អ្នកឃ្លាំមើលអំពីបញ្ហាសង្គមបានទស្សន៍ទាយថា ការអនុវត្តលទ្ធិប្រជាធិបតេយ្យនៅកម្ពុជាកំពុងជួបបញ្ហាដែលត្រូវប្រឈម ប៉ុន្តែលទ្ធិមួយនេះនឹងមិនស្លាប់ងាយៗនោះឡើយ។
នាយកប្រតិបត្តិនៃអង្គការតម្លាភាពកម្ពុជាលោកព្រាប កុលបានសរសេរនៅលើគណនីហ្វេសប៊ុករបស់លោកថា ស្ថានភាពប្រជាធិបតេយ្យកម្ពុជាកំពុងមានជំងឺ ប៉ុន្តែអាចព្យាបាលបាន។ លោកអះអាងថា លោកនៅតែមានសង្ឃឹមដោយសារមានពលរដ្ឋខ្មែរដែលជាអ្នកស្រឡាញ់ប្រជាធិបតេយ្យពិតប្រាកដក្នុងនោះមានក្រុមបញ្ញវន្ត មន្ត្រីរាជការ សហគ្រិន គ្រូបង្រៀន ពលករ កម្មករ អ្នកសារព័ត៌មាន យុវជន សិស្ស និស្សិត និងពលរដ្ឋទូទៅ ជាពិសេសក្នុងចំណោមអ្នកនយោបាយទាំងនៅក្នុងចំណោមក្រុមប្រឆាំងនិងនៅក្នុងចំណោមក្រុមកាន់អំណាច។
លោកមើលឃើញថា ពលរដ្ឋខ្មែរកាន់តែច្រើនឡើង មានការយល់ដឹងអំពីសិទ្ធិ អំពីច្បាប់និងគោលការណ៍ប្រជាធិបតេយ្យនិងចេះចូលរួមក្នុងដំណើរការប្រជាធិបតេយ្យចេះសម្រេចចិត្តបោះឆ្នោតប្រកបដោយការវិនិច្ឆ័យ។
លើសពីនេះ ស្មារតីនៃកិច្ចព្រមព្រៀងទីក្រុងប៉ារីស២៣តុលា១៩៩១និងរដ្ឋធម្មនុញ្ញនៃព្រះរាជាណាចក្រកម្ពុជាជាគុម្ពីរ និងជាត្រីវិស័យសម្រាប់ការរៀបចំប្រទេសឱ្យប្រសើរឡើងវិញ ដោយមានការជួយគាំទ្រដោយផ្ទាល់និងដោយប្រយោលពីសំណាក់ប្រទេសកាន់លទ្ធិប្រជាធិបតេយ្យនៅលើសាកលលោក។
ជាមួយគ្នានេះដែរ លោកព្រាប កុលក៏មើលឃើញថា និន្នាការនិងផ្នត់គំនិតនៃខ្មែរជំនាន់ក្រោយនិងអ្នកបន្តវេនភាគច្រើនមានទំនោរទៅរកប្រជាធិបតេយ្យហើយជនជាតិខ្មែរដែលកំពុងរស់នៅបរទេសបានរួមចំណែកជំរុញនិងគាំទ្រចលនាប្រជាធិបតេយ្យទាំងកម្លាំងកាយទាំងស្មារតី និងថវិកា។ មិនតែប៉ុណ្ណោះប្រព័ន្ធបច្ចេកវិទ្យាបច្ចេកវិទ្យាព័ត៌មាន ជាពិសេសបណ្តាញសង្គមហ្វេសប៊ុកផ្តល់ឱកាសឱ្យពលរដ្ឋគ្រប់សមាសភាពអាចទទួលបានព័ត៌មានចែករំលែកព័ត៌មាន និងសម្តែងមតិ។ ទាំងនេះលោកថា ជាឱសថសម្រាប់ព្យាបាលជំងឺប្រជាធិបតេយ្យដែលកំពុងកើតមាននៅកម្ពុជាផងដែរ។
លោកព្រាប កុលអះអាងថា អ្វីដែលពលរដ្ឋខ្វះគឺយន្តការប្រជាធិបតេយ្យពិតប្រាកដ ដែលមានលក្ខណ:សេរី ត្រឹមត្រូវ និងយុត្តិធម៌ដែលអាចផ្តល់ឱកាសឱ្យមានការប្រកួតប្រជែងពិតប្រាកដ។
លោកក៏អំពាវនាវឱ្យពលរដ្ឋខ្មែរទាំងអស់រក្សាគោលជំហរគាំទ្រប្រជាធិបតេយ្យសេរី រក្សានិងបង្កើនក្តីសង្ឃឹម និងបង្កើនថាមពល ដើម្បីរួមគ្នាជំរុញឱ្យប្រជាធិបតេយ្យនៅកម្ពុជារីកដុះដាលនិងចាក់ឫសកែវកាន់តែរឹងមាំឱ្យខាងតែបាន។
ការលើកឡើងរបស់លោកព្រាប កុលធ្វើឡើងស្របពេលសហគមន៍អន្តរជាតិរកឃើញថា ស្ថានភាពសិទ្ធិមនុស្សនិងប្រជាធិបតេយ្យនៅកម្ពុជាកំពុងរកការបំផ្លិចបំផ្លាញយ៉ាងធ្ងន់ធ្ងរពិសេសការចាប់មេបក្សប្រឆាំងគឺលោកកឹម សុខាដាក់គុក រំលាយគណបក្សប្រឆាំងចោល និងហាមប្រាមមន្ត្រីជាន់ខ្ពស់គណបក្សសង្រ្គោះជាតិជាង១រយនាក់មិនឱ្យធ្វើនយោបាយ កាលពីចុងឆ្នាំ២០១៧។ លើសពីនេះ ការធ្វើទុក្ខបុកម្នេញមន្ត្រីសង្គមស៊ីវិល មន្ត្រីសហជីព បំបិទសំឡេងសារព័ត៌មានឯករាជ្យនិងការតាមកម្ចេចក្រុមបក្សប្រឆាំងនៅតាមមូលដ្ឋានជាដើម។
សហគមន៍អន្តរជាតិដែលមានសហភាពអឺរ៉ុបនិង សហរដ្ឋអាមេរិកជាអ្នកនាំមុខគេនោះ បានព្រមានដាក់ទណ្ឌកម្មសេដ្ឋកិច្ចដល់របបក្រុងភ្នំពេញជាបន្តបន្ទាប់ប្រសិនបើរបបនេះមិនព្រមស្តារលទ្ធិប្រជាធិបតេយ្យ និងការគោរពសិទ្ធិមនុស្សឡើងវិញទេ៕