29 C
Phnom Penh

មេ​ដឹកនាំ​វៀតណាម​នឹង​មក​កម្ពុជា​នៅ​ចុង​ខែ​កុម្ភៈ​ដើម្បី​ពង្រឹង​មិត្ត​ភាព​រវាង​ប្រទេស​ទាំងពីរ​

ដោយ ឌឹ ខេមបូឌា ដេលី

បទវិភាគ

ប្រធាន​រដ្ឋ​វៀតណាម​និង​ជាអគ្គ​លេខាធិការ​បក្ស​កុម្មុយ​នីស្ត​វៀតណាម​ផង​ គឺ​លោក​Nguyen PhuTrong​គ្រោង​មក​បំពេញ​ទស្សន​កិច្ច​នៅ​កម្ពុជា​រយៈ​ពេល​ពីរ​ថ្ងៃ​ ចាប់​ពី​ថ្ងៃ​ទី​២៥​ដល់​២៦ ​ខែកុម្ភៈ​​ដើម្បី​រឹត​ចំណង​ទំនាក់​ទំនង​ការទូត​រវាង​ប្រទេស​ជិត​ខាង​ទាំង​ពីរ។​

លិខិត​ដែល​ផ្ញើ​ជូន​ទៅ​គណៈ​អភិបាល​រាជធានី​ភ្នំពេញ​ចុះ​ថ្ងៃ​ទី​១៨​ខែ​កុម្ភៈ​ របស់​គណៈ​កម្មាធិការ​ជាតិ​រៀបចំ​បុណ្យ​ជាតិ ​និង​អន្ដរជាតិ​ឲ្យ​ដឹង​ថា​  អគ្គ​លេខាធិការ​បក្ស​កុម្មុយនីស្ដ​វៀតណាម​និង​ជា​ប្រធាន​​រដ្ឋ​នៃ​សាធារណ​រដ្ឋ​សង្គម​និយម​វៀតណាម​លោក​Nguyen PhuTrongនឹង​ដឹក​នាំ​គណៈ​ប្រតិភូ​វៀតណាម​មក​កម្ពុជា​រយៈ​ពេល​២​ថ្ងៃ ​ចាប់ពី​ថ្ងៃ​ទី​២៥​ដល់​ថ្ងៃ​ទី​២៦​ខែ​កុម្ភៈ​ខាង​មុខ។​

ប្រភព​ដដែល​បន្ត​ថា​ លោក​ PhuTrong​គ្រោង​ជួប​ជា​មួយ​មន្ត្រី​ជាន់​ខ្ពស់​នៃ​រដ្ឋា​ភិបាល​កម្ពុជា ​ក្នុង​គោល​បំណង​ពង្រឹង​ទំនាក់​ទំនង​និង​មិត្ត​ភាព​ រវាង​ប្រជាជន​នៃ​ប្រទេស​ទាំង​ពីរ។​

ក្នុង​ដំណើរ​ទស្សន​កិច្ច​នេះ ​ លោក​Nguyen PhuTrong​គ្រោង​ចូល​គាល់ ​ព្រះ​ករុណា​ព្រះ​បាទ​សម្តេច​ព្រះ​បរម​នាថ ​នរោត្តម ​សីហមុនី ​   ព្រះ​មហា​ក្សត្រ​កម្ពុជា ​និង​សម្តេច​ព្រះ​មហា​ក្សត្រី យានី​នរោត្តម​មុនី​នាថ​ សីហនុ​  សម្តេច​អគ្គ​មហា​សង្ឃ​រាជា​ធិបតី ​ទេព វង្ស ​សម្តេច​ព្រះ​មហា​សង្ឃ​រាជ​នៃ​គណៈ​មហានិកាយ​និង​សម្តេច​ព្រះ​អភិសិរី​សុគន្ធា​មហា​សង្ឃ​រាជា​ធិបតី ​បួរ គ្រី។​

លើស​ពី​នេះ​ទៅ​ទៀត​ លោក​នឹង​ជួប​ជា​មួយ ​លោក​ហេង សំរិន  ​ប្រធាន​សភា​លោក​សាយ ​ឈុំ​ប្រធាន​ព្រឹទ្ធសភា  ​និង ​លោក​​ហ៊ុន​ សែន ​នាយក​រដ្ឋមន្ត្រី​ដែល​នឹង​ធ្វើ​ជា​សក្សី​ក្នុង​ពិធី​​ចុះហត្ថ​លេខា​លើ​កិច្ច​ព្រម​ព្រៀង​នានា​រវាង​វៀតណាម ​និង​កម្ពុជា។​

ដំណើរ​ទស្សន​កិច្ច​ធំៗ​របស់​ថ្នាក់​ដឹកនាំ​វៀតណាម​មក​កម្ពុជា​និង​ទស្សន​កិច្ច​​របស់​ថ្នាក់​ដឹក​នាំ​របស់​កម្ពុជា​ទៅ​កាន់​ប្រទេស​វៀតណាម​នោះ​គឺ​បាន​ធ្វើ​ឡើង​ប្រមាណ​ជិត​១០​លើក​រួច​មក​ហើយ ​ចាប់តាំង​ពី​ចុង​ឆ្នាំ​២០១៨​មក។​ ក្នុង​ការ​បំពេញ​ទស្សន​កិច្ច​ជាញឹក​ញាប់​នោះ ​ថ្នាក់​ដឹកនាំ​កម្ពុជា​បាន​ប្រាប់​ទៅ​ថ្នាក់​ដឹក​នាំ​វៀតណាម​ ម្តង​ហើយ​ម្តង​ទៀត​ថា ​នៅ​កម្ពុជា​មិន​មាន​វត្តមាន​មូលដ្ឋាន​ទ័ព​បរទេស​ឡើយ​ហើយ​នៅតែ​កាន់​ជំហរ​អព្យា​ក្រឹត្យ​ផង​ដែរ។​

ការ​បំពេញ​ទស្សន​កិច្ច​ជាញឹក​ញាប់​នេះ​ទៀត​សោត​ធ្វើ​ឡើង​ក្រោយ​ពេល​កម្ពុជា​បាន​បង្ហាញ​ជំហរ​កាន់តែ​ច្បាស់​អំពី​ទំនោរ​ទៅ​រក​ប្រទេស​កុម្មុយនីស្ត​កាន់​តែ​ខ្លាំង ​និង​ក្រោយ​ពេល​កាសែត​បរទេស​ព្រម​ទាំង​អាមេរិក​ផង បាន​សម្តែង​ក្តី​បារម្ភ​ចំពោះ​លទ្ធ​ភាព​នៃ​ការ​ដាក់​មូលដ្ឋាន​ទ័ព​បរទេស​ពិសេស​មូលដ្ឋាន​ទ័ព​ចិន​ នៅ​ក្នុង​ប្រទេស​កម្ពុជា ​តាម​រយៈ​ការ​កសាង​កំពង់ផែ​ទឹក​ជ្រៅ​ដ៏​ធំ​ លើ​ទំហំ​ដី​វិនិយោគ​ជាង​៤​ម៉ឺនហិកតា​របស់​ចិន​ នៅ​ខេត្ត​កោះកុង៕​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស