លោកហ៊ុន សែនគំរាមចាប់ខ្លួនអតីតមន្ត្រីគណបក្សប្រឆាំង២រូបឈ្មោះរ័ត្ន សុធី ហើយម្នាក់ទៀតឈ្មោះផ្លុក សំអុនដែលហ៊ានប្រើសម្ដីមិនសមរម្យនិយាយធ្វើឲ្យប៉ះពាល់ដល់សិទ្ធិអ្នកដទៃ។
ការគំរាមរបស់បុរសខ្លាំងដែលក្រាញអំណាចជាង៣០ឆ្នាំនេះ ធ្វើឡើងក្នុងឱកាសចុះជួបសំណេះសំណាលជាមួយក្រុមកម្មករជាង១ម៉ឺននាក់នៅខេត្តពោធិ៍សាត់ កាលពីព្រឹកមិញ។
លោកហ៊ុន សែនអះអាងថា មន្រ្តីបក្សសង្គ្រោះជាតិមួយរូបនៅខេត្តបន្ទាយមានជ័យឈ្មោះរ័ត្ន សុធីបានរត់ទៅខេត្តព្រះវិហារបាត់ទៅ ហើយ។ ចំណែកមួយរូបទៀតឈ្មោះផ្លុក សំអុនក៏បានរត់ទៅកាន់ស្រុកអន្លង់វែងបាត់ទៅហើយដែរ។ លោកបន្តថា លោកជាអ្នកគ្រប់គ្រងប្រទេស ដូច្នេះលោកដឹងទាំងអស់អំពីការគ្រប់គ្រងសន្តិសុខជាតិ។ លោកបន្តថា តែផ្នែកណាមួយដឹងហើយគឺដឹងដល់នាយករដ្ឋមន្ត្រីភ្លាម។
ជាងនេះទៅទៀតលោកបានព្រមានក្រុមបក្សប្រឆាំងថា កុំធ្វើអ្វីផ្ដេសផ្ដាសក្នុងបំណងបង្កើតចលនាញុះញ៉ង់បំបែកបំបាក់សន្តិភាពជាតិ។ លោកបន្តថា លោកនឹងមិនអត់ឱនឲ្យជននោះជាដាច់ខាត៕