29 C
Phnom Penh

សកម្ម​ជន​បរិស្ថាន​ព្រួយ​បារម្ភ​ចំពោះ​ការ​វិនិយោគ​វារី អគ្គិសនី​នៅ​កម្ពុជា​បន្ថែម​ទៀត

ដោយ ឌឹ ខេមបូឌា ដេលី

បទវិភាគ

សកម្ម​ជន​បរិស្ថាន​សម្តែង​ក្តី​បារម្ភ​ថា​​ការ​វិនិយោគ​វារី​អគ្គិសនី​បន្ថែម​ទៀត​ដើម្បី​យក​ថាមពល​មក​ផ្គត់ផ្គង់​តម្រូវ​ការ​ក្នុង​ស្រុក​នឹង​ធ្វើ​ឱ្យ​ប៉ះពាល់​ដល់​បរិស្ថាន​ជាពិសេស​ការ​បំផ្លិច​បំផ្លាញ​ធនធាន​ធម្មជាតិ​អំពើ​ពុករលួយ​ និង​ការ​រំលោភ​សិទ្ធិ​មនុស្ស​ជាដើម។​

ស្ថាបនិក​អង្គការ​មាតា​ធម្មជាតិ​លោក​​Alejandro Gonzalez Davidson​ បាន​ប្រាប់​The Cambodia Daily​ថា ​លោក​មិន​គាំទ្រ​ចំពោះ​គម្រោង​វិនិយោគ​ទំនប់​វារី​អគ្គិសនី​បន្ថែម​ទៀត​នោះ​ឡើយ។​

លោក​បន្ថែម​ថា ​គម្រោង​កសាង​តំបន់​ទំនប់​វារី​អគ្គិសនី​នៅ​ស្រុក​សំបូរ​ ខេត្ត​ក្រចេះ ​និង​នៅ​ខេត្ត​ស្ទឹងត្រែង​នឹង​បង្ក​ផល​ប៉ះពាល់​ធ្ងន់ធ្ងរ​ដល់​បរិស្ថាន​និង​ជីវិត​មនុស្ស។​ សកម្ម​ជន​បរិស្ថាន​រូប​នេះ​អះអាង​រដ្ឋាភិបាល​ក្រុង​ភ្នំពេញ​ក៏​បាន​សារ​ភាព​ហើយ​ថា​ ទំនប់​វារី​អគ្គិសនី​នឹង​មិន​អាច​ផ្តល់​ថាមពល​បាន​ពេញលេញ​ឡើយ​នៅ​ក្នុង​រដូវ​ប្រាំង ​ដោយ​មិន​មាន​ទឹក​គ្រប់​គ្រាន់​ប្រើ​ប្រាស់។​ ​

កាលពី​ថ្ងៃ​១៨​មីនា ​អគ្គិសនី​កម្ពុជា​បាន​ចេញ​សេចក្តី​ប្រកាស​ព័ត៌មាន​មួយ​ថា​ កត្តា​ដែល​ធ្វើឱ្យ​ខ្វះ​ភ្លើង​អគ្គិសនី​ដោយ​សារ​តែ​កំណើន​វិនិយោគ​ទុន​ក្នុង​និង​ក្រៅស្រុក​ និង​ការ​បញ្ចុះ​តម្លៃ​អគ្គិសនី​កាលពី​ខែ​មករា។​ ម្យ៉ាង​ទៀត​អាកាស​ធាតុ​ក្តៅ​ខ្លាំង​និង​កង្វះ​ទឹក​ខុស​ប្រក្រតី​ធ្វើ​ឱ្យ​តំបន់​   វារី​អគ្គិសនី​មួយ​ចំនួន​ផ្គត់ផ្គង់​ថាមពល​អគ្គិសនី​មិន​បាន​ពេញលេញ។​

ជា​ដំណោះ​ស្រាយ​អគ្គិសនី​កម្ពុជា​បាន​ស្នើ​ឲ្យ​រដ្ឋាភិបាល​ទិញ​អគ្គិសនី​បន្ថែម​ទៀត​ពី​ប្រទេស​ថៃ​និង​ឡាវ​ហើយ​ស្នើ​ឱ្យ​វៀតណាម​នៅ​តែ​រក្សា​ការ​ផ្គត់ផ្គង់​អគ្គិសនី​មក​កម្ពុជា​ដដែល ​ប៉ុន្តែ​កម្ពុជា​នៅ​តែខ្វះ​ថាមពល​អគ្គិសនី​ប្រមាណ​១៣%​បន្ថែម​ទៀត។​

ប្រភព​ដដែល​អះអាង​ថា ​ក្នុង​ទិស​ដៅ​អភិវឌ្ឍន៍​វិស័យ​អគ្គិសនី​ដល់​ឆ្នាំ​២០៣០​ កម្ពុជា​បាន​រៀបចំ​ផែនការ​មួយ​ចំនួន​ដូចជា​ការ​បង្កើត​តំបន់​វារី​អគ្គិសនី​បង្កើត​រោងចក្រ​អគ្គិសនី​ដើរ​ដោយ​ធ្យូង​ថ្ម ​និង​ប្រភព​ផ្សេង​ទៀត។​

លោក​អាឡិច​យល់​ថា​ ការ​បង្កើត​រោង​ចក្រ​អគ្គិសនី​ដើរ​ដោយ​ធ្យូង​ថ្ម​មាន​ប្រយោជន៍​ក្នុង​ការ​ផ្តល់​អគ្គិសនី​ច្រើន​ក៏ពិត​មែន​ ប៉ុន្តែ​វា​បណ្តាល​ឱ្យ​ប៉ះពាល់​ធ្ងន់ធ្ងរ​ដល់​បរិស្ថាន​ក្នុង​តំបន់​និង​សលក​លោក។​

លោក​ថា​ ដើម្បី​ដោះ​ស្រាយ​បញ្ហា​ភ្លើង​អគ្គិសនី​ជា​លក្ខណៈ​យូរ​អង្វែង​នោះ​កម្ពុជា​គួរតែ​វិនិយោគ​ប្រព័ន្ធ​ផលិត​អគ្គិសនី​យក​ពី​ថាមពល​ពន្លឺ​ព្រះ​អាទិត្យ​ឬ​ហៅថា​ ប្រព័ន្ធ​សូឡា ​ដ្បិត​កម្ពុជា​ជា​ប្រទេស​មួយ​ក្តៅ​អាច​ប្រើ​ប្រាស់​ពន្លឺ​ព្រះ​អាទិត្យ​សម្រាប់​ផលិត​ជា​ថាមពល​ប្រើប្រាស់​បាន​ច្រើន។ ​បន្ថែម​ពី​នេះ ​ពល​រដ្ឋ​ក៏​អាច​ចូល​រួម​ចំណែក​ជា​លក្ខណៈ​គ្រួសារ​ ដោយ​សហការ​ជា​មួយ​រដ្ឋ​ផង​ដែរ៕​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស