ​​នៅ​​គណៈ​កម្មា​ធិការ​ជាតិ​រៀបចំ​ការ​បោះ​ឆ្នោត​ (គ.ជ.ប.) ត្រូវ​​បាន​សាកសួរ​​នៅ​សាលា​ដំបូង​រាជធានី​ភ្នំពេញ​កាលពី​ចុង​សប្ដាហ៍​កន្លង​ទៅ​ ហើយ​ត្រូវ​បាន​ឃាត់​​​ខ្លួន​មួយ​យប់​​នៅ​អង្គភាព​ប្រឆាំង​​​អំពើ​ពុករលួយ (ACU)​។

បុគ្គល​ទាំង​ប្រាំរូប​​ដូច​ជា​លោក នី សុខា ប្រធាន​ផ្នែក​ឃ្លាំមើលសិទ្ធិ​​​​​​មនុស្ស​​​​នៅ​សមា​គម​​​​អាដហុក​ និង​អនុប្រធាន​ពីរ​រូប​របស់​លោកគឺ​លោក ណៃ វ៉ង់ដា និង​លោក យី សុខសាន្ត ​​លោកស្រី លឹម មុនី អ្នក​ស៊ើបអង្កេត​ជាន់​ខ្ពស់​នៅ​សមាគម​នេះ​ព្រមទាំង​លោក​​ នី ចរិយា ​អគ្គលេខាធិការ​រង​ គ.ជ.ប. ដែល​ជា​អ្នក​កាន់​តំណែង​មុន​របស់​លោក នី សុខា ត្រូវ​បាន​នាំ​ខ្លួន​ទៅ​កាន់​តុលាការ​​កាលពី​ថ្ងៃ​សៅរ៍។

ពួកគាត់​​​​ត្រូវ​បាន​​​​​​​​ចាប់​​​​ខ្លួន​ និងឃាត់​​​ខ្លួន​​ដោយ ​​​ACU ដែល​ដឹកនាំ​​ការ​ស៊ើបអង្កេត​រឿង​អាស្រូវ​​​​ផ្លូវ​ភេទ​របស់​លោក កឹម សុខា​ អនុប្រធាន​គណបក្ស​សង្គ្រោះ​ជាតិ​ ហើយ​ត្រូវ​បាន​ចោទ​ប្រកាន់​​ពីបទ​​ជួយ​​​លោក​ កឹម សុខា បញ្ចុះ​បញ្ចូល​ស្រី​កំណាន់​​របស់​លោក​ឲ្យ​បដិសេធ​​​​​ស្នេហា​លួច​លាក់​​ជា​ថ្នូរ​​នឹង​ការ​សូក​ប៉ាន់​​ជា​ប្រាក់​ចំនួន​៥០០​ដុល្លារ។

ពួកគាត់​ត្រូវ​បាន​បញ្ជូន​​ទៅ​ឃុំខ្លួន​នៅ​ ACU ​​វិញ​កាលពី​យប់​ថ្ងៃសៅរ៍ ​ប៉ុន្តែ​ត្រូវ​បាន​បញ្ជូន​មក​តុលាការ​វិញ​នៅ​​ព្រឹក​ថ្ងៃ​អាទិត្យ​ ដើម្បី​​ឲ្យ​ព្រះរាជអាជ្ញា​សាកសួរ​បន្ថែម​។ ពួកគាត់​ត្រូវ​បាន​បញ្ជូន​ត្រឡប់​ទៅ​ ACU ជា​ថ្មី​​ម្ដង​ទៀត​នៅ​​​​ម៉ោង​៨​​យប់មិញ​។

លោក សំ សុខគង់ មេធាវី​ការ​ពារ​តំណាង​លោក​ នី ចរិយា ដែល​ការ​សាកសួរ​​​លោក​បាន​​​​បញ្ចប់​កាលពី​ម្សិលមិញ​​ មាន​ប្រសាសន៍​ថា ព្រះ​​​រាជអាជ្ញា​រង លឹម ​ពេជ្រ ​មិន​ទាន់​សម្រេច​​​​​ថា​​​​​​ត្រូវ​ដាក់​ការ​ចោទ​ប្រកាន់​​លើ​មន្ត្រី​ គ.ជ.ប. រូប​នេះ​​​​​នៅឡើយ​​​​​​ទេ។

លោក​​​​មាន​ប្រសាសន៍​នៅ​ម៉ោង​ប្រហែល​​​៦​ល្ងាច​​ថា “​តុលាការ​​​​​​​ទើប​​​តែ​​​​​​បញ្ចប់​ការ​សាក​សួរ​​​ជន​សង្ស័យ​ម្នាក់​ប៉ុណ្ណោះ​ក្នុង​ចំណោម​ជន​សង្ស័យ​ទាំង​អស់​ផ្សេងទៀត​​​​​​ដែល​មិន​ទាន​​​បញ្ចប់​​​​នៅ​ឡើយ​។ ​ក្នុង​នីតិវិធី​ច្បាប់​ ប្រសិន​បើ​​​វា​ជា​សំណុំរឿង​មួយ​ដែល​មាន​ជន​សង្ស័យ​ច្រើន វា​​​តម្រូវ​ឲ្យ​ព្រះរាជអាជ្ញា​សាកសួរ​ជន​សង្ស័យ​ទាំង​អស់​ ហើយ​បន្ទាប់​មក​សិក្សា​ថា​តើ​ត្រូវ​​ដាក់​ការ​ចោទ​ប្រកាន់​​ឬ​ក៏អត់​”។

​លោក​​​​បាន​​​​​​​​​​​បន្ត​​​ទៀត​​​​ថា ​លោក​មិន​បាន​ដឹង​​ថា ​កូន​ក្ដី​របស់​លោក​មាន​តួនាទី​​​​​អ្វី​​​​​​ជាប់​ពាក់​ព័ន្ធ​​​​​​ក្នុង​​រឿង​អាស្រូវ​ផ្លូវ​ភេទ​របស់​លោក កឹម សុខា​ ទេ។ “​ខ្ញុំ​​មិន​ទាន់​ដឹង​លម្អិត​​​​​ទេ។ យើង​មិន​ជឿ​ថា គាត់​ជាប់​ពាក់​ព័ន្ធ​ទេ ប៉ុន្តែ​នេះ​កំពុង​ស្ថិត​ក្នុងដំណើរ​​​​​​ការ​​​​នីតិវិធី​សាកសួរ​នៅ​ឡើយ ដូច្នេះ​យើង​នឹង​​ស្វែង​យល់​បន្ថែម​ទៀត​”។

លោក ឡោ ចន្ធី មេធាវី​​តំណាង​មន្ត្រី​សមា​គម​អាដហុក​បាន​មាន​ប្រសាសន៍​ថា ការ​សាក​សួរ​​​​ជន​​​​​​សង្ស័យ​​​​​​បួន​​​​បាន​បញ្ចប់​នៅ​ម៉ោង​៨​យប់​ ជា​ពេល​ដែល​​​​ជន​​សង្ស័យ​​​​​​​ទាំង​៥រូប​ត្រូវ​បាន​បញ្ជូន​ទៅ​ ACU វិញ​។

លោក​ថ្លែង​​​​​​ថា “​ពួកគាត់​បានបញ្ចប់​នីតិវិធី​សាកសួរ​​​​​ហើយ​​​នៅ​ល្ងាច​នេះ​​ម៉ោង​ប្រហែល​​​​៨យប់។ ពួកគាត់​មិន​ទាន់​​​​សម្រេច​ថា​ត្រូវ​ចោទ​​​​ប្រកាន់​កូន​ក្ដី​របស់​ខ្ញុំ​​​​​​នៅ​​​​​​ឡើយ​​​ទេ ពីព្រោះ​វា​យប់​ណាស់​ទៅ​ហើយ​។ ពួកគាត់​ [ជន​សង្ស័យ​] ត្រូវ​បាន​បញ្ជូន​ទៅ​ ACU វិញ​​​​​​នៅ​​​​​​យប់​​​​​​នេះ​​​ ហើយ​​​​​​យោង​តាម​នីតិវិធី គេ​នឹង​បញ្ជូន​ពួកគាត់​ត្រឡប់​​​មក​តុលាការ​វិញ​នៅ​ព្រឹក​ថ្ងៃ​ស្អែក”។

