មេដឹកនាំរដ្ឋាភិបាល លោកហ៊ុន សែនបានបញ្ជាក់ជាថ្មីទៀត ថា រដ្ឋាភិបាលរបស់លោកបានត្រៀមលក្ខណៈពង្រឹងផ្ទៃក្នុងគ្រប់គ្រាន់ជាពិសេសយុទ្ធនាការពង្រឹងសេដ្ឋកិច្ចខ្លួនឯងឲ្យខ្លាំងដោយមិនអោនក្បាលចំពោះការទាមទាររបស់អន្តរជាតិនោះឡើយ។
ថ្លែងក្នុងពិធីចែកសញ្ញាបត្រជូននិស្សិតនៅសាកលវិទ្យាមួយក្នុងក្រុងភ្នំពេញនៅថ្ងៃនេះ លោកហ៊ុន សែនបានលើកឡើងពីការធ្វើកំណែទម្រង់ផ្ទៃក្នុងរបស់ខ្លួនដោយកំណែទម្រង់ធ្វើឱ្យសេដ្ឋកិច្ចខ្លួនឯងកាន់តែខ្លាំងនិងក្លាយជាប្រទេសមានការអភិវឌ្ឍពិតប្រាកដ ទោះបីជាមាន ឬមិនមានការដាក់ទណ្ឌកម្មសេដ្ឋកិច្ចពីសហភាពអឺរ៉ុបនិងសហរដ្ឋអាមេរិក ក៏ដោយ។
លោកហ៊ុន សែនក៏បានលើកឡើងទៀតថា លោកនឹងមិនធ្វើតាមកង្វល់នានារបស់អន្តរជាតិ ឡើយដ្បិតវាមិនមែនជាបន្ទាត់ច្បាប់ដែលត្រូវយកមកអនុវត្តនៅកម្ពុជា។ លោកបង្ហើបថា លោកមានបំណងចង់លុបចោលថ្ងៃឈប់សម្រាកប្រចាំឆ្នាំនៅក្នុងកម្ពុជាដោយបង្រួញឱ្យនៅតិចថ្ងៃដោយសារកម្ពុជាមានថ្ងៃឈប់សម្រាកច្រើនហួសហេតុច្រើនជាងប្រទេសអ្នកមានទៅទៀតដែលធ្វើឱ្យអ្នកវិនិយោគទុននៅកម្ពុជាមានការខាតបង់។
ក្រោយមកសហភាពអឺរ៉ុបនិងសហរដ្ឋអាមេរិកព្រមានដកប្រព័ន្ធអនុគ្រោះពន្ធEBAនិងGSPប្រសិនបើរដ្ឋបាលលោកហ៊ុន សែនមិនព្រមស្តារស្ថានការណ៍នយោបាយនិងបញ្ហាសិទ្ធិមនុស្សនៅកម្ពុជាឡើងវិញទេ។ រដ្ឋាភិបាលបានក៏ចាប់ផ្តើមយុទ្ធនាការពង្រឹងឯករាជ្យសេដ្ឋកិច្ចរបស់ខ្លួននិងធ្វើកំណែទម្រង់ដើម្បីសម្រួលដល់វិស័យឯកជនជាបន្តបន្ទាប់។
វិធានការកំណែទម្រង់ដល់វិស័យឯកជន មានដូចជាការមិនយកពន្ធលើប្រាក់ចំណេញចំពោះសហគ្រាសកសិកម្មរយៈពេល៥ឆ្នាំ។ វិធានការដកកាំកុងត្រូលចេញពីព្រំដែន ការលុបចោលស្ថាប័ននាវាចរកាំសាប និងការលុបចោលការិយាល័យក្រសួងនៅថ្នាក់ស្រុកមួយចំនួន ព្រមទាំងការបង្កើតក្រុមការងារជាដៃគូពិភាក្សាជាមួយវិស័យឯកជនជាដើម។
ប៉ុន្តែអ្នកឃ្លាំមើលសង្គមបារម្ភចំពោះដំណើរការឈានទៅដកប្រព័ន្ធអនុគ្រោះពន្ធEBAនិងGSPពីកម្ពុជាទាំងស្រុងនៅពេលខាងមុខ ដែលនឹងអាចធ្វើឲ្យកម្ពុជាខាតបង់ទឹកប្រាក់ជាង១ពាន់លានដុល្លារសហរដ្ឋអាមេរិកក្នុងមួយឆ្នាំៗ ហើយអាចនឹងប៉ះពាល់ធ្ងន់ធ្ងរដល់វិស័យការងារនៅកម្ពុជាជាពិសេសពលរដ្ឋខ្មែររាប់សែននាក់នឹងប្រឈមការបាត់បង់ការងារធ្វើ៕