ពេលថ្លែងជាសាធារណៈជាលើកដំបូងនៅក្នុងរយៈពេលជាងមួយខែមកនេះ លោក កឹម សុខា អនុប្រធានគណបក្សសង្គ្រោះជាតិបានលើកឡើងកាលពីម្សិលមិញពេលប្រជាពលរដ្ឋកំពុងចោមរោមថា ការគាំទ្រចំពោះគណបក្សប្រឆាំង មានតែកាន់តែខ្លាំងទៅវិញទេ ពេលមានការផ្តន្ទាទោសទ្រង់ទ្រាយធំពីសំណាក់រដ្ឋាភិបាលចំពោះការអះអាងដែលថា លោកមានស្រីកំណាន់។
លោក កឹម សុខា បានប្រកាន់ខ្ជាប់នូវគោលការណ៍ “មិនឆ្លើយ មិនឆ្លង មិនឈ្លោះ” ចំពោះការអះអាងនេះ ចាប់តាំងពីវាបានលេចឡើងជាលើកដំបូងកាលពីពីរខែកន្លងមកនេះ ប៉ុន្តែការនៅស្ងាត់ស្ងៀមរបស់លោកមានភាពកាន់តែគួរឲ្យកត់សម្គាល់ ពេលមន្ត្រីរដ្ឋាភិបាលបានចាប់ខ្លួនមន្ត្រីសិទ្ធិមនុស្ស និងមន្ត្រីគណបក្សប្រឆាំងនៅក្នុងករណីនេះកាលពីសប្តាហ៍មុន។
អំឡុងពិធីជួបជុំរបស់គណបក្សសង្គ្រោះជាតិ នៅទីស្នាក់ការរបស់ខ្លួនក្នុងខេត្តស្វាយរៀងកាលពីម្សិលមិញ លោក កឹម សុខា បានលើកឡើងថា លោករីករាយនឹងឈរមើល ពេលការវាយប្រហារពីសំណាក់រដ្ឋាភិបាលមានតែធ្វើឲ្យប្រជាពលរដ្ឋកាន់តែច្រើនគាំទ្រគណបក្សប្រឆាំងទៅវិញនោះ។
លោកបានមានប្រសាសន៍ថា “យើងឃើញប្រជាពលរដ្ឋ ជាមហាជនទូទៅ មិនមែនតែអ្នកក្នុងរចនាសម្ព័ន្ធគណបក្សសង្គ្រោះជាតិទេ មហាជនទូទៅ ប្រជាពលរដ្ឋ សូម្បីតែប្រជាពលរដ្ឋខ្លះ ដែលមិនធ្លាប់គាំទ្រគណបក្សសង្គ្រោះជាតិនុះ ក៏ចាប់ផ្តើមបង្ហាញនូវភាពកក់ក្តៅ គំាទ្រគណបក្សសង្គ្រោះជាតិកាន់តែច្រើនទៅ”។
លោកបានមានប្រសាសន៍បន្ថែមថា”បងប្អូនឃើញហើយ ហើយបងប្អួននៅមូលដ្ឋានដឹងជាងខ្ញុំទៅទៀត។ តើប្រជាពលរដ្ឋធម្មតាគាត់ផ្តាំមកម៉េចខ្លះ? គាត់ថា “ឱ្យប្រាប់មេទៅ ចាំតាថ្ងៃទៅ បោះឆ្នោតឈ្នះហើយ”។
លោក កឹម សុខា បានមានប្រសាសន៍បន្ថែមទៀតថា “បើគ្មានរចនាសម្ព័ន្ធរឹងមំា បើគ្មានប្រជាពលរដ្ឋទូទៅ បង្ហាញភាពកក់ក្តៅឱ្យយើងទេ ក៏យើងអត់អាចបោះជំហានបានប៉ុណ្ណឹងដែរ។ តាមខ្យល់ព្យុះនេះ គឺធ្ងន់ណាស់បងប្អូន”។
បន្ទាប់មក លោកបានលើកឡើងម្តងទៀតថា លោកមិនចាំបាច់ឆ្លើយតបចំពោះការវាយ ប្រហារដ៏ជាក់លាក់នេះឡើយ។ កាលពីពីរខែកន្លងមកនេះ រដ្ឋាភិបាលបានដាក់សម្ពាធមកលើគាត់គ្រប់ទិសជុំវិញការចោទប្រកាន់ដែលថា គាត់មានរឿងសហាយស្មន់ជាមួយអ្នកធ្វើសក់អាយុ២៥ឆ្នាំម្នាក់ឈ្មោះ ខុម ចាន់តារ៉ាទី ដែលបដិសេធរឿងសហាយស្មន់នេះ មុនពេលក្រែប្រែការបដិសេធរបស់នាងកាលពីខែមុន អំឡុងការសាកសួរពាក់ព័ន្ធការចោទប្រកាន់ពីបទ “ពេស្យាចារ”។
បន្ទាប់ពីទទួលស្គាល់រឿងសហាយស្មន់នេះ នាង ខុម ចាន់តារ៉ាទី បានចោទប្រកាន់បុគ្គលិកមួយចំនួនមកពីសមាគមសិទ្ធិមនុស្សអាដហុក មេឃុំគណបក្សប្រឆាំងមួយរូប និងមន្ត្រីអង្គការសហប្រជាជាតិមួយរូបថា បានបញ្ចុះបញ្ចូលឲ្យនាងនិយាយកុហក ដើម្បីការពារលោក កឹម សុខា។ ចាប់តាំងពីពេលនោះមក អាជ្ញាធរបានចាប់ខ្លួនអ្នកទាំងនេះ។
លោក កឹម សុខា មានថ្លែងកាលពីម្សិលមិញថា “មិនបាច់ឆ្លើយ។ ពលរដ្ឋឆ្លើយជំនួសយើង។ ហេតុអ្វីបានជាប្រជាពលរដ្ឋឆ្លើយជំនួសយើង? ប្រជាពលរដ្ឋច្រើនជាងយើងទៀត ហើយគេឈឺចាប់ជាងយើងអស់លោកអ្នកដឹកនាំទៀត។អ៊ីចឹងបានខ្ញុំឈរនៅបានហ្នឹង”។
ប៉ុន្តែ លោក ផៃ សីុផាន អ្នកនាំពាក្យទីស្តីការគណៈរដ្ឋមន្ត្រីបានមានប្រសាសន៍ថា លោក កឹម សុខា គ្រាន់តែព្យាយាមបង្វែរការចាប់អារម្មណ៍របស់ប្រជាពលរដ្ឋពីរឿងអាស្រូវផ្លូវភេទរបស់គាត់ប៉ុណ្ណោះ ហើយបានបន្ថែមថា វាគួរឱ្យអស់សំណើចក្នុងការនិយាយថា គណបក្សសង្គ្រោះជាតិកាន់តែខ្លាំងទៅៗនោះ។
លោក ផៃ ស៊ីផាន បានមានប្រសាសន៍ថា “គាត់ចេះតែបង្កើតរឿងតែប៉ុណ្ណោះ។ សម្រាប់ពេលនេះ អ្នកគាំទ្រគណបក្សសង្គ្រោះជាតិហាក់ដូចជាមានការបែកបាក់ ហើយដូចជាពួកគេកំពុងប្រយុទ្ធគ្នាដើម្បីធ្វើធំអ៊ីចឹង។ មានការបែកបាក់ខ្លាំងណាស”។
លោកបានមានប្រសាសន៍ថា ”ឧទាហរណ៍ ពួកគេកំពុងផ្តោតលើបញ្ហាផ្ទាល់ខ្លួនរបស់លោក កឹម សុខា ហើយពួកគេមិនមានពេលវេលាច្រើនសម្រាប់បញ្ហាដទៃឡើយ។ ពួកគេស្ថិតក្នុងការគ្រប់គ្រងស្ថានការណ៍ការបែកបាក់ធ្ងន់ធ្ងរ ហើយខ្ញុំមិនឃើញពួកគេមានការគាំទ្រកើនឡើងទេ”។
លោក ផៃ ស៊ីផាន បានបន្ថែមថា លោកមានការជឿជាក់ថា គណបក្សប្រជាជនកម្ពុជានឹងឈ្នះការបោះឆ្នោត ប្រសិនបើការបោះឆ្នោតធ្វើឡើងនៅថ្ងៃនេះ ហើយលោកបានលើកឡើងថា លោកមិនបារម្ភថា ការបោះឆ្នាតជាតិឆ្នាំ២០១៨អាចធ្វើឲ្យមានការតក់ស្លុតដូចក្នុងឆ្នាំ២០១៣ឡើយ។
លោកបានមានប្រសាសន៍ថា “ទេ វាមិនដូចគ្នាទេ។ ក្នុងឆ្នាំ២០១៣ មានបញ្ហាមួយចំនួនដែលពួកគេនិយាយកុហកប្រជាពលរដ្ឋដូចជាការដំឡើងប្រាក់ខែ ការកែទម្រង់ប្រព័ន្ធអប់រំ និងបញ្ហានៅតាមមូលដ្ឋានដូចជាការផ្តល់សេវាជាដើម ហើយយើងមានភាពសកម្មណាស់ក្នុងការកែទម្រង់”។
លោក កែម ឡី ប្រធានក្រុមតស៊ូមតិនយោបាយមូលដ្ឋាន “ខ្មែរដើម្បីខ្មែរ” មានប្រសាសន៍ថា បើទោះជាលោកជឿថា លោក ផៃ ស៊ីផាន ត្រឹមត្រូវក្នុងការនិយាយថា គណបក្សសង្គ្រោះជាតិមានបញ្ហាផ្ទៃក្នុងក៏ដោយ តែវាហាក់ដូចជាមិនអ៊ីចឹងទេ។
លោក កែម ឡី មានប្រសាសន៍ថា “ពួកគេបានចាក់ចំបេះដូងប្រជាពលរដ្ឋហើយ។ គ្មានការស្ទង់មតិទេ ប៉ុន្តែផ្អែកតាមការសង្កេតរបស់ខ្ញុំ បើទោះជាផ្ទៃក្នុងគណបក្សសង្គ្រោះជាតិមានបញ្ហាក៏ដោយ ក៏ប្រជាពលរដ្ឋនៅពីក្រោយពួកគេដែរ ហើយពួកគេកំពុងតែរក្សានូវសម្ទុះដ៏ខ្លាំងដដែល”។
លោកបានបន្ថែមថា “ពួកគេបន្តសកម្មភាពរបស់ខ្លួនដដែល បើទោះជាមនុស្សមួយចំនួនត្រូវបានចាប់ដាក់ពន្ធនាគារ ហើយអ្នកផ្សេងទៀតស្ថិតក្នុងតុលាការ។ វាគ្មានបញ្ហាទេ។ អ្នកអាចឃើញតាមទំព័រហេ្វសប៊ុក មានយុទ្ធនាការកាន់តែច្រើនឡើងៗប្រឆាំងគណបក្សកាន់អំណាច”។
លោក កែម ឡី បានមានប្រសាសន៍ថា គណបក្សសង្គ្រោះជាតិកំពុងជួបការលំបាកដោយសាររងការវាយប្រហារលើថ្នាក់ដឹកនាំរបស់ខ្លួន និងដោយសារអវត្តមានរបស់លោក សម រង្ស៊ី មេដឹកនាំគណបក្សប្រឆាំង ដែលកំពុងរស់នៅក្នុងប្រទេសបារាំងដើម្បីគេចពីការផ្តន្ទាទោសដាក់ពន្ធនាគារនៅទីនេះ ប៉ុន្តែបានប្រដូចការមើលការវាយប្រហាររបស់គណបក្សប្រជាជនកម្ពុជាទៅនឹងការមើលកូនក្មេងវាយពស់។
លោក កែម ឡី មានប្រសាសន៍ថា “សូម្បីសត្វពស់ បើទោះជាក្បាលវានៅឆ្ងាយ ក៏កន្ទុយនៅតែខ្លាំងដដែល។ សម្រាប់គណបក្សសង្គ្រោះជាតិវិញ ក្បាលរបស់ពួកគេមានបញ្ហា មួយនៅឆ្ងាយហើយមួយទៀតស្ថិតក្នុងល្បែងនយោបាយ ប៉ុន្តែខ្លួននិងកន្ទុយនៅតែបន្តទៅមុខក្នុងទម្រង់រួបរួមគ្នា។ ពួកគេកំពុងវាយក្បាល ប៉ុន្តែកម្រើកឯខ្លួនទៅវិញ”៕ស៊ុយឈាង និង សារុន