29 C
Phnom Penh

កូន​ប្រុស​មេ​ប៉េអឹម​ខេត្ត​ក្រចេះ​ព្រម​ប្រគល់​ខ្លួន​ឱ្យ​សមត្ថ​កិច្ច​ក្រោយ​មាន​ការ​បញ្ជា​ពី​លោក​ហ៊ុន សែន​

ដោយ ឌឹ ខេមបូឌា ដេលី

បទវិភាគ

មន្រ្តី​អាវុធ​ហត្ថ​ស័ក្ក៤​​នៅ​បញ្ជា​ការ​កង​រាជ​អាវុធ​ហត្ថ​ខេត្ត​ក្រចេះ​និង​ជាកូន​ប្រុស​បង្កើត​របស់​មេ​បញ្ជាការ​អាវុធ​ហត្ថ​ក្នុង​ខេត្ត​នេះ​​គឺ​​លោក​សាន្ត សុខុម​បាន​យល់​ព្រម​ប្រគល់​ខ្លួន​ឱ្យ​សមត្ថ​កិច្ច​ហើយ​ នៅ​រសៀល​ថ្ងៃ​នេះ​ដើម្បី​ទទួល​ទោស​របស់​ខ្លួន​ពាក់ព័ន្ធ​ករណី​ប្រើ​ហិង្សា ​និង​ដក​កាំភ្លើង​គំរាម​យុវជន​២​នាក់​ក្នុង​ហាង​អ៊ីនធឺណេត​មួយ​កន្លែង​នៅ​ទីរួម​ខេត្ត​កំពង់ចាម។​

ការ​ព្រម​ប្រគល់​ខ្លួន​ឱ្យ​សមត្ថ​កិច្ច​នេះ ​ធ្វើ​ឡើង​ក្រោយ​ពេល​លោក​ហ៊ុន សែន​បាន​ប្រកាស​នៅ​ព្រឹក​នេះ​ឱ្យ​មន្ត្រី​កងរាជ​អាវុធ​ហត្ថ​ពាក់ស័ក្ក​៤​រូប​នោះ​ចេញ​មក​ប្រគល់​ខ្លួន​ទទួល​កំហុស​តាម​អ្វី​ដែល​ខ្លួន​បាន​ប្រព្រឹត្ត។​មេ​ដឹកនាំ​របប​ក្រុង​ភ្នំពេញ​បង្ហើប​ទៅ​មេ​ប៉េអឹម​ខេត្ត​ក្រចេះ​លោក​ឧត្តម​សេនីយ៍​ត្រី​សាន្ត ប៊ុនថា​ ដែល​ជា​ឪពុក​ជន​សង្ស័យ​ថា​ ត្រូវ​នាំ​កូន​របស់​ខ្លួន​មក​ប្រគល់​ឱ្យ​សមត្ថ​កិច្ច ​បើ​មិន​ដូច្នេះ​លោក​ហ៊ុន សែន​នឹង​ដក​តំណែង​មេ​ប៉េអឹម​រូប​នោះ​ចោល​និង​បណ្តេញ​ចេញ​ពី​ក្រប​ខណ្ឌ​មន្ត្រី​រាជការ​ថែម​ទៀត។​

មន្ត្រី​អាវុធ​ហត្ថ​ខេត្ត​ក្រចេះ​ពាក់​ស័ក្តិ​៤​លោក​សាន្ត សុខុម​កាលពី​ថ្ងៃ​ទី​១៩​ខែ​មីនា​បាន​ប្រើ​ហិង្សា​ និង​ប្រើ​ប្រាស់​កាំភ្លើង​គំរាម​យុវជន​ពីរ​នាក់​នៅ​កន្លែង​លេង​អ៊ិនធឺណេត​មួយ​កន្លែង​ក្នុង​ក្រុង​កំពង់ចាម។ ​

