មេដឹកនាំរបបក្រុងភ្នំពេញលោកហ៊ុន សែនបានប្រាប់មេដឹកនាំកុម្មុយនីស្តវៀតណាមលោកង្វៀង ហ៊្វូទ្រុង(Nguyen Phu Trong)និងជាប្រមុខរដ្ឋវៀតណាមថា កម្ពុជាទទួលបានការអភិវឌ្ឍរហូតមកដល់ពេលនេះគឺមិនអាចកាត់ផ្ដាច់បានពីកងទ័ព ប្រជាជននិងរដ្ឋាភិបាលវៀតណាមបានឡើយ។ មិនតែប៉ុណ្ណោះលោកហ៊ុន សែនក៏បានឯកភាពផងដែរថា នឹងឈរលើមូលដ្ឋានលើទំនាក់ទំនងនៃកិច្ចសហប្រតិបត្តិការកន្លងមក ដោយធ្វើយ៉ាងណាជំរុញឲ្យទំនាក់ទំនងនេះកាន់តែរីកចម្រើនបន្ថែមទៀត។
ការអះអាងរបស់លោកហ៊ុន សែនធ្វើឡើងនៅក្នុងជំនួបផ្លូវរដ្ឋរវាងលោកហ៊ុន សែនជាមួយលោកង្វៀង ហ៊្វូទ្រុងនៅវិមានសន្តិភាពកាលពីព្រឹកថ្ងៃអង្គារនេះ។
ចំណែកទំព័រហ្វេសប៊ុករបស់លោកហ៊ុន សែននៅថ្ងៃនេះឱ្យដឹងថា ភាគីមេដឹកនាំវៀតណាមក៏មិនភ្លេចឡើយក្នុងការអួតសរសើរពីស្នាដៃដឹកនាំរបស់លោកហ៊ុន សែនដែលថា កម្ពុជាបច្ចុប្បន្នមានការរីកចម្រើនខ្លាំងនិងទទួលបានជោគជ័យលើវិស័យជាច្រើនរួមមានការអភិវឌ្ឍខាងហេដ្ឋារចនាសម្ព័ន្ធសំណង់ សេដ្ឋកិច្ចមានកំណើនដល់ទៅជាង៧% ហើយស្ថានភាពនៅកម្ពុជាគឺមានស្ថិរភាពពិសេសកម្ពុជាកាន់តែមានទំនាក់ទំនងល្អ ជាមួយបណ្តាប្រទេសនានាជាលំដាប់ផងដែរ។
ការអួតសរសើរនេះហាក់ផ្ទុយគ្នាទៅនឹងការរកឃើញរបស់បណ្តាប្រទេសលោកសេរីផ្សេងទៀត ដូចជាសហភាពអឺរ៉ុប និងសហរដ្ឋអាមេរិក ដែលតែងចាត់ទុកថា ស្ថិរភាពនយោបាយនៅកម្ពុជាបច្ចុប្បន្នកំពុងស្ថិតនៅមាត់ជ្រោះ ដោយសាររបបលោកហ៊ុន សែនបានបំផ្លាញមូលដ្ឋានគ្រឹះនៃប្រជាធិបតេយ្យនិងបានរំលោភសិទ្ធិមនុស្សធ្ងន់ធ្ងរថែមទៀត។
មិនតែប៉ុណ្ណោះទំនាក់ទំនងការទូតនៅលើឆាកអន្តរជាតិក៏ត្រូវបានក្រុមអ្នកឃ្លាំមើលសង្កេតឃើញថា កម្ពុជាកំពុងបោះពួយយ៉ាងលឿនទៅរករបបកុម្មុយនីស្តចិនផ្តាច់ខ្លួនជាបណ្តើរៗចេញពីប្រទេសលោកសេរី ហើយកាន់តែធ្វើឱ្យកម្ពុជាឯកានៅលើឆាកអន្តរជាតិផងដែរ។
បណ្តាប្រទេសលោកសេរីតែងព្រមានថា ប្រសិនបើរបបនេះមិនព្រមស្តារស្ថានការណ៍ប្រជាធិបតេយ្យ និងសិទ្ធិមនុស្សនៅកម្ពុជាឡើងវិញ ទេ នោះកម្ពុជានឹងប្រឈមការដកហូតប្រព័ន្ធអនុគ្រោះពន្ធទាំងនៅអឺរ៉ុបនិងនៅសហរដ្ឋអាមេរិក ដែលធ្វើឱ្យកម្ពុជាខាតបង់ទឹកប្រាក់ជាង១ពាន់លានដុល្លារក្នុងមួយឆ្នាំៗ៕