រដ្ឋមន្ត្រីក្រសួងមហាផ្ទៃលោកស ខេងលើកឡើងថា ការប្រើប្រាស់កម្លាំងយោធាឬទាហាន ទៅបង្ក្រាប ឬដោះស្រាយបញ្ហាជាមួយពលរដ្ឋ ឬចុះអនុវត្តសាលដីការបស់តុលាការ គឺជារឿងខុសច្បាប់។
ថ្លែងក្នុងសន្និបាតបូកសរុបការងារឆ្នាំ២០១៨ និងដាក់ទិសដៅសម្រាប់ឆ្នាំ២០១៩ នៅទីស្តីការក្រសួងមហាផ្ទៃកាលពីព្រឹកមិញ លោកស ខេងអះអាងថា ការយកកម្លាំងយោធាទៅអនុវត្តសាលដីការបស់តុលាការគឺជារឿងខុសច្បាប់ទាំងស្រុង។ លោកបន្តថា អ្នកដែលមានសិទ្ធិចុះអនុវត្តច្បាប់គឺជាកម្លាំងនគរបាលយុត្តិធម៌ ប៉ូលិស កងរាជអាវុធហត្ថ និងព្រះរាជអាជ្ញាប៉ុណ្ណោះ។
លោកស ខេង បានលើកឡើងករណីខេត្តចំនួនពីរដែលប្រើប្រាស់កម្លាំងយោធាទៅបង្ក្រាបទាំងកម្រោលលើពលរដ្ឋ ក្នុងការអនុវត្តសាលដីការបស់តុលាការទី១គឺនៅខេត្តព្រះសីហនុហើយទី២ គឺនៅខេត្តក្រចេះ ដែលបណ្តាលឱ្យមានការប៉ះទង្គិចគ្នា រហូតដល់មានការបាញ់រះទៅលើពលរដ្ឋទៀតផង។
លោកបញ្ជាក់ថា ក្នុងស្ថានភាពបច្ចុប្បន្នការប្រើប្រាស់កម្លាំងទៅបង្រ្កាបឬ ដោះស្រាយទំនាស់ជាមួយពលរដ្ឋមិនត្រូវធ្វើឡើងជាដាច់ខាត ពីព្រោះអ្នកកាន់អំណាចមិនអាចពឹងលើកាំភ្លើងនោះទេ ប៉ុន្តែគេត្រូវរកវិធីដោះស្រាយដោយឈរនៅលើផ្លូវច្បាប់ប្រកបដោយភាពយុត្តិធម៌។
ជាមួយគ្នានេះ លោកថាជំរុញឱ្យរដ្ឋបាលខេត្តទាំងអស់ ត្រូវពង្រឹងការអនុវត្តច្បាប់ឱ្យបានត្រឹមត្រូវ ជាពិសេសត្រូវយល់ឱ្យបានច្បាស់អំពីការប្រើប្រាស់កម្លាំងក្នុងការដោះស្រាយបញ្ហាឬទប់ទល់ជាមួយពលរដ្ឋ ។
កាលពីខែមីនាឆ្នាំ២០១៨ អាជ្ញាធរខេត្តក្រចេះបានប្រើកម្លាំងចម្រុះ ដោយមានយោធារាប់សិបនាក់ផង បានបង្រ្កាបដោយហិង្សា និងមានទាំងបាញ់ប្រហារទៅលើពលរដ្ឋមានជម្លោះដីធ្លីនៅស្រុកស្នួល ដែលបណ្តាលឱ្យពលរដ្ឋជាច្រើននាក់រងរបួស។
នៅខែមករាឆ្នាំ២០១៩ថ្មីៗនេះ មន្ត្រីតុលាការ និងអាជ្ញាធរខេត្តព្រះសីហនុបានដឹកនាំកម្លាំងចម្រុះពិសេសមានកម្លាំងទាហានជាច្រើននាក់ចុះអនុវត្តសាលដីការរបស់តុលាការ ហើយក៏មានការផ្ទុះអំពើហិង្សាឡើង រហូតដល់មានការបាញ់ប្រហារទៅលើពលរដ្ឋ បណ្តាលឱ្យកម្មករសំណង់ម្នាក់ត្រូវគ្រាប់កាំភ្លើងស្ទើរតែផុតជីវិត។
កាលពីឆ្នាំ២០១៤ អាជ្ញាធរបានការប្រើកម្លាំងទាហាននិង កម្លាំងសន្តិសុខ ខណ្ឌឬប្រជាការពារដើម្បីបង្ក្រាបទៅលើគណបក្សសង្រ្គោះជាតិ និងវាយដំច្រំធាក់មន្ត្រីសង្គមស៊ីវិល ព្រមទាំងវាយក្រុមអ្នកតវ៉ាដីធ្លីយ៉ាងធ្ងន់ធ្ងរថែមទៀត។ សង្គមស៊ីវិលធ្លាប់បានថ្កោលទោស ចំពោះការប្រើប្រាស់កម្លាំងខុសច្បាប់បង្ក្រាបទៅលើពលរដ្ឋនិងសង្គមស៊ីវិលទាំងនោះដែលជាការរំលោភធ្ងន់ធ្ងរទៅលើសិទ្ធិមនុស្សរំលោភច្បាប់ជាតិ និងអន្តរជាតិជាខ្លាំង។ ក្រុមសង្គមស៊ីវិលតែងទាមទារឱ្យរដ្ឋាភិបាលកែប្រែឥរិយាថអាក្រក់ទាំងនេះ ហើយស្នើឱ្យដាក់ទោសទណ្ឌដល់អ្នកបញ្ជានិងអ្នកអនុវត្តផ្ទាល់នូវអំពើខុសច្បាប់ទាំងនោះផងដែរ៕