កាលពី​ថ្ងៃ​ម្សិលមិញ​ តំណាង​អយ្យការ​អម​សាលាដំបូង​ខេត្ត​កំពង់ចាម​លោក​ហាក់ ហ៊ន់​បាន​ចេញ​ដីកា​ឲ្យ​កូន​ប្រុស​មេ​បញ្ជាការ​អាវុធ​ហត្ថ​ខេត្ត​ក្រចេះ​ឈ្មោះ​សាន្ត សុខុម​ចូលខ្លួន​បំភ្លឺ​នៅ​តុលាការ​ឲ្យ​បាន​មុន​ថ្ងៃ​ទី​២៦​ខែ​មេសា​ពាក់ព័ន្ធ​សំណុំ​រឿង​ហិង្សា​ដោយ​ចេតនា​មាន​ស្ថាន​ទម្ងន់​ទោស​ដោយ​គំរាម​កំហែង​នឹង​អាវុធ។  ​

ក្រៅ​ពី​ករណី ​មន្ត្រី​កង​រាជ​អាវុធ​ហត្ថ​នៅ​ខេត្ត​ក្រចេះ​នេះ​ លោក​ហ៊ុន សែន​ក៏​បាន​បញ្ជា​ឱ្យ​មន្ត្រី​សមត្ថ​កិច្ច​ពីរ​នាក់​នៅ​ខេត្ត​ព្រៃវែង​ចេញ​មក​បង្ហាញ​ខ្លួន​និង​បញ្ជា​ឱ្យ​សមត្ថ​កិច្ច​តាម​ចាប់​ខ្លួន​មន្ត្រី​ទាំង​នោះ​ពាក់​ព័ន្ធ​ករណី​បាញ់​ប្រហារ​បុរស​ជិះ​រថយន្ត​ម្នាក់​ឈ្មោះ​យ៉ន រ៉ាវុធ​កាលពី​យប់​ថ្ងៃ​ទី​២៣​មីនា ​បណ្តាល​បុរស​នោះ​ស្លាប់​ភ្លាមៗ​នៅនឹង​កន្លែង​តែម្តង​ ដោយ​គ្រាន់តែ​សមត្ថ​កិច្ច​សង្ស័យ​ថា​ បុរស​រូប​នោះ​ជា​ចោរ។​

ទំព័រ​ហ្វេសប៊ុក​របស់​រដ្ឋមន្ត្រី​ក្រសួង​មហា​ផ្ទៃ ​លោក​ស ខេង​បាន​លើក​ឡើង​ពី​ការ​សោក​ស្តាយ ​និង​ចូល​រួម​ចែក​រំលែក​ទុក្ខ​ដ៏ក្រៀម​ក្រំ​បំផុត​នេះ ​ក្រោយ​ពេល​លោក​ទទួល​បាន​ព័ត៌មាន​មក​ថា ​លោក​យ៉ន រ៉ាវុធ​បាន​ទទួល​មរណភាព​ក្នុង​ហេតុ​ការណ៍​ផ្ទុះ​អាវុធ​ កាលពី​យប់​ថ្ងៃ​ទី​២៣​ខែ​មីនា​នៅ​ចំណុច​ភូមិគោក​សណ្ដែក​ឃុំ​រក្ស​ជ័យ​ ស្រុក​បាភ្នំ ​ខេត្ត​ព្រៃវែង។​

លោក​ស ខេង​បាន​សច្ចា​ថា​ ក្នុង​នាម​ក្រសួង​មហា​ផ្ទៃ​លោក​សន្យា​ថា​ នឹង​ស្វែង​រក​យុត្តិ​ធម៌​ជូន​គ្រួសារ​សព​ ក៏​ដូច​ជា​ក្រុម​គ្រួសារ​ដែល​មាន​ការ​ពាក់​ព័ន្ធ​និង​ជូន​សង្គម​ជាតិ​យើង​ទាំង​មូល៕​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស