29 C
Phnom Penh

លោក​ហ៊ុន សែន​បញ្ជា​ឱ្យ​ថៅកែ​រោងចក្រ​W&D​ទទួល​យក​កម្មករ​ចូល​ធ្វើ​ការងារ​វិញ​

ដោយ ឌឹ ខេមបូឌា ដេលី

បទវិភាគ

លោក​ហ៊ុន សែន​បាន​ស្នើឱ្យ​ថៅកែ​រោងចក្រ​W&D​ទទួល​យក​កម្មករ​រោងចក្រ​នេះ ​ដែល​ខ្លួន​បាន​បញ្ឈប់​កាលពី​ពេល​ថ្មីៗ​នេះ​ឱ្យចូល​បម្រើ​ការងារ​ឡើង​វិញ។​

ថ្លែង​ក្នុង​ពិធី​ចែក​សញ្ញា​បត្រ​ឱ្យ​និស្សិត​នៃ​សាកល​វិទ្យាល័យ​មួយ​នៅ​រាជធានី​ភ្នំពេញ​នាព្រឹក​នេះ ​លោក​ហ៊ុន សែន​បក​ស្រាយ​ឡើង​វិញ​ថា​ កម្មករ​រោងចក្រ​ដែល​បាន​ទៅ​តវ៉ា​ក្បែរ​គេហដ្ឋាន​របស់​លោក​កាលពី​សប្តាហ៍​មុន​មិនមែន​ទាមទារ​ប្រាក់​អតីត​ភាព​ការងារ​ទៀត​ឡើយ​ប៉ុន្តែ​ជា​ការ​ទាមទារ​ឱ្យ​ថៅកែ​រោងចក្រ​ទទួល​យក​ពួក​គាត់​ជិត​១​ពាន់​នាក់​ឱ្យ​ចូល​ធ្វើ​ការ​ងារ​វិញ​ប៉ុណ្ណោះ។​

លោក​ហ៊ុន សែន​បាន​បញ្ជា​ឲ្យ​រដ្ឋ​មន្ត្រី​ក្រសួង​ការងារ​លោក​អ៊ិត សំហេង​ធ្វើការ​សម្រប​សម្រួល​ភាគី​ទាំងពីរ​ដើម្បី​ឈាន​ទៅ​បញ្ចប់​វិវាទ​ការងារ​នៅ​រោងចក្រ​មួយ​នេះ​ហើយ​ភាគី​ទាំង​ពីរ​ក៏​ត្រូវ​យោគយល់​គ្នាទៅ​វិញ​ទៅ​មក​ផង​ដែរ។​

កាល​ពី​ថ្ងៃ​ច័ន្ទ​សប្តាហ៍​មុន​ លោក​ហ៊ុន សែន​បាន​ថ្លែង​ប្រាប់​ឱ្យ​ប្រធាន​សហភាព​ការងារ​កម្ពុជា​លោក​អាត់ ធន់​ណែនាំ​ទៅ​សមាជិក​របស់​ខ្លួន​នៅ​រោងចក្រ​W&D​ដែល​កំពុង​ធ្វើ​កូដកម្ម​ទាមទារ​ប្រាក់​អតីត​ភាព​ការងារ​ឱ្យ​បញ្ឈប់​សកម្ម​ភាព​ទាមទារ​នោះ​បន្ត​ទៀត​ ដោយ​ថា​ ជារឿង​មិន​អាច​ទៅ​រួច​ និង​ជា​រឿង​ខុស​ច្បាប់។​

ក្រោយការ​ប្រកាស​នេះ ​ទាំង​កម្មករ​ទាំង​សហភាព​ការងារ​កម្ពុជា​និង​ក្រសួង​ការងារ​ផង​បាន​ចេញ​មុខ​បំភ្លឺ​ថា​ ការ​ធ្វើ​កូដកម្ម​ទាមទារ​របស់​ក្រុម​កម្មករ​មិន​ពាក់ព័ន្ធ​រឿង​ប្រាក់​អតីត​ភាព​ការងារ​ទៀត​នោះ​ទេ ​ប៉ុន្តែ​ជា​ការ​ស្នើ​ឱ្យ​ទទួល​ពួកគាត់​ជិត​១​ពាន់នាក់​ចូល​ធ្វើ​ការងារ​វិញ​ដោយ​គ្មាន​ការ​រើសអើង​ប៉ុណ្ណោះ។ ​

កាលពី​ចុង​ឆ្នាំ​២០១៨ ​កម្មករ​ជិត​២​ពាន់​នាក់​បម្រើ​ការងារ​នៅ​រោងចក្រ​W&D​បាន​ផ្ទុះ​ការ​តវ៉ា​ដើម្បី​ទាមទារ​ឲ្យ​ថៅកែ​ឲ្យ​បើក​ប្រាក់​អតីត​ភាព​ការងារ​ជូន​ពួកគេ​ជា​កញ្ចប់​មុន​ឆ្នាំ​២០១៩។ ​បញ្ហា​នេះ​ធ្វើឱ្យ​ថៅកែ​រោងចក្រ​សម្រេច​បញ្ឈប់​កម្មករ​ជាង​១​ពាន់​នាក់​ដោយសារ​មិន​គោរព​តាម​ការ​សម្រេច​រក្សា​ការ​ពារ​របស់​តុលាការ។ ​ ក្រោយ​មក​រោង​ចក្រ​នេះ​បាន​ប្រកាស​ទទួល​យក​កម្មករ​ឲ្យចូល​បម្រើ​ការងារ​វិញ​ប៉ុន្តែ​មាន​កម្មករ​ជា​ច្រើន​រយ​នាក់​ទៀត​ថៅ​កែ​មិន​ព្រម​ឱ្យ​ចូល​ធ្វើការ​ឡើយ៕​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស