28 C
Phnom Penh

តុលាការ​ក្រុង​ភ្នំពេញ​នឹងសម្រេច​សេចក្តី​លើ​សំណុំ​រឿង​ក្រុម​គ្រូ​បង្រៀន​ប្តឹង​ក្រសួង​អប់រំ​នៅ​៣​សប្តាហ៍​ក្រោយ​​

ដោយ ឌឹ ខេមបូឌា ដេលី

បទវិភាគ

គ្រូ​បង្រៀន​និង​បុគ្គលិក​ក្រសួង​អប់រំ​ជិត​១០​នាក់​ក្នុង​ចំណោម​គ្រូ​បង្រៀន​ចំនួន​១១​នាក់​បាន​ដាក់​ពាក្យ​ប្តឹង​ក្រសួង​អប់រំ​ករណី​លុប​ឈ្មោះ​ពួក​គេ​ចេញ​ពី​ក្រប​ខណ្ឌ​ក្រសួង​បាន​បញ្ជាក់​ថា ​តុលាការ​ក្រុង​ភ្នំពេញ​នឹង​សម្រេច​ថា​ តើ​ចាត់​វិធាន​ការ​បែបណា​លើ​សំណុំ​រឿង​នេះ​បន្ត​ទៀត​នៅ​៣​សប្តាហ៍​ក្រោយ។​

ការ​អះអាង​នេះ​ធ្វើឡើង​ក្រោយ​ពេល​ក្រុម​គ្រូ​បង្រៀន​និង​ បុគ្គលិក​ក្រសួង​អប់រំ​ជិត​១០​នាក់​ដឹក​នាំ​ដោយ ​អតីត​សមាជិក​គ.ជ.ប.​​លោក​រ៉ុង ឈុន​ដែល​ជា​ដើម​បណ្តឹង​និង​ក្រុម​តំណាង​ក្រសួង​អប់រំ​ដែល​ជា​ចុង​បណ្តឹង​បាន​ចូល​ឆ្លើយ​បំភ្លឹ​នៅ​សាលាដំបូង​រាជធានី​ភ្នំពេញ​នៅ​ព្រឹក​នេះ។​

ថ្លែង​ប្រាប់​អ្នក​សារ​ព័ត៌មាន​ក្រោយ​ចេញ​ពី​តុលាការ​នៅ​ព្រឹក​នេះ​អតីត​សមាជិក​គ.ជ.ប.​ និង​ជា​អតីត​បុគ្គលិក​របស់​ក្រសួង​អប់រំ​លោក​រ៉ុង ឈុន​សង្ឃឹម​ថា ​ក្រុម​របស់​លោក​នឹង​ទទួល​បាន​យុត្តិធម៌​ប្រសិន​បើ​តុលាការ​ឈរ​នៅ​លើ​គោល​ការណ៍​ឯករាជ្យ ​និង​វិជ្ជា​ជីវៈ​ដោយ​មិន​រង​សម្ពាធ​នយោបាយ​នោះ​ទេ។​

លោក​រ៉ុង ឈុន​នៅតែ​អះអាង​ថា​ ករណី​ក្រសួង​អប់រំ​លុប​ឈ្មោះ​ពួក​គាត់​ជាង​១០​នាក់​កាលពី​ដើម​ឆ្នាំ​២០១៨​គឺ​ជា​រឿង​នយោបាយ​ពីព្រោះ​ពួក​គាត់​សុទ្ធ​តែ​ជា​អតីត​មន្ត្រី​ក្រុម​ប្រឹក្សា​ស្រុក​ ក្រុង​ ខេត្ត​ព្រម​ទាំង​ជា​អតីត​មន្ត្រី​សមាជិក​គណៈ​កម្មាធិការ​ជាតិ​រៀបចំ​ការ​បោះ​ឆ្នោត​ពី​កូតា​គណ​បក្ស​សង្រ្គោះ​ជាតិ។​ លោក​បន្ត​ថា​ ការ​លុប​ឈ្មោះ​ពួក​គាត់​ចេញ​ពី​ក្រប​ខណ្ឌ​ក្រសួង​គឺជា​រឿង​បំពាន​ច្បាប់ ​និង​ជា​រឿង​អ​យុត្តិធម៌។​ ​

អតីត​គ្រូ​បង្រៀន​នៅ​សាលា​គរុកោសល្យ​និង​ វិក្រឹត្យ​ការ​ខេត្ត​ព្រះ​សីហនុ​និង​ជា​អតីត​សមាជិក​ក្រុម​ប្រឹក្សា​ក្រុង​ព្រះ​សីហនុ​មក​ពី​គណបក្ស​សង្គ្រោះ​ជាតិ​អ្នកស្រី​វង រុន្នី​បញ្ជាក់​ថា ​ប្រសិន​បើ​សំណុំ​រឿង​នេះ​តុលាការ​មិន​បាន​ផ្តល់​យុត្តិធម៌​ជូន​ពួក​គាត់​ទេ ​ នោះ​សាធារណ​ជន​នឹង​មើល​ឃើញ​កាន់តែ​ច្បាស់​អំពី​ប្រព័ន្ធ​យុត្តិ​ធម៌​នៅ​កម្ពុជា។  ​អ្នកស្រី​បន្ត​ថាការ​លុប​ឈ្មោះ​ពួក​គាត់​ចេញ​ពី​ក្រប​ខណ្ឌ​ក្រសួង​អប់រំ​គឺ​រំលោភ​ទៅ​នឹង​ច្បាប់​សហ​លក្ខន្តិកៈ​មន្ត្រី​រាជ​ការ​ទាំង​ស្រុង។​

កំណត់​ហេតុ​របស់​តុលាការ​នៅ​ថ្ងៃ​នេះ​បញ្ជាក់​ថា ​ភាគី​ចុង​បណ្តឹង​ដែល​មាន​តំណាង​រដ្ឋ​មន្ត្រី​ក្រសួង​អប់រំ​ពីរ​នាក់​និង​មេធាវី​ម្នាក់​ បាន​លើក​ឡើង​ថា​ ការ​សម្រេច​លុប​ឈ្មោះ​ក្រុម​គ្រូ​បង្រៀន​ទាំង​នោះ​ជា​ការ​អនុវត្ត​តាម​ច្បាប់​ត្រឹមត្រូវ​ដោយ​សំអាង​លើ​ហេតុផល​ និង​នីតិវិធី​មួយ​ចំនួន។​

បន្ថែម​ពី​នេះ ​ក្រសួង​ក៏​បាន​បញ្ជាក់​ថា​ ការ​ដាក់​លិខិត​អន្តរាគមន៍​និង​ពាក្យ​បណ្តឹង​របស់​ក្រុម​គ្រូ​បង្រៀន​ទាំង​នោះ​ជារឿង​មិន​ត្រឹមត្រូវ ហើយ​ក៏​ច្រាន​ចោល​ការ​លើក​ឡើង​របស់​ក្រុម​គ្រូ​បង្រៀន​ទាំង​នោះ​ផង​ដែរ​ ដោយ​ស្នើ​ឱ្យ​ចៅ​ក្រម​ទម្លាក់​ចោល​ពាក្យ​បណ្តឹង​របស់​ដើម​ចោទ​ទាំង​ស្រុង​ទៀត​ផង។​

កាល​ពី​ដើម​ឆ្នាំ​២០១៨​រដ្ឋ​មន្ត្រី​ក្រសួង​អប់​រំ​ យុវជន ​និង​កីឡា​លោក​ហង់ ជួនណារ៉ុន​បាន​សម្រេច​លុប​ឈ្មោះ​គ្រូ​បង្រៀន​ និង​បុគ្គលិក​អប់រំ​ចំនួន​១៣​នាក់​ ដែល​ជា​អតីត​មន្ត្រី​ជាប់​ឆ្នោត ​និង​មន្ត្រី ​គ.ជ.ប.​ កូតា ​មក​ពី​បក្ស​ប្រឆាំង ​ ចេញ​ពី​ក្របខ័ណ្ឌ​ក្រសួង​អប់រំ ​ក្រោម​ហេតុផល​ថា​គ្រូ​បង្រៀន​ទាំង​នោះ​អវត្ត​មាន​ពី​ការងារ​ដោយ​គ្មាន​ច្បាប់​អនុញ្ញាត។​

ក្រោយ​ការ​លុប​ឈ្មោះ​ចេញ​ពី​ក្រប​ខណ្ឌ​មន្ត្រី​រាជការ​ ក្រុម​គ្រូ​បង្រៀន​ចំនួន​១១​នាក់ ​ក្នុង​ចំណោម​១៣​ នាក់ ​បាន​ដាក់​លិខិត​អន្តរាគមន៍​ជា​ច្រើន​ទៅ​ក្រសួង​អប់រំ​ ទៅ​លោក​នាយក​រដ្ឋមន្ត្រី ​និង​ទៅ​សហគមន៍​អន្តរជាតិ​ ហើយ​ចុង​ក្រោយ​ពួក​គេ​សម្រេច​ដាក់​ពាក្យ​ប្ដឹង​រដ្ឋមន្ត្រី​ក្រសួង​អប់រំ ​លោក​ហង់ ជួនណារ៉ុន​ទៅ​សាលា​ដំបូង​រាជធានី​ភ្នំពេញ ​ដោយ​ស្នើ​ឱ្យ​តុលាការ​បដិសេធ​សេចក្ដី​ប្រកាស​របស់​ក្រសួង​អប់រំ​ និង​​ផ្ដល់​ក្រប​ខណ្ឌ​ជា​គ្រូ​បង្រៀន​ដល់​ពួក​គេ​វិញ៕ ​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស