អ្នកវិភាគនយោបាយឯករាជ្យដែលកំពុងរស់នៅនីរទេសក្នុងប្រទេសហ្វាំងឡង់(Finland)លោកគឹម សុខាអះអាងថា មូលហេតុដែលលោកមិនអាចនៅជុំនិងគ្រប់គ្រងគ្រួសាររបស់លោកដូចសព្វថ្ងៃនេះគឺដោយសារភាពអយុត្តិធម៌និងការគាបសង្កត់មកលើរូបលោកដែលបង្កើតឡើងដោយលោកហ៊ុន សែនផ្ទាល់។
គណនីហ្វេសប៊ុករបស់លោកគឹម សុខសរសេរថា ការណ៍ដែលលោកសំរេចចិត្តបែកពីក្រុមគ្រួសារគឺដើម្បីរក្សាជីវិតរៀងៗខ្លួន ក្រោមឧបាយកលគំរាមកំហែងពីបក្ខពួករបស់លោកហ៊ុន សែន។
អ្នកវិភាគនយោបាយរូបនេះយល់ថា ការឈឺចាប់របស់ខ្លួនពេលនេះគឺដោយសារស្នាដៃអសីលធម៌របស់លោកហ៊ុន សែន។
ការលើកឡើងរបស់លោក គឹម សុខធ្វើឡើងក្រោយពេលលោកហ៊ុន សែនថ្លែងសារនយោបាយក្នុងពិធីចែកសញ្ញាប័ត្រឱ្យនិស្សិតជាង១ពាន់នៅព្រឹកនេះដោយប្រាប់ទៅអ្នកវិភាគដែលលោកមិនបាននិយាយចំឈ្មោះប៉ុន្តែគេដឹងថា សំដៅទៅលើលោកគឹម សុខថា ជាអ្នកវិភាគនយោបាយដែលគ្មានសមត្ថភាពសូម្បីតែគ្រប់គ្រងគ្រួសារតូចមួយក៏មិនកើតផងដោយត្រូវរត់ចោលស្រុកនាំយកកូនស្រីទៅជាមួយ មិនព្រមទុកឱ្យភរិយារបស់ខ្លួនចិញ្ចឹមឡើយ។
លោកហ៊ុន សែនថា អ្នកវិភាគនយោបាយធន់នេះបែរជាមកចង់ឱ្យអ្នកនយោបាយរួបរួមគ្នា ស្របពេលខ្លួនឯងបែកបាក់គ្នាជាមួយគ្រួសារនោះ។ កាលពីថ្ងៃទី១៧ខែសីហាឆ្នាំ២០១៨ អ្នកវិភាគនយោបាយដ៏ឥតសំចៃមាត់ លោកគឹម សុខត្រូវបានដោះលែងឲ្យមានសេរីភាព បន្ទាប់អនុវត្តទោសរយៈពេល១៨ខែរួចរាល់ក្រោមការចោទរបស់រដ្ឋាភិបាលពីបទ«បរិហារកេរ្តិ៍ជាសាធារណៈ និងញុះញង់ឲ្យប្រព្រឹត្តបទឧក្រិដ្ឋជាអាទិ៍»។ ការចោទប្រកាន់នេះធ្វើឡើងបន្ទាប់ពីលោក ធ្វើអត្ថាធិប្បាយដោយចោទប្រកាន់គណបក្សកាន់អំណាចថាជាអ្នកបង្កើតប្រព័ន្ធសម្លាប់មនុស្ស តែរកឃាតកមិនឃើញ។
ក្រោយចេញពីពន្ធនាគារមិនដល់ពីរសប្ដាហ៍ផង លោក គឹម សុខត្រូវបានលោក ហ៊ុន សែនព្រមានថានឹងចាប់ដាក់ពន្ធនាគារម្ដងទៀតប្រសិនបើអ្នកវិភាគនយោបាយរូបនេះមិនសងប្រាក់ចំនួន៨០០លានរៀលឲ្យទៅគណបក្សកាន់អំណាចក្នុងសំណុំរឿងដដែល។
នៅថ្ងៃទី៣០ ខែសីហា ឆ្នាំ២០១៨ ក្រោយការគំរាមរបស់លោក ហ៊ុន សែន លោកគឹម សុខក៏បាននាំកូនស្រីភៀសខ្លួនទៅកាន់ប្រទេសថៃមួយរយៈហើយលោកក៏បានភៀសខ្លួនបន្តទៅកាន់ប្រទេសហ្វាំងឡង់បន្ទាប់ពីលោក និងកូនស្រី ទទួលបានសិទ្ធិជ្រកកោនផ្នែកនយោបាយទៅរស់នៅទីនោះ៕