លោក សុឺន សាលី ​មន្ត្រី​អង្គការ​សហ​ប្រជា​​ជាតិ​​ក៏​ត្រូវ​បាន​​កោះហៅ​​ដែរ​នៅ​ក្នុង​សំណុំ​រឿង​​​​​នេះ ប៉ុន្តែ​លោក​បាន​បដិសេធ​មិន​បង្ហាញ​​​​ខ្លួន​​​​​​​​ឡើយ ដោយ​ការិយាល័យ​​សិទ្ធិ​មនុស្ស​​​​​​​​​​​​​​​​របស់​​​​​​​​​​​អង្គការ​សហប្រជាជាតិ​​​​​​​​​ប្រចាំ​​​កម្ពុជា​​​​​​ ​​​បាន​​​លើក​​​​ឡើង​ពី​អភ័យ​ឯក​សិទ្ធិ​របស់លោក​​​​​​​ក្នុង​នាម​ជា​មន្ត្រី​អង្គការ​សហប្រជា​ជាតិ ទោះ​បី​​​​នៅ​​​ពេល​​​​​​​ ​​​ACU និយាយ​ថា ខ្លួន​​នឹង​កោះហៅ​​លោក​​​​​​​ម្ដង​ទៀត​​​​​​ ហើយ​អាច​នឹង​ចាប់លោក​​​គាត់​ប្រសិន​​​​បើ​ចាំបាច់​​​​​​យ៉ាង​​​ណាក្តី​​​​។

ក្នុង​សុន្ទរកថា​​នៅ​ខេត្ត​ព្រះសីហនុ​កាលពី​ម្សិលមិញ លោក​នាយក​រដ្ឋមន្ត្រី​ ហ៊ុន សែន ​​​បាន​​​មាន​​​ប្រសាសន៍​​​​​​​​​​​​ថា ​អភ័យ​ឯកសិទ្ធិ​​ផ្ដល់​ឲ្យ​​​តែ​មន្ត្រី​អង្គការ​​សហប្រជាជាតិ​បរទេស​​ដែល​​​​បម្រើ​ការ​ងារ​នៅ​កម្ពុជា​ប៉ុណ្ណោះ​​ ហើយ​​​មិន​អាច​​ផ្ដល់​​ឲ្យ​លោក សុឺន សាលី ធ្វើ​​​ជា​​​​​​​​​មួក​ការ​ពារ​បាន​ទេ​។

​លោក​​បាន​​ថ្លែង​​​​​​ក្នុង​សុន្ទរក​​​​​​ថា​​​នោះ​​​ថា ​”​ម៉ែ​​​អភ័យ​ឯកសិទ្ធិ ឪអភ័យ​ឯកសិទ្ធិ​​ក៏ដោយ ​ពួក​គេ​ត្រូវ​ជាប់​ពន្ធនាគារ​ ពីព្រោះ​អភ័យ​ឯកសិទ្ធិ​​មិន​មែន​មួក​​​ដែក​ទេ។ អ្នក​​​​​​ឯង​សូកប៉ាន់​សាក្សី​ អ្នក​ឯង​គាប​សង្កត់​​ពួកគេ​”។

នៅ​ខាង​ក្រៅ​តុលាការ​កាលពី​ម្សិលមិញ មនុស្ស​ប្រហែល​៦០​នាក់​បាន​ប្រមូល​ផ្ដុំគ្នា​​​​ដើម្បី​ទាមទារ​ឲ្យ​ដោះលែង​មន្ត្រី​សិទ្ធិ​មនុស្ស​​​​នៅ​ក្នុង​សំណុំរឿង​​​​​នេះ​​​​​​ដែលរង​​ការ​​​​​​​​​​រិះគន់​​​​​​​យ៉ាង​​​​​​ខ្លាំង​​​​​​​​​ថា​ជា​ការ​វាយ​ប្រហារ​លើ​​​សង្គម​ស៊ីវិល​​​​​​​ក្នុង​​​ហេតុផល​នយោបាយ​​។ នគរ​បាល​បង្ក្រាប​​កុបកម្ម​ប្រមាណ​៤០​នាក់​បាន​ប្រើ​ខែល​​ដើម្បី​រុញ​​​​​​​អ្នក​​​​​​​​​តវ៉ា​​​​​​ឲ្យ​​​​​​ឡើង​​​​​​លើ​​​ចិញ្ចើម​​​​​​​​​ផ្លូវ នៅ​ពេល​ពួកគាត់​​​​​​​​ស្រែក​ថា ​”អយុត្តិ​​ធម៌” ប៉ុន្តែ​គ្មាន​នរណា​ម្នាក់​រង​របួស​ទេ។

មេឃុំ​​គណបក្ស​ប្រឆាំង​​មួយ​រូប​ត្រូវ​បាន​ចោទ​ប្រកាន់​​​​ពីបទ​ “​សូកប៉ាន់​សាក្សី” ហើយ​​​​​​​​​ត្រូវ​​​បាន​​​​​​​​​​​​​​​​​​ដាក់​​​​​​​​​​​​​​​​​ពន្ធនាគារ​​​ក្នុង​សំណុំរឿង​នេះ​​ពីបទ​សន្យា​ផ្ដល់​ប្រាក់​ចំនួន​៥០០​ដុល្លារ​​ដល់​គ្រួសារ​​​របស់​​​​​​​ស្រីកំណាន់​​​លោក កឹម ​សុខា ​ប៉ុន្តែ​គណបក្ស​សង្គ្រោះ​ជាតិ​​​​​បក​​​ស្រាយ​​​​​​​​​​​​ថា ​​​​​​វា​ជាជំនួយ​​​​​​​សប្បុរសធម៌​​​បាន​​​​​​​ពី​អ្នក​គាំទ្រ​នៅ​បរទេសសម្រាប់​​​​​ការ​បាត់​បង់​​​ការ​ងារ​របស់​នាង​​ដោយ​សារ​រឿង​អាស្រូវ​នេះ។

លោក កែម ឡី អ្នក​វិភាគ​នយោបាយ​​​ក្នុង​ចំណោម​​អ្នក​អង្កេត​​​​​តាម​ដាន​សកម្មភាព​​​​​​ក្នុង​​​​​​​ថ្ងៃ​នោះ បាន​មាន​ប្រសាសន៍​ថា លោក​យល់​​​ថា ACU មាន​រឿង​សំខាន់​​​​​​​ជាង​​នេះ​​ដែល​ត្រូវ​ដោះ​​​ស្រាយ​​​ដូច​ជា​​ការ​លាត​ត្រដាង​អំពើ​ពុក​រលួយ​​​​​​​ក្នុង​ក្រសួង​សុខាភិបាល​​​​ដោយ​មូល​និធិ​សកល​​​ដើម្បី​​ប្រយុទ្ធប្រឆាំង​ជំងឺអេដស៍​ របេង ​​និង​គ្រុនចាញ់​​​ជា​​​​​​​​​ដើម​​​។

​​កាលពី​ឆ្នាំ​២០១៤ មូលនិធិ​សកល​​​​​បាន​ចោទ​ប្រកាន់​ថា លោក ដួង សុជាតិ អតីត​​​ប្រធាន​មជ្ឈមណ្ឌល​​ជាតិ​​កម្ចាត់​ជំងឺ​គ្រុនចាញ់ និង​មន្ត្រី​មួយ​ចំនួន​ទៀត​​បាន​ទទួល​ការ​សូក​ប៉ាន់​​​​ចំនួន​​​​​​៤៥០.០០០​ដុល្លារ​​ពី​​​ក្រុម​​​ហ៊ុន​​​​ផ្គត់ផ្គង់​មុងការ​ពារ​​មូស​ខ្លា​​​​មួយ​​​​​​នៅ​បរទេស​ជា​ថ្នូរ​នឹង​ការ​ទទួល​បាន​កិច្ច​សន្យា​​​ក្នុង​​​​​​​​​ទំហំទឹក​​​ប្រាក់​​​​​​១២​លាន​ដុល្លារជា​​​​​​​ផ្នែក​​​មួយ​​​នៃ​​​គម្រោង​​​​​​​​​របស់​​​​​​​​​​​​របស់​​​​មូលនិធិ​​​​​​សកល។​​​​​​​​​​​​​​

លោក​​​​​​មាន​​​ប្រសាសន៍​​​​​​ទៀត​​​​ថា ”ប្រសិន​បើ​​យើង​ប្រៀបធៀប​រឿង​នេះ​ទៅ​មូលនិធិ​សកល​​​​​​​វា​​​​​​​​​ពាក់​​​ព័ន្ធ​​​​​​​​​​​​​​​ទឹក​​​ប្រាក់​ប្រហែល​៤១០.០០០​ដុល្លារ​ ប៉ុន្តែ​អ្នក​ដែល​ជាប់​ពាក់​ព័ន្ធ​​នឹង​មូលនិធិ​សកល​មិន​ត្រូវ​បាន​ស៊ើបអង្កេត​ទេ។ វា​ជា​ករណី​​លុយ​២០០​ដុល្លារ​​ ឬ​​៥០០​ដុល្លារ​​​ដើម្បី​ជួយ​ជន​រងគ្រោះ​ក្នុង​នាម​​មនុស្ស​ធម៌​​ នៅ​ពេលនាង​​​ប្រឈម​បញ្ហា​ផ្លូវ​ច្បាប់​។ ត្រឡប់​មក​​សំណុំរឿង​តុលាការ​នេះ​វិញ​ ខ្ញុំ​យល់​​​​ថា វា​គួរ​ឲ្យ​អស់​សំណើច”៕ សុខុម​